ඒ ඒ මාස වල හා දවස්‌ වල ඉපදුනොතින් ඵල මෙලෙසින්

ඒ ඒ සහස්‍රක, ශත වර්ෂ, වර්ෂ, මාස, දින, පැය හා විනාඩිවලදී ඒ ඒ පුද්ගලයන් උපත ලබන අතර, “මානසාගරී” නමැති පෞරාණික මාහැඟි ජ්‍යෙතිෂ ග්‍රන්ථයේ සඳහන් වන අන්දමට, ඒ ඒ මාස වලදී උපත ලැබීමේ ඵල පහත සඳහන්ය.

ජනවාරි :

ශූරය, ඔද තෙද සහිතය, දෙවියනට හා දෙමව්පියනටද ගරු කිරීමට මැළිය, ධනය ඉපයීමේ හැකියාවක්‌ සහිතය.

පෙබරවාරි :

ශුරය, ධනවත්ය, රළු වචන කතා කරයි, සටන්වලට හපන්ය, කාමුකය.

මාර්තු :

ධනවත්ය, අනුනට උපකාර කිරීමට කැමතිය, සුව සම්පන්නය, සුදු පැහැතිය, උගත්කමක්‌ සහිතය, පිටරට සවාරිවල නිරතුරු යෙදීමට කැමතිය.

අප්‍රේල් :

සුන්දර සිරුරකින් සමන්විතය, දෙනෙත් රත් පැහැවිය හැකිය, කතුන්ට ලොල්ය, ජීවත් වන්නේ සතුටකින්ය.

මැයි :

යහපත් සිතකින් යුක්‌තය, සිත්ගන්නා දෙනෙතක්‌ද, ශෝභා සම්පන්න සිරුරක්‌ද සහිතය, කතුන් කෙරෙහි ඇල්මක්‌ දක්‌වන සුලුය, බව භෝග සහිතය, ධනවත්ය.

ජුනි :

සිත පිරිසිදුය, ධනවත්ය, ආයුෂ දීර්ඝය, නුවණැතිය, පිට රටවලට ඇල්මක්‌ දක්‌වන සුලුය.

ජූලි :

දැහැමි සිතක්‌ සහිතය, සිත් අදනා පැහැයකින් යුක්‌තය, දරු මුනුපුරන් සහිතය, පසු වන්නේ මද සුවයකිනි, ධනය විනාශ වීමෙන්, චිත්ත පීඩාවකට පත් විය හැකිය.

අගෝස්‌තු :

මනා රූසපුවකින් යුක්‌තය, සිරුර තරය, දුක සැප දෙකේදී මෙන්ම ලාභ අලාභ දෙකේදීද, නොසැලී එක සේ සිටිය හැකිය.

සැප්තැම්බර් :

සිල්වත්ය, කතාබහ මොලොක්‌ වුවද වාචාලය, දූ දරුවන් සහිතය, සුබ සනීපයකින් යුතුව, නිරතුරු සතුටකින් වාසය කළ හැකිය.

ඔක්‌තෝබර් :

රූමත්ය, සුව සනීපයකින් යුක්‌තය, කවියකු විය හැකිය, ගුණවත්ය, ධනවත්ය, කාමියකු විය හැකිය.

නොවැම්බර් :

අතමිට සරුය, ධනවත්ය, කාමුක ගතිද ඇත්තේය, දුෂ්ට ගතිද නපුරු සිත්ද සහිතය. ගනු දෙනුද කරයි. පාපී පුද්ගලයෙකි.

දෙසැම්බර් :

දැහැමි දිවිපෙවෙතක්‌ ගත කිරිමට කැමතිය, කතා බස්‌ කරන්නේ මුදු මොළොක්‌ වචනයෙන්ය, මිතුරු මිතුරියන් බොහෝ පිරිසක්‌ සිටිය හැකිය. අනුන් යටත් කර ගැනීමේ හැකියාවකින් යුක්‌තය, අනුන්ට ඇප උපකාර කිරීමට කැමතිය.

ඒ ඒ දිනවල ඉපදීමේ ඵල, පහත සඳහන්ය.

ඉරිදා :

ඉතා චතුර, තෙදැති කෙනකු විය හැකිය. සිරුරේ පිත් බහුලය, සටනට කැමතිය, අනුන්ට දීමට කැමැතිය, උත්සාවන්තය.

සඳුදා :

නුවණැතිය, කතාබස්‌ කරන්නේ ප්‍රියජනක බසින්නය, ජීවිතය සන්සුන්ය, දිවි ගෙන යන්නේ රාජ්‍ය සේවය තුළින්ය, සැප දුක සමසේ සැලකීමට කැමතිය, වාසනාවන්තය.

අඟහරුවාදා :

කුටිල බුද්ධියක්‌ සහිතය, පොළවට සම්බන්ධ කටයුතුවලින් දිවිපෙවෙත ගෙන යන්නේය, සටනට කැමැතිය, බලගතු සේනාධිපතියකු හෝ පාලකයකු හෝ විය හැකිය.

බදාදා :

කතාබස්‌ කරන්නේ ප්‍රිය ජනක වචනය, ජීවිතය ගෙන යන්නේ, ලිපි ලේඛන කටයුතුවලින්ය, දැනුම් තේරුම් සහිත පණ්‌ඩිතයා සත්පුරුෂ ස්‌වභාවයක්‌ සහිතය.

බ්‍රහස්‌පතින්දා :

ශිල්ප ශාස්‌ත්‍රය උගත් කෙනෙක්‌ය. ගුණවත්ය, විවේකයෙන් යුක්‌තය, ජනයාගේ ගරු සම්මානයට පාත්‍ර වන ආචාර්යවරයෙක්‌ හෝ මන්ත්‍රීවරයෙක්‌ හෝ විය හැකිය.

සිකුරාදා :

චංචල සිතැත්තේය, දෙවියන් පිදීමට අකමැතිය, ධනය උපයීමට මෙන්ම ක්‍රීඩාවලටද කැමතිය, නැණවත්ය, කතාවට දක්‌ෂය.

සෙනසුරාදා :

පවසන්නේ ස්‌ථිර බස්‌ය, අනුන් යටපත් කිරීමට සමත්ය, කෲර, දුෂ්ට ගති සහිතය, කෙස්‌ අධිකය, වයස්‌ගත ලියන්ට කැමතිය, පහත් දුස්‌ටි, මන්ද ගති සහිතය.