හිත බිය දනවන සෙනසුරු ඒරාෂ්ටකය

නම ඇසූ පමණින් සැවොම බිය වද්දන සෙනසුරු හෙවත් ශනි ග්‍රහයා, ග්‍රහ පවුලේ මෙහෙකරු වන අතර දුකට අධිපතියා ද වේ. පුද්ගලයකුට ශනි දශාව ලැබීම ඔහුගේ ජීවිතයේ අපල කාලයක් යැයි සිතීමට ආදි කාලයේ සිටම පුරුදු වී සිටියි. සෙනසුරු රාශි චක්‍රයේ එක් රාශියක් පසු කිරීමට වසර 2 1/2ක් ගන්නා බැවින් වැඩි කාලයක් රාශියක සිටින ග්‍රහයා ලෙස ද නම් කරයි.

සෙනසුරුගේ ගමන හෙවත් ගෝචරය නිසා ඒරාෂ්ටක අපල 4 වර්ගයක් උදාවේ. ඒවා මෙසේය.

1. ලග්න ඒරාෂ්ටකය
2. අෂ්ටම ඒරාෂ්ටකය
3. ජන්ම ඒරාෂටකය
4. චන්ද්‍රාෂටම ඒරාෂ්ටකය

ලග්න ඒරාෂ්ටකය

සෙනසුරු ග්‍රහයා වසර 2 1/2කට වරක් රාශි මාරු කරනු ලබයි. මෙසේ ගමන් කිරීම ගෝචරය වන අතර, ගෝචරයෙන් ශනි 12 වැනි කොටුවට පැමිණීමෙන් ලග්න ඒරාෂ්ටකය පටන් ගනී. ශනි 12 වැනි කොටුවෙහි, ලග්න කොටුවෙහි හා දෙවැනි කොටුවෙහි යන කොටු තුනෙහි ගමන් කරන කාලය ලග්න ඒරාෂ්ටකයයි. එය අවුරුදු 7 1/2ක කාලයකි. නමුත් මෙම 7 1/2ක කාලයට තදබල අපල ගෙන නොදේ. මුල් අවුරුදු 5 පමණක් තදබල අපල ගෙන දේ. 

මීට අමතරව ජන්මියාගේ ලග්නය ශනිට හිතකර මකර, කුම්භ, තුලා, ධනු, මිථුන, කන්‍යා වැනි එකක් නම් ඒරාෂටක තත්ත්වයේ ඇති ප්‍රබලතාව අඩුවනු ඇත. නමුත් කටක, වෘශ්චික, සිංහ, මේෂ වැනි ලග්න හිමි අයට ලග්න ඒරාෂටකය තදබල අපලයක් වනු ඇත. 

මෙය මෙසේ වුවද ජන්මියාගේ කේන්දරය තුළ ශනි ග්‍රහයාගේ බල දුබලතාවය ද සැලකීමට ගත යුතුය. ජන්මියාගේ කේන්දරයේ ශනි ග්‍රහයා උච්ච, ස්වක්ෂේත්‍ර, මිත්‍ර බලයෙන් යුක්ත නම් ඒරාෂ්ටක තත්ත්වය පැවතුණ ද තදබල අපල ඇති නොවේ. 

යම් හෙයකින් කේන්දරයේ ශනි ග්‍රහයා සතුරු, නීච, සතුරු මූල ලෙස පවතී නම්, නීචය ද භංග නොවේ නම් ඒරාෂ්ටක අපල කාලය තදබල පීඩා ඇති කරයි. තවද මෙම ශනි නරක රාශිගත බලයකින් සිට ඔහුට 22 වැනි දෙර්කානාධිපතියා හෝ 64 නවාංශකාධිපතියන් වූයේ නම්, ශනිගේ ඒරාෂටක තත්ත්වය සමඟ ශනිගේ මහ දශාවත් අතුරු දශාවත්, විදශාවත් පැමිණියේ නම් අනිවාර්යයෙන්ම මාරක තත්ත්වයක් උදාවනු ඇත. 

අෂ්ටම ඒරාෂ්ටකය  

ශනි ග්‍රහයා ගෝචර ගමනින්, ලග්නයෙන් අටවැන්නට පැමිණීම අෂ්ටම ඒරාෂටකයයි. ශනි වසර 2 1/2ක කාලයක් අටවැන්න තුළ සිටියි. එම කාලය තුළ අපලය වැඩි වන්නේ ලග්නයෙන් 8 වැන්න කටක, සිංහ, වෘශ්චික, මේෂ වැනි ශනිට අහිතකර රාශියක් වී, ජන්ම පත්‍රයේ ද ශනි ග්‍රහයා දුබල වූ විටය. එවන් තත්ත්වයක් ඇත්නම් එම කාලසීමාව වතාවත් කිරීම මගින් ඒරාෂටක තත්ත්වය අවම කරවාගත හැක. 

ජන්ම ඒරාෂ්ටකය 

මෙය ඒරාෂටක අතරින් දරුණුම ඒරාෂ්ටකයයි. උත්පත්ති චන්ද්‍රයා සිටි රාශියට පෙර රාශිය, උත්පත්ති චන්ද්‍රයා සිටින රාශිය හා උත්පත්ති චන්ද්‍රයා සිටින රාශියට හසු රාශිය යන රාශි 3ම ශනි ගමන් කරන අවුරුදු 7 1/2ක කාලය. ජන්ම ඒරාෂටක කාලය වනු ඇත. ජන්ම ඒරාෂ්ටකයේ දරුණුම කාලවකවානුව පවතිනුයේ උත්පත්ති චන්ද්‍රස්ථානයේ සිට 300 බැගින් දෙපසට අයත් වන සීමාව හරහා ශනි ගෝචරයෙන් ගමන් කරන අවුරුදු 5ක පමණ සීමාවයි. 

මෙහිදී ද ඉහත ඒරාෂ්ටක දෙක මෙන්ම උත්පත්ති සඳු සිටින රාශිය ශනිට හිතකර රාශියක් නම් අදාළ තත්ත්වය සමනය වේ. එමෙන්ම උත්පත්ති සඳු ශනිට අහිතකර රාශියක නම් අපලය බොහෝ සෙයින් වැඩි වේ. එසේ වන්නේ සඳු සමඟ ශනි සතුරු බැවිනි. 

චන්ද්‍රාෂ්ටම ඒරාෂ්ටකය 

උත්පත්ති චන්ද්‍රයාගෙන් 8 වැන්නේ ශනි ගමන් කරන වර්ෂ 2 1/2ක කාලය චන්ද්‍රාෂ්ටම ඒරාෂ්ටක කාලයයි. ඉහත ආකාරයටම සඳුගෙන් 8 වැන්නට යෙදෙන රාශිය ශනිට හිතකර රාශියක් නම් ඒරාෂටක තත්ත්වය බරපතළ නොවේ. එම රාශිය ශනිට අහිතකර නම් ඒරාෂටක තත්ත්වය බරපතළ වේ. ඉහත ඒරාෂ්ටක තුන සම්බන්ධයෙන් පැවැසූ ශුභ අශුභ තත්ත්වයන් ද මෙම ඒරාෂ්ටක වර්ගයට ද පොදුවේ.

තවද උත්පත්ති ශනි මතට ගෝචරයෙන් ශනි පැමිණීම අශුභදායකය. එහිදී උත්පත්ති ශනි දුබල භාවයෙන් යුක්ත නම් ඉතාම අපලකාරී වේ. එසේම ශනිගෙන් යෙදෙන ඒරාෂ්ටකයක් පවතින විට ශනි දශාවක් හෝ සඳු දශාවක් පවතී නම් අයහපත් වේ. අපලය වැඩි කරනු ලැබේ. 

උපතේදී සඳු ලග්නයේ හෝ 8 වැන්නේ සිටින විට ඒරාෂටක 2ක් එක්වර යෙදේ. 

උපතේදී ලග්නයේ සඳු සිටින විට ගෝචරයෙන් ශනි පැමිණීමේදී ලග්න ඒරාෂටකයත්, ජන්ම ඒරාෂටකයත් යන ඒරාෂටක දෙක එකවර යෙදේ. 

උපතේදී 8 වැන්නේ චන්ද්‍රයා සිටි විට, ගෝචරයෙන් ශනි ඒ මතින් ගමන් කරද්දී ජන්ම ඒරාෂ්ටකය හා අෂ්ටම ඒරාෂ්ටකය යන ඒරාෂටක දෙක එක වර යෙදේ. 

මෙවැනි ඒරාෂ්ටක දෙකක් එකවර පුද්ගලයකුට යෙදීමෙන් අපලය තදබල වේ. නමුත් ජන්මියාගේ ලග්නය ශනිට අහිතකර හෝ හිතකර භාවය මත අපලය අඩු වැඩි වීම සිදුවේ. 

ඉහත කී ඒරාෂ්ටක තත්ත්වයන් ඔබටත් ලබා ඇත්නම් කළ යුතු වන්නේ ඉතා ධාර්මික වී සෙනසුරු අපලයට අදාළ වතාවත්වල නිරන්තරයෙන් නිරත වීමයි. එවිට අපලය සම්පූර්ණවම නැති නොවුණ ද යම්තාක් දුරට එහි ප්‍රබලතාවය අඩුවීම සිදුවේ.

උපුටා ගැනීම දිවයින