සිය දිවි හානිකර ගැනීම අත්ලේ සටහන් වන්නේ මෙහෙමයි
සමාජයේ නොයෙක් අවස්ථාවන්හි පුද්ගලයන් සියදිවි හානි කරගත් අවස්ථාවන් අපට අහන්න දකින්න ලැබෙන අතර, එසේ ඔවුන්ට සියදිවි හානිකර ගැනීම සඳහා විවිධ ආකාරයේ ගැටලු මුල් වී ඇති බවද අපට පෙනෙන්නට තිබේ. ආදර සම්බන්ධතා අහිමිවීම, අනියම් සම්බන්ධතා, නීති ප්‍රශ්න, ආර්ථික ප්‍රශ්න, රෝගාබාධ වැනි නොයෙක් ආකාරයේ ගැටලු මේ සඳහා මුල් වන අතර, ගැටලුව කුමක් වුවත් සියදිවි හානි කර ගැනීම සඳහා විවිධාකාර ක්‍රමවේදයන්ද මොවුන් උපයෝගි කර ගන්නා බව පෙනෙන්නට තිබේ. කෙසේ වුවත් සාකච්ජා කිරීමට අමිහිරි නමුත් ඔබගේ හිතවතා, ඥාතියා, දරුවන් ඒ සඳහා යොමුවීම වැළැක්වීම සඳහා පරිසරය නිර්මාණය කිරීම වෙනුවෙන් සිය දිවි හානි කරගැනීමක් අත්ලක සටහන් වන ආකාරය සලකා බැලීම උචිත බව හැඟේ.
පුද්ගලයකු සියදිවි හානි කර ගැනීම යන්න සඳහා විවිධ අර්ථ කථනයන් ඉදිරිපත් කර ඇති නමුත් එය සිදුවීමට ප්‍රථම එම පුද්ගලයාගේ අත්ල පරික්ෂා කිරීමෙන් ඔහු එවැනි ක්‍රියාවළියකට යොමු වන බව හෝ නොවන බව ඉතා පැහැදිලිව තීරණය කළ හැක.
විශේෂයෙන් මෙහිදී කිවයුතු කාරණය වන්නේ අත්ලේ පවතින එක් රේඛා ලක්ෂණයකින් දෙකකින් පමණක් පුද්ගලයකුගේ සියදිවි හානිකර ගැනීම හඳුනාගත නොහැකි බවයි. එනම් අත්ලේ පවතින ලක්ෂණ කිහිපයකින් එවැනි වූ ක්‍රියාවලියක් නිශ්චිතවම හඳුනාගත හැකි වන අතර, මෙහිදී පුද්ගලයකුගේ ශීර්ෂ රේඛාව ගැන විශේෂයෙන් අවධානය යොමු කළ යුතුය. ඕනෑම පුද්ගලයකුගේ මනසේ දිශානතිය පෙන්වන රේඛාව වන්නේ ශීර්ෂ රේඛාව වේ. මේ රේඛාවෙ හැසිරීමේ ස්වභාවය මත ඔහුගේ බුද්ධි මට්ටම එනම් ඔහු ලෝකය දකින ආකාරය, මානසික තත්ත්වය, ආකල්ප සහ කල්පනා කිරීමේ ශක්තිය ආදි මානසික ක්‍රියාකාරිත්වයන් හඳුනා ගත හැකිය. මෙහිදී ශිර්ෂ රේඛාව වක්‍රාකාරව චන්ද්‍ර මණ්ඩලය වෙත ගමන් කරන අතර, මෙහි අසාමාන්‍ය අවස්ථාව වන්නේ රූපයේ දිස්වන ආකාරයේ ශීර්ෂ රේඛාව චන්ද්‍ර මණ්ඩලයට පහළින් ඇතුළුවීමයි. කෙසේ වුවත් ශීර්ෂ රේඛාව වැඩිපුර වක් වු තරමටම පුද්ගලයා පරමාදර්ශී වෙයි. අධික ලෙස සිතන අතර සීමා රහිත ලෙස චිත්ත රූප මවයි. ඒ නිසා දරා ගත නොහැකි සිතිවිලි සම්භාරයක පුද්ගලයා සිරවෙන අතර, ඔවුන් අතාත්වික පුද්ගලයන් ලෙස හැඳින්විය හැකිය. මොවුන්ගේ චන්ද්‍ර මණ්ඩලයද හොඳින් වැඩී තිබේ. විශේෂයෙන් එහි යට කොටස ඉතා ප්‍රබලය.
තවද ශීර්ෂ රේඛාව සහ ජීවන රේඛාව ඉතා තදින් බැදී පවතීනම් මේ තත්ත්වයන් එනම් ඔහුගේ සිතුම් පැතුම් රෝගියකුගේ උස්සන්න වූ රෝගයකට සමාන වෙයි. තමාගේ මේ බහුල චිත්ත රූප මැවීම හේතු කොටගෙන කිසිම වැදගම්මකට නැති පුද්ගලයකු බවට පත්වෙයි. එසේම ප්‍රායෝගික ක්‍රියාවන් හෝ කාර්යයන් කිරීමට ඔහු තුළ ඇති හැකියාවන් අඩපණ වේ. එසේම ප්‍රබල ශනි මණ්ඩලයක් සහිත වීම තුළද ඉහත දැක්වුණු ලක්ෂණ ක්‍රියාත්මක විය හැකිය. ජීවත්වීම අර්ථ ශූන්‍ය කටයුත්තකැයි ඔවුන් තීරණය කරනු ඇත. තවද එවැනි පුද්ගලයන්ගේ ගුරු මණ්ඩලයද සම්පුර්ණයෙන් දුබලව පවති. ගුරු මණ්ඩලය ප්‍රබලව සියදිවි හානි කර ගැනීමේ ලක්ෂණ නොමැතිව පිහිටා ඇත්නම් ඔහුට ජීවිත කාලය පුරා ආශා සම්භාරයක් වැදගත් තීරණ ගැනීම් හා වැදගත් සැලසුම් බහුලත්වයක් ඔහු සිත තුළ විරාජමානව ඇති නමුත් ගුරු මණ්ඩලය දුබලව සියදිවි හානි කර ගැනීමේ ලක්ෂණ ඇත්නම් ඉහත කී ගුණාංගයන් ගේ ප්‍රතිවිරුද්ධ ගුණාංගයන් ඔහු තුළ ඇත. එසේම බොහෝ විට හෘද රේඛාවද මෙහිදී නොසලකා හැරිය නොහැකිය. දිග හෘද රේඛාවක් පිහිටි පුද්ගලයා අන් අය කෙරෙහි ලොකු බලාපොරොත්තු තබා ගනී. සමහර විට එවැනි බලාපොරොත්තු ඔවුන්ගෙන් ඉටු නොවූ විට ඔහුට හෝ ඇයට බලවත් සංවේගයක් ඇතිවේ.
එසේම ශනි මුදුව ද පිහිටා තිබීමද එතරම් හොඳ ලක්ෂණයක් නොවේ. ශනි මුදුව සහිත පුද්ගලයා කියන කරන කටයුත්තක් සාර්ථක නොවේ. කිසිම කටයුත්තකින් ලැබීමක් හෝ එහි නිසි අවසානයක් දැකීම අතිශය දුෂ්කරය.
මෙවැනි රේඛා ලක්ෂණ සහිත පුද්ගලයා ජීවිතයේ හදිසි කඩා වැටීමකදී හෝ බලාපොරොත්තු සුන්වීමකදි අපෙක්ෂා භංගත්වයක් ඇති කර ගනී. පහළට නැමුණු ශීර්ෂ රේඛාවක් කෝනික හෝ තියුණු ඇඟිලි තුඩු සහිත අත්ලකදි මේ තත්ත්වය තවත් වර්ධනය වේ. සිය දිවි නසා ගන්නා පුද්ගලයන්ගේ අත්වල මීට වඩා වෙනස් තත්ත්වයත් ද ශීර්ෂ රේඛාවට සම්බන්ධව දැකිය හැකිය. මෙහිදී ශීර්ෂ රේඛාව ඒ තරම් පහළට නොනැමේ. නමුත් ජීවන රේඛාව සමඟ තදින් බද්ධ වී පවති. එසේම ගුරු මණ්ඩලය දුර්වලව ශනි මණ්ඩලය උස්ව වේ. මෙවැනි පුද්ගලයන්ද ජීවිතයේ තනිවී සිටියි. ජීවිතයේ පරාජයන් බරපතළ ලෙස ගන්නා අතර, මෙහිදී ජීවිතය ද මරණය ද යන්න තෝරා ගැනීම තර්කානුකුලව සෙමින් සිදු කරයි.
උපුටා ගැනීම සුභසෙත පුවත්පත
