ගිනි පොලීකාරයකුට දඬුවම් දෙන්න සොහොන් කාලි සිහිනෙන් එයි

අනුන්ගේ දුක වේදනාව දන්නා කාලි මෑණියන් ඇයගේ පිහිට පතා හලාවත මහා භද්‍රකාලි අම්මාන් කෝවිලට පැමිණෙන ඕනෑම අයකුට පිහිට ලබා දෙන්නේ ඒ දුක්ගැනවිල්ලේ සත්‍ය අසත්‍යතාව, අවංකභාවය ගැන දහසකුත් දෑස් අතරින් තේරුම් ගෙන බව සත්‍යයකි. ඒ බව පවසන්නේ මහා භද්‍ර කාලි කෝවිලේ මහේන්ද්‍ර සාමිය. කෙනකුගේ දුක්ගැනවිල්ලක පසුබිමේ සැඟවුණු වේදනාව කාලි මෑණියන්ට ඇයගේ දෑස් අතරින් දකින්නට වැඩි වේලාවක්ද ගත නොවේ. එහෙත් බොරු කියන්නට, තමන් වරද කර අනුන්ට පළි ගහන්නට කාලි කෝවිලේ පෙනී සිටින ව්‍යාජ පුද්ගලයන්ට කාලි මෑණියන්ගෙන් සමාවක්ද නැත. එවැනි දෑ කළ කී බොහෝ දෙනකුට එම ස්ථානයේ ගහන පළිය ආපසු කරකැවී ගිය අවස්ථා එමට ඇති බව මහේන්ද්‍රසාමි පැවැසීය. මැතදී ටෙලි නාට්‍යයක් නිෂ්පාදනය කිරීමට ගොස් දස අතේ ණය වී අවසානයේ ටෙලි නාට්‍යය කඩාකප්පල් වී රටට ණය වී ණයකරුවන් ඔහු පසුපස එද්දී කාලි මෑණියන් ඒ අයට පිහිට වූ අයුරු කියන්නට මෙවරද කටහඬ අවදි කර සිටියේ මහා භද්‍රකාලි කෝවිලේ මහේන්ද්‍ර සාමිය.

"මම මේ කියන ටෙලි නාට්‍ය අධ්‍යක්ෂවරයා කොළඹට නුදුරු ප්‍රදේශයක පදිංචිකරුවෙක්. එයා කලාවට ළැදි පාසල් වියේ ඉඳන් නාට්‍යවල රඟපෑමට පවා ආශා කළ තරුණයෙක්. මෙයාගෙ එකම ආශාව තිබුණේ ටෙලි නාට්‍යයක් නිපදවීම. එයාගෙ පාසල් ගමන අවසන් වෙලා සමීප හිතවතුන් කීපදෙනකු සමඟ එකතු වෙලා ටෙලි නාට්‍යයක් නිෂ්පාදනය කරන්න සැලැසුම් කරගෙන ගියා. එහි රඟපාන අයටත් යහමින් මුදල් දුන්නා. හැබැයි මේ තරුණයා කිසි දිනෙක කාලි කෝවිලට ආව කෙනෙක් නෙවෙයි. එයා කාලි කෝවිල දැකලවත් තිබුණේ නැහැ. මේ අය ටෙලි නාට්‍යයට වියදම් කරන අන්දම ගැනවත් දැන සිටියේ නැහැ. ඒ ගැන හිතන්නෙ නැතිව එයාගෙ හිතවතුන් මාර්ගයෙන් ටෙලි නාට්‍ය හදන්න ණයට මුදල් අරන් තිබුණා. පස්සෙ ටෙලි නාට්‍ය අසාර්ථක වෙනකොට ළඟින් හිටපු හිතවතුන්ද මෙයාගෙන් අෑත් වුණා. ඒකට ණයට සල්ලි දුන්න අය මුදල් ඉල්ලගෙන ගෙදරට එන්න පටන් ගත්තා. සමහර දිනවලට මේ අය ණයකාරයන්ගෙන් බේරෙන්න බැරිව ගෙදරින් මඟ ඇරලත් හිටියා. මේ නිසා ඒ ටෙලි නාට්‍ය නිෂ්පාදකවරයා බලවත් හිත් වේදනාවකිනුයි හිටියේ. ඔහුට හරියට නින්දක් පවා නොමැතිව දස අතේ කල්පනා කරමිනුයි හිටියේ. එහෙම හිත හිතා ඉන්නකොට එයාට කල්පනා වුණේ පිට පළාතක තියෙන ඒ අයට අයිති ඉඩම විකුණල හෝ එය ගෙවන්න ඕනෑ කියල. ඒ ගැන පත්තර දැන්වීම් දාල බලා සිටියත් සමහරු එනව බලනව යනව මිසක් ඒ ඉඩම මිලදී ගන්න කැමැති වුණේ නැහැ. අවසානයේ ඒ තරුණයා දුවගෙන අපේ කාලි කෝවිලට ආවා. ඒ ඇවිත් මුල සිට අග දක්වාම එයාට සිදුවූ දේ ගැන මා සමඟ දුක කීවා. එහෙම කියල ඒ තරුණයා මා සමඟ කාලි මෑණියන් ළඟට ගිහින් හැඬූ­ කඳුළින් පූජාවක් දීල කියා සිටියේ ණය තුරුස් වලින් එයාව බේරා දෙන්න කියල. එදා අපේ කෝවිලේ දහවල් පූජාවට භාරහාර ඔප්පු කරන්න ඇවිත් හිටිය විශාල පිරිසක් දිහා එයා බලා ඉඳල මගෙන් ඇහැව්වේ මේ පිරිස සේරටම කාලි මෑණියන් පිහිටවෙලා භාර ඔප්පු කරන්න ආව අයද කියල. එයා මගෙන් අහපු ප්‍රශ්නයට උත්තරය එයා සිටිය තැනම ඉඳන් දිෂ්ටි වෙමින් කාලි මෑණියන්ට භාර ඔප්පු කරමින් සිටි කාන්තාවකගෙන්ම පැහැදිලි කරගත්තා. ඒ වෙලාවේ මේ තරුණයටත් කාලි මෑණියන් ගැන ලොකු විශ්වාසයක් භක්තියක් ඇතිවෙලයි තිබුණේ. ඒ නිසාම එයා මගෙන් කාලි මෑණියන්ගෙ අතීත සිද්ධීන් ගැනත් වුවමනාවෙන් අසා දැනගන්න උනන්දු වුණා. ඒ තරුණයා කාලි මෑණියන්ට පූජාව දීල බාරවෙලා ගිහින් දින 05ක්වත් ගතවුණේ නැහැ. එයා සිතාගෙන සිටි ගාණට ඒ ඉඩම ගන්න කාන්තාවක් මුදල් අරගෙනම ගෙදරට ආවා. ඒ ඉඩමේ මිල අඩු කරන්න කියල කේවල් කරන්නවත් ඒ කාන්තාව පෙලඹුණේ නැහැ. ඒ තරුණයා පසුදාම ඥාතියකු සමඟ ණයකාරයන්ගෙ ගෙවල්වලට ගිහින් ණය ගෙවල ඒ අයගෙන් අරන් තිබුණු ණය බරින් නිදහස් වුණා.

ණයකරුවන්ගෙ තර්ජනවලින් ඒ තරුණයා බේරා දීම ගැන එයා කාලි මෑණියන්ට හදවතින්ම ස්තුති කළා. ණය ගෙවා දැමීමෙන් පස්සෙ දවසක්වත් ප්‍රමාද නොකර එයා දිවගෙන ආවෙ කාලි කෝවිලට. ඒ විතරක් නොවෙයි මේ සිද්ධියෙදි තම පුතාට කාලි මෑණියන්ගෙන් ලැබුණු ඉක්මන් සහනය නිසා එයාගෙ මවුපියන්ටත් ඇති වුණේ බලවත් සතුටක්. ඒ අයත් මේ තරුණයා සමඟ කාලි කෝවිලට ආව. ඒ මොකද එයාගෙ මවුපියන් එයාලගෙ ගෙදර අයගෙ දියුණුවත් ආපස්සට යමින් සියලු බලාපොරොත්තු කාලයක සිට බිඳ වැටෙන්න හේතුවක් ඇතියි කියල හිතුව නිසයි එහෙම ඇවිත් තිබුණෙ. ඒ සිතිවිල්ල මේ දරුවගෙ ප්‍රශ්නයෙන් පස්සෙ වඩාත් ඒ අයට හිතට වධ දීලයි තිබුණෙ. ඒ අයගෙ පුතාගෙ ප්‍රශ්නය ආව වෙලාවේ ඒ අය කාලි වරමෙන් පේන කියන කාන්තාවකගේ දේවාලෙට ගිහින් සාස්තර බලල තිබුණා. එතෙන්දි කියල තිබුණෙ ඒ පවුලේ දියුණුවට විරුද්ධ ඥාතියකු ඒ අය පදිංචි භූමියට වින කරල කියල. ඒ අය සියලුදෙනා එකම පවුලක් විදියට මහ ගෙදරයි පදිංචිව සිටියෙ. ඒ ගෙදර හිටිය විවාහක වයසේ තරුණියන්ගෙ විවාහ යෝජනා පවා කඩාකප්පල් වී ගියා. මේ සේරම සිද්ධීන් ගැන හිතල බලල ඒ අයත් අර තරුණයා බාර ඔප්පු කරන්න යන දවසෙ ඒ තරුණයාත් සමඟ කාලි කෝවිලට ආවා. ඒ ඇවිත් ඒ අයගෙ කරදර සියල්ල මා සමඟ කීවා. පස්සෙ මම කාලි මෑණියන් යැදල කාලි මෑණියන්ට කියා සිටියේ මේ අය පදිංචි භූමිය, නිවෙස ආරක්ෂා කර දෙන්න කියල. එහෙම අයැදල ගේ වටා ආරක්ෂා කරන්න දෙහි ගෙඩි කීපයක් කාලි මෑණියන් ඉදිරියේ කැප කරල ගේ වටා වළ දමන්න කියල මම ඒ අයට දුන්නා. ඒ අය එදා කාලි මෑණියන් ළඟින් ඉවත් වෙලා ගියේ කාලි මෑණියන් කෙරෙහි විශ්වාසය ඇතිව. ඒ විතරක් නෙවෙයි සෑම තුන් මාසයකට සැරයක් කාලි කෝවිලට එනව කියල ඒ අය කාලි මෑණියන් ඉදිරියේ පොරොන්දු වුණා." දුකට පත්වී කඳුළු සලන අවංකව දුක කියන ඕනෑම අයකු ඒ දුකින් බේරාගන්න කාලි මෑණියන් බැල්ම හෙළන්නේ රාවණා රාජ සමයේ සිට බව මහේන්ද්‍ර සාමි පැවැසීය. සහෝදරියකගේ අසනීපයකට වෙදකම් කිරීමට පදිංචි ඉඩම ගෙය උකස් තබා පොලියට මුදල් ගත් පුද්ගලයකු පන්නා දමා ඒ ගෙය අයිති කරගන්නට උත්සාහ දැරූ ගිනිපොලී කාරයෙක් පැය 48ක් ඇතුළත ඔහු බලෙන් අයිති කරගෙන සිටි නිවෙසින් කාලි මෑණියන් විසින් පන්නා දමනු ලැබූ අයුරු කියන්නට මහේන්ද්‍රසාමි යළිත් හඬ අවදි කර සිටියේය. "ඒ අහිංසක පවුලේ වැඩිමහල් සහෝදරිය බලවත් ලෙස රෝගාතුර වුණා. සමහර වෛද්‍යවරු කීවේ පිළිකාවක ලකුණු කියල. ඒත් ගෙදර අය ඒ ගැන විශ්වාස නොකර දන්න දන්න හැම තැනකින්ම ඇයට වෙදකම් කරන්න පෙලඹුණා. ඒ පවුලේ එක් අයෙක් විතරයි රජයේ රැකියාවක් කළේ. ඒ පවුලේ අට දෙනෙක් ජීවත් කළේ වැඩිමහල් සහෝදරයා. එයා එයාගෙ වැඩිමහල් සහෝදරිය බේරාගන්න එයාගෙ ඉඩකඩම් පවා විකුණලා සහෝදරියට වියදම් කළා. ඒ විතරක් නොවෙයි ඇයට දෙන බෙහෙත්වලට මුදල් නැති වුණාම ගමේ පොලී කාරයකුගෙන් විටින් විට මුදල් ඉල්ල ගත්තා. ඒ පොලී මුදල් වැල් පොලී ගිනිපොලී වෙලා මේ පවුලේ අයට ඒක ගෙවාගන්න බැරි වුණු තැන පොලී කාරයාට සින්න වුණු ගේ දීල කුලී නිවෙසක් අරගෙන ගෙයින් එළියට බැස්සෙ හරිම වේදනාවෙන්. මාස පහක් විතර යනකොට ඒ පවුලේ අයට ළඟම හිතවත් අයෙක් ඉතාලියෙ ඉඳල මේ අයට කතා කළ වෙලාවෙ එයාට මේ සියලු විස්තර කීවා. ඒ ගැන ඒ අය ඉතාලියෙ ඉඳන් බලවත් කම්පාවට පත්වෙලා පොරොන්දු වුණා ඒ පවුලෙ අයට මාස්පතා ලොකු මුදලක් එවන්නත් ගේ බේරාගන්න ඒ පොලී මුදලත් සමඟ එකවර මුදලක් එවන්නත්. එහෙම පොරොන්දු වෙලා ඒ මුදල එව්වායින් පස්සේ ගේ අහිමි වුණු අය පොලීකරුවා සොයාගෙන ගිහින් සියලුම මුදල් ගෙවන්න සූදානම් වුණත් පොලීකාරයා එයට අකැමැති වුණා. පස්සෙ මේ සිද්ධිය ඉතාලියෙ ඉන්න මිතුරන්ටත් කියල ඒ අය අපේ කාලි කෝවිලට ඇවිත් මෑණියන් ඉදිරියෙ දුක කියල ගිනි පොලීකාරයාට විරුද්ධව පළි ගහල පොල් බින්දා. ඒ අයට සිදුවුණු අසාධාරණයට ඒ කළ අයටද දඬුවම් දුන්නොත් ඒ අය කාලි මෑණියන් වෙනුවෙන් එළුවන් දෙන්නෙක් කාලි කෝවිල් භූමියට නිදහස් කරනව කියලයි ඒ අය භාර වුණේ. එහෙම භාර වෙලා ඇවිත් දින 5ක් ගියේ නැහැ දිනක් ගිනිපොලී කාරයා අර ගේ දොර අහිමිවෙලා ඉන්න අය ඉන්න නිවෙසට දිව ආවෙ අලුයම පහට. ඒ ඇවිත් එයාගෙන් ගත්ත මුදල් පොලී නැතිවම ලබාගෙන ආපහු ඒ නිවස හිමිකාරයන්ටම ලියල දුන්නා. ඒ අය කාලි කෝවිලට ඇවිත් ආපහු ගිය දවසෙ ඉඳන් ගිනිපොලී කාරයට සොහොන් කාලි සිහිනෙන් ඇවිත් බිය වද්දමින් කඩුවක් අරන් ඔහු පසු පස ලුහුබඳිනව දකින්නට වීම නිසා බිය වී කෑ ගසා නින්දෙන් අවදිවන්නට පටන්ගෙන තිබුණා. ඒ සිහිනෙන් පේන දර්ශනවලට බියෙන් තමයි ඔහු ආපසු සින්න කරගත් ගේ ආපසු දීල තිබුණෙ. ඒ ගිනිපොලී කාරයා කාලි අවතාරයට කොච්චර බිය වුණාද කියනවානම් ගිනි පොලියට සල්ලි දීමේ රැකියාව නතර කරල සුළු ව්‍යාපාරයක් ආරම්භ කරල ජීවන මාර්ගය වෙනස් කරගෙන තිබුණා."

ප්‍රේමලාල් විජේරත්න
උපුටා ගැනීම මව්බිම පුවත්පත