කාලි යක්ෂණිය කියා ඔබත් විශ්වයේ මැවුම්කාරියට ගරහනවාද?

සක්වළ යනු ගිනිය නොහැකි දෙයකැයි බුදුන් වහන්සේ දේශනා කර ඇත. අප ජීවත්වන චක්‍රාවාටයට එපිටින් දහසක් සක්වළ තල පිහිටා තිබේ. යන්ත්‍රයට, මන්ත්‍රයට, තන්ත්‍රයට අධිපතියාණන් වන මහා ශිව දෙවිදුන්ගේ බැතිබර බිරිය උමා මහේෂ්වරියයි. එතුමියගේ ජන්ම භූමිය බ්‍රහ්මාණ්ඩයයි. එය මෙම සක්වළින් එපිට ස්ථානයකි. දක්ෂා නම් රජුට දාව සතී ලෙසත්, මීනාක්ෂී, කමාක්ෂී, පාර්වතී ආදී ලෙසත් උමයංගනාව නොයෙක් වර මනු ලොව ජන්මය ලබා ඇත. එයින් මූලිකම කතාව දිගහැරෙන්නේ සතී ලෙස මනු ලොව උපන් ජන්මයයි. පාර්වතී හෝ උමා යන්නෙහි තේරුම සෙනෙහස හා භක්තිය යන්නයි. කුමන නමකින් හැඳින්වුවද, ඇය විශ්වයේ ජනනිය නොහොත් ආදි පරා ශක්තියයි. හින්දු වේදයට අනුව ඇය විශ්ව මාතාව ලෙස හදුන්වනු ලබයි. උමයංගනා දේවියට පුතුන් දෙදෙනෙකි. වැඩිමලා කාර්තිකේය නොහොත් ස්කන්ධ දෙවියන්ය. දෙවැන්නා බුද්ධියට අධිපති ගනේෂ දෙවියන්ය. එතුමිය විෂ්ණු දෙවියන්ගේද සහෝදරියයි. විශ්වයේ මැවුම්කාරිනිය උමයංගනා දේවියයි. එය ශෛව සාහිත්‍යයේ ශක්තිය ලෙස නම් කරයි. (ශෛව සාහිත්‍ය හෙවත් ශෛව දහමේ ප්‍රධානත්වය ගනු ලබන මහා දෙවියන්, විනාශ කරන්නා නොහොත් ශිවයි. විශ්වයේ සියලු රිද්මය හා ජනනනය – ශිව ශක්ති තුළ ගැබ්ව පවතී.)

වේදාන්තයනට අනුව උමයංගනාව ගැන සෘග් වේදයේ මෙසේ සඳහන් වෙයි. මහා බ්‍රහ්මයන්ගේ සියලු ශක්තිය හා ඥානය රඳා ඇත්තේ පාර්වතිය තුළයි. වේද ත්‍රිමූර්තිය වන අග්නි, වරුණ හා වායු දෙවියන් සියලු භාවනාමය යෝග සිද්ධීන් හා බලයන් ලැබුවේ උමා නොහොත් පාර්වතී මාතාවගෙන් බවයි. ලිංග පුරාණයේ ඇය අසුරයන් මැඬලූ මහා කාලිය ලෙසත්, ස්කන්ධ පුරාණයේ අසුර යුද්ධය ජයගත් දුර්ගා ලෙසත්  සඳහන් වේ. මුලදී මා සඳහන් කර ඇති ලෙස සතී නමින් මනු ලොව ඉපදීම පිළිබඳව ජන්ම කතාන්දරය ඉතා සිත්ගන්නාසුලු එකකි.

දක්ෂා රජුටත් ප්‍රසූති දේවියටත් දියණියන් සිටියේ නැත. මෙය මහා බ්‍රහ්මයන්ට සැල කර සිටි විට එතුමන් දක්ෂා රජුට උපදෙස් දුන්නේ ආදි පරා ශක්ති දේවිය මත යෝග වඩන ලෙසයි. සියලු රජසැප ඉවතලා වනගතව මෙම යුවළ දීර්ඝ කාලයක් එතුමිය මත ධ්‍යාන වැඩීය. අති දුෂ්කර යාග හා ධ්‍යානවලට අනතුරුව එක් දිනක් ආදි පරා ශක්තිය දර්ශනය විය. දක්ෂා රජුට කැමැති වරයක් ඉල්ලන්න යැයි කී විට, ඔවුන්ගේ දියණියක ලෙස ආදි පරා ශක්තියට උපත ලබන්න යැයි ආරාධනා කරනු ලැබිණ. එවිට මාතාවන් ඔවුන්ගෙන් එක් පොරොන්දුවක් ගනු ලැබිණ. කෙදිනක හෝ ඇය බලවත් නින්දාවකට ලක්වුවහොත් ක්ෂණයකින් ආදි පරා ශක්තිය ලෙස අතුරුදන් වන බවය. ඔවුන් එයට එකඟ විට ඇයට  “සතී” යනුවෙන් නම් තබන ලදී.

ඒ වනවිට දක්ෂා රජුට තවත් දරුවන් 23ක් විය. කුඩා කල පටන් ශිව නාමය ඇයගේ මුවගෙහි රැඳිණ, කෙදින හෝ ශිව දෙවිදුන් අතිනත ගන්නා බව ඇය නිතර දෙඩීය. මළ සොහොනක කොටි සමක් පොරවා නිදන ශිව වැන්නකුට ඇය වැනි රූමත් දියණියක් සරණපාවා දීමට දක්ෂා රජු කෙසේවත් එකඟ නොවීය. මෙහි අවසන් ප්‍රතිඵලය වූයේ සතී දේවිය මාලිගය හැරපියා වනගතව ශිව දෙවිඳුන් වෙනුවෙන් ධ්‍යාන වැඩීමයි. එය කෙතරම් උග්‍ර ධ්‍යානයක්ද කිවහොත්, සතී දේවිය දිනකට ගසකින් වැටෙන එක් කොළයක් පමණක් ආහාරයට ගත්තාය. මෙම සිදුවීම මත ඇයට අපර්ණා යන නාමය පටබැඳිණ. සියල්ලම බලා සිටි ශිව දෙවිදුන් අවසානයේදී ඇයව තම බිරිය කරගැනීමට කැමැති විය. ශිව දෙවිදු ඇයව කෛලාශයට කැඳවාගෙන ගියේය. මෙසේ දින ගතවන විට, දක්ෂා රජු දෙවියන් හා දේවතාවියන් පිරිවරා විශාල යාගයක් සූදානම් කරනු ලැබිණ. මෙම යාගයට ශිව දෙවියන්ට හෝ සතී දේවියට ආරාධනා කරනු නොලැබිණ. මෙම මහා යාගයට ශිව දෙවිදුට හෝ තමාට ආරාධනා නොකිරීම පිළිබඳව ඇය ඉතා කනස්සල්ලට පත් විය.

මෙය තම ස්වාමියාට කරනා මහත් නිග්‍රහයක් ලෙස සිතූ ඇය, මහ දෙවි අණද නොතකමින් යාග භූමිය වෙත පිටත් විය. මෙය දුටු දක්ෂා රජු ඇයට බැන වැදිණ. එය සතී දේවියට පිරිස අතර දරාගත නොහැකි නින්දාවක් බවට පත්විය. එසැණින්ම ඇය ආදි පරා ශක්ති ස්වරූපයට මාරු විය. ඉන්පසු ආදි පරා ශක්තිය විසින් දිනෙක ශිව දෙවිදු අතින් දක්ෂා රජු මිය යා යුතු බවට පළමු ශාපය කළාය.  ශිව ශක්තිය නොමැතිව විශ්වයේ කිසිදු යාගයක් පූර්ණ නොවන ලෙස දෙවැනි ශාපයක් කළාය. පසුව යෝග බලයෙන් උපදවාගත් සෘද්ධි බලය තුළ ඇයගේ සිරුර අග්නියෙන් වෙළාගනු ලැබිණි. සැණෙකින් සතී දේවියගේ සිරුර කපා හෙළුෑ කෙසෙල් කඳක් සේ බිම පතිත විය. 

මෙම සිදුවීම ශිව දෙවියන්ට දරාගත නොහැකි දුකක් ඇති කරනු ලැබිණ. ඉන්පසු දෙවියෝ ශිව තාණ්ඩවය නැටීම ආරම්භ කරන ලදී. ඒ අතරතුර මහ දෙව් තම කේශ ජටාවෙන් කෙස් ගස් දෙකක් ගලවාගෙන ඉන් එකකින් මහා රුද්‍ර ස්වරූපය වූ වීරබද්‍ර ස්වරූපයත්, අනෙකින් භයංකර ස්ත්‍රී ස්වරූපය වූ මහා කාලි ස්වරූපයත් මවන ලදී. මෙම වීරභද්‍ර අතින් දක්ෂා රජු මරණයට පත්විය. ඉන්පසු මහා විෂ්ණු දෙවිදු එම ශරීරය කොටස් 52කට කපා විසි කළ අතර, එම කොටස් 52 ස්ථාන 52ක මහා ශක්ති පීඨ ලෙස ස්ථාපිත විය. එවෙලේම එම ශක්ති පීඨයන්ගේ ආරක්ෂාව සඳහා ශිව දෙවියන් භෛරව ස්වරූපයෙන් පොළොවට පැමිණියේය. ශ්‍රී  ලංකාවේ යාපනයේ නල්ලූර් හි ඇති නාග ප්‍රශනී කෝවිල එක් ශක්ති පීඨයකි. මෙය සතී දෙවියගේ පා සලඹ වැටුණු ස්ථානය ලෙසද සලකයි. ඉන්ද්‍ර දෙවියන් විසින් මෙම ස්ථානය ගොඩනංවා ඇති බවත්, රාම – රාවණ යුද්ධයේදී, මෙම ස්ථානයේ මාතාවන් මෙම දෙදෙනාටම ආශීර්වාද කර ඇති බවත් පුරාණයේ සඳහන් වේ.

මෙම කතන්දරය පැවැසුවේ. මහා උමයංගනා මාතාවන් හෙළ දිවයිනටද සෘජුව සම්බන්ධයක් තිබෙන බව ඔබට පහදා දීමටය. කෙසේ නමුදු මෙම උතුම් මාතාවන්ගේ විශ්ව ස්වරූප 108ක් පවතී. එයින්ද දස විද්‍යා අවතාර 10කි. එහිද පරිවාර අවතාර පවතී. මනුලොවට උපන් අවතාර තව බොහෝ ගණනකි. ඔබ කාලි යකින්න යැයි කියා නිගරු කරනා කාලි අවතාරයද මාතාවන්ගේම ස්වරූපයකි. මිනිසුන් වෙනුවෙන් පමණක් නොව දෙවියන්, බඹුන් හා විශ්වයේ බුදුවරු වෙනුවෙන්ද  උමයංගනා මාතාව ඉටුකොට ඇති අමිල මෙහෙය ඔබ කාටත් තවමත් රහසක් බව දනිමි.

මානව ප්‍රේමයේ මහා කරුණා නදිය උමා මාතාවයි. සරස්වතිය, ලක්ෂ්මිය, කාලිය, ඇයගේම අවතාරයන්ය. මෝක්ෂය හෙවත් පරමානන්දය තුළ ඔබ ගිල්වා බියකරු සසරින් ඔබ එතෙර කරවීම ඇයගේ පාරමිතාවයි.

සියලු විශ්ව ජීවීන් ශාන්තියට පත්වේවා!

සතිදේවී ශක්ති පීඨය,
මාතා ශිවගාමී
කුරුණෑගලවත්ත පාර, යක්කල
0773030076

උපුටා ගැනීම මව්බිම