විවාහයේ හොඳම නැකත මධු සමය සඳහා නැකතයි
විවාහ කටයුතු සඳහා නැකත් සෑදීමේ දී පැරණි සම්ප්‍රදාය අනුව මනමාලයා නිවසින් පිටත්වීම, පෝරුවේ නැගීම, මුදු මාල පැලඳවීම මනමාලිය කැන්දාගෙන යෑම ආදී සියලුම දේ සිදු වන්නේ නැකත් අනුවයි. උසස්ම පරම්පරාවක් ඇති කරන ප්‍රීතිය සතුට සමාදානය ගෙන දෙන මධුසමය සඳහා නැකත් පත්‍රයෙන් ලොප් වී ඇත. මෙම හේතුව නිසා මෝඩයින්, අන්දයින්, ගොළුවන්, බිහිරන් බිහි කරන යුගයකට වර්තමාන සමාජය තල්ලු වී තිබේ. මස්, මාළු, බිත්තර මෙන්ම තිරිසනා කරන මත් වතුර තුළින් කා බී සිනාසී සැරසී අඹු සැමියන් වශයෙන් එක්වීම තුළින් අකීකරු, අවලක්‍ෂණ, මොළය නැතිද දරුවන් බිහිකිරීම වැලැක්විය නොහැක. සමාජ රැල්ල නැගෙන ආකාරයට සෑම පුද්ගලයෙක්ම අවනත විය යුතු නමුත් වාසනාවන්ත පින්වත් දරුවන් රටට දැයට දායාද කිරීමට විවාහ දිවියට පත් වන යුවතිපති දෙදෙනාගේ පරම අභිලාසය විය යුතුය. ඒ සඳහා ඔවුන් මගුල් දින පෙර දින පසු දින මස් මාංශ සුරාව ආදියෙන් තොරව පෝෂදායී ආහාර වේලක් ගැනීමෙන් පැරණි ජ්‍යොතිෂ්‍ය ග්‍රන්ථවල සඳහන් පරිදි වාසනාවන්ත දූ පුතුන් මෙලොවට බිහිකිරීමට දෙමාපියන් එක් විය යුතු සුබ හෝරා තෝරාගත යුතුය. ඒ සඳහා ජ්‍යොතිෂ්‍යයේ සඳහන් වාසනාවන්ත දරුඵල ලැබෙන මූර්ති සාදාගෙන මංගල නැකත් පත්‍රයට එක්කළ යුතු කාලය දැන් එළඹ තිබේ. මේ සඳහා,
1. අස්විද, කැති, අස්ලිස, දෙට, මූල, උත්‍රපල්, උත්‍රසල, උත්‍රපුටුප සහ රේවතී යන මේ නැකත් 10 කවර හෝ උදාව පවතින අවස්ථාවේදී ලිංගික එක්වීම සඳහා නුසුදුසුය.
2. මුවසිරස, පුස, හත, පුනාවස යන නැකත් පවතින අවස්ථාවන්හි අඹු – සැමි එක්වීම වාසනාවන්ත පිරිමි දරු උපතකට හේතු වේ.
3. ලග්නයේ 5, 9 ගුරු සිටීම යහපත් දරු ගැබකට හේතු වේ.
4. රවි, සඳු, ශුත, කුජ සුබ රාසි ගතව සිටීම වාසනාවන්ත දරු උපතකට හේතු වේ.
5. ලග්නයේ සඳු ද, 9 හෝ 5 මූල ත්‍රිකෝණයේ බුධ ද 5 වැන්නේ ගුරු හෝ සිකුරු ද සිටීම වාසනාවන්ත දරු උපතකට හේතු වේ.
6. රවි, සඳු, සිකුරු බලවත්ව සිටින විට හෝ ඔවුන් ස්වකීය නවාංශකයේ සිටින විට සංසර්ගය යහපත් දරු උපතකට හේතු වේ.
7. රවි, සඳු, ගුරු ශක්තිමත්ව ලග්නය ඔත්තේ රාශියක් වී ඔවුන් සිටින නවාංශ ද ඔත්තේ වුවහොත් එම අවස්ථාවේ සිදුවන අඹු – සැමි සංසර්ගයෙන් පිළිසිද ගනු ලබන්නේ රටට දැයට වැඩ ඇති පිරිමි දරුවෙකි.
පිරිමි කේන්දරයේ ජනක ශක්තිය තීරණය කරනු ලබන්නේ රවි, සිකුරුගේ ශක්තිය මතය. මෙය දෙදෙනා ශක්තිමත්ව ඔත්තේ නවාංශයක නම් පුරුෂයකුට ලිංගික සංසර්ගයේ දී නිරෝගී දරුවන් බිහි කිරීමේ වාසනාව ඇත.
ස්ත්‍රී කේන්දරයේ ජනක ශක්තිය තීරණය කරනු ලබන්නේ සඳුගේ සහ අඟහරුගේ ශක්තිය මතයි. ඔවුන් දෙදෙනා ශක්තිමත්ව ඔත්තේ රාශිවල සහ ඔත්තේ නවාංශවල පිහිටා ඇති අවස්ථාවක ස්ත්‍රියකට ගුණ, රුව ඇති ගැහැනු දරුවකු බිහිකිරීමට ශක්තිය ඇත.
මෙයට අයත් නැකත් හෝරා ගත යුත්තේ ගුරු, සිකුරු, සඳු, බුධ හෝරාවන් වන අතර, රාත්‍රි 8.00 සිට අලුයම 4.00 – 5.00 දක්වා උදාවී තිබිය යුතුය. මෙම නැකත් වලින් සුබ හෝරාවෙන් සුබ ග්‍රහයන් සුබ ස්ථානවල පිහිටා ගත් අවස්ථාවේදී සාදාගත් නැකතකට යුවතිපති එක්වෙයි ද ඔවුන්ට වාසනාවන්ත දරුවන් ලැබ අනාගතය ප්‍රීතියෙන් සතුටින් ජීවත් වීමේ වාසනාව උදාවේ.
මංගල නැකත් පත්‍ර සෑදීමේදී මංගල බුලත් දීම, තෙල් වළං ළිප තැබීම, මනාල මනාලිය නිවසින් පිටත්වීම, මංගල ඇඳුම් ඇදීම, පෝරුවේ නැගීම, බැසීම, මංගල මුදු මාරු කිරීම ආදී නැකත් පත්‍රයට මධුසමය ගත කිරීම, සඳහා නැකත ද එක් කළ යුතු කාලය දැන් එළඹ තිබේ. ජනමාධ්‍යවේදී ජ්‍යොතිෂ්‍ය
වාස්තු විද්‍යා උපදේක, ධර්මාචාර්ය විද්‍යාජෝති ධර්ම බන්දු දේශ කීර්ති සාම විනිසුරු (මුළු දිවයිනට) ජ්‍යොතිර් විද්‍යා කීර්ති ලංකා පුත්‍ර ප්‍රේමසිරි කහඳවලආරච්චි 252/1, පුලිනතලාරාම පාර, මාගම්මන, රාගම.
