මුහුණ බලා ඔබේ පෙම්වතා හඳුනාගන්න

කෙනකුගේ මුහුණේ හැඩයෙන් වරිත ලක්‍ෂණ කිව හැකි ක්‍රම දේහලක්‍ෂණ විද්‍යාවේ සඳහන් වේ. මුහුණ කෙනකුගේ චරිතය විදහාපාන කැඩපතකි. මිනිසුන්ගේ ගමන් විලාසය, කතා විලාසය හා ඔවුන්ගේ ශරීර ලක්‍ෂණ ද ඔවුන්ගේ චරිත ස්‌වභාවය මනාව පිළිබිඹු කරයි. මෙම ලිපියේ අරමුණ මුහුණේ හැඩය අනුව චරිත ලක්‍ෂණ විග්‍රහ කිරීමයි.

රවිට අයත් ත්‍රිකෝණාකාර මුහුණ :

හිස්‌ මුදුන සිහින්ව නිකට ප්‍රදේශය මහත්ව පිහිටි මෙම මුහුණ රවි හිමි අග්නි භූතයට අයත්ය. අභිමානවත් බව, අන්‍යයන් තම මතයට යටත් කරගැනීමේ හැකියාව නායකත්වය දැරීමේ දක්‍ෂ බව මෙම අයට උපතින්ම පිහිටා ඇත. තම පවුලේ ප්‍රධානත්වය. ගම් ප්‍රදේශයේ හෝ සමාජයේ හෝ මූලිකත්වය දැරීමට සුදුස්‌සෝ වෙති. එපමණක්‌ ද නොව නගරයේ හෝ රටේ හෝ නායකත්වය දැරීමේ හැකියාවද ඇත. වර්ගය, ජාතිය, ආගම, කුලය සහ ස්‌ත්‍රී පුරුෂ බව නොසලකා හැමට එක හා සමානව සලකයි. තමන් ඇසුරේ සිටින අය අභිබවා ක්‍රියා කරයි. ප්‍රතිඵල හොඳ හෝ නරක හෝ වේවා තම මතය අනුවම ක්‍රියා කරයි. බොහෝවිට ප්‍රතිඵල යහපත් වේ. අයහපත් වන්නේ ඉතා කලාතුරකිනි. උස මහත ශක්‌තිමත් ශරීරයක්‌ හිමිවේ. බොහෝ සෙයින් නිරෝගිය. ආහාර ගැනීමේදී විමසිලිමත් වේ. නිරෝගි වීමට ප්‍රධාන හේතුව එයයි. තම අරමුණ ඉටු කර ගැනීම සඳහා සතුරන් සමඟ වුවද මිතුරු වීමට කැමතිය. තම සහකාරිය තම අදහස්‌වලට නැඹුරු කර ගැනීමට නිතර උත්සාහ දරයි. අවංකව ආදරය කරයි. පිත අධික ශරීරයකි. ආමාශගත දැවිල්ල, රුධිර පීඩනය වැනි රෝගවලට භාජනය වේ. දීර්ඝායුෂ විඳියි. රවි බලවත් වූ වේලාවක උපත ලබා ඇත.

සඳුට හිමි වෘත්තාකාර මුහුණ :

පුන්සඳ මෙන් පිරුණු රවුම් මුහුණක්‌ ඇත. සඳු හිමි ජල භූතයට අයත්ය. ප්‍රියමනාප ගතිය ඇත. සෞඛ්‍ය ගතිගුණවලින් යුක්‌තය. වෙනස්‌වන අදහස්‌ ඇත. කාරුණික හදවතක්‌ ඇති අනුන්හට උදව් උපකාර කිරීමට කැමැති කෙනෙකි. මධ්‍යම ප්‍රමාණයේ හෝ කුඩා ප්‍රමාණයේ හෝ ශරීරයකින් යුක්‌තය. හම පැහැපත්ය. සියුමැලිය. නැහැය උස්‌ව පිහිටා ඇත. සඳු බලවත් වූ වේලාවක කටක ලග්නය උදාව පවතින අවස්‌ථාවේදී බොහෝවිට උපත ලබා ඇත. සෙම් බහුල අසනීප, පීනස්‌ රෝග, හතිය ඇඳුම වැනි අසනීප නිතර සෑදේ. ශරීරය මහන්සි වී කරන වැඩවලට කැමැති නැත. මොළය වෙහෙසා කරන වැඩවලට කැමැතිය. සීතල ආහාර පාන අගුණයි. දවල් කාලයේ නින්දට ප්‍රිය කරයි. රාත්‍රි නිදි වරා වැඩ කරයි. පළමු තැනට පත්වීමට හෝ ප්‍රධානත්වය දැරීමට හෝ උත්සාහ නොකරයි. දෙවැනි තැන ලබාගෙන කටයුතු කරයි. සහකාරියට ඉතා හිතවත්ම අයට මුල් තැන දී ක්‍රියා කිරීමට කැමැතිය.

කුජට හිමි චතුරශ්‍රාකාර මුහුණ :

නළල ප්‍රදේශය සහ නිකට ප්‍රදේශය එක සමානව පළල්ව හතරැස්‌ හැඩයක්‌ ගන්නා මුහුණකි. අඟහරුට අයත් පඨවි භූතයට අයත්ය. පෞරුෂත්වය, එඩිතරකම, නිර්භීත බව, ඉදිරිපත් වීමේ ගතිය, සටනට කැමැති බව පෙන්නුම් කරයි. අවවාද උපදෙස්‌ පිළිනොගනියි. මධ්‍යම ප්‍රමාණයේ ශක්‌තිමත් සිරුරක්‌ ඇත. සටනකට ඉදිරිපත් වුවහොත් මරණය දක්‌වා වුවද සටන් කිරීමට කැමැතිය. වාද විවාදවලදී පරාජය පිළිගැනීමට කැමැත්තක්‌ නැත. පරාජය වුවහොත් කලබලයක්‌ ඇති කර හෝ ජය ගැනීමට උත්සාහ දරයි. යුද හමුදාව, පොලිසිය, ආරක්‍ෂක සේවය වැනි රැකියාවලට ප්‍රියකරයි. කලාත්මක අදහස්‌ ඇතිවන්නේ නැත. තම සහකාරියට, පෙම්වතියට බොහෝ සේ ඇලුම් කරයි. කුජ බලවත් වූ වේලාවක මේෂ, වෘශ්චික ලග්නවලින් බොහෝවිට උපත ලබයි.

බුධට අයත් ත්‍රිකෝණාකාර මුහුණ :

නළල් ප්‍රදේශය පලල්ව, නිකට සිහින්ව පිහිටීම මෙම මුහුණේ හැඩය වේ. බුධ හිමි වායෝ භූතයට අයත් ය. බුද්ධිමත් වේ. කල්පනාකර බලා නුවණින් සිතා බලා කටයුතු කරයි. තමා ළඟ සිටින තමා කිට්‌ටුව ඇසුරු කරන අය ගැන සිතමින් ඔවුන් අනුගමනය කිරීමට උත්සාහ දරයි. තම සහකාරියගේ ක්‍රියා කලාපයට අනුව හැඩ ගැසීමට උත්සාහ දරයි. ඇයගේ වැඩකටයුතුවලට සම්පූර්ණ සහයෝගය දෙයි. සහකාරිය යහපත් කෙනකු නම් ඇයගේ යහපත් වැඩවලට උදව් කරයි. අයහපත් කෙනකු නම් ඇයගේ නරක වැඩවලට සහයෝගය දැක්‌වීමටද පසුබට නොවේ. ඉගෙනීමට දක්‍ෂය. කරුණාවන්තය. කවට කතා කීමට සිත වසඟ වන ලෙස කතා කිරීමට, ලිවීමට හා නිවේදන කටයුතුවලටද සහජ දක්‍ෂතා ඇත. බුධ බලවත් වූ අවස්‌ථාවක කන්‍යා, මිථුන ලග්නවලින් උපත ලබා ඇත.

ගුරුට අයත් දිගටි මුහුණ :

නළල් තලයේ සිට නිකට දක්‌වා එක සමාන පළලින් යුක්‌ත දිගටි මුහුණ ගුරු ග්‍රහයාට අයත් වේ. ආකාශ භූතයට අයත්ය. හිස කෙස්‌ ඉතා සිනිඳුය. උස්‌ මහත් වූ සිරුරක්‌ ඇත. මැදි වයස ඉක්‌මවන විට සිරුර තරබාරු වේ. ශරීරය වෙහෙස නොවන ගුරු සේවය උපදේශක සේවය වැනි රැකියාවලට කැමැතිය. බණ භාවනා කිරීමට, ආගමික කටයුතුවලට සමාජ සේවයට ඉතා ලැදිය. ලෞකික ජීවිතයට වඩා ලෝකෝත්තර පැත්තට සිත නැඹුරු වේ. පාපයට කැමැති නැත. සහකාරියගේ දුර්වලකම් මඟ හරවා යහපත් පැත්තට නැඹුරු කර ගනී. සෙම් අධික රෝග, රුධිර පීඩනය, හෘද රෝග, දියවැඩියාව වැනි අසනීප පහසුවෙන් වැළඳේ. ගුරු බලවත් වූ වේලාවක ධනු, මීන ලග්නවලින් උපත ලබා තිබීම විශේෂයකි.

සිකුරුට අයත් විචිත්‍රාකාර මුහුණ :

ඉතා ප්‍රියමනාප වූ පැහැපත් මුහුණකි. බොහෝ විට හිස කෙස්‌ රැලි සහිතය. සිකුරු හිමි ජල භූතයට අයත්ය. ප්‍රිය මනාපවූ දෙතොල් ඉතා ලක්‍ෂණය. දුටුවන් සිත් වසඟයට ගැනීමේ සිනහවක්‌ ඇත. ප්‍රිය වචන කතා කිරීමට දක්‍ෂය. බොහෝ ඉක්‌මනින් කලබලයට කෝපයට පත් වුවද ඉතා ඉක්‌මනින් සන්සුන් වේ. අපක්‍ෂපාතී වේ. හැකි හැම විටම සාධාරණය ඉටු කරයි. ලස්‌සන ඇඳුම්වලට ප්‍රිය කරයි. තම වැඩකටයුතු ක්‍රමානුකූළව පිළිවෙළට ඉටු කරයි. තමාගේ නිවස තම කාමරය ඉතා පිරිසිදුව තබා ගනී. මල් වැවීමට බොහෝ කැමැතිය. ආදරය වෙනුවෙන් ඕනෑම දෙයක්‌ පරිත්‍යාග කරයි. තම සහකාරියට පන මෙන් ආදරය කරයි. වයසට පත් වුවද ආදරය වෙනස්‌ නොවේ. රූපලාවන්‍ය ශිල්පය, රෙදි පිළි, සුවඳ විලවුන් ව්‍යාපාර, කලා අංශයේ රැකියා මෙම අයට ඉතා සුදුසුය. සෙම අධිකය. සෙම් බහුල අසනීපවලින් පීඩා විඳියි.

සෙනසුරුට අයත් වයස්‌ ගත පෙනුමැති මුහුණ :

තම වයසට වඩා වයස්‌ගත වූ බවක්‌ මෙම මුහුණෙන් පෙන්නුම් කරයි. සෙනසුරුට හිමි වායෝ භූතයට අයත්ය. ප්‍රියමනාප ගතිය නැත. බොහෝවිට දුක්‌මුසුභාවය, නොරිස්‌සුම් ස්‌වභාවය, නපුරු බව පෙන්නුම් කරයි. ලස්‌සනට සිටීමට, පිරිසිදු ලෙස පිළිවෙළට ඇඳුම් ඇඳීමට උවමනාවක්‌ නැත. කලුපාට, තද නිල්පාට, දුඹුරු පාට වැනි අඳුරු වර්ණවලට ප්‍රිය කරයි ඉතා චාම්ය. සරලය. නිතර වැඩෙහි යෙදේ. විවේකය අඩුය. මුදල් ඉපැයීමට දක්‍ෂය.වියදම් කිරීමේදී සැලකිලිමත් වේ. මෙලොවට වඩා පරලොව ගැන සිතයි. ලෞකික ජීවිතයේ සැප සම්පත්වලට වැඩි ආශාවක්‌ නැත. අවංකය. අනුන් රැවටීමට උත්සාහ දරන්නේ නැත. වාත අමාරු තුනටියේ අමාරු වැනි රෝග සෑදේ. ශරීරයේ වම්පැත්තේ රෝග සාදයි. සෙනසුරු බලවත් වූ වේලාවක මකර, කුම්භ ලග්නවලින් උපත ලබා ඇත. මුහුණේ හැඩය පරීක්‍ෂා කර බලා ඔබගේ පෙම්වතා හෝ සහකරු හෝ හඳුනා ගන්න.

උපුටා ගැනීම දිවයින