ගුප්ත මිනිසුන්ගේ අක්‍ෂරය P
මෙම අක්‍ෂරය ඉංග්‍රීසි හෝඩියේ 16 වැනි අක්‍ෂරයයි. අංක විද්‍යාවේදී මෙයට හිමිවන්නේ අංක 7ය. එය අයත්වන්නේ කේතු ග්‍රහයාටය. බටහිර අංක විද්‍යාවට අනුව නෙප්චූන් ග්‍රහයාටය. මෙම අක්‍ෂරය චන්ද්‍රයා හෙවත් සඳුගෙන් පාලනය වන බවටද තවත් මතයක් ඇත. කෙසේ වෙතත් පෙරදිග අංක විද්‍යාවට අනුව මෙම අක්‍ෂරය කේතුගේ අණසකට යටත් වූවකි. P අක්‍ෂරය දිලිසෙන කළු පැහැයෙන් යුක්ත වන අතර දෙවියන් හා ආගම දැඩි ලෙස විශ්වාස කරන පුද්ගලයන් බොහෝ දෙනකු මෙම නාම අක්‍ෂරය යටතේ උපත ලද අය වේ. අසරණයන්ට පිහිටවීම, රෝගීන්ට සරණ වීම, වැඩිහිටියන්ට සැලකීම සංකේතවත් කරන මෙම අක්‍ෂරයෙන් උපත ලද ඔබට මනා කලා රසඥතාවක් උපතින්ම පිහිටනු ඇත. විශේෂයෙන්ම කවියට, ගීතයට උපන් හපන්කම් දක්වන ඔබ ඒ සඳහා ගෞරව සම්මානයන්ද හිමිකර ගනු ඇත. මෙම අක්‍ෂරය ප්‍රධාන නාම අක්‍ෂරය කර ගනිමින් මෙලොවට ජනිත වූ ඔබට ඔබගේ නිර්මාණාත්මක හැකියාවන් සඳහා ඉහළම ජනප්‍රියත්වයක් හිමිවන අතර ගීත ඇසීමට දැඩි ප්‍රියතාවක් දක්වනු ඇත. එමඟින් විශාල මුදලක්ද ඔබට උපයා ගැනීමට හැකිවන අතර ජීවිතයේ විශාල දියුණුවක්ද ඇතිවන බව සහතික ලෙසින් පැවැසිය හැකිය. ඔබ ඔබටම ආවේණික වූ සිතිවිලිවලින් පෝෂිත වූවකු වන අතර එම සිතිවිලි උපයෝගී කරගනිමින් ඔබගේ ඉදිරි ගමන් මාර්ගය සකසා ගැනීමේ මනා පරිකල්පනික ශක්තියක් ඔබට උපතින්ම දායාද වී ඇත.
ආකර්ෂණීය බවක් ඔබගේ පෙනුමේ හා කතාවේ ඇති බැවින් බොහෝ දෙනා ඔබට වශීකෘත වන බවක් දැකගත හැකිය. එමෙන්ම අසීමිත පරිපාලන හැකියාවක් ඔබගේ ආත්මය හා බැඳී පවතින බැවින් දක්‍ෂ මෙන්ම යහපත් පරිපාලකයකු ලෙස කටයුතු කිරීමට ඔබට පුළුවන. සමහර අවස්ථාවල ඉදිරියට නොයා සැඟවී සිටීමට උත්සාහ දරන ඔබ අවස්ථානුකූලව ඉදිරියට නොබියව පැමිණ කටයුතුවල යෙදෙනුද දැකගත හැකිය. කලබලකාරී පරිසරය ප්‍රිය නොකරන ඔබට අවශ්‍ය වන්නේ නිසංසල, හුදෙකලා වූ දිවි ගමනකි. එමෙන්ම අනුන්ගේ ඕපාදූප කතා ඇසීම ඔබට අප්‍රසන්නය. තමා ගැන හෝ අනුන් ගැන විවේචනය කරන්නන් හා අශුභවාදී සිතිවිලි ඇත්තන් ඔබ ඔබගේ දිවියෙන් අෑත්කර තබනුයේ බලවත් පිළිකුලකින් යුතුවය. ඔබ ඇතුළතින් පීඩා වින්දද මතුපිටින් ඒ බව නොපෙන්වා සිටීමට දැඩි උත්සාහයක යෙදෙයි. ඇත්ත වශයෙන්ම ඔබ ඇතුළාන්තයෙන් ඉතා පිරිසුදුය. මතුපිටින් ඉතා මිහිරිය. ළගන්නාසුලුය. ඔබ අභ්‍යන්තරයේ තෙරපෙන දුක, වේදනා හා සත්‍ය මුහුණට ආරූඪ කර නොගන්නා ඉතාම සංවේදී පුද්ගලයකු ලෙස හඳුන්වා දිය හැකිය. චේතනා අචලය, අවංකය. තමාට පාඩු වුවත් අනුන්ට උදවු කිරීමෙන්, පිහිට වීමට මොහොතකට හෝ මැළි නොවේ.
හුදකලාව ප්‍රිය කරමින් තනිව ජීවත් වීමට උත්සාහයක යෙදෙන ඔබ සමහරුන්ට තේරුම්ගත නොහැකි චරිතයකි. ඔබව තේරුම් ගන්නට උත්සාහ කරන්නන් හට ඔබ එතරම් ගුප්ත චරිතයක් නොවේ යැයි හැඟෙනු ඇත. ඉතා පැහැදිලි ජීවන දර්ශනයක් මෙන්ම ජීවිතය පිළිබඳ මනා පරිචයක් ඔබට උපතින්ම ලැබී තිබීම ගැන සතුටුවිය යුතුය. දුරදක්නා නුවණින් හෙබියා වූ ඔබ අනාගතය පිළිබඳ ඉලක්ක සෑදීමට ඉතාම දක්‍ෂයෙකි. තම ජීවිතය ගැන පමණක් නොව ඔබ වටා සිටින සමාජ ස්තරයේ විවිධ පුද්ගලයන් පිළිබඳ ගැඹුරින් කල්පනා කර බලන්නෙකි. ගැඹුරු වූ බුද්ධිමය සම්පතකින් ආඪ්‍ය වූ ඔබ ජීවිතය විවිධ වූ කෝණයන්ගෙන් විශ්ලේෂණය කරනු ලබන දුර්ලභ ගණයේ පුද්ගලයකු බව සතුටින් පැවැසිය හැකිය. ඔබගේ ජීවිතයේ ඉතාම පුදුම සහගත සිදුවීම් රැසක්ම සිදුවන අතර ඒවා ඉතාම ප්‍රබල ලෙසින් දේව සංකල්ප හා ආගමික ඇදහිලි සමඟ සම්බන්ධ වනු ඇත. ගුප්ත විද්‍යාත්මක නැඹුරුවක්ද ඔබගේ අභ්‍යන්තර චිත්ත සන්තානය තුළ නිරතුරු පවතින අතර යක්‍ෂයන්, භූතයන් හා දෙවියන් සමඟ මනෝමය වශයෙන් බද්ධ වීමේ හැකියාවක් ඔබ සතුව ඇත. එවැනි නොපෙනෙන බලවේගයන්ගෙන් උදවු ගැනීමේ පරිචිත්තමය විඥාන ශක්තියක්, බලවේගයක් බවට පත්කර ගැනීමට ඔබට පහසුවෙන්ම හැකිවනු ඇත. අන්‍යයන්ගේ ඇඟිලි ගැසීම් නිරන්තරව පිළිකුල් කරන්නෙකි. බොහෝවිට ප්‍රායෝගික වන ඔබ ඉතා ඉක්මනින්ම දැඩි ලෙස නොසන්සුන්තාවට පත්වීම දුර්වලකමකි. වැඩිපුර ආහාර ගැනීමද ඔබගේ සෞඛ්‍යයට යහපත් නැත. නිවෙසේ සිටියද, කාර්යාලයේ සිටියද වෙන්ව ජීවත්වීම ඔබගේ සිරිතය. මෙලෙස හුදකලාවේ සිටිමින් ගන්නා තනි තීරණ ඔබේ ජීවිතය සාර්ථකත්වයට පත්කරන අතර දීප්තියෙන් බබළවනු ඇත.
ජ්‍යෝතිෂවේදී, අංක විද්‍යාවේදී, කොටදෙණියාවේ, වරාදල ඩී. ඩී. එන්. ගුණවර්ධන 0776283097උපුටා ගැනීම මව්බිම පුවත්පත
