ඔබේ අතේ හැඩය අනුව ඔබේ චරිත ලක්ෂණ දැනගනිමු.

අත බලල අනාවැකි කියන එක පෙරදිග රටවල  අපට අලුත් මැජික් එකක් නෙවෙයි. ඉස්සර කාලේ නම් ගම් වල පාරවල් දිගේ මොනර පිහාටු කට්ටලයක් අතින් අරගත් මලයාලි ගැහැණු මිනිස්සු  අත බලලා සාස්තර කියමින් ඇවිදිනවා සමහරුන්ට මතකත් ඇති. 

නමුත් මේ කියන්න හදන්නේ ඒ විදියට අත බලන එක ගැන නෙවෙයි. ඇමරිකානු හස්ත විශ්ලේෂකයන්ගේ ඇකඩමියේ කේ පැකාර්ඩ්ට අනුව පුද්ගලයන්ගේ අත් වල පිහිටීමෙන් චරිත ලක්ෂණ කියන්නේ කොහොමද කියන එකයි මේ ඔබට ඉදිරිපත් කරන්න යන්නේ.

1. ඔබේ බලවත් අත හඳුනාගන්න

මේක ඒ තරම් අපහසු වැඩක් නෙවෙයි. ඔබේ බලවත් අත කියල කියන්නේ ඔබේ පුරුදු අතට. වම හෝ දකුණ. මේ ඔබට පුරුදු අතේ ලක්ෂණ වලින් ඔබේ පෞර්ෂය සහ ඔබේ වෘත්තීය ජීවිතය ගැන කියවෙනවා. ඒ වගේම ඔබේ අනිත් අතින් ඔබ සමීපතමයන් කෙරෙහි දක්වන ආකල්ප ගැන කියන්න පුළුවන්.

2. ඔබේ බලවත් සහ දුර්වල ඇඟිලි හඳුනා ගන්න

අතේ ඇඟිලි අතරත් බලවත් වගේම දුර්වල ඒවා තියනවා. ඔබේ ඇඟිලි ඇද නම්, එකක් තවෙකක් දෙසට බරවීම් දකින්න ලැබෙනවා නම් ඒ ඇඟිල්ල දුර්වල එකක් ලෙස හඳුනා ගන්නවා. ඒ වගේම ඔබේ ඇඟිලි දිගට ඍජුව පිහිටලා තියනවා නම් එම ඇඟිලි බලවත් ඒවා ලෙස හඳුන්වනවා.

• ඔබේ බලවත් අතේ මහපට ඇඟිල්ල බලවත්ව තිබෙනවා නම් ඔබ වෘත්තීය ජිවිතයේ ඉහලටම යන්න උත්සහ කරන කෙනෙක්.
• ඔබේ බලවත් අතේ දබර ඇඟිල්ල බලවත්ව තියනවානම් ඔබ බලයට ආශාකරන, ශක්තිමත් චරිතයක් ඇති බුද්ධිමත් පුද්ගලයෙක් 
• මැද ඇඟිල්ලෙන් කියවෙන්නේ ඔබේ වගකිම් සහගත බව, කාර්යක්ෂම බව, ආත්මශක්තිය සහ ප්‍රඥාව ගැනයි
• මුදුගිල්ලෙන් ඔබේ කලාත්මක හැකියාව මෙන්ම ප්‍රකාශන හැකියාව ද කියවෙනවා.
• සුළඟිල්ලෙන් කියවෙන්නේ ඔබේ සන්නිවේදන හැකියාවන් ගැන

3. ඔබේ ඇඟිලි තුඩු වල හැඩය හඳුනා ගන්න

• රවුම් හැඩති ඇඟිලි  තුඩු  වලින් ඔබ  අන්  පුද්ගලයන් සමඟ සාමයෙන් සිටීමට ඇති කැමැත්තත්, අනුමත නොකරනු ලැබීමට ඇති බයත් පෙන්වනවා. 
• කොටු හා පැතලි ඇඟිලිතුඩු සහිත අය ඍජු චරිතයක් ඇති අයයි. ඔවුන් නැමෙන සුළු අදහස් වලට කැමති නෑ.
• ඉදිරියෙන් පළල, සවලක හැඩය ඇති ඇඟිලිතුඩු හිමි අය දක්ෂ වගේම  පරාජය බාර නොගන්නා චරිතයක් හිමි අයයි.
• උල් හැඩයේ ඇඟිලි තුඩු සහිත පුද්ගලයන් ප්‍රයෝගික දේ වෙනුවට අසාමාන්‍ය සහ ගුප්ත විද්‍යාත්මක දේවල් වලට නැඹුරු වීමට ඉඩක් ඇති අයයි.

4. ඇඟිලි අතර පරතරයෙන් කියවෙන දේ

• ඔබේ අත හොඳින් දිගහැරලා පැතලි මතුපිටක් මත තියන්න.

• ඔබේ ඇඟිලි අතර ඉඩකඩ තිබෙන පරිදි ඈත් වෙලා නම් පිහිටලා තියෙන්නේ ඔබ අලුත් දේවල් කරන්න කැමති, නිදහස අගය කරන කෙනෙක්.

• ඔබේ ඇඟිලි අතර දුර අඩුනම් ඔබ විචක්ෂනශීලි, පරෙස්සම් සහගත සහ බොහෝ විට ඉතාම නිශ්ශබ්ද සමාජශීලි නොවන කෙනක්.

• ඔබේ මුදුගිල්ල සහ මැදගිල්ල එකිනෙකට ඈත්ව පිහිටා තියෙනවා නම්, ඔබට බලපෑම් කරන්න අමාරුයි. ඒ වගේම මේ දෙක ලංව පිහිටනවා නම් ඔබ නීතියට වැඩ කරන සමාජය බලාපොරොත්තු වෙන විදියේ ජිවිතයක් ගත කරන කෙනෙක්.

• ඔබේ අතේ සුලැඟිල්ල සහ මුදුගිල්ල ඈත්ව පිහිටලා තියෙනවා නම් ඔබ බරපතල  කතා බහෙන් ඈත් වෙලා ඉන්න කැමති කෙනෙක්. ඒ වගේම තීරණ නොගෙන ඉන්නත් ඔබ බොහොම කැමතියි. මේක ඔබේ පුද්ගලික වගේම වෘත්තීය ජීවිතයටත් බලපානවා. නමුත් ඔබේ මේ ඇඟිලි දෙක අතර දුර අඩු නම්, ඔබ දක්ෂ, නිර්භීත පුද්ගලයෙක් වගේම නිදහස් චින්තකයෙක්.

උපුටා ගැනීම රැජිණිය