ඕන වැඩකට සතියේ සුබ දින මෙන්න
සතියේ දිනවල පවත්නා සුභාෂාව වේලාවන් එදින තත් කාලය අනුව එනම් වෙනස්වන ග්‍රහචාරය අනුව වෙනස්ය. මෙම සුබ අසුබ තත්ත්වයන් අවබෝධ කරගැනීමට මෙම ග්‍රහ ගෝචර ගමන පිළිබඳ අවබෝධය අවශ්‍යය. ග්‍රහ ගමනේ අනුව දිනයේ බලය වැඩි අඩුවේ. එදිනෙදා ග්‍රහ ගමන පිළිබඳ නිවැරදි විස්තර වන්නේ පංචාංග ලිතකය. එමෙන්ම සතිපතා පළවන ජොතිෂ්‍ය පුවත්පත්වලින් ද එම සතිය තුළ ඇතිවන ග්‍රහ ගමනය ගැන දැනගත හැකිය. එසේ ග්‍රහයන්ගේ ගෝචරය ගමන බලා කටයුතු කිරීමෙන් වඩාත් දිනය පිළිබඳව පැහැදිලි අවබෝධයක් ලබා ගැනීමට හැකිය. එසේ නුඹලා සාමාන්‍ය වශයෙන්ද දිනයක ඇති වැදගත්කම අනුව එදින කටයුතු කිරීමෙන් යම් ප්‍රයෝජනයක් ලැබිය හැක.
මේ අනුව විවිධ කටයුතු සඳහා සතියේ යම් යම් දිනවල වැදගත් වන දින පිළිබඳ මෙසේ විස්තර කළ හැකිය.
ඉරිදා දිනය : සතියේ දින අතර ප්‍රථම දිනය වශයෙන් සලකන ඉරිදා දිනය රවිට අයත් දිනයයි. මෙදින රවි හෝරාව බලවත් වේ. පොදුවේ ඉරිදා දිනය සොරු ඇල්ලීමට, ආයුධ සැදීමට, කලාවන් සම්බන්ධ කටයුතු, රෝග පීඩාවන් සම්බන්ධව පිළියම් යෙදීම, නව කටයුත්තක් ආරම්භයට, රෙදි විකිණීමට, වෛද්‍ය වෘත්තීන් උදෙසා යහපත් වේ. මෙවැනි කාර්යයක් ඉරු දින කිරීමෙන් වඩාත් සාර්ථක කර ගැනීමට හැකිවනු ඇත.
සඳුදා දින : සතියේ දින අතර සඳුදා දින සඳු බලවත් වේ. මෙදින සඳු හෝරාව බලවත් වනු ඇත. මෙහිදී අස්වනු නෙළීමට, විවාහ යෝජනාවලට, මංගල ගමන් බිමන්වලට, අලුත් ඇඳුම් පැළඳුම් ගැනීමට, ව්‍යාපාර ආරම්භයට, සංගීතය ඉගෙන ගැනීම ආරම්භයට කෘෂිකාර්මික කටයුතු ආරම්භයට සඳුදා දිනය ශුභවේ. මෙහිදී සඳු දිනක සඳු 4 ,7 ,10 වැන්නේ ගමන් කරන විටත් සඳු කටක රාශියේ පිහිටි කල්හිත් මෙම දිනය වඩාත්ම සුබ වේ. බලවත් වේ.
අඟහරුවාදා දින : අඟහරුවාදා හෙවත් කුජ දිනය කුජ බලවත් වෙයි. කුජ හෝරාව බලවත්වේ. මෙදින රත්තරන් මිලදී ගැනීමට හා ඒ සම්බන්ධ කටයුතුවලට යහපත් වෙයි. ලෝහ වර්ග සම්බන්ධ කටයුතුවලටද එසේම යහපත් වනු ඇත. ඖෂධ මිලදී ගැනීම් ඒ සම්බන්ධව නව ආරම්භ කිරිම් යහපත් වනු ඇත. විදුලිය පිළිබඳ කටයුතුවලට ඇළ වේලි ප්‍රාකාර බැමි ඉදිකිරීමට ආරම්භය මෙදින යහපත් වනු ඇත.
බදාදා දින : බදාදා බුධ ග්‍රහයාගේ දිනය යි. මෙදින බුධ හෝරාව බලවත් වේ .මෙදින මරකත මැණිකා වටිනා පාෂාණයන් සහ ඛනිජ ද්‍රව්‍ය ඇති ඉඩම් මිලදී ගැනීමට යහපත් වනු ඇත. සුවඳ ද්‍රව්‍ය වෙළඳාම් හා සම්බන්ධ කටයුතුවලට යහපත් වෙයි. වෙළඳ ගිවිසුම් වලට අත්සන් තැබීමට බුධ දින යහපත් වනු ඇත. වැදගත් තීරණය ගැනීමට හා කරන කියන දේ වැඩිදියුණු කිරීමට මෙම බුද්ධ දින ඉතා යහපත් බව සඳහන් කරනු ඇත.
බ්‍රහස්පතින්දා දින : බ්‍රහස්පතින්දා හෙවත් ගුරු දින ගුරු බලවත් වේ. සංස්කෘතික වැඩ කටයුතු උදෙසා, ලේඛන කටයුතු, රන් රිදී පිළිබඳ කටයුතු ආරම්භයට, වෙළෙඳ ව්‍යාපාර ආරම්භයට, ත්‍යාග ප්‍රදානය උත්සව පැවැත්වීමට, විශාල ආගමික කටයුතුවලට, මුල්ගල තැබීමට විශේෂයෙන්ම නව නිවසක් ආරම්භයට, විවාහ මංගල කටයුතුවලටද මෙම ගුරු දින ඉතාම බලවත් බව මෙයින් සඳහන් කරනු ඇත.
සිකුරාදා දින : කිවිදා හෙවත් සිකුරාදා සිකුරු බලවත් වෙයි. මෙම දිනයේ සිකුරු හෙවත් කිවිගේ හෝරාව බලවත් වනු ඇත. මෙදින ආදරේට මුල්වන දිනයකි. ආදරය කිරීමට ආදර හසුන් ලිවීමට, අලුත් ඇඳුම්, වාහන මිලදී ගැනීමට මෙම දවස ඉතා ශුභවනු ඇත. ඉතාමත් ලස්සන දිනයක් වනු ඇත. සාමාන්‍ය ව්‍යවහාරයේදී අලුත් ඇඳුම් පැළඳුම් ගැනීමේ සිකුරාදා දින ඉතා යහපත් බව අසා ඇත. එදින ගන්නා ඇඳුම් පැළඳුම් ආභරණ ඉතා අලංකාරය. කල්පැවැත්ම වැඩිය. මෙම සියල්ලටම සිකුරාදා දින ඉතා යහපති.
සෙනසුරාදා දින : සෙනසුරාදා හෙවත් ශනි දින ශනි හෝරාව බලවත් වේ. යකඩ වානේ කම්හල් ඉදිකිරීම් ආරම්භයට මෙදින යහපත්ය. කම්මල්වල කටයුතුවලට මෙදින යහපත්වනු ඇත. බාරහාර වීම් පුදපූජා කටයුතු ආරම්භයට මෙදින සුබය. ආගමික කටයුතු මුල් කරගෙන සිදුකරනා කටයුතු මෙදින යහපත් වේ. පූජනීය ස්ථාන සඳහා ආධාර උපකාර කිරීම මෙදින යහපත් වේ.
ඉහත දක්වා සිටිනුයේ තම ශුභ කටයුතු ඒ ඒ දිනයන්ට අදාළව සිදු කිරීමෙන් ඉතා සාර්ථක ලෙස එම කාර්යය සිදුකිරීමට හැකි නිසාවෙන්ය.
උපුටා ගැනීම දිවයින
