ලෙඩ රෝගවලට ග්‍රහයන් බලපාන අයුරු

නිරෝගිකම වාසනාවකි. එහෙත් උපතේදී සිට මරණය දක්වාම වරින්වර රෝග පීඩාවන්ට ජන්මීන් ගොදුරු වේ. නිරෝගි ජීවිතයක් හිමි වීම පෙර පිනකි. අද වනවිට විශ්ව ජන සමාජයේ බොහෝදෙනෙක් කොවිඩ් - 19 වයිරසය වැලඳීමෙන් පීඩා විඳිති. මෙම වයිරසය නිසා ජීවිතයෙන් සමුගත් පිරිසක්ද සිටිති. ප්‍රතිකාර ලබා සුව වන පිරිස දිනෙන් දින වැඩි වේ. රැල්ලක් ලෙස පොකුරු අයුරින් ව්‍යාප්ත වන වසංගතය මැඬපැවැත්වීමට ජන සහයෝගිතාව අවශ්‍යය.

ගංවතුර, භූමිකම්පා, සුනාමි ආදී ස්වාභාවික විපත් මෙන්ම සමාජයට වසංගත රෝග මඟින්ද සිදුවන්නේ විපතකි. ජන්මියකුගේ උපතේදී පිහිටන ග්‍රහ හැසිරීම් රටාව ජීවිත කාලය පුරා අපල මෙන්ම සපල තත්ත්වයට බලපායි.

ජන්ම ලග්නය සමඟ සඳු ග්‍රහයා එක්ව තැන්පත් වීම ජන්ම ඒරාෂ්ටකය හා ලග්න ඒරාෂ්ටකය එකවර යෙදීමටද හේතු වෙයි. උපතේදී අට වැනි භාවයේදී සඳු තැන්පත්ව තිබීම අෂ්ටම හා ජන්ම ඒරාෂ්ටක දෙකම එකවර යෙදීමකි. මෙම තත්ත්වයන් අපලදායකය. ලග්නයේ සඳු ග්‍රහයා නීච ලෙස හැසිරීමද පීඩා දායකය.

ලග්නස්ථානය, රෝගස්ථානය හා වැයස්ථානය භාවයන්හි අනිටු බලපෑම් කරන ග්‍රහයන් තැන්පත් වීම නිසා ලෙඩ රෝග බහුලව වැලඳීමට හේතුවෙයි. එමෙන්ම ධනස්ථානයේ හා විනාශස්ථානයේ අසුබ ලෙස ග්‍රහයන් තැන්පත් වීම නිසා මරණය ළඟා වීමටද හැකිය. වැයස්ථානයේ අසුබ ග්‍රහයන් තැන්පත් වීම බිරියගේ හෝ ස්වාමිපුරුෂයාගේ ශරීර සෞඛ්‍යයට දැඩි තර්ජනයක් වීමට පුළුවන. වික්‍රමස්ථානයේ අසුබ ග්‍රහයන් තැන්පත් වීම පියාගේ මරණයටද හේතු වීමට හැකිය.

සඳුගේ මහ දසා කාලය සෙම් රෝගය බහුලව වැලඳෙන සමයකි. කේතුගේ මහ දසා කාලයේදී සම ආශ්‍රිත රෝග, අර්ශස් රෝගය වැලඳීම, රුධිරය විස වීම සිදු වේ. සඳු මහ දසාවේ රාහු අන්තරයේදී සඳු හා රාහු අසුබ ලෙස යෙදීමෙන් සෙම් පීඩාව, රුධිරය විස වීම නිසා පීඩාවට හේතු වෙයි.

කේතුගේ රාහු හා ගුරු අතුරු දසා කුජගේ කේතු අතුරු දසා කාලයේදී රුධිරය විස වීමද, සිකුරුගේ කේතු දසාව, ශනි අතුරු දසාව සෙම් පීඩා බහුල වන සමයකි. ගුරුගේ ශනි අතුරු දසාව, බුධගේ කුජ අතුරු දසාවද සෙම් රෝග බහුල වන වකවානුවකි. සඳුගේ කේතු අතුරු දසාව රාහුගේ කේතු හා රවි අතුරු දසා, ගුරුගේ කේතු සහ රාහු අතුරු දසා, බුධගේ රවි හා සඳු අතුරු දසා දැඩි රෝග පීඩාවන්ට ලක්වන වකවානුය.

කේතුගේ බුධ අතුරු දසාව මානසික තැවුල් වර්ධනය වී රෝගාබාධවලටද හේතු සිදුවේ. කේතුගේ කේතු, සඳු හා සිකුරු අතුරු දසාවලදී පවුලේ අයට රෝග පීඩාවන් වැලඳීමේ හැකියාව ඇත. කේතුගේ කුජ අතුරු දසා කාලය තුළ ශල්‍යකර්මයන්ට හේතු විය හැකිය.

වර්ෂා කාලය තුළදී සිකුරුගේ ශනි අතුරු දසාව යෙදීම සීතල නිසා වැලඳෙන රෝග පීඩා වැලඳීමට හේතුවන අතර පීඩාකාරී ලෙස බලපායි.

රෝග පීඩාවලින් සුවපත් වීමට වෛද්‍ය ප්‍රතිකාර අනිවාර්යයෙන්ම ලබාගත යුතුය. ආධ්‍යාත්මික සුවයක් ලබාගැනීමට ජය පිරිත, රතන සූත්‍රය භාවිතය, අභිසම්භිධාන යන්ත්‍රය පැලඳීම, අභිසම්භිධාන මන්ත්‍ර ජප කළ රන්තැඹිලි තෙල් සුරයක බහා පැලඳීම, එලෙසම පොල්තෙල් ජප කර පහන් දැල්වීම, ග්‍රහ පූජා පැවැත්වීම අපල දුරු වීමට සුදුසුය.

උපුටා ගැනීම මව්බිම