සුරාපානයෙන් බොහෝ කරදර පැමිණේ
මානව සමාජයේ යහපත උදෙසාත් ප්‍රීතියෙන් හා බියක් සැකක් නොමැතිව ජීවත් වීම උදෙසාත් දේශනා කළ පංචශීල ප්‍රතිපදාවට අයත් සුරාමේරයෙන් වැළකීමේ සික්ශා පදය ආරක්ෂා කිරීමට සෑම කෙනෙකුම ඇප කැප විය යුතුය.
මත්ද්‍රව්‍ය වශයෙන් රා, අරක්කු, ආදි පාන වර්ග බීමද, දුම් වර්ග බීමද, කෑම වර්ග කෑමද යන සියල්ල මත් වන දේවල් වශයෙන් ගැනීමට පුළුවන. සුරාපානය යන වචනය තුළ ඒ සියල්ල අන්තර්ගත වන අතර එතුළින් මනුෂ්‍යයාගේ ප්‍රකෘති ස්වභාවය නැතිකොට විකෘති ස්වභාවයකට පත් කිරීමට එම දේවල් තුළට හැකියාවක් ඇත. බුද්ධ දේශනාව අනුව ගත් කළ සුරාපානය යන වචනය තුළ මත්ද්‍රව්‍ය යන වචනය සම්බන්ධ කොට ඇත. එනිසාම පංච ශීලය තුළ පස්වන සික පදය වන්නේද එයයි. “සුරාමේරය මජ්ජපමාදට්ඨානා වෙරමණී සික්ඛාපදං සමාදියාමි” (මම ප්‍රමාදයට හේතුවන මත්ද්‍රව්‍යවලින් වැළකීමේ සික පදය සමාදන් වෙමි) යනුවෙන් බෞද්ධයාගේ නිත්‍ය ශීලය තුළ සුරාපානයෙන් වැළකීමේ ස්වභාවය නොහොත් සමාජ යහපත උදෙසා චර්යාමය වෙනසක් ඒ තුළ අවශ්‍ය බව අන්තර්ගත කොට ඇත. සුරාපානයේ සමාරම්භය පිළිබඳ සොයා බැලීමේදී ජාතක පොත් වහන්සේ තුළ ඇතුළත් 504 වෙනි “කුම්භ ජාතකය” ඉතා වැදගත් වේ. ඒ තුළින් පැහැදිලි වන්නේ බරණැස් නුවර බ්‍රහ්ම දත්ත රජ සමයේ එක්තරා “සුර” නම් වූ වැද්දෙක් ගස් දෙබලක රැඳී තිබුණු පල්වතුර බී එයින් මත්ව එහි සිටි “වර්ණ” නම් තපස් කෙනෙකුටද ඒවා පානය කරන්නට දීමත් ඉන් පසු එම තාපසයාද ඒවා පානය කොට මත්වීමේ කතා පුවතකි. එයින් පසු ඔවුන් දෙදෙනා එම පල් වූ වතුර භාජනවල දමාගෙන නගරයටද ගෙන ගොස් බොහෝ දෙනාට ඒවා අලෙවි කොට මුදල් ලබා ගත්හ. එරට රජුද එය දැන සුරාව පානය කොට විසාල සැලිවල එම වැද්දාට කියා සුරාව සැකසූ අතර පසුව රට පුරා සුරාව පැතිර ගියේය. එහි අවසාන ප්‍රතිඵලය වූයේ බරණැස, සාකේත, සැවැත්නුවර රට වැසියෝ හැමකෙනෙකුම සුරා පානය කොට අන් සියලු කටයුතු අතපසු කොට මුළු මහත් රටේම අන්ත දිළිඳු බවට පත් කර ගැනීමය.
මෙම කතා පුවතින් සුරාව පිළිබඳ අතීතයට නෙත් යොමු කිරීමට පුළුවන් කමක් ඇත. සුරාපානය යනු මත් වන ද්‍රව්‍යයක් බව අමුතුවෙන් කිවයුතු නැත. සුරාපානය තුළින් සත්වයාට වන හානිය බුදුරදුන් සිඟාලෝවාද සූත්‍රය තුළින් දේශනා කොට ඇත. එහි සුරා පානය නොහොත් මත්ද්‍රව්‍ය භාවිතය තුළින් වන විනාශය දක්වා ඇත. එනම්,
- මේ ආත්මභාවයෙහිදීම ධනය විනාශ වීම.
- කෝලාහල ඇතිවීම.
- රෝග පීඩාවන්ට ගොදුරු වීම.
- අපකීර්තිය ඇතිවීම.
- ලජ්ජා නැතිව හැසිරීම.
- නුවණ දුර්වල වීම.
පරාභව සූත්‍රය තුළ දැක්වෙන ගාථා අතර 16 වෙනි ගාථාව වන්නේ.
ඉත්ථිධුත්තෝ සුරාධුත්තෝ
අක්ඛධුත්තෝච යෝ නරෝ
ලද්ධං ලද්ධං විනාසේ
තීතං පරාභවතෝ මුඛං
යම් මිනිසෙක් ස්ත්‍රීන් කෙරෙහි ලොල් වේද, සුරාවෙහි ලොල් වේද, දූ කෙළියෙහි ලොල් වේද, ලද ලද දෙය වනසයිද එය පිරිහීමට කාරණය වේ යනුවෙනි. සුරාව යනු කෙනෙකුගේ මුළු ජීවිතයම විනාශ කර ඔහු ප්‍රපාතයට ඇද දමන විෂබීජයකි. ඉතිහාසය ගත් කළ අපේ රටේ මිනිසුන් පංචශීල ප්‍රතිපත්ති ඔස්සේ ජීවිතය පවත්වාගෙන ගිය අයුරු ඉතා පැහැදිලිය. නමුදු විදෙස් සංක්‍රමණත් සමඟ ඔවුන්ගේ ආභාෂය මත අපේ රටේ බෞද්ධයින් පවා මෙවැනි අධාර්මික පිළිවෙත්වලට යොමු වූ ආකාරය කීමට පුළුවන. වර්තමාන සමාජය තුළ මංගල්‍ය, අවමංගල්‍ය,පොදු සමාජ උත්සව, සමිති සමාගම් ආදි බොහෝ තැනකම මත්ද්‍රව්‍ය අත්‍යවශ්‍යම කාරණය වී ඇත. සමහර අවස්ථාවලදී දරුවන් ඉදිරියේදි මාපියන් මත්ද්‍රව්‍ය භාවිතා කරති. දුවගෙ පුතාගෙ උපන්දින සාද පවත්වන්නේද මත්ද්‍රව්‍යයන් සමඟය. එනිසා බුදු හිමි දේශනා කළ කරුණු කාරණාවන් සමඟ සැසඳිමේදී මත්ද්‍රව්‍ය පුද්ගලයාගේ මෙලොව පරලොව යන දෙඅංශයටම ඍජුවම බලපාන කාරණයකි. තමන්ටත් අනුන්ටත් විපත් කැඳවන්නකි. විකෘති වූ මනසකට නොකළ හැකි දෙයක් නොමැත. ලෝකය සමාජය දෙස බැලීමෙන් පැහැදිලි වන්නේ බොහෝ දූෂණ, භීෂණ, අපරාධ සිදු වන්නේ මත්ද්‍රව්‍ය භාවිතයත් සමඟය.
උම්මත්තා විගත ලජ්ජ ගුණා භවන්ති
දීනා සාදා ව්‍යසන රෝග පරායනා
චජාතා භවේසු විවිධෙසු විරූපදෙහා
පීත්වා හලාහලවිසං ව සුරා විපඤ්ඤා
“නුවණ නැත්තා වූ පුද්ගලයෝ හලාහල විෂයක් බඳු වූ සුරාව පානය කොට අනාගතයෙහි උම්මත්තකයෝ වන්නාහ. ලජ්ජා ගුණය නැත්තේ වන්නාහ. දිළින්දෝ වන්නාහ. සෑම කල්හි නොයෙක් ව්‍යසන හා නොයෙක් රෝග ඇත්තෝ වන්නාහ. නොයෙක් ජාතිවල උපන්නාහු විරූප ශරීර ඇත්තෝ”
යනු එහි තේරුමයි. ඉන් පැහැදිලි වන්නේ සුරා පානය කිරීම තුළින් මෙලොවදීම සත්වයා පිරිහෙන ආකාරයයි. එය තමන්ට අයහපත පිණිසම පවතී. එපමණකුදු නොව අන්‍යයන්ගේ විපත පිණිසද හේතුවේ. සුරාපානය තුළින් මරණයෙන් පසු වුවද දුක් විඳීමට සිදුවන අයුරු දේශනා කොට ඇත. ඒ අනුව
සුරාමේර පානං භික්ඛවේ හෝති
තිරච්ඡාන යොනි සංවත්තනිකං හෝති
පෙත්ති විසය සංවවත්තනිකං හෝති
යො සම්බලහුසො සුරාමේරය පානස්ස විපාකො
මනුස්ස භූතස්ස උම්මත්තක සංවත්තනිකා හෝති
“මහණෙනි සේවනය කරන ලද්දා වූ වඩනා ලද්දා වූ බොහෝ කොට කරන ලද්දා වූ සුරාමේරය පානය නරකයෙහි ඉපදීම පිණිස පවත්නේ වේ. තිරිසන් යෝනියෙහි ඉපදීම පිණිස පවත්නේ වේ. පේ‍්‍රත විෂයෙහි ඉපදීම පිණිස පවත්නේය. සුරාමේරය පානය කිරීමේ ඉතාම අල්ප විපාකයාගේ වශයෙන් මිනිස් ලොව උපන්නහුට උමතු බව ඇති කරන්නේ වේ”.
මේ ආදි වශයෙන් බුදුරදුන් සුරාපානයෙහි විපාක මෙලොව වශයෙනුත් පරලොව වශයෙනුත් ලැබෙන අයුරු දේශනා කොට ඇත. සුරාපානය මදයටත් මදය අකුසලයටත් අකුසලය අපායෝත්පත්තියටත් හේතු වන බැවින් එයින් වැළකීම ඉතා ප්‍රයෝජනවත් වේ. සුරාපානය නොකිරීමෙන් බොහෝ අකුසල් දුරුකර ගැනීමේ ශක්තිය ඇත. සුරාපානය කළාට පසු සිතින් කයින් වචනෙන් සිදුවන අකුසලත් සමඟ එය අපායෝත්පත්තියට හේතුවක් බව වටහා ගත යුතුය. වෛද්‍ය විද්‍යාවට අනුව වුවද සුරාපානය නිසා ඇතිවන බොහෝ රෝගාබාධ හඳුනාගෙන ඇත. ඒ අනුව සිතුවද ඉන් වැළකීමට අපහසු නැත. ඒ අනුව සුරාපානය එතරම් සුබ දෙයක් නොවේ. විනෝදයට හෝ සිතේ දුකට හෝ ප්‍රශ්න ගැටලු නිරාකරණය කර ගන්නා අදහසින් හෝ සුරාපානය කළද එහි විපාක ඉතා බරපතළය. මානව සමාජයේ යහපත උදෙසාත් පී‍්‍රතියෙන් හා බියක් සැකක් නොමැතිව ජීවත්වීම උදෙසාත් දේශනා කළ පංචශීල ප්‍රතිපදාවට අයත් සුරාමේරයෙන් වැළකීමේ සික පදය ආරක්ෂා කිරීමට සෑම කෙනෙකුම ඇප කැප විය යුතුය. සෑම ආගමක් තුළින්ම ඒ පිළිබඳ අඩු වැඩි වශයෙන් කරුණු ඉදිරිපත් කර ඇත්තේ මිනිසාගේ යහපත උදෙසාය. ඉහත කරුණු පිළිබඳ සිතා ඉන් වැළකීම හා අන්‍යයා ඉන් වළක්වා ගැනීමට සෑම පියවරක්ම ගත යුතුය. ඒ තුළින් රටක සමාජයක ජීවත් වන්නන්ට සමගියෙන් සහජීවනයෙන් ජීවත්වීමට අවශ්‍ය පරිසරයක් ගොඩනැගෙනවාට කිසිදු සැකයක් නැත.
කොබෙයිගනේ පුබ්බිලිය ශ්‍රී සාරානන්ද පිරිවනෙහි ආචාර්ය මාස්පොත ශ්‍රී ගංගාරාම විහාරවාසී ගලගෙදර රතනවංශ හිමි
උපුටා ගැනීම බුදුසරණ
