අල්ලේ ලියවුණ ඔබේ දෛවය
කෙනෙකුගේ අත්ලේ ප්‍රධාන රේඛාවන්ට අමතරව පිහිටන තවත් ලුහුඬු රේඛා කීපයක්‌ පිළිබඳවයි අද විස්‌තර කරන්නෙ. පළමුව ඉහත සඳහන් පරිදි සිකුරු චක්‍ර රේඛාව පිහිටි අයගේ ජීවන තොරතුරු කෙසේද කියා බලමු.
"ශුක්‍ර මේඛලාව" නමිනුත් හඳුන්වනු ලබන මෙම රේඛාව දබරඟිල්ලටත්, මැදඟිල්ලටත් අතරෙන් පටන්ගෙන ශනි, රවි, මංඩල පසුකර වෙදඟිල්ලටත් සුලඟිල්ලටත් අතරදී කෙළවර වෙයි. අර්ධ කවාකාර හැඩයක්‌ ගන්නා මෙම රේඛාව හැම අයෙකුගේම අත්වල දක්‌නට නොලැබෙයි. මෙම රේඛාවෙන් කෙනෙකුගේ විවාහය පිළිබඳ තොරතුරුත් ඔහුගේ හෝ ඇයගේ හැසිරීම් රටාව, අශෝභන සිතිවිලි හා හැඟීම්වලින් ඇවිස්‌සෙන ස්‌වභාවය, නොමනා දේවලට පෙළඹෙන ස්‌වභාවය, ආදී කරුණු ප්‍රකට කෙරෙයි. මෙම රේඛාව පිහිටි ඔහු හෝ ඇය අධිකාමුක සිතිවිලිවලින් පිරුණ එම නොතින් ආශාවන් සපුරා ගැනීම සඳහා නොයෙකුත් උපාය මාර්ග භාවිත කරති. කාමුක ආශාවන්ගෙන් ලොල් බවක්‌ ඔවුන් තුළින් පෙන්නුම් කරයි. රේඛාව කැඩීම්, කැපීම් ආදී බාධක ලක්‍ෂණවලින් තොරව ප්‍රබල ලෙස පිහිටියේ නම් උසස්‌ ඥණ ශක්‌තියක්‌ හා ආත්ම ශක්‌තියක්‌ ඇතිවේ. එබඳු අය අතර දක්‍ෂ ලේඛකයෝ හා කලා ලැදි ප්‍රකට පුද්ගලයෝද වෙති. එබඳු රේඛා දෙකක්‌ හෝ තුනක්‌ හෝ ඒකාබද්ධව සැදුණ විටද, කැඩීම් කැපීම් ආදියෙන් දූෂිත වූ විටද, පුද්ගලයා අශෝභන සිතිවිලිවලින් හා හැඟීම්වලින් පෙළඹවීමෙන් ඔවුන් තුළ පවත්නා රාගාධික ගති හේතු කොටගෙන නුසුදුසු මාර්ගවලින් කාමය සංසිඳුවා ගනිති. මේ නිසා ඔවුන් පසු කාලයේදී නොයෙකුත් ලිංගික රෝගවලටද ගොදුරු වෙති.
මෙම රේඛාව මත දූපත්, කුරුස, ලප, තරු, දැල් ආදී සලකුණු වැටීමද, රේඛාව ගැඹුරු ලෙස පිහිටීමද අසුබය. නමුත් අත්ලේ අනෙකුත් රේඛාවල සුබ ලකුණු වැඩිපුර පෙන්නුම් කරයි නම් එහි ඇති අසුබ ඵල අවම වේ. අත්ලේ සිකුරු මණ්‌ඩලය උස්‌ව පිරී තිබීමත්, දැල් සලකුණුවලින් යුක්‌තව තිබීමත්, ඇඟිලිවල පුරුක්‌ විශාල වීමත්, මෙම රේඛාවෙන් ඇතිවන අනිසිඵල අධිකවීමට හේතුවේ. රේඛාව දුර්වර්ණ වී ඇති විටද ඔවුන් කොතෙකුත් දුක්‌ විඳින තත්ත්වයක්‌ උදාකර ගනිති. බොහෝවිට සිය පවුල් ජීවිතය අකාලයේ විනාශකර ගනිති. තම සිතැඟි අදහස්‌ සපුරා ගැනීමට දරන විවිධ කටයුතු නිසා ජීවිත හානි පවා සිදුවෙන අවස්‌ථා ඇතිවෙයි. හැඩකාර ලෙසටත් වර්ණවත් මට සිලිටු ආකාරයටත්, පිහිටි සිකුරු චක්‍ර රේඛාවක්‌ හිමි අය වඩාත්ම කාම සේවනයට ලොල්වෙති. සිය කාමුක ආශාවන් ඉටුකර ගනිමින් විනෝදකාමී සැහැල්ලු ජීවිත ගතකරති.
චරිත රේඛාව :
සිකුරු මංඩලය ආශ්‍රයෙන් ආරම්භවෙන මෙම රේඛාව අර්ධ කවාකාර ලෙස චන්ද්‍ර මණ්‌ඩලයෙන් අවසන් වෙන බව රූප සටහනින් ඔබට පැහැදිලි වෙනවා ඇති. එම රේඛාව මැණික්‌ කටු රේඛාවලට ටිකක්‌ ඉහළින් පිහිටීම විශේෂ ලක්‍ෂණයක්‌ වෙයි. සිකුරු ග්‍රහයාගේ අති ධාවන බල ශක්‌තිය ශරීර ගතවූ අයගේ අත්වල පිහිටි මෙම රේඛාව කාම රේඛාව නමිනුත් හඳුන්වයි. තමන් අවංක පිරිසිදු චරිතයක්‌ ඇති අයෙක්‌ බව සමාජයට පෙන්වන එහෙත් රහසිගතව නොයෙකුත් විදියේ දුසිරිත්වල යෙදෙන අයගේ අත්වල මෙම රේඛාව පැහැදිලිව පිහිටිය හැකිය. සුරා පානය ඇතුළු මත්ද්‍රව්‍යවලට ඇබ්බැහිවීම මෙම රේඛාව පිහිටි අයගේ ලක්‍ෂණයක්‌. නොයෙකුත් සමාජ රෝගවලට ගොදුරු වී ජීවිතය අවාසනාවන්ත කරගත් අයගේ අත්වලද චරිත රේඛාව පිහිටිය හැක. ඒ හැම දෙයකටම හේතුවන්නේ උපතින්ම ඔවුන් කෙරෙහි පිහිටි කාම රාගයයි. දඟර ගැසුන චරිත රේඛාවෙන් ඉතාමත් දූෂිත චරිතයක්‌ හඳුන්වාදෙයි. දුරාචාරයේ යෙදීම නිසා යන එන මං අහිමිකර ගත් අයගේ චරිත රේඛාව තරු ලක්‍ෂණයකින් ආරම්භ වී තිබිය හැක. චරිත රේඛාව ගැඹුරට පිහිටීම බේබදු කමේ ලක්‍ෂණයක්‌ වෙයි. රේඛාව මත තාරකා ලකුණක්‌ පෙන්නුම් කරයිනම් කාම අපරාධකාරයෙක්‌ වේ.
සොලමන්ගේ මුද්ද :
අතීතයේ පලස්‌තීන රාජ්‍යයේ රජ කළා සුලේමාන් නම් බලවත් රජෙක්‌. ව්‍යවහාරයට පහසුවටය සොලමන් වුණේ. එම රජුගේ අතේ එම රේඛාව පැහැදිලිවම තිබුණ නිසයි සොලමන්ගෙ මුද්ද නම්වුණේ. සොලමන්ගෙ මුද්ද බලගතු පිහිටීමක්‌. රාජයෝගයක්‌ වශයෙන්ද හැඳින්විය හැකිය. රජ වෙන්න බැරි වුණත් රජයේ උසස්‌ රැකියාවක්‌ හෝ ලැබීමට හේතුවක්‌ තමයි. කෙනෙකුගේ අතේ දඹරඟිල්ලේ මුල සොලමන්ගෙ මුද්ද පිහිටීම මහ බලවතෙක්‌ හා ධනවතෙක්‌ වීමටද මෙම පිහිටීම හේතුවෙයි. රේඛා බහුල අත්වල බොහෝවිට මෙම සලකුණ පිහිටිය හැකියි. මෙය වාසනාව, බලය ළඟා කරදෙන සලකුණක්‌ ලෙසත් ගැඹුරු ශිල්ප ශාස්‌ත්‍ර, ගුප්ත විද්‍යා ආදිය පිළිබඳ දැනුම ලබාගැනීමේ ආශාව හා ඒවා ග්‍රහණය කර ගැනීමේ හැකියාව ලෙසත් හැඳින්වේ. ප්‍රසිද්ධ නක්‍ෂශස්‌ත්‍ර කරුවන් සහ සාමුද්‍රික ශාස්‌ත්‍රවේදීන්ගේ අත්වලද මෙම රේඛාව දැකිය හැක. සොලමන්ගේ මුදුව පිහිටන අවස්‌ථාවල සාමාන්‍යයෙන් ජීවන රේඛාවේ සිට ඉහළට යන රේඛාවක්‌ද දැකිය හැක.
අන්සතු ධන රේඛාව :
දෙවැනි කුජ මණ්‌ඩලයටත්, චන්ද්‍ර මණ්‌ඩලයටත් අතර ඇති ප්‍රදේශයෙන් ආරම්භ වී රවි මණ්‌ඩලය දිශාවට (වෙදඟිල්ලමුල) විහිදයන රේඛාව අන්සතු ධන රේඛාව ලෙස සඳහන්වෙයි. මෙම පිහිටීම කීර්ති රේඛාවේ පිහිටීමද තරමක්‌ සමාන වෙයි. අන්සතු ධන රේඛාව කලාතුරකින් කෙනෙකුගේ අතක දක්‌නට ලැබෙන සලකුණකි. ලොතරැයි දිනුම් ලබා කෝටිපතියන් වන අයගේ මෙන්ම අන්සතු ධනයකට හිමිකම් ලැබෙන අයගේ අත්වල මෙම රේඛාව දැකිය හැක. මෙම රේඛාව මත තාරකා ලකුණක්‌ හෝ කතිර ලකුණක්‌ දර්ශනය වීම ඉතාමත් සුබය. එම අයට රේස්‌ ඔට්‌ටු ඇල්ලීම වැනි තරගවලින් ඉක්‌මනට ධනවත් විය හැකිවේ.
ශනිගේ මුද්ද :
ශනි මණ්‌ඩලයේ පිහිටා ඇති මුදු සලකුණ ශනිගෙ මුද්ද නමින් භාවිතවෙයි. අඩසඳ ලකුණ, චන්ද්‍රවංකය යන නම්වලිනුත් මෙම අර්ධ කවාකාර සලකුණ හඳුන්වයි. චපලත්වයේ ප්‍රතිමූර්තියක්‌ ලෙස සලකනු ලබන ශනිගේ මුද්ද සුබ පිහිටීමක්‌ නම් නොවේ. මෙම රේඛාවෙන් කෙනෙකුගේ ජීවිතයේ නිශ්ඵලභාවය හා දුක ප්‍රකට කෙරේ. ශනි මුද්ද යම් අත්ලක නොපිහිටියේ නම් වඩාත් සුබවේ. මෙම රේඛාවෙන් ශනි මණ්‌ඩලය දූෂිත වෙන බැවින් මිනිසාගේ ඥණය මොට වෙයි. ඉක්‌මනින් කලබල වෙන, කිපෙන, දුරදිග නොබලා කටයුතු කරන, සුළු දෙයකින් පවා සිත් අධෛර්යමත් කරගන්නා, හදිසි තීරණ අනුව ක්‍රියාකරන උදාසීන අයෙක්‌ වේ.
හිඹුටානේ - පියතිලක ද අල්විස්උපුටා ගැනීම දිවයින
