ග්‍රහ අපල සඳහා ග්‍රහයන්ට නියමිත ආහාර
මේ ලිපියෙන් පෙන්වා දෙන්නේ ඔබගේ ග්‍රහ අපල සඳහා කරන ශාන්ති කර්මවලදී ඒ ඒ ග්‍රහයනට පවත්වන පුද පූජා සඳහා යොදාගන්නා ආහාරපාන වර්ග මෙන්ම සුබ නැකැත්වලදී ඒ ඒ දිනයට නියමිත ආහාර වර්ග මොනවාද? හඳුනා ගැනීමය.
මේ දිනවල රාහු - කේතු මාරුව ගැනත් ඉදිරියේ එන ශනි මාරුව ගැනත් බොහෝ දෙනා කතා කරති. ඒ සමඟම මේ ග්‍රහ අපලවලින් ආරක්‍ෂා වීමට කළ යුතු යන්ත්‍ර - මන්ත්‍ර සහ පුද පූජා පෙන්වා දෙන්නේ එම ග්‍රහයන්ගේ බලය අඩු කරන්නටය. සෑම ග්‍රහ අපලයකටම පැලඳිය යුතු යන්ත්‍ර එසේම මැණික් වර්ග පෙන්වා දුන්නද ඇතැමුනට ඒවා කරන්න වත්කමක් නැත. ඒ අවස්ථාවලදී ඔවුන් අසරණ වේ. එහෙත් මේ ග්‍රහ දෝෂවලින් යම් තරමකට "අඩු වියදමින්" මේ ග්‍රහ අපල අඩු කරන්නට හැකියාව ඇත්නම් එය සහනයක් යැයි සිතමි.
කතරගම සහ ගණ දෙවියන් එක්තරා අවස්ථාවක මේ දෙදෙනාගේ ශක්තිය සහ බුද්ධිය මැන බැලීමට සප්ත මහා සාගරය වටා දිව එන්නැයි ඔවුන්ගේ පියාගෙන් අභියෝගයක් එල්ල විය. ඒ අභියෝගය එල්ල වුවත් සමඟම "ස්කන්ධ" හෙවත් කතරගම දෙවියන් ඉතාම සුළු වේලාවකින් සප්ත මහා සාගරය තරණය කොට ආපසු ආවේය. ඒ වන විට "ගණ" දෙවියන් කිසිදු වෙහෙසක් නොමැතිව සිනා සෙමින් එහිම රැඳී සිටි බව දුටු කතරගම දෙවියන් වහසි බස් ෙදාඩන්න පටන්ගත් විට ගණ දෙවියන් කතරගම දෙවියන් මෙන් විඩාවට පත් නොවී "ලුණු" පොල් කටුව වටා කරකැවී තමාගේ බුද්ධිය පෙන්වන ලදී. එය සත්‍ය නම් දෙවියන්ගේ ආහාර අතර "ලුණු" පැවැති බව පිළිගන්න සිදුවේ. නමුත් ප්‍රේතයන් වෙනුවෙන් සාදන ආහාරපානවලට "ලුණු" නොදමනුයේ ඔවුන්ට "ලුණු"වල රසයේ අගයක් නොමැති නිසා විය හැකියි. ලුණු පමණක් නොව ඒ ඒ ග්‍රහ පූජා සඳහා යොදාගත යුතු වෙනත් ආහාර ගැන කතා කරමු.
බොහෝදෙනා කතා කරන්නේ දන්නේ "ශනි ඒරාෂ්ටක" අපල සඳහා "කපුටු දානය" දීම ගැනම පමණි. ඇතැමුන් මෙය "බලු කපුටු දානය" යැයි වරදවා වටහා ගෙන ඇත. ශනි ඒරාෂ්ටක හෝ ශනිගේ අපල සඳහා දෙන "කපුටු දානය" කපුටු දානයක්ම පමණි. එය බල්ලන්, බළලුන්ට නොදිය යුතුය. එසේම ඇතැමුන් කපුටන්ට දෙන කිරිබත් ගුළියට එළඟිතෙල් පොඟවන ලද පහන් තිරයක් ගිල්වා එය දල්වා කපුටන්ට ආහාරයට දීම සිරිතකි. එහෙත් එය නුසුදුසුය. මෙය දන් දීමකට වඩා කපුටාට විපත්තියක් සිදු කිරීමකි. කළ යුත්තේ කිරිබතට එළිතෙල් සහ කළු තල එක් කිරීමයි. ඒ අනුව ශනිගේ අපල දුරු කරන්නට එළඟි තෙල් මිශ්‍ර කිරිබත් කපුටන්ට දන්දෙමු.
එසේම ශනිගේ අපල ඇති අවස්ථාවලදී අසරණයන්ට නිර්මාංස ආහාර දන්දීමද වැදගත්ය. සෙනසුරුට පමණක් නොව අනෙක් ග්‍රහයන්ටද දන්දීම වැදගත්ය.
අපි රවිගෙන් පටන් ගනිමු. රවිගේ දෝෂවලදී දන්දීම සිදුකළ යුත්තේ "පරිප්පුය". රවි ග්‍රහ මණ්ඩලයේ රජතුමාය. රවිගේ දෝෂ පවත්නා අවස්ථාවල පැටවෙක් සහිත එළදෙනක දන්දීමට ඇත්නම් එය සුබයි. අපට එළදෙනකු මිලදී ගෙන දන් දෙන්න වත්කමක් නැත. ඒ අනුව බොහෝදෙනා කරනුයේ බොහෝ දෙනකු එක්ව එළදෙනකු මරණයෙන් මුදාගෙන අභයදානය දීමය. ඒ එළදෙන තෝරා ගැනීමේදී "කිරිදෙන" (පැටවකු සහිත දෙනක) තෝරා ගැනීම වැදගත්ය. ඒ අනුව රවිගේ දෝෂ අඩු කරගන්න පරිප්පුවලින් පිසූ ආහාර වර්ග දන් දීම සුබයි. එය වෑංජනයන් ලෙස හෝ "වඩේ" ආදිය වුවද වරදක් නැත.
සඳුගේ අපල දුරු කරගන්න "හාල්" හෝ "වී" පුරවන ලද පාත්‍රයක් පූජා කිරීම මැනවි. එසේම මුදවන ලද දී කිරි (මුදවාපු කිරි) පූජා කිරීම සහ දන් දීම සුබයි. රවිගේ දෝෂ අඩු කරගන්න අනුන්ට සෙවණ දෙන කුඩ, හිස්වැසුම්, සෙවිලිතහඩු, උළු ආදිය දන්දීමද යෙහෙකි.
කුජගේ අපල අඩු කරගන්නත් "පරිප්පු" දන්දීම විශේෂයි. එසේම සීනිවලින් සාදන ලද රස කැවිලි දන් දීමෙන්ද කුජගේ දෝෂ අඩු කරයි. බුධගේ දෝෂ අඩු කරගන්න. "සුවඳ වර්ග" දන්දීම හා පූජා කිරීම සුබයි. සුවඳ කූරු - සාම්බ්‍රානි අදිය සහ මුං ඇටවලින් උයන ලද ආහාර දන්දීම බුධගේ දෝෂ අඩු කිරීමට හේතු වේ.
ගුරුගේ අපල අඩු කරගන්න කහ පාට වස්ත්‍ර දන්දීමත්, සීනි, ලූනු මල් දන්දීම සහ බෙලිමල් තැබ්බූ පානය බෝධි පූජාවේදී ගිලන්පස ලෙස යොදා ගැනීමත් දන්දීමත් සුබයි.
සිකුරුගේ දෝෂ අඩු කරගන්න "සුදු සහල්"වලින් උයන ලද ආහාර වර්ග මෙන්ම රස කැවිලිද පූජා කිරීම. දන්දීම සිකුරු අපලයට අඩු වියදමින් කළ හැකි පූජාවකි. එළඟිතෙල් දන්දීමද සුබයි.
රාහුගේ අපල සඳහා කළු එළුවන්ගේ මස් දීම කියා ඇතත් සත්ත්ව යාගය අනුමත නොකරන නිසා ලෝහ භාජන හෝ කඩල තම්බා දන්දීම සුබයි. කේතුගේ අපලවලට තල තෙල් දන්දීමත්, මාළුන්ට පොරි කන්න දීමත් වැදගත්ය.
දැන් ඔබට විශාල මුදලක් වැය නොකර අඩු පිරිවැයකින් ග්‍රහ දෝෂ "තරමක්" අඩු කරගන්න මඟපෑදී ඇත.
උපුටා ගැනීම මව්බිම
