කාලි මෑණියන්ට කැප කළ එළුවන්ගේ හා කුකුළන්ගේ බෙලි කැපූ අය - බෙල්ල කැඩී මියගිය හැටි
ගමට නගරයට විනකරමින් ජාවාරම්වල යෙදෙන පුද්ගලයන් නිසා දුක් විඳින ගම්මුන්ගේ දුකට කාලි මෑණියන්ගේ පිහිට අනිවාර්යයෙන්ම ලැබෙන බව සත්‍යයකි. කුඩ්ඩන් නිසා ගමක් විනාශ වෙන්නට යද්දී ඒ විනාශයෙන් ගම්මුන් මුදා ගන්නට ඉදිරිපත් වූ තවත් ගම්මුන් පිරිසක් සමඟ කුඩ්ඩන් සටන් වදින අවස්ථා නගරබද මෙන්ම ගැමි සමාජය තුළද නිරන්තර දකින්නට ලැබෙන දර්ශනයකි. මත්පැන් ජාවාරම්, කුඩුජාවාරම්කරුවන් සොයා එන පිරිස් නිසා ගමේ සිටින සාමකාමී පිරිස්වලට වන හානිය වළක්වන්න යන ගැමියන් කුඩ්ඩන්ගේ සතුරන්ය.
එහෙත් එයට නොබියව සටන්වදින පුද්ගලයන් සමඟ කුඩ්ඩන් සටන් වදින්නේ බොහෝ විට ඔවුන්ගේ අහිංසක ජීවිතද අහිමි කරමිනි. එහෙත් එවැනි අහිංසක ගැමියන් ආරක්‍ෂා කර ගන්නට කාලි මෑණියන් ඉදිරිපත් වූ අවස්ථා ඕනෑ තරම් තිබූ බව හලාවත මහ භද්‍රකාලී අම්මාන් කෝවිලේ මහේන්ද්‍ර සාමි පවසයි. කුඩුවලට ඇබ්බැහි වූ තම එකම දරුවා කාලි මෑණියන් ළඟට ගෙනැවිත් බාරහාරවී ඔහු නරක මිතුරන්ගෙන් ඉවත්කර සුමඟට ගත් මවුපියන්ද එමට බව මහේන්ද්‍ර සාමි පැවැසීය. කුඩ්ඩන්ගෙන් ගමක් රැකගන්න ගොස් සටන් වැදුණු ගම්මුන් පිරිසක් කාලි මෑණියන්ගේ පිහිටෙන් ජය ලබා ඒ සතුට නිමා කරන්නට කාලි මෑණියන් වෙනුවෙන් කෝවිල් භූමියට කුකුළන් දෙදෙනකු සහ එළුවකු මුදාහරින්නට සූදානම් කර තිබිණි. අල්ලපු ගමක සිටි කුඩ්ඩන් දෙදෙනකු එම සතුන් සොරාගෙන ගෙල මිරිකා මරා මස්කර කෑ සිද්ධියක් කාලි මෑණියන්ගේ දහසකුත් දෑස් අතරට ළංවූ මොහොතේ ඔවුන්ට දඬුවම් දීමට කාලි මෑණියන් සොහොන් කාලි අවතාරය එවා ඔවුන්ගේ හිස් දෙක කඩා දැමූ සිද්ධියක් ගැන කියන්නට මෙවරද කටහඬ අවදිකර සිටියේ මහේන්ද්‍ර සාමිය.
මම මේ කියන සිද්ධියට පසුබිම් වුණේ කඩුවෙලට නුදුරු ප්‍රදේශයක ගම්මානයක්. ඒ ගමේ මිනිස්සු හොඳ ආගමික ජීවිතයක් ගත කරන පිරිසක්. ගැමියන් පදිංචි ගෙවල් විස්සක් විතර ගමේ අෑතින් අෑත පිහිටා තිබුණා. ඒ ගම කුඹුරු යායවල්, ඇළ ෙදාළින් ලස්සන වූ ගම්මානයක්. මේ ගමේ හිටිය වැදගත් පවුලක එකම දරුවා කොළඹ පාසලකට යද්දී නරක මිතුරන්ගේ ඇසුර නිසා කුඩුකාරයන් ඇසුරට පත්වෙලා හිටියා. ඒ විතරක් නොවෙයි එයා එයාගෙ ගමේ ඉන්න මිතුරන් කීපදෙනකුම මතට හුරු කළා. ටිකෙන් ටික ගම නරක්වේගෙන යද්දී ගමේ පන්සලට යන එන බැතිමතුන්ද ගමේ පන්සලේ හාමුදුරුවන්ද මේ ගැන කතාබහ කළා. මේ තරුණයා නිසා පිටපළාත්වලින් ගමට කුඩුකාරයො එන්න පටන් ගත්තා. මේ තරුණයා එයාගෙ මවුපියන් කියන දේටවත් කන්දුන්නේ නැහැ. එයාගෙ මවුපියන් එයාගෙ නමට ලියලා දීලා තිබුණ කුඹුරකුත් උකස් තියලා ඒ සල්ලිත් කුඩු බොන්න වියදම් කළා. මේ වැඩේට විරුද්ධ වුණු ගමේ අයත් සමඟ ඒ තරුණයා නිතර නිතර ආරවුල් ඇති කරගත්තා. තවත් කුඩ්ඩන් එක්කරගෙන එවැනි අයට පහර දෙන්න පවා පෙලඹුණා. මේ තරුණයා නිසා ගමේ ඇති වුණ මේ අවාසනාවන්ත තත්ත්වය නිසා ඒ ගමේ තරුණියන්ට රෑ බෝවෙලා ගමට එන්න යන්න පවා බැරි තත්ත්වයක් ඇති වුණා. ඒ අය ගමේ කුඩ්ඩන්ගේ උසුළු විසුළුවලට පවා මැදි වුණා. ඒ ගැන අහන්න ගිය ගම්මුන්ට කුඩ්ඩන් පිරිසක් පහරදීලා තිබුණා. පිට ගම්වලින් ගෙන්වා ගත් කුඩ්ඩන් තුන්දෙනකු ගමේ අයට ඒ සිද්ධියේදී පහරදීලා තුවාල කරලා තිබුණා. මේ ප්‍රශ්නය මෙයින් අවසන් නොවන බව ගම්මුන්ට වැටහුණා. ඒ අය ගමේ පන්සලේ රැස්වෙලා මෙයට විසඳුම් සොයන අවස්ථාවේ පන්සලේ දායක සභාවේ අයෙක් කාලි කෝවිලට යමු කියලා යෝජනා කළා. එයා විශ්‍රාමික ගුරුවරයෙක්. ගම්මුන් නොදැන හිටියට එයා කාලි කෝවිලට ආගිය අයෙක්.
එයාගෙ කීම අහලා ගම්මුන් පිරිසක් වෑන් රියක් කුලියට අරන් අපේ කාලි කෝවිලට ආවා. ඒ ඇවිත් වෙලා තියෙන විපත්තිය ගැන මා ඉදිරියේ කියල කාලි මෑණියන්ට බාර වුණා. මේ විපත්තියෙන් ගම බේරා දෙන්න කියලයි. එහෙම හිතලා බාරවෙලා ඒ අය කාලි කෝවිල ඉදිරිපිට බිලිගලේ කෙස්රොදවල් අඳිමින් කුඩ්ඩන්ගෙ නම් කියලා කාලි මෑණියන් ඉදිරිපිට පළි ගැහැව්වා. එහෙම පළිගහල ගිහින් දින විසිඑකක් ගියේ නැහැ. කුඩු ජාවාරමට සම්බන්ධ ගමේ තරුණයන් තුන්දෙනා දිනක් අලුයම් කාලෙ අර කාලි කෝවිලට ආව අයකුගෙ ගේ ඉදිරිපිට සෙම දාගෙන වැටිලා මුළු ගමෙන්ම කෑ ගසමින් සමාව ඉල්ලුවා. ඒ අය පසුදිනම ගම අතහැර ගිහින් කියන පණිවුඩය ගමපුරා පැතිර ගියේ ඒ තරුණයන්ගෙම මවුපියන් ඉදිරිපත් වෙලා ප්‍රචාරය කරපු නිසා. ඒ තරුණයන් තුන්දෙනා කොළඹ තොටළඟ ප්‍රදේශයට ගිහින් කුඩ්ඩන් පිරිසකට එකතු වෙලා පසු කාලෙක හිරේ විලංගුවෙ වැටුණා. කුඩු විපත්තිය ගමෙන් දුරුකර දුන්න කාලි මෑණියන්ට පින් දුන්න ගැමියන් ඒ සතුටට කාලි මෑණියන්ට බාර ඔප්පු කරන්න කුකුළන් දෙන්නෙකුයි, එළුවකුයි මිලට අරන් ඒ ගමේ ඒ ගැන නායකත්වය දුන්න විශ්‍රාමික ගුරු මහතාගේ නිවෙස පිටුපස බැඳ තිබ්බා.
ඒ සතුන් එහෙම බැඳ තිබ්බේ ඒ සතියේ සෙනසුරාදා අලුයම හලාවත මුන්නේශ්වරම් කාලි කෝවිලට යන්න හිතාගෙන. මේ අතරතුර නැවතත් අර ගම හැරගිය කුඩ්ඩන් තුන්දෙනා ගැන ඒ අයගෙ මවුපියන්ගෙන් ආරංචි වුණේ ඒ දවස්වල ඒ තුන්දෙනාම ගෙවල්වල රෑ නින්දක් නොමැතිව පිස්සු වැටිලා වගේ ගෙවල් ඇතුළේ ඇවිදිමින් මොනවදෝ කියමින් කෑගසන්න වුණු බව. පස්සේ ඒ තුන්දෙනා 20 වැනි දවසෙ තමයි අර ගමේ නායකයාගේ නිවෙස ඉදිරිපිට සෙම දාගෙන ඇද වැටිලා තිබුණේ. මේ සිද්ධීන් ගම තුළ මෙසේ පෙළ ගැසෙද්දී අල්ලපු ගමක අලුත් කුඩ්ඩන් දෙන්නෙක් ගමට වැදුණේ අර තුන්දෙනා ගමේ නැති බව දැනගෙන. ඒ කුඩ්ඩන් දෙන්නගෙ පළමු උකුසු ඇස එල්ල වුණේ අර කාලි කෝවිලට ගෙනයන්න ගෙයක් පිටුපස බැඳ තිබුණු එළුවයි කුකුළන් දෙදෙනා දෙසට. ඒ දෙන්න එකතු වෙලා දිනක මැදියම් රැයක එළුවයි කුකුළන් දෙන්නයි සොරකම් කරලා එළුව මස් කඩයට විකුණලා කුකුළන් දෙදෙනාගේ ගෙල මිරිකලා මරල මස් කර ඒ අයම මරන් කාලා තිබුණා. ඒ සියල්ල සිදුවුණේ අර ගම්මුන් පිරිස කාලි කෝවිලට යන්න සූදානම් වුණ සෙනසුරාදා දිනට එළිවෙන්න. පසුදා කාලි කෝවිලට එන්න සූදානමේ සිටි ගැමි පිරිස මේ සිද්ධියෙන් හරියට කම්පාවට පත් වුණා. ඒ අය හලාවත මුන්නේශ්වරම් කාලි කෝවිලට යෑම කීපදිනකට කල් දමලා ගම්මානය ආසන්නයේ ඇති කාලි දේවාලයට ගිහින් පැයක් පුරා කාලි මෑණියන්ට කන්නලව් කරමින් සතුන් සොරාගත්ත අයට පළි ගැහැව්වා. මුන්නේශ්වරම් කාලි මෑණියන් ගැන සිතමින් එහෙම පළිගහපු මේ ගැමි පිරිසට දින හතක් යන්න පෙර එසේ කළ සතුරන් ඇස් ඉදිරිපිට දැක ගන්නට හැකිවුණා. ඒ අය කාලි කෝවිලට ගෙන ඒමට කාලි මෑණියන්ට වෙන්කර තිබුණු සතුන් තුන්දෙනා සොරාගත් තරුණයන් දෙන්නා කුඩු අරන් ත්‍රිරෝද රථයක යද්දී පොලිසිය දැකලා ගමේ අතුරු මාර්ගයකින් පලායද්දී බෝක්කුවක් උඩින් ගිහින් තවත් කොන්ක්‍රීට් තාප්පයක වැදිලා දෙන්නගෙ හිස්කබල් පොඩිවෙලා (බෙලි කැඩී) මළවුන් අතරට ගියා. කාලි මෑණියන්ට වෙන්කළ සතුන් තුන්දෙනා මස්කළ පුද්ගලයන්ට ඒ ආකාරයෙන්ම කාලි මෑණියන් දඬුවම් දුන්නෙ එහෙමයි.
ප්‍රේමලාල් විජේරත්න
උපුටා ගැනීම මව්බිම පුවත්පත
