මල්වර කේන්ද්‍රයට ඔබත් රැවටුණාද?

දැරියකගේ ජීවිතයේ දෙවැනි ඉපදීම ලෙස සලකන්නේ ඇය මල්වරවියට පත්වීමයි. එකී සංසිද්ධියේදී ඇගේ පවුලේ මව ඇතුළු වැඩිහිටියන් විසින් පළමුව සිදුකරනු ලබන චාරිත්‍රයක් ලෙස සැලකෙනුයේ ඇගේ මල්වර නැකතට අනුව කේන්දරයෙන් පලාපල විමසා බැලීමයි. එහිදී බොහෝ ජ්‍යෝතීර්වේදීහු ඇගේ කේන්දරයට අනුව එම යුවතියගේ අනාගත ජීවිතය පිළිබඳව විවාහය , අධ්‍යාපනය ආදී  කාරණා සම්බන්ධයෙන් අදහස් දක්වති. පුරාතනයේ සිට කරගෙන එනු ලබන එකී චාරිත්‍රය සත්‍ය ලෙසම ප්‍රතිඵලදායකද? 

එසේ කියනු ලබන කාරණා සත්‍යයද? අප ඒවා කෙසේ භාරගත යුතුද? යන්න සම්බන්ධයෙන් අපි විමසා බැලීමට තීරණය කළෙමු. මේ ඒ පිළිබඳව ප්‍රවීණ ටොලමියානු ජ්‍යෝතීර්වේදී කේ.සී.ජේ. රත්නායක මහතා සමග කළ සාකච්ඡාවකි.

දැරියක යුවතියක වීම සනිටුහන් වනුයේ ඇගේ පළමු ඔසප් චක්‍රයේ ආරම්භය සමගිනි. එය ඉතා සාමාන්‍ය ස්වාභාවික සංසිද්ධියක් බව කවුරුත් දනිති. එහෙත් මේ අවස්ථාව ආශ්‍රිතව නැකැත් බැලීම සහ මල්වර කේන්ද්‍ර සැදීමත්, එහි ගුණ අගුණ විමසීමත් අපේ රටේ තවමත් නිතර සිදුවේ.

මීට දශක 3කට පමණ පෙර කාලයේ නම් පළමු ඔසප් වීම ආශ්‍රිතව පවත්වාගෙන ආ කේන්ද්‍ර බැලීමේ මිථ්‍යා විශ්වාසය වර්තමානයේ බොහෝ දුරට වසංගත තත්ත්වයක්ව පවතිනුයේ නැත. ඊට හේතුව වනුයේ බොහෝ දෙනෙකු විසින් එහි ඇති නිසරු බව අවබෝධ කරගෙන තිබීම වන්නට ඇත. කෙසේ නමුත් ඇතැම් තැනක තවමත් මේ මල්වර කේන්ද්‍ර සැදීම සිදුකරනු ලැබේ.

මල්වර කේන්ද්‍රය යනු යුවතියක විසින් තමාගේ පළමු වෙනස්වීමේ රුධිර සලකුණු පළමුවරට දකින දිනය හා වේලාව පදනම් කොටගෙන ඇති කරගත් මිථ්‍යා විශ්වාසයක්  අනුව සාදනු ලබන කේන්ද්‍රයයි. පළමු ඔසප්වීම ලැබූ දැරියගේ මව හෝ වැඩිහිටියෙකු දෛවඥයෙකු කරා ගොස් අසවල් දින, අසවල් කාලයේ රුධිර සලකුණු දුටු බව කියයි. ඒ වේලාව නිශ්චිතවම කිසිවෙකුත් නොදන්නා නමුත් ජ්‍යෝතිෂ්‍ය‍ෙව්දියා විසින් අදාළ මොහොතට අනුව කේන්ද්‍රයෙන් සාදා පලාපල කියයි. විවාහය, රැකියාව, උගත්කම, පවුලට ගෙනෙන වාසනාව හෝ අවාසනාව, මාරක රෝගාබාධ, මේ ආදී නොයෙකුත් දෑ මල්වර කේන්ද්‍රය අනුව කියයි.

ඒ විස්තර අසන කෙනෙක් සතුටු වෙයි. තව කෙනෙක් දුක්වෙයි. මල්වර වීම අනුව ඇගේ රූමත්බව, ගුණවත් බව, කුලවත් බව, වාසනා ගුණය, දරු සම්පත, විවාහය යන ආදිය සුබදායක යැයි කීමම සතුටු වන්නේ යම් සේද, මුලින්ම කී කරුණු අසාර්ථක යැයි කී විට වැඩිහිටියන් තුළ හට ගනුයේ අසංතෘප්තියකි. එහෙත් මේ මල්වර කේන්දරය යනු ශිෂ්ට සම්පන්න සමාජයේ  බැහැර කළ යුතු නොදියුණු මිථ්‍යා භාවිතයක් බව ඔබ දන්නවාද. මල්වර කේන්ද්‍රය අනුව ආදාළ යුවතිය සම්බන්ධයෙන් හොඳ හෝ නරක පැවසීමෙන්  කිසිවක් සිදුවන්නේ නැත. ඇතැම් කෙනෙකු කියන්නේ මල්වර වීම යනු කාන්තාවකගේ දෙවැනි ඉපදීම බවයි. අදාළ තරුණියගේ ජීවිතය තීරණ වන්නේ ඇගේ ජන්ම කේන්දරයට අනුව නොව මල්වර කේන්දරයට අනුව යැයි ඇතැමෙක්  සිතයි. නමුත් එය එසේ සිදුවන්නේ නැත.

අපි මෙසේ බලමු.  X නම් දැරිය තම පළමු ඔසප් වීම සමගම යුවතියක බවට පත්විය. ඈ ගෙයි මුල්ලට තල්ලුකොට ඇගේ වැඩිහිටියන් පලාපල අසන්නට ගියේය. මුල්ම ඔසප් වීම සිදුවූ ස්ථානය, වේලාව නොදන්නා  නමුත් වැඩිහිටියන් කියන දිනය හා වේලාවට අනුව පලාපල කියන තැනැත්තා මල්වර කේන්දරයක් හදා මෙසේ කීවේලු. මේ මල්වර කේන්දරය අනුව ඇගේ චරිතයට කැළලක් විය හැකිය. පියාට හා මවට අපලයි. විවාහ වූ පසුව අඬදබර මෙන්ම දික්කසාදය සිදුවෙයි. බහු විවාහයන්ද සිදුවෙයි. අධ්‍යාපනය කඩාකප්පල් වේ.

මල්වර කේන්දරයේ තොරතුරු අනුව  X දැරියගේ වැඩිහිටියන් මහත් සංවේගයට පත් වී මහා නපුරක් සිදුවී ඇති බව සිතමින් හැඬූ  කඳුළින්ම ගෙදර එති. එතැන් සිට වැඩිහිටියන් මවුපියන් විසින් අර අහිංසක යුවතිය දෙස බලනුයේ වපර ඇසිනි. එදා සිට රැවුම් ගෙරවුම් වැඩිවේ. මේ සියලු විගඩම් හටගන්නේ බොරු මනස්ගාත මල්වර නැකැත් නිසාය. 

මෙවැනි දෑ ජ්‍යෝතිෂ්‍යයේ නැත. නමුත් බමුණන් හා මිථ්‍යා දෘෂ්ටිකයන් විසින් මිනිසුන් මුළා කිරීම සඳහා වැපිරූ බොරුවක් මිස පළමු ඔසප් වීම සමග හට ගන්නා සිදුවීම සමග ඇගේ ජීවිතයට හෝ අන්අයගේ ජීවිතයට කිසිදු බලපෑමක් සිදුවන්නේ නැත. ඒ බව මේ වනවිට නම් බොහෝ දෙනෙකු ඇති සැටියෙන් කරුණු වටහා ගෙන ති‌බේ. එහෙත් සුළුතරයක් මිථ්‍යාවේ ගිලී සිටිති. 

මල්වර කේන්ද්‍රයට අනුව යුවතියගේ ජීවිතය තීන්දු වන්නේ නම් එතැන් සිට ඇගේ විවාහය දක්වා වූ සියලු කටයුතුවලදී ජ්‍යෝතිෂ්‍යවේදීන් නැකැත් සෑදීමේදී එම මල්වර වූ නැකැත් වේලාවන් අනුව එම යුවතියගේ සියලු කටයුතු තීරණය කළ යුතුවේ.  උපන් ජන්මයට අනුව නොව මල්වර වූ නැකැතට අනුව සියලු දේ තීරණය විය යුතු යැයි ඇතැමුන් සිතයි. නමුත් එය එසේ වන්නේ නැත. විභාග, විවාහ ආදී ජීවිතයේ සියලු සන්දිස්ථානයන්හිදී ජ්‍යෝතීර්වේදීන් සලකා බලනුයේ මල්වර වූ නැකැත නොව උපන් ජන්ම නැකැතයි. එහිදී මල්වර වූ නැකැත් ජ්‍යෝතීර්වේදීන් ඉල්ලනුයේ නැත. උපන් නැකැත් අනුව පලාපල කියයි. විය යුත්තේද එයයි. බොරුවට හිත අසන්තෝස කරගත් නමුත් මල්වර කේන්දරයේවත්, පළමු ඔසප් චක්‍රය සිදු වූ අවස්ථාවේ සිටවත් ඊට යුවතියගේ ජීවිතයට ජ්‍යෝතිෂ්‍යමය වශයෙන් කිසිදු බලපෑමක් හට ගන්නේ නැත. එය ස්වාභාවික සංසිද්ධියක් පමණි. මල්වර කේන්දර බලන සියලු දෙනාටම මේ පණිවිඩය වැදගත් වනු ඇත.

කෂිනි හපුආරච්චිඋපුටා ගැනීම අද