යකඩ ගොඩක ආරවුලකට මත්පැන් පොවා ලෙඩ කරවයි
මිනිසුන් දෙපාර්ශ්වයක් අතරේ ආරවුලක් ඇති වූ විට තුන් වැනි පාර්ශ්වයක් ඉදිරිපත් වී තම තමන්ගේ අඩුපාඩු පෙන්වා දුන් විට තමන් ගේ වරද පිළිගැනීමට කිසිවෙකු කැමැති නැත. අනුන්ගේ දොස් ම කියාපායි. එහෙත් භූතයෝ බොහෝ දෙනෙක් තමන්ගේ වැරැදි අඩුපාඩු පෙන්වා දුන් විට එය පිළිගනිති. එසේ ම අනුන්ට යටත් වීමට, පහත් වීමට, හෑල්ලු වීමට මිනිසුන් වගේ ම අමනුෂ්‍යයෝ ද අකැමැතිය. හලාවත පදිංචිකරුවකු වූ සමරදිවාකර හතළිස් හැවිරිදි ව්‍යාපාරිකයෙකි. තිස් දෙනෙකු පමණ සේවක පිරිසක් සේවය කරන විශාල ප්‍රමාණයේ ග්‍රිල් වැඩ පොළක් පවත්වා ගෙන ගියේය. හිටි හැටියේ ඔහු අසාමාන්‍ය ලෙස අරක්කු බොන්නට පටන් ගත්තේය. දිනපතා රාත්‍රියට අරක්කු බෝතලයක් පමණ බිව්වේය. ශීඝ්‍රයෙන් දියුණුවට පත්ව තිබූ ඔහුගේ ග්‍රිල් වැඩ පොළ ද ක්‍රමයෙන් පාඩු ලබන්නට විය.
මේ අසාමාන්‍ය ලෙස අරක්කු බීමට ඇබ්බැහි වීම වෛද්‍ය ප්‍රතිකාරවලින් ද, මානසික වෛද්‍ය ප්‍රතිකාර වලින් ද මනෝ උපදේශන වලින් ද පාලනයක් කැර ගත නොහැකි තැන ඔහුගේ බිරිය දිනක් ඇය සමරදිවාකර සමඟ ඇතුල්කෝට්ටේ ගුප්ත ගවේෂණ මධ්‍යස්ථානය සොයා ගෙන පැමිණියාය. එහි දී ආධ්‍යාත්මික උපදේශකවරයා මුණ ගැසී තම ස්වාමියාට සහ ව්‍යාපාරයට එළඹ ඇති තත්ත්වය පැහැදිලි කළාය. එදින සමරදිවාකර වෙත ශක්ති කිරණ එල්ල කරන විට සමරදිවාකර හූ කියන්නටත් කෑගසන්නටත් වීය. ඉන් එහා දෙයක් ඔහු වෙතින් මතු නොවූ බැවින් දින විසි එකක් ගමේ පන්සලේ බෝධි පූජා විසි එකක් පවත්වා නැවත පැමිණෙන ලෙස උපදෙස් දුන්නේය. බෝධි පූජා අවසන් කොට නැවත පැමිණි දිනයේ ගවේෂකවරයා ශක්ති කිරණ එල්ල කරන විට සමරදිවාකර ප්‍රලය වූයේය. ගවේෂකවරයා ප්‍රශ්න කරන්නට විය.
“කවුද මේ ශරීරයට රිංගලා ලෙඩ කරන්නෙ?”
“මම මේ සමරදිවාකරගෙ ලොකු මාමා”
“ඇයි මේ ඥාති පුත්‍රයාට හිරිහැර කරදර කරන්නෙ?”
“මට මස් කන්න ඕනෑ. අරක්කු බොන්න ඕනෑ. මම මූ ලවා ඒ ටික කර ගන්නවා.”
“ඒ කොහොම ද? මෙයා ඒවා ගෙනැත් දෙනවා ද?”
“නෑ නෑ මූගේ ශරීරයට රිංගලා බොන්න පොලඹවනවා. දැන් හොඳට බීමට ඇබ්බැහි වෙලා. මස් මාළු නැතුව දැන් මෙයා කන්නෙ නෑ. ඉතින් මෙයා ඒවා කන කොට බොනකොට මෙයාගෙ ශරීරයෙ ඉඳගෙන මමත් කනවා. බොනවා. මෙයාට දැන් මස් පුච්චලා කන්නත් පුරුදු කළා.”
“තමුන් මොනවා වෙලා ද මැරුණේ?”
“අක්මාව දියවෙලා”
“ඇයි එහෙම වුණේ.”
“මම දිනපතා ම හොඳට ම බිව්වා. අන්තිමට සිරෝසීස් හැදුණා.”
“තමුන් මත්පැන් පානය කිරීමේ ආදීනවය වශයෙන්, මත්පැන් පානය නමැති හේතුවේ ඵලය වශයෙන් අකාලයේ මරණයට පත් වුණා. දැන් මේ සමරදිවාකර ගේ ශරීරයට රිංගලා ඒ ජීවිතයත් නැති කරලා මහා පාපයක් සිද්ධ කැර ගන්න නේද හදන්නෙ? මේ මනුස්සයා අතහැරලා යන්න බැරි ද?”
“බැහැ මෙයා එක්ක මගේ තරහක් තියෙනවා. මූවත් නැති කරලා මුගේ දේපළත් නැති කරන්න ඕනෑ.”
“මොකක්ද ඔය වෛරයට හේතුව?”
“මූ මට දවසක් ගහලා පැන්නුවා. ඒකට පළිගන්න ඕනෑ.”
තවත් දවස් හතක් බෝධි පූජා පවත්වා නැවත පැමිණෙණ ලෙස උපදෙස් දුන්නේය. ඒ බෝධි පූජා පැවැත්විය යුතු ආකාරය ද විස්තර කැර දුන්නේය. ඒ බෝධි පූජා පවත්වා අවසන් වන විට සමරදිවාකරගේ මත්පැන් පානය අඩු වී ගොස් තිබුණේය. මස් පුළුස්සා ගෙන කෑමේ ආශාව ද අඩුවී තිබුණි. නැවත ප්‍රතිකාර පිණිස පැමිණි විට ගවේෂකවරයා ඔහු දිෂ්ටි ගැන්වීමට පෙර පෞද්ගලික විස්තර පිළිබඳ සාකච්ඡා කළේය. තමන්ගේ මියගිය ලොකු මාමාට පහර දී පන්නා ගත්තේ යැයි භූතාත්මය කලින් දින පැවසූ කතාවේ සත්‍ය අසත්‍යතාවය ද විමසීය.
“මොකක්ද මේ මාමාට ගහල පැන්නුවා ය කියන කතාව?”
“ඔව් මහත්තයා. අපේ ලොකු මාමා දිනපතාම උදේ හවස අරක්කු බීමට ඇබ්බැහි වුණ කෙනෙක්. දවසක් මගෙන් සල්ලි ඉල්ලගෙන ආවා. මමත් දුන්නා. මේ වගේ දවස් තුන හතරක් ම සල්ලි ඉල්ලගෙන ආවා. මෙයා කළේ ඒ සල්ලි ඉල්ලගෙන ගිහින් දවස පුරා ම අරක්කු බීපු එක. මම ඒ ගැන හොයලා බැලුවා. එයාගෙ ගෙදරිනුත් ඒක ඇත්ත කියලා දැන ගන්න ලැබුණා. මේ අතරේ දවසක් මගේ වැඩ පොළේ නිවාඩු දවසක මමත් අපේ ගෙදර අයත් ගමනක් ගියා. මගේ වැඩ පොළ ලොකු වැඩ පොළක්. ගෙට යාබදවමයි තිබුණේ. අවුරුදු ගාණක් ග්‍රිල් හදලා කැපිලා ඉතුරු වුණ යකඩ කෑලි ගොඩක් තිබුණා. ලක්ෂ ගණනක් වටිනා යකඩ කෑලි. එදා ලොකු මාමා බෝතල් කඩේ ලොරිය ගෙනැල්ලා අර යකඩ කෑලි ගොඩ හොරෙන් ම පටවලා තිබුණා. ලක්ෂ ගණනක් වටිනා යකඩ කෑලි ගොඩ ම රුපියල් පහළොස් දාහකට විකුණලා. එදා මම ගෙදරට ම හොයා ගෙන ගිහින් ගැහැව්වා. ඊට පස්සෙ ලොකු මාමා ආවෙ නෑ. ඊට මාසෙකට දෙකකට පස්සෙ සිරෝසීස් හැදිලා ලොකු මාමා මැරුණා. ඊට පස්සෙ තමයි මමත් බීමට ඇබ්බැහි වුණේ” යි සමරදිවාකර අතීත සිද්ධිය විස්තර කළේය. ගවේෂකවරයා ශක්ති කිරණ එල්ල කොට සමරදිවාකර දිෂ්ටි ගැන්වීය. භූතාත්මය සමඟ කතා කළේය.
“තමුන් බීලා බීලා ජීවිතේ නැති කරගෙන මේ බෑණාවත් නැති කරන්න නේද හදන්නෙ? ඒකට ඉඩ දෙන්න බෑ. මේ ශරීරයෙන් ඉවත්වෙලා යනව ද නැද්ද?”
“බෑ... බෑ... මම යන්නෙ නෑ. යන්නේ ම නෑ” යි භූතාත්මය තදින් ම කීවේය.
“හැබෑ ද එහෙනම් අපි බලමු” යි කී ගවේෂකවරයා ශක්ති කිරණ එල්ල කොට භූතාත්මය දවාලීය.
“පිච්චෙනවා... පිච්චෙනවා... එපා... එපා... අනේ මහත්තයා. පුච්චන්න එපා... මම අසරණයි.”
“එහෙම නම් මේ ශරීරයෙන් ඉවත් වෙලා කරුණාකර පිටවෙලා තමන් කැමැති තැනකට යන්න.”
“බෑ මහත්තයා... මූ මට ගහපු එකට පළි ගන්නේ නැතුව මට යන්න බෑ.”
“ඇයි මෙයා තමුන්ට ගැහැව්වේ?”
“යකඩ ගොඩ විකුණා ගත්තා කියලා.”
“කීයකට විකුණා ගත්තෙ?”
“රුපියල් පහළොස් දාහකට”
“කාට ද වික්කේ?”
“පරණ යකඩ ගන්න බෝතල් කාරයාට”
“ඒ යකඩ ගොඩ කීයක් වටිනව ද?”
“මම දන්නේ නෑ.”
“හොඳයි. තමුන් ඒ කළ හොරකමට බෑණා පොලීසි ගියා ද?”
“නෑ”
“ලක්ෂ ගණනක් වටිනා දේපළ හොරකම් කළා කියලා තමුන්ව පොලීසියට බාර දුන්නා නම් හිරේ විලංගුවේ වැටිලා දුක් විඳින්න තිබුණා නේද?”
“ඔව්”
“ඒ වගේ ලක්ෂ ගණනක් වටිනා යකඩ ගොඩක් තමුන්ට තිබුණා නම් ඒ යකඩ තොගය මේ සමරදිවාකර හොරෙන් විකුණා ගත්තා නම් තමුනුත් මේ බෑණාට ගහන්නේ නැද්ද? පොලීසි උසාවි යන්නේ නැද්ද? තමුන් විශාල පාඩුවක්, වරදක් කරලා තියෙනවා නේද? හොඳට කල්පනා කර උත්තර දෙන්න.”
“ම්... ම්... ම්... ඉහි... ඉහි... ඉහි...” භූතාත්මය හඬන්නට විය.
“හොඳයි මම මේ සමරදිවාකර ලවා සාංඝික දානයක් දී ලොකු මාමාට පින් අනුමෝදන් කරවන්න ද?”
“එපා... එපා... මුගේ සල්ලිවලින් කරන පින්කම් මට එපා” යි භූතයා තදින් ම කීවේය.
“තමුන් යනව ද නැද්ද?”
“හොඳයි මම යන්නම්” යැයි භූතාත්මය ශරීරයෙන් ඉවත්ව ගියේය.
සතියකින් නැවත එන්නැයි ගවේෂකවරයා සමරදිවාකරට උපදෙස් දුන්නේය. ඊළඟ සතියේ පැමිණි විට සමරදිවාකර නැවත දිෂ්ටි ගැන්වීය. ලොකු මාමාගේ භූතාත්මය නැවත ආරූඪ වූයේය. මේ භූතාත්මය බොරු කියන බවත්, ඉවතට නොයන බවත් වටහා ගත් ගවේෂකවරයා ශක්ති කිරණයෙන් දවා පුළුස්සා තදින් ම දුර්වල කොට ශරීරයෙන්ම ඉවතට ඇද දමා පන්නා දැම්මේය. සමරදිවාකරටත් පවුලේ අයටත් ග්‍රිල් වැඩ පොළටත් ආධ්‍යාත්මීය ආරක්ෂාවක් දැම්මේය. මත්පැනට තදින් ගිජු වන, කෑදර වන, බීමට සිත නිතර පොලඹවන ගතියක් ඇති පුද්ගලයන් තමන්ට මළගිය බේබද්දකුගේ බලපෑමක් ඇති බව වටහා ගත යුතු ය. මත්පැනට ගිජුව කෑදරව සිට මියගිය ලක්ෂ කෝටි ගණන් බේබද්දන්ගේ භූතාත්ම මේ විශ්වයේ සැරි සරති. ඔවුන් මිය ගියත් ඒ කෑදරකම ඒ චිත්ත සන්තානවලින් ඉවත්ව නැත. කවුරුන් හෝ කෙනෙකු මත්පැන් පානය කරයි නම් ඔහුගේ ශරීරයට රිංගා ඔහු ලවා මත්පැන් පානය කරන්නට ඒ අමනුස්සයෝ ක්‍රියාකාරකම් කරති.
මතුගම මහින්ද විජේතිලක
උපුටා ගැනීම සිළුමිණ
