තාරකා ලකුණෙන් හෙළිවන පලාපල
කිසියම් අයෙකුගේ අත්ලෙහි පිහිටන විවිධ සලකුණු ඔහුගේ හෝ ඇයගේ චරිත ලක්‍ෂණ හා ජීවන තත්ත්වයන් හෙළිකරන බැව් සාමුද්‍රික ශාස්‌ත්‍රයේ සඳහන් වෙයි. මේ අනුව අත්ලේ පිහිටි සුවිශේෂ ලකුණු කීපයක්‌ පිළිබඳව පසුගිය ලිපිවලින් විස්‌තර කළා ඔබට මතක ඇති. අදත් එවැනිම විශේෂ ලකුණක්‌ පිළිබඳවයි විස්‌තර කරන්නේ. එය තමයි තාරකා සලකුණ බැලූ බැල්මට එම ලකුණ ඔබේ අතේ නොපෙනෙන්නට පුළුවන්. නමුත් ඔබ පරීක්‍ෂාකාරී ලෙස ඔබේ අත්ල නිරීක්‍ෂණ කළහොත් කොයිම තැනක හෝ තාරකා ලකුණ සටහන් වී තිබිය හැකියි. එම ස්‌ථානය අනුව අත්ල හිමියා වෙත ප්‍රකාශවෙන පලාපල සාමුද්‍රික ශාස්‌ත්‍රයේ මේ අයුරින් සඳහන් වෙයි.
ග්‍රහ මංඩල මත :
මංඩල යනුවෙන් හස්‌ත රේඛා විද්‍යාවේ සඳහන් වන්නේ සප්ත ග්‍රහයන්ට අයත් ආකර්ෂණ ශක්‌තීන් පෙන්නුම් කරන ස්‌ථාන වේ. මේ අනුව අතේ ඇඟිලි පහේ මුල ප්‍රදේශය ගුරු, ශනි, රවි ආදී ග්‍රහයන්ගේ ආකර්ශණ ශක්‌තීන් ගබඩා වෙන ස්‌ථාන ලෙස සැලකිය හැක.
අංක 1
යනුවෙන් සඳහන් කර ඇත්තේ දබරඟිල්ල මුල පිහිටි ප්‍රදේශයයි. මෙය ගුරු ග්‍රහයාගේ ආකර්ශණ ශක්‌තිය පෙන්නුම් කරන ගුරු මංඩල යයි. තාරකාවේ සලකුණක්‌ ඔබේ අතේ ගුරු මංඩලයේ පිහිටා ඇත්නම් එය ඉතා හොඳ වාසනාවන්ත පිහිටීමක්‌. ඉගෙනීමෙන් උපරිම ප්‍රයෝජන ලබා රජයේ උසස්‌ තනතුරු ලැබීමට ඔබ වාසනාවන්තයෙක්‌ වෙයි. කොයි කාගේත් ගෞරවාදරයට පාත්‍රවෙන ඔබ පිරිමියෙක්‌ නම් රූමත්, ධනවත් භාර්යාවක්‌ ලබන අතර ගැහැනියක්‌ නම් උගත්, ධනවත් බලවත් පුරුෂයෙක්‌ භාර්යාවක්‌ වනු ඇත.
අංක 2
සලකුණින් පෙන්නුම් කරන්නේ මැද ඇඟිල්ලේ මුල පිහිටි ශනි මංඩලයයි. තාරක සලකුණ ශනි මංඩලයට නම් සුබ නොවේ. හදිසි අනතුරකින් හෝ සාහසිකයෙකුගේ අතින් මරණයට පත්වෙන අයගේ අත්වල එම ස්‌ථානයේ තරු ලකුණ සටහන්වෙන බව කියෑවේ. එල්ලුම් ගසට නියම වෙන අයගේද අත්වල මෙම සලකුණ තිබිය හැක.
අංක 3
න් සටහන් වන්නේ රවි මංඩලයයි. රවි මංඩලය උස්‌ව පිහිටීම කලාවට සම්බන්ධ අයට ඉතා හොඳ පිහිටීමක්‌. එය මත තාරකා ලක්‍ෂණයකුත් පිහිටා ඇත්නම් එයින් ප්‍රකාශවන්නේ ඔහු හෝ ඇය ලේඛකයෙක්‌ සංගීතඥයෙක්‌ හෝ නළුවෙක්‌ වශයෙන් ජාත්‍යන්තර වශයෙන් කීර්තියට, ප්‍රසිද්ධියට පත්වෙන බවයි. සෙවාත්සාහයෙන් දියුණු වී රටට, සමාජයට විශාල මෙහෙයක්‌ ඉටුකර සදානුස්‌මරණීය නාමයක්‌ තබන අයවෙති.
අංක 4
න් පෙන්නුම් කරන්නේ බුධ මංඩලයයි. දක්‍ෂ කපටි පුද්ගලයන්ගේ අත්වල බොහෝවිට බුධ මංඩලය මත තාරුකා සලකුණ දිස්‌වී ඇති බව දැකිය හැක. ව්‍යාපෘති අංශයෙන් විශාල දියුණුවක්‌ ලබා ධනවතෙකු වීමටත් මෙම ලකුණ හේතුවන බැව් කියෑවේ. එවැනි පිහිටීම් ඇති ශිෂ්‍ය ශිෂ්‍යාවන්ට අධ්‍යාපන අංශයෙන් ශීඝ්‍ර දියුණුව ලබා ගැනීමටද හේතුවක්‌ වනු ඇත.
අංක 5
අත්ලෙහි කුජ ග්‍රහයාගේ ආකර්ෂණය ලැබෙන ස්‌ථාන දෙකක්‌ වෙයි. ඒ ඉහළ කුජ මංඩලය හා පහල කුජ මංඩලයයි අංක 5 යටතේ සලකුණු කර ඇත්තේ පහල කුජ මංඩලයයි. ජීවිත සටනකින් ජයගෙන කායික හා මානසික සුවයෙන් ජීවත්වීමේ වරම් ලබන අයගේ මෙම පහල කුජ මංඩලය මත තාරකා සලකුණ දැකිය හැක.
අංක 6
චන්ද්‍ර මංඩලයයි. නව නිර්මාණයන් සොයා ගැනීම නිසා ප්‍රසිද්ධියට පත්වෙන අයගේ අත්වල චන්ද්‍ර මංඩලය මත තාරකා ලකුණු පිහිටයි. නමුත් මෙම ලකුණ චන්ද්‍ර මංඩලයේ පිහිටීම ජලයෙන් අනතුරු ඇතිවීමට හේතුවන බැවින් තවත් අතකින් එය අසුබ ලක්‍ෂණයක්‌ ලෙසද සැලකිය හැක.
අංක 7
ඉහළ කුජ මංඩලය ලෙස හඳුන්වයි. මෙම ස්‌ථානයේ තාරකා ලකුණ ඇති අය ඉතා නිර්භීතයි. යුද කටයුතුවලින් ජයගත් කීර්තියට පත්වෙන ඔවුන් හමුදාවේ ඉහළ තනතුරුවලට වඩා සුදුස්‌සෝය. ත්‍රිවිධ හමුදා සේවය ඔවුන්ට බොහෝ විට ගැලපේ. ඒ කෙසේ වෙතත් ඒ විදියේ තාරකා ඇති පුද්ගලයෙක්‌ වැරදි පැත්තට යොමු වුවහොත් රටේ නමගිය අපරාධකරුවෙක්‌ වීමටද ඉඩ ඇත. ප්‍රසිද්ධ අපරාධකරුවන්ගේ අත්වල එම සලකුණු පිහිටා තිබුණ බව ඔප්පු වී ඇත.
අංක 8
සලකුණු කර ඇත්තේ සිකුරු මංඩලයයි. පහසුවෙන් ප්‍රේම සම්බන්ධතාවයන් ඇතිවීමට වගේම සාර්ථක ප්‍රේම සම්බන්ධයකින් සිදුවන විවාහයක්‌ද මෙම ලකුණින් පෙන්නුම් කරයි. ස්‌ත්‍රී පුරුෂ සේවනයේ දීද දක්‍ෂතා දක්‌වන අයගේද සිකුරු මංඩලයට තාරකා ලකුණ දැකිය හැකිවෙයි. අසීමිත කාම රාගය නිසාම නොයෙකුත් අවුල් වියවුල් ඇතිකර ගැනීමටත් එය හේතුවනු ඇත.
අංක 9
තාරකාව ලකුණ ඇත්තේ මහපට ඇඟිල්ලේ නියපිහිටා ඇති පුරුකේය. මෙම සලකුණ එම ස්‌ථානයට සුබ නොවේ. බලාපොරොත්තු නිශ්ඵල වීමට එය හේතුවක්‌ වේ.
අංක 10
තාරකාව ඇත්තේ මහපට ඇඟිල්ලේ දෙවැනි පුරුකේ තර්කානුකූලව කතා කරන්න දක්‍ෂතාවයක්‌ දක්‌වන ඔවුන් ඉතා ජනප්‍රියතාවයට පත්වෙයි. දේශපාලනඥයන්ගේ අත්වල බොහෝවිට මහපට ඇඟිල්ලේ තාරකා ලකුණ දැකිය හැකි වෙයි.
අංක 11
දැන් දබර ඇඟිල්ලේ නිය පිහිටා ඇති පුරුක දෙස බලන්න. උසස්‌ අදහස්‌ ඇති අයෙක්‌ දබර ඇඟිල්ලේ නිය පිහිටා ඇති පුරුකේ දිස්‌වෙන තාරකා සලකුණෙන් හඳුනා ගන්න. හදිසි ධන ලාභ ලැබීමේ වාසනාවක්‌ එමගින් පෙන්නුම් කරයි. දැන් ඔබට පුළුවන් තමන්ගේ දකුණු අතදිග ඇරල බලන්න තමන්ට ලොතරැයි දිනුමක්‌ ලැබෙන වාසනාව තියෙනවද කියල.
අංක 12
යටතේ සලකුණු කර ඇත්තේ දබර ඇඟිල්ලේ දෙවැනි පුරුකේ පිහිටි තාරුකා සලකුණයි. සුවිනීත ගතිගුණ ඇති අයෙක්‌ එම ස්‌ථානයේ ඇති තාරකා ලක්‍ෂණයෙන් හඳුන්වා දෙයි.
අංක 13
නිස්‌ ප්‍රයෝජන කතා කියමින් කාලය ගත කරන අය ඔබ දැක ඇති එවැනි අයගේ දබර ඇඟිල්ලේ තුන්වැනි පුරුකේ තාරකා සලකුණ තිබිය හැකිය.
අංක 14
න් දක්‌වන මැද ඇඟිල්ලේ නිය පිහිටා ඇති පුරුක දෙස දැන් බලන්න. ඕනෑම දෙයක්‌ විනිවිද දැකිය හැක. තියුණු වින්දන ශක්‌තියක්‌ එවැනි සලකුන ඇති අයකු තුළ තිබෙන බව කියෑවේ.
අංක 15
සඳහන් ස්‌ථානයේ ඇති තාරකා සලකුණ සුබ නොවේ. යුතු අයුතු කම් ගැන නොදන්නාගේ මැද ඇඟිල්ලේ දෙවැනි පුරුකේ තරු සලකුණ දැකිය හැකිය.
අංක 16
සලකුණු කර ඇති තාරකා සලකුණ ඇති අයද අවාසනාවන්තය. සාහසිකයෙකු අතින් ජීවිතක්‍ෂයට පත් මහත්මා ගාන්ධිතුමාගේ අත්ලෙත් මෙවැනි තාරුකා ලකුණක්‌ තිබුණ බව අනාවරණය වී ඇත. කොහොම වුවත් එවැනි තාරකාවක්‌ තමන්ගෙ අතේත් තියෙනව නම් බිය විය යුතු නොවේ. වෙනත් සුබ පිහිටීම් පිහිටා ඇත්නම් සිදුවීමට යන එවැනි අවාසනාවන්ත සිදුවීම් වලින් ඔබට ආරක්‍ෂා විය හැක.
අංක 17
වෙද ඇඟිල්ලේ නිය පිහිටා ඇති පුරුකේ දිස්‌වෙන තාරකාවෙන් හඳුන්වාදෙන්නේ ජීවිතය තුළට කි¹ බසින ලද ගුප්තමය බල ශක්‌තියක්‌ ඇති පුද්ගලයෙකුයි.
අංක 18
තමන්ගේ අධ්‍යාපන සුදුසුකම්වලට නොගැලපෙන වෙනත් රැකියාවල යෙදුණු අයගේ අත්වල මේ ආකාරයේ තරු සලකුණු දිස්‌විය හැක.
අංක 19
බුද්ධිමත් වන එවැනි අය කුමන ක්‍රමයකින් හෝ උසස්‌ තත්ත්වයකට පත්වෙන බව වෙද ඇඟිල්ලේ තාරුකා ලකුණින් පැහැදිලි වෙයි.
අංක 20
සුළඟිල්ලේ නිය පිහිටා ඇති පුරුකේ දිස්‌වෙන තාරකාව දැන් පරීක්‍ෂා කරන්න. අන් අයගේ සිත්වල ඇති දේ හැඳින ගැනීමේ පුදුම හැකියාවක්‌ ඇති ගුප්ත පුද්ගලයෙක්‌ එමගින් මූර්තිමත් වෙයි.
අංක 21
කුඩා කාලයේදීම මවුපියන් අහිමිවන අයගේ සුළඟිල්ලේ තරු ලකුණ පිහිටා තිබිය හැක.
අංක 22
සුළඟිල්ලේ අග පුරුකේ තාරකා සලකුණු සුභදායක වේ. දීප්තිමත් අනාගතයක හිමිකම් කියන වාසනාවන්තයෙක්‌ සුළඟිල්ලේ තුන්වෙන පුරුකේ දිස්‌වෙන තාරකා ලකුණින් හඳුනාගන්න.
ජීවන රේඛාව මත තාරකා ලකුණක්‌ වැටීමද අසුබයි. හදිසි අනතුරුවලට එය හේතුවෙයි. නොයෙකුත් මානසික රෝගවලට මෙන්ම ස්‌නායු රෝගවලටද හේතුවන නිසා ශීර්ෂ රේඛාවේ තාරකා සලකුණ සුබ නොවේ. හෘදය රේඛාව මත තාරකා සලකුණක්‌ වැටීම ඇස්‌වල ආබාධවලටද හේතුවන අතර සුඛරේකාව මත එම සලකුණ වැටීම ශල්‍ය කර්මයක්‌ සිදු කිරීමටද හේතු විය හැක.
හිඹුටානේ පියතිලක ද අල්විස්‌උපුටා ගැනීම දිවයින
