බුදු පහන සහ බුද්ධ පූජාව තබන නිවැරැදි පිළිවෙත්
නිසි අයුරු බුදු පහන තැබීමට නම් බුදු පහන තැබීමට පෙර ඔබ පිරිසුදු විය යුතුයි. මස්, මාළු, බිත්තර හෝ වෙනත් පිළී වර්ගයක් අල්ලා ඊට පසුව බුදු පහන අල්ලන්න එපා. බුදු පහන පිරිසුදු විය යුතුයි. බුදු පහනට දමන තෙල් ඉතාම හොඳ තත්ත්වයේ විය යුතුයි. නිසි ලෙස තබන බුදු පහනින් එහි ආලෝකයෙන් සතුටට පත්වන සම්‍යක්දෘෂ්ටික දේව සමූහයා ඔබව ආරක්‍ෂා කරමින් ඔබට පැමිණෙන අපල කරදර, බාධා, විපත්වලින් හා ඔබගේ පවුලේ අයට පැමිණෙන කරදර, විපත්වලින් ආරක්‍ෂා කරනු ලබනවා ඇත. රෝගී බවක් ඇති වුවත් ඉතාම ඉක්මනින් සුවය ලබාදෙයි.නිතරම බුදු පහන තබන විට උදේට බුද්ධ පූජාව තබන්න. උදේට බැරි නම් දවාලට දවල් 12ට පෙර තබා ඔබට කැමැතිම දෙවියන්ට පින් දෙන්න. නැත්නම් ඔබගේ කේන්දරයේ ලග්නාධිපති ග්‍රහයාට හිමි දෙවියන්ට පින් දෙන්න. බුද්ධ පූජාව තබන විටදී හැකි හැම විටම පලතුරු හෝ කැවිලි වර්ගයක් තැබීම කරන්න. ඔබගේ ගෙදරට ගේන පලතුරු වලින් පලමුව කොටසක් වෙන් කරන්න. කෙසෙල් ගෙඩි නම් එයින් ගෙඩි 2ක් වෙන්කර පිරිසුදු භාජනයක තබන්න. අඹ ගේන විට වැඩිපුර අඹ ගෙඩියක් ගේන්න. අන්නාසි හෝ ගස්ලබු නම් එයින් පළමුව කෑල්ලක් වෙන්කර තබන්න. හැබැයි රාත්‍රියට කපාගෙන කන දේ නම් උදේට තබන්න එපා. උදේ කෑමට ගන්න පලතුරු වලින්ම වෙන් කරන්න. හැකි හැම විටම නැවුම් බවින් යුතුව පලතුරු තැබීමට පුරුදු වන්න. කැවිලි වර්ග වුණත් ගෙදරට ගෙනෙන දෙයින් පළමුව බුද්ධ පූජාවට වෙන් කර පිරිසුදු භාජනයක දමාගන්න. ඔබ ගෙදරට ගේන කැවිලි වර්ග වල තල කැරලි, මාස්මෙලෝස්, කැවුම්, අතිරස ආදී කොයි දේ වුවත් එයින් කොටසක් වෙන් කරන්න. අයිස්ක්‍රීම් හෝ මී කිරිවලින්ද පළමුව කොටසක් වෙන්කර ශීතකරණයේ තබන්න. දැන් බලන්න අමතරව කිසිම වියදමක් නොමැතිව බුද්ධ පූජාවට අතුරුපස වෙන්වූ හැටි. බුද්ධ පූජාව තබන භාජන වෙනමම තබා ගන්න. විශේෂ කරුණ නම් බුද්ධ පූජාවට බත් බෙදන විට එය අතින්ම සැකැසීමට බලනවා. බත් වැනි දේ අතින් අල්ලන්න එපා. හැඳි වර්ග පාවිච්චි කරන්න. (ඉඳුල් වීම සිදුනොවිය යුතුයි) මේ උතුම් වූ බුද්ධ පූජාව මුළු ලොවම සනසාලූ උතුම් ගෞතම බුදුරජාණන් වහන්සේට පූජා වේවා කියා සැහැදැවත් සිතින් මෙනෙහි කරමින් බුද්ධ පූජාව සකසා ගන්න.
ඔබ තබන බුද්ධ පූජාව හැම විටම හිතේ සතුටින්ම තබන්න.මෙන්න මේ දේ හොඳට ධාරණය කරගන්න. ලොව්තුරා බුදු රජාණන් වහන්සේගේ මහා දාන පාරමිතාව කල්ප ගණන් පෙරුම් පිරූ මහා දාන පාරමිතා ගුණ බලය ගැන සිතන්න.තව විශේෂ වූ දෙයක් ඇත. ඔබ දුප්පත් වුවත් පෝසත් වුවත් සිතේ බල මහිමය එකයි. ලොව්තුරා බුදුරජාණන් වහන්සේත් බුද්ධත්වය ලබන්නට පෙර අධිෂ්ඨානයක් කළහ. එය අධිෂ්ඨානයක් වුවත් අධිෂ්ඨාන කරන්නට තමා තුළ සත්‍ය තිබෙන්නට අවශ්‍ය වෙයි. බුද්ධත්වය ලබන්න පෙර දන් වැළඳූ පාත්‍රය උඩුගම් බලා යේවායි අධිෂ්ඨාන කළෝය. අපටද ප්‍රාර්ථනා අධිෂ්ඨාන අනන්තවත්ව තිබේ. නමුත් විශ්වයේ බලය ලබන්න නම් අපට සත්‍යයේ බලය අවශ්‍යම වෙයි. මේ ලෙස පත්තිනි දේවියත් තම ස්වාමියා වෙනුවෙන් සත්‍ය ක්‍රියා කළාය. ඒ තම පති භක්තියේ සත්‍ය බව ඔප්පු කරමිනි. බුදු පහන තබන විට පළමුව පන්සිල් ගෙන ඉතිපිසෝ ගාථාව 7 වරක් කියන්න. සබ්බ පාපස්ස ගාථාව 7 වරක් කියන්න. ඉතිපිසෝ ගාථාව තුළ නව අරහාදී බුදුගුණ සත්‍ය පවතිනවා. සබ්බ පාපස්ස ගාථාව තුළ කුසලයෙහි පිහිටීම සත්‍ය තිබෙනවා. මේලෙස කාලයක්ම කරන විට දින, සති, මාස ගෙවෙන විට ඔබට තිබෙන අපල අගුණ, කරදර අඩු වෙනවා. එපමණක් නොවේ ඔබගේ පවුලේ සැමගේ දරුවන්ගේ අපල අගුණ දෝෂ පවා දරුවන බව ඔබටම වැටහෙනු ඇත.
මව්බිම
