දේව පූජාවට ගැළපෙන්න, හරියටම පූජා වට්ටියක් හදන හැටි

බොහෝ බැතිමතුන් විසින් දෙවියන්ට බාර වී එම ප්‍රාර්ථනාවන් සම්පූර්ණ වූ පසු දෙවියන්ට පොරොන්දු වූ ආකාරයෙන් පූජාවන් ලබා දීමට යෑමේදී බොහෝ දෙනකුට ඇතිවන ගැටලුවක් වන්නේ දේව පූජාවකට සුදුසු ආකාරයෙන් අංගසම්පූර්ණව නිවැරදිව පූජා වට්ටියක් සකසා ගන්නෙ කොහොමද? යන්න. එසේ ගැටලු ඇති අයගේ දැනගැනීම පිණිස අද ඒ සම්බන්ධව දැනුවත් කරන්නට මම කල්පනා කළෙමි.

මුලින්ම අපි පූජා වට්ටියකට අවශ්‍ය පූජා ද්‍රව්‍ය මොනවාද දැනගනිමු.

• බුලත්
• හොඳින් ඉදී සුවඳ විහිදෙන පලතුරු
• නැවුම් කැවිලි වර්ග
• විලඳ මීපැණි
• මුඩ්ඩ සහිතව සුද්ද කළ පොල් ගෙඩියක්
• තැඹිලි ගෙඩියක්
• මල් මාලයක්
• හඳුන්කූරු
• කපුරු
• රෝස වතුර
• එළඟිතෙල් හෝ පොල්තෙල් පහනක්
• විසිතුරු සළුවක්
• සාම්බ්‍රානි කට්ටකුමන්ජල්
• පඬුරක්
• පූජා තැටියක් හෝ වට්ටියක්

01. පුජා වට්ටිය

පූජාව සැකසීම සඳහා පළල් හා හොඳින් විවෘත ගැඹුරින් අඩු වූ පූජා තැටියක් හෝ වට්ටියක් තෝරා ගැනීම සුදුසුය. එය හොඳින් පිරිසුදු කර පිසදා ගත යුතුය.

02. බුලත්

පූජා වට්ටිය සැකසීම සඳහා පූජා වට්ටියේ මුලින්ම අසුරනු ලබන්නේ බුලත් කොළය. මේ සඳහා බුලත් කොළ 07ක්, 21ක්, 108ක් යන ආකාරයෙන් යොදාගනු ලබයි. බුලත් කොළ 07ක් පාවිච්චි කරනු ලබන්නේ කුඩා ප්‍රමාණයේ වට්ටියක පලතුරු පමණක්ම පූජා කරන අවස්ථාවකදීය. සාමාන්‍යයෙන් අපි දෙවියන්ට බාරයක් සිදු කොට බාරය ඉෂ්ට වූ පසු බාරය ඔප්පු කිරීමක් වශයෙන් පූජා වට්ටියක් දෙනු ලබයි. නමුත් ඇතැම් පුද්ගලයන් දෙවියන්ට බාරයක් ගැටගසන අවස්ථාවේද යම්කිසි පූජාවක් දෙවියන්ට සිදු කරනු ලබයි.

එවැනි අවස්ථාවක් සඳහා මේ ආකාරයෙන් කුඩා ප්‍රමාණයේ පලතුරු වට්ටියක් යොදා ගැනීම සුදුසුය. අනෙකුත් සෑම අවස්ථාවකදීම පලතුරු වට්ටිය සඳහා බුලත් කොළ විසි එකක් යොදා ගැනීම සම්මත හා සුදුසුම ක්‍රමයයි. මීට අමතරව විශේෂ කාරණාවන් සඳහා බාරහාර වී එම බාර ඔප්පු කිරීමේදී විශාල ප්‍රමාණයෙන් පූජා වට්ටි සකසා පූජා කරන අවස්ථාවන්හිදී පූජා වට්ටියේ ඇතිරීම සඳහා බුලත් කොළ 108ක ප්‍රමාණයක් පාවිච්චි කරනු ලැබේ.

පූජා වට්ටියේ ඇතිරීම සඳහා බුලත් කොළවලට අමතරව කෙසෙල් කොළද හින්දු භක්තිකයන් විසින් යොදාගනු ලබයි. විශේෂයෙන්ම ගණ දෙවියන් වෙනුවෙන් සිදුකරන පූජාවන්වලදී මෙසේ කෙසෙල් කොළ භාවිත කිරීම ඉතා යහපත්ය. ඇතැම් පුද්ගලයන් බුලත් කොළ වෙනුවට ඇතැම් අවස්ථාවලදී මහා කාලි පූජාවලදී පූජා වට්ටියේ කොහොඹ කොළද, මහා ලක්ෂ්මි පූජාවන්වලදී බෙලි කොළ, නෙළුම් කොළ අතුරා ගැනීමද සිදු කරනු ලබන බව දක්නට ලැබේ.

03. පලතුරු

දේව පූජාව සඳහා යොදාගන්නා පූජා ද්‍රව්‍ය අතර ප්‍රධානම පූජා ද්‍රව්‍යයන් වන්නේ පලතුරුයි. මෙහිදී පූජාවක් සඳහා පලතුරු තෝරා ගැනීමේදී එම පලතුරුවල ගුණාත්මකභාවය නැවුම්හාවය, වර්ණවත් පෙනුම හා සුවඳ පිළිබඳ අප ඉතා සැලකිලිමත් විය යුතුමය. ඒ වගේම පූජාවකට පලතුරු තෝරා ගැනීමේදී සෙත් පූජාවකට සුදුසු පලතුරු වෙනමද වස් පූජාවකට සුදුසු පලතුරු වෙනමද වෙන්කර අවබෝධයෙන් තෝරා ගත යුතුය. (සෙත් පූජාවන් යනු තමන්ගේ දියුණුවට, තමන්ගේ යහපතට ශුභසිද්ධිය ප්‍රර්ථනා කරමින් සෙත්ශාන්තිය වෙනුවෙන් සිදු කරනා පූජාවන්ය. වස් පූජාවන් යනු සිදු වූ අසාධාරණයකට විරුද්ධව දඬුවම් ඉල්ලා, පලි ගසා හෝ අවලාද වෙනුවෙන් සිදු කරනා පූජාවන්ය.)

සෙත් පූජාවන් සඳහා යොදා ගන්නා පලතුරු වර්ග.

ඇඹුල් කෙසෙල්, රත් කෙසෙල්, කෝලිකුට්ටු අඹ, පේර, උක්දඬු, ‍ෙදාඩම්, පැණි ‍ෙදාඩම්, වැල්‍ෙදාඩම්, ඇපල්, මිදී, ලාවුලු, මොර, වීර, පලු, අනෝදා, දිවුල්, දෙළුම්

වස් පූජාවන් සඳහා යොදා ගන්නා පලතුරු වර්ග

ඇටිකෙසෙල්, රත් කෙසෙල්, ඉදුණු අළු කෙසෙල්, යකි නාරං, ඇඹුල් ‍ෙදාඩම්, රඹුටන් කාමරංගා, කටු ආත්තා, අන්නාසි, පුහුල්, සීනි කැකිරි, ලොවි, උගුරැස්ස, පැණි කොමඩු, සියඹලා කරල්, ජමනාරන්.

ගුප්ත ශාස්ත්‍රය තුළ තවත් තැනක ගස් උඩ සෑදෙන පල සෙත් පූජාවන් සඳහාත්, බිම හා වැල්වල හැදෙන පල වස් පූජාවන් සඳහා යොදා ගැනෙනා බවට සඳහන් වේ.

04. කැවිලි

පූජාවකට පලතුරු මෙන්ම කැවිලි යොදා ගැනීමත් ඉතා වැදගත් අංගයකි. මෙහිදී කැවිලි තෝරා ගැනීමේදී ඉතා පිරිසුදුව සාදාගත් අලුත් රසවත් කැවිලි වීම ඉතා වැදගත්ය. මේ අතරින් තෙලින් බදින ලද කැවිලි වඩා විශේෂ වේ. පූජාවකට සුදුසු කැවිලි වර්ග මෙසේය.

කොණ්ඩ කැවුම්, කොකිස්, අග්ගලා, අතිරස, මුංගුලි, ආස්මී, නාරන් කැවුම්, මෝදක, ලඩ්ඩු, තල කැරලි, රුලං, කළු ‍ෙදා‍ෙදාල්, මස්කට්, පුහුල්‍ෙදා්සි, බූන්දි, අළුවා, පොල්ටොෆි, සූකිරි, මුරුක්කු යොදා ගැනීම සුදුසු වේ.

පූජා වට්ටිය පිළියෙල කරගන්නා ආකාරය.

පූජා වට්ටිය පිළියෙල කර ගැනීමට පෙර ඔබගේ දෑත්, පූජා වට්ටිය හා පූජාව සඳහා යොදා ගන්නා බුලත්, පලතුරු, පොල්, තැඹිලි වැනි දේ හොඳින් කහ මිශ්‍ර ජලයෙන් පිරිසුදු වන සේ සෝදා ගන්න.

දෙවැනුව පූජා වට්ටියේ පතුලේ බුලත් කොළ අවශ්‍ය ප්‍රමාණයට ගෙන බුලත් කොළයේ උල් කොටස වට්ටියේ පිටතට සිටින සේ නෙළුම් මලක ආකාරයට සකසා ගන්න.

පූජාවට තබන පොල් ගෙඩියෙන් ගණ දෙවියන් හා ශිව දෙවියන් නියෝජනය කරනා නිසා පොල් ගෙඩිය හා තැඹිලි ගෙඩිය පූජා වට්ටියේ හරි මැදින් තබා ගත යුතුය.

ඔබ ගෙඩි පූජාවක් තැබීමට බාර වී ඇති නම්, ඔබ පූජාවට ගත් සෑම පලතුරකම ඉහළින් කුඩා කොටසක් කපා ඉවත් කර පූජා වට්ටියේ මැද ඇති පොල් ගෙඩිය වටා, වටේට පලතුරු අතුරා ගන්න. කෙසෙල් ඇවරිය තැබීමේදී ඇස් කොටස කපා ඉවත් කළ යුතුය.

පසුව කැවිලි ටික පලතුරු මතින් පූජා වට්ටියේ අතුරා ගන්න. බූන්දි, පුහුල්‍ෙදා්සි වගේ ඉක්මනින් පෙඟෙනා ද්‍රව්‍ය බුලත් කොළයකින් ගොටුවක් සාදා ඒ තුළ දමා පූජා වට්ටියේ තබන්න. විලඳ ද ඒ ආකාරයෙන්ම සාදාගත් ගොටුවක දමා එයට උඩින් මී පැණි ටිකක් දමා පූජා වට්ටියේ තබන්න.

පූජාවට ගන්නා සළුව දිලිසෙන වර්ණවත් අවම යාරයක පමණ ප්‍රමාණයක එකක් විය යුතුය. සළුවේ වර්ණයද ඔබ පූජාව සිදු කරන දේවතාවුන්ගේ ප්‍රිය වර්ණයෙන් තෝරා ගත යුතුය. එම සළුව පිළිවෙළකට කුඩාවට නවා පූජා වට්ටියේ පැත්තකින් පලතුරු මත තබන්න.

මල් මාලයද ඉහත කී ආකාරයෙන්ම දෙවියන්ට ප්‍රිය අදාළ වර්ණයේ මල්දමක්ම විය යුතුය. නැතිනම් හොඳින් සුවඳ විහිදෙන ගැටපිච්ච, සමන්පිච්ච, රෝස, දාස්පෙතියා, සේපාලිකා, අරලිය වැනි මලින් ගෙතූ මල්දමක් වූවාටද කම් නැත. පූජාවට යොදා ගන්නා මල්දම මිලදී ගන්නවා වෙනුවට ඔබම සියතින් ගොතා සකසා ගන්නවා නම් වඩා ශුභ වේ. මල් මාලයද පූජා වට්ටියේ ඉහළින්ම පලතුරු උඩින් තබන්න. පසුව රෝස වතුර ටිකක් ගෙන පූජාවට්ටිය, වටා නොතෙමෙන ගානට ඉසගන්න. අවසාන වශයෙන් හදුන්කූරු කිහිපයක්, කපුරු පැකට් එක හා බුලත් කොළයක් මත තැබූ පඬුර පූජා වට්ටියේ ගැනීමට පහසු ආකාරයෙන් ඉහළින්ම තබන්න.

එළඟි තෙල් පහන හා කට්ටකුමන්ජල් දුම් දල්වා වෙනම පූජා කරන්න.

මෙසේ කරුණු හොඳින් කියවා බලා තේරුම් ගැනීමෙන් ඔබටද තනිවම අංගසම්පූර්ණ හා නිවැරදිව දේව පූජාව සඳහා පූජා වට්ටියක් සකසා ගැනීමට හැකියාව උදාවනු ඇත.

ඔබ සැමට ශ්‍රී මහා දුර්ගා අම්මා මෑණියන්ගේ පිහිටයි.

දේවගැති ජෙරමි නෙහාර්
ශ්‍රී මහා දුර්ගා මාතා කෝවිල, ජාඇළ - 0761084190 - 0710190219

උපුටා ගැනීම මව්බිම