ආයුෂ, රෝග පීඩා, හදිසි අනතුරු, ජය, පරාජය පෙන්නුම් කරන ජීවන රේඛාව
එක් එක් පුද්ගලයින්ගේ අත්ල මත සුවිශේෂවූ ලක්ෂණ දැකිය හැකි අතර තම උපතේ සිට ගෙන එන ලද පිං පව් සේම මෙම සුවිශේෂ ලක්ෂණ ද වෙනස්වීම්වලට භාජනය නොවේ. එක් එක් පුද්ගලයන්ට අනන්‍යවූ ලක්ෂණ මේ තුළින් දැකිය හැකි අතර එමඟින් ඔහුගේ හෝ ඇයගේ ගතිගුණ චරිත ලක්ෂණ මෙන්ම ජීවිතයේ හැම සිදුවීමක් පිළිබඳවම දැන ගත හැක.
සියලුම රේඛා ප්‍රධාන රේඛා සහ අප්‍රධාන රේඛා වශයෙන් කොටස් දෙකකට බෙදෙයි. ඒ අතරින් ප්‍රධාන රේඛා පිළිබඳවයි පළමුව විස්තර කරන්නේ. ප්‍රධාන රේඛා හයක් දැකිය හැකි අතර ඒවා ජීවන රේඛාව, ශීර්ෂ රේඛාව, හෘදය රේඛාව, දෛව රේඛාව, කීර්ති රේඛාව හා සුඛ රේඛාව යනුවෙනි. මේ අතරින් අත්ලේ ප්‍රධාන රේඛාව ජීවන රේඛාවයි. මෙම රේඛා ආරම්භ වන්නේ කොතනින්ද අවසන් වන්නේ කොතනින් ද යන්න පළමුව දැනුවත් විය යුතුයි.
රූප සටහනේ ප්‍රධාන රේඛා හය ලකුණු කර ඇති ආකාරය දැන් පරීක්ෂා කරන්න. ඒ හැම රේඛාවකටම රේඛාවේ මුල් අකුරු යොදා ඇත. (ජීජී), (ශීශී), (හහ), (දෛ දෛ), (කීකී), (සුසු) යනුවෙනි. දැන් අපි ජීවන රේඛාව පිළිබඳව කතා කරමු. රූප සටහනේ ජීජී අක්ෂරවලින් ලකුණු කර ඇත්තේ ජීවන රේඛාවයි. දබරඟිල්ල හා මහපටඟිල්ල අතරින් පටන්ගෙන සිකුරු මණ්ඩලය හා පහළ කුජ මණ්ඩලය වටකර මැණික් කටු සන්ධිය දක්වා විහිද යන රේඛාවටයි ජීවන රේඛාව කියන්නේ. මෙය ජීවන රේඛාව ලෙස හැඳින්වූවත් මෙයින් කෙනෙකුගේ ආයුෂ පමණක් නොව ජීවිතය පිළිබඳ වැදගත් කරුණු රාශියක් එමඟින් දැනගත හැකිය. කෙනෙකුගේ ආයු කාලය, සෞඛ්‍ය තත්ත්වය, රෝග පීඩා, මාරක බාධා ඇතිවන කාලවකවානු, ජීවිතයේ ජයග්‍රහණ හා පරාජයන් ආදී ජීවිතයේ සුවිශේෂ සිදුවීම් යනාදී බොහෝ දේවල් ද ජීවන රේඛාවේ පිහිටීම තුළින් අනාවරණය වෙයි. බාධක රේඛාවලින් තොරව නොකැඩුණාවූ ද, ගැඹුරු වූ ද රෝස පැහැයෙන් යුතු ජීවන රේඛාව විශේෂයෙන් ශුභ පළදායකය.
වම් අතේ ජීවන රේඛාවෙන් පරම්පරා ගතව පැවත එන රෝග පීඩා, ගතිගුණ, සිතුම් පැතුම්, ශරීර ශක්තිය ආදිය ප්‍රකාශ කළ හැකි අතර දකුණු අතේ ජීවන රේඛාවෙන් හදිසි ධන ලාභ, කලින් කල ඇතිවන රෝග පීඩා, සැප දුක් ආදිය ප්‍රකාශ කළ හැකිය. තමන්ගේ උත්සාහය හා උදාසීනත්වය අනුව මෙම රේඛාවන් ප්‍රබල හෝ දුබල විය හැකිය.
(1) ගුරු මණ්ඩලයෙන් මෙම රේඛාව පටන් ගැනීම වඩාත් සුබදායක ලෙස සැලකේ. ඒ අනුව ජීවිතයේ මුල් අවධිය (ළමා කාලය) පෙන්නුම් කරන්නේ ගුරු මණ්ඩලයේ පහළ කොටසිනි. මෙම කොටස ඇතැම් අයගේ අපැහැදිලි ආකාරයෙන් (දම්වැල් ආකාර, දූපත් ලකුණු ඇතිව) දැක ගත හැකිය. ඒ අනුව ඔහු හෝ ඇය කුඩා කාලයේ ගත කළ කටුක දිවිය රෝග පීඩාදියෙන් දුකට පත්ව සිටි බැව් ප්‍රකට වේ. රේඛාව ආරම්භයේ පැහැදිලි ආකාරයෙන් තිබීම සුභ වේ. ඇතැම් අයගේ ජීවන රේඛාව හා ඒ ළඟම ඇති ශීර්ෂ රේඛාවන් (ශීශී) එක තැනකින් පටන් ගනී. එවැනි අය බොහෝ විට තර්කානුකූලව කතාකරන තීක්ෂණ බුද්ධියත් ඇති සංවේදී පුද්ගලයෝ වෙති.
අත්ලේ හැඩයෙන් හා වර්ණයෙන් හෙළිවන රහස්
සමුද්‍ර නම් ඍෂිවරයා භාරතයට හඳුන්වා දුන් සාමුද්‍රික ශාස්ත්‍රය හෙවත් හස්ත රේඛා විද්‍යාව මේ වනවිට ලොව පුරා ප්‍රචලිතව ඇත. විවිධ දේශයන්හි ඇති විවිධ විද්‍යා විධි නියමයන්ට අනුකූල ලෙස විකාශනය වෙමින් පවතින මෙම හස්ත රේඛා විද්‍යාව ලොව පුරා බොහෝ දෙනකුගේ පිළිගැනීමට ලක්වුණ පුළුල් විෂයයක් ලෙස ගෞරවයට පත්ව ඇති බව කිව යුතු නොවේ. එවැනි වැදගත් ශාස්ත්‍රයක් පිළිබඳ දැනුමක් ලබාදීමයි මෙම ලිපියේ අරමුණ. පළමුවෙන්ම අපේ අත්ලේ පිහිටීම පිළිබඳව සලකා බලමු.
එක් එක් පුද්ගලයින්ගේ අත්ල මත සුවිශේෂවූ ලක්ෂණ දැකිය හැකි අතර තම උපතේ සිට ගෙන එන ලද පිං පව් සේම මෙම සුවිශේෂ ලක්ෂණ ද වෙනස්වීම්වලට භාජනය නොවේ. එක් එක් පුද්ගලයන්ට අනන්‍යවූ ලක්ෂණ මේ තුළින් දැකිය හැකි අතර එමඟින් ඔහුගේ හෝ ඇයගේ ගතිගුණ චරිත ලක්ෂණ මෙන්ම ජීවිතයේ හැම සිදුවීමක් පිළිබඳවම දැන ගත හැක. අත්ල පරීක්ෂා කිරීමේදී පුරුෂයෙකුගේ දකුණු අත්ලත් ස්ත්‍රියකගේ නම් වම් අත්ලත් පරීක්ෂා කළ යුතු බව ඇතැමුන් තුළ මතයක් පවතී. තවත් තැනක දැක්වෙන්නේ පුරුෂයෙකුගේ වම් අත වැඩි භාවිතයක් වේ නම් වම් අතද, ස්ත්‍රියකගේ දකුණු අත වැඩි වශයෙන් භාවිත වන්නේ නම් දකුණු අත පරීක්ෂා කළ යුතු බවය. කෙසේ වුවද බොහෝ දෙනෙකුගේ මතය වී ඇත්තේ ස්ත්‍රි පුරුෂ භේදයකින් තොරව අත්දෙකම පරීක්ෂා කළ යුතු බවය. කෙනෙකුගේ අත්ල රෝස පැහැයෙන් යුක්ත නම් රේඛා පැහැදිලිව දිස්වේ නම් ඉතාමත් වාසනාවන්තය. ප්‍රසන්න වූ පෙනුමකින් යුක්ත කරුණාව, දයාව ඇති යහපත් ගතිගුණවලින් හෙබි එවන් අය සතුටින් විනෝදයෙන් කල් ගෙවන්නෝය. ඔවුන් වාසනාවන්ත විවාහ ජීවිතයකට ද හිමිකම් කියයි. යමෙකුගේ අත්ල තද ගතියකින් යුක්තව කහ පැහැ වර්ණයෙන් යුක්ත වූයේ නම් හෙතෙම පිත්තාධික ශරීරයක් අත්තාවූද, එසේම අශෝභන සිතිවිලිවලින් යුතු අයෙකු ද වෙයි. අන්‍යයන්ගේ දියුණුව නුරුස්සන, එසේම ඔවුන් දියුණු වීමට කොතෙක් උත්සාහ කළත් පළක් නොවන එම ලකුණුවලින් ප්‍රකට වේ. සුදු පැහැයෙන් යුතු වීමද අසුභය. සමාජයෙන් ඈත්ව සිටීමට හැමවිටම උත්සාහ කරන ඔවුන් ද වාසනා ගුණයෙන් හීනය. අත්ල කළු පැහැයෙන් යුතු අයෙක් නම් හේ ආත්මාර්ථකාමී අයෙක් විය යුතුය. නිතර මුසා බස් තෙපලන ඔවුන් තම දක්ෂතා සියල්ලම අයහපතට යොදවන්නෙකු වේ. අත්ල රත්ත වර්ණයෙන් යුක්තවී නම් සම්පත් නොඅඩුව ලබන්නෙකු වන අතර අත්ල නිල්වන් පැහැයෙන් යුක්ත වූයේ නම් මත්ද්‍රව්‍ය නිසා ජීවිතය මෙන්ම තම වස්තුව ද විනාශ කරගන්නෙකු වෙයි. අත්ල පිරුණ මස් සහිතව සමතලා ලෙස වැඩී තිබීම ත්‍යාගශීලී බව පෙන්නුම් කිරීමකි. අත්ල තුනී නම් එය දෙමාපිය උරුමයක් නොලබන අයෙකුගේ ලක්ෂණයක් වන අතර අත්ල නොගැඹුරු වටකුරුව ඇත්තේ නම් එම උරුමයන් හිමි අයෙකු වේ. එමෙන්ම දියුණු මනසකට හා සංවේදී ජීවන චරිතයකට හිමිකම් ඇති අයට හතරැස් හැඩයකින් යුත් අත්ලක් හිමිය.
පිළිවෙළකට නොමැති අත්ල හිමි අයගේ ජීවිතය අවාසනාවන්තය. දූපතක සලකුණක් අත්ලේ රේඛා මත හෝ ග්‍රහ මණ්ඩලයක් මත සලකුණු වීම ද සුභ නොවේ. ජීවන රේඛාව මත මෙම දූපත ලකුණු පෙන්නුම් කරයි නම් ශරීරයේ කොතනක හෝ ඇතිවන ආබාධයක් පෙන්නුම් කරයි. ඒ අයුරින් ශීර්ෂ රේඛාවේ නම් ශීර්ෂාබාධද, හෘදය රේඛාවේ නම් හෘදය වස්තුවේ රෝග ද ප්‍රකට කෙරේ. ධන රේඛාවේ දූපත් සලකුණක් වී නම් ආදායම් තත්ත්වයේ පහත වැටීමක් වන අතර එය කීර්ති රේඛාවේ නම් තම ආත්ම ගරුත්වයට කැළලක් වන බව ද පෙන්නුම් කරයි. කවයකට සමාන සලකුණක් අත්ලේ කුමන තැනක පිහිටියත් එයද අවාසනාවන්තය. විශේෂයෙන් චන්ද්‍ර මණ්ඩලයේ කවයක සලකුණක් හෝ කතිර සලකුණක් පිහිටියේ නම් ජලයෙන් සිදුවන අනතුරක් ප්‍රකට කෙරේ.
නෙළුමක පැහැයෙන් යුතු රත් පැහැති රේඛා සහ නොකැඩුන නොකැපුණු රේඛා පිහිටීම ධනය හා වාසනාව පෙන්නුම් කරයි. රේඛා කාලවර්ණ වීම ප්‍රධාන රේඛා මැකීයාම අවාසනාවන්තය. විශේෂයෙන් ජීවන රේඛාව කෙළවර මැකී යන ස්වභාවයක් පෙන්නුම් කරයි නම් ලෙඩ රෝගවලින් ප්‍රවේශම් වීම වැදගත් වේ.
ස්ත්‍රියකගේ අත්ලේ මාළුවෙකුගේ රුවක් හෝ නෙළුම් මලක සටහනක් විiමාන වේ නම් එය ද ඉතා වාසනාවන්තය. පිරිමි දරුපල එමගින් පෙන්නුම් කරන අතර අත්ලේ දක්ෂිණාවෘත කවාකාර සටහනක්, ඊතලයක සටහනක් හෝ වේ නම් ඇයට රජ බිසවකට සමාන යස ඉසුරු හිමි වේ. යම් ස්ත්‍රියකගේ අත්ල කොට ද මනා හැඩහුරුකමින් යුක්ත ද, රතු පාටින් දිලිසෙයි ද, කැපීගිය රේඛාවක් නොමැති රේඛාවන් කීපයකින් පමණක් යුක්ත ද එම රේඛාවන් පළල්ව පැහැදිලිව අත්ලේ මැද දෙසට ඒවා විහිදී පවතී නම් එම කාන්තාව ඒකාන්තයෙන්ම සමාජයේ ගෞරව ලබන උතුම් වූ මහා හේතු සම්පත්තියෙන් යුත් තැනැත්තියක් වන්නීය. ඇය ධනයෙන් හා වාසනාවෙන් ද යුක්ත වන බව සාමුද්‍රිත විද්‍යාවේ පෙන්නුම් කර ඇත.
උපුටා ගැනීම දිවයින
