හෝරාව බලා වැඩ කළොත් ගොඩ යන්න පුළුවන්…
අපි කවුරුත් කැමැතියි අපි කරන වැඩ වඩාත් සාර්ථක වනවා දකින්න. සාර්ථකව වැඩකටයුතු ඉටුකර ගැනීමට අපගේ උත්සාහය නිවැරැදි කළමනාකරණය වගේ දේවල් ගොඩක් ප්‍රයෝජනවත් වෙනවා. එහෙම උත්සාහයෙන් වැඩ කරන අපට විශ්වයේ පවතින ග්‍රහ බලයත් ප්‍රයෝජනයට ගෙන වඩාත් හොඳින් අපේ ඉලක්ක සපුරා ගන්න පුළුවන්. අද අපි බලමු එදිනෙදා පවතින සුබ හෝරාවන් කොහොමද යෙදෙන්නේ කියලා.
හෝරාව කියන්නේ පැයකට ආසන්න කාලයක්. හෝරාව පටන් ගන්නේ එදිනෙදා ඉර උදාවත් සමගයි. ඕනෑම ලිතකින් ඒක බලාගන්න පුළුවන්. ඊට පස්සේ අපි දැනගන්න ඕනෙ දවසේ පළමුවැනි පැය එම දින අධිපතියාට අයත් හෝරාව බව. කවුද දින අධිපතියා කියන්නේ?
සතියේ දින හත ගත්තොත් ඉරිදාට දින අධිපතියා තමයි ඉරු. ඒ කියන්නේ රවි. සඳුදාට දින අධිපතියා තමයි සඳු. එනම් චන්ද්‍රයා. අඟහරුවාදාට දින අධිපතියා තමයි අඟහරු හෙවත් කුජ. බදාදාට දින අධිපතියා වන්නේ බුධ. බ්‍රහස්පතින්දාට දින අධිපතියා වන්නේ බ්‍රහස්පති. බ්‍රහස්පතිට ගුරු කියලා කියනවා. සිකුරාදාට දින අධිපති සිකුරු. ජ්‍යොතිෂයේදී සිකුරුට කියන්නේ ශුක්‍ර කියලා. සෙනසුරාදාට දින අධිපති තමයි සෙනසුරු. ජ්‍යොතිෂයේදී සෙනසුරු ශනි කියලා හඳුන්වනවා.
ජ්‍යොතිෂ ශාස්ත්‍රයේදී සුබ වේලාවක් සොයාගැනීම මුහුර්ත සෑදීම හැටියට හඳුන්වාදී තිබෙනවා. සුබ මුහුර්තයක් සෙවීමේදී කරුණු ගණනාවක් ගැන අවධානය යොමු කරන අතර එක කරුණක් තමයි මේ හෝරාව. අපගේ ජීවිත හා සම්බන්ධ වැදගත් කටයුතු සඳහා වඩාත්ම සුදුසු වන්නේ කවර ග්‍රහයාට අයත් හෝරාවද කියලා ජ්‍යොතිෂය හඳුන්වා දුන් ඍෂිවරු තමන්ගේ අධි මානසික බලයෙන් දැකලා ඒ ගැන සඳහන් කරලා තියෙනවා. රවි ග්‍රහයා රාජ්‍ය කාරක ග්‍රහයා හැටියට හඳුන්වා දී තිබෙන නිසා රජුන් දැකීමට යනවා නම් රවි හෝරාවෙන් පිටත්ව යන්න කියලා පැරැණි පොතපතෙහි සඳහන් වෙනවා. දැන් කාලෙ රජවරුන් නැහැනේ. එහෙම නම් අපට පුළුවන් රජයේ කාර්යාලයකින් වැඩක් කරගන්න යනවා නම් රජයේ සේවයකට යන්න සම්මුඛ පරීක්ෂණයකට යනවා නම්, පෞද්ගලික අංශයේ වුණත් ඉහළ මට්ටමේ කෙනෙක් හමුවෙන්න යනවා නම් රවි හෝරාවෙන් පිටත් වෙලා යන්න.
චන්ද්‍ර හෝරාව සියලු සුබ කටයුතු සඳහා යොදාගන්නා ලෙස ජ්‍යොතිෂයේ සඳහන්. ඕනෑම කටයුත්තක් ආරම්භ කරන්න චන්ද්‍ර හෝරාව යොදාගත්තාට වරදක් නැහැ.
කුජ ග්‍රහයා ග්‍රහ මඬුල්ලේ සෙන්පතියා, එහෙමත් නැත්නම් සටන්කාමියා ලෙසයි හඳුන්වා තිබෙන්නේ. යුද්ධයට යනවා නම් කුජ හෝරාවෙන් පිටත්ව යන්න කියල තමයි පැරැණි පොත පතෙහි සඳහන් වෙන්නේ. අපි ඉතින් යුද්ධ කරන්න යන්නෙ නැහැනේ. නඩුවකට යනවා නම්, ක්‍රීඩා තරගයකට යනවා නම් කුජ හෝරාව යොදාගන්න පුළුවන්.
බුධ තමයි බුද්ධියට අධිපති ග්‍රහයා. නුවණ වඩන කටයුතු ආරම්භ කිරීමට බුධ හෝරාව තමයි හොඳ. අලුතින් පාඨමාලාවක් ආරම්භ කරන්න, විභාගයකට යන්න, ටියුෂන් පන්තියක් පටන් ගන්න වගේ කටයුතු බුධ හෝරාවෙන් ආරම්භ කළාම වඩා හොඳ ප්‍රතිඵල ලබාගන්න පුළුවන්.
ගුරු ග්‍රහයා සුරගුරු ලෙසද හඳුන්වනවා. එහෙම කියන්න හේතුව දෙවියන්ගෙත් දෙවි වූ කියන තේරුම ඇතිවයි. ගුරු ධනයට අධිපතියාද වනවා. පුත්‍රකාරකද වනවා. ග්‍රහ මඬුල්ලේ වඩාත්ම සුබ ග්‍රහයා හැටියට හඳුන්වන අවස්ථාද තිබෙනවා. පැරැණි පොත්වල ‘ගුරු විවාහෙ’ ලෙස සඳහන්. ඒ කියන්නේ විවාහ කටයුතුවලදී ගුරුගේ හෝරාව පාවිච්චි කරන්න කියලා. අපි විවාහ නැකැත් හදනකොටත්, මුදල් ගනුදෙනු සඳහා සුබ මුහුර්ත හොයනකොටත් ගුරුගේ හෝරාවට ප්‍රධාන තැනක් දෙනවා.
එදිනෙදා ජීවිතයේදී අපට නිතරම හොඳ වේලාවක් බලන්න සිදුවෙන කාරණයක් තමයි ගමනක් යන්න පිටත් වීම. මොකද අපි ගමනකට පිටත් වෙනකොට අසුබ වේලාවක් උදාවෙලා තිබුණොත් නොයෙකුත් අනතුරු කරදර රස්තියාදු ආදිය සිදුවෙන්න පුළුවන්. ගමන් යන්න වඩාත්ම සුදුසු වන්නේ සිකුරු හෝරාවයි. සිකුරු හෝරාව අනෙකුත් සියලු සුබ කටයුතු සඳහාද යොදාගන්න පුළුවන්.
සෙනසුරු තමයි ග්‍රහ මඬුල්ලේ මහල්ලා. එයා ඉන්නේ ජීවිතය ගැන කලකිරිලා. අපට ඒරාෂ්ටක අපල වගේ තදබල අපල සිදුකරලා දෙන්නෙත් සෙනසුරුයි. ඒක නිසා ශනිගෙ හෝරාව පැවිදි කිරීමේ කටයුතු, භාවනා කටයුතු වැනි දේ ආරම්භ කිරීමට යොදාගන්න පුළුවන්.
ජ්‍යොතිෂ ශිරෝමනී, දේශබන්දු අගලවත්තේ චන්දන වීරක්කොඩි
උපුටා ගැනීම මව් රට
