දරු සම්පත ලබා ගන්න නක්‌ෂත්‍ර රහස්‌ මෙන්න
දරුවෙකු පිළිසිඳ ගැනීමට අදාළ අප්‍රකට නමුදු ඉතා වැදගත් කරුණු කිහිපයක්‌ මෙම ලිපියෙන් සාකච්ඡා කිරීමට අපේක්‍ෂා කරමු. හුදු ස්‌ත්‍රියකගේ හා පුරුෂයෙකුගේ ලිංගික සබඳතාව නිසා පමණක්‌ දරුවකු පිළිසිඳ නොගන්නා බවත්, ඒ සඳහා පරලොවින් පැමිණෙන සත්වයකුගේ හෙවත් ගන්ධබ්බයකුගේ පැමිණීම අවශ්‍ය බවත් මීට ඉහතදී පැවසුවෙමු. මෙම අවස්‌ථාවේදී සිදුවන ශුක්‍රාණුවක හා ඩිම්බයක සංසේචනයට සඳුගේ විශේෂ බලපෑමක්‌ තිබේ. ස්‌ත්‍රීන්ගේ ඔසප් චක්‍රයත්, සඳුගේ ගමනක්‌ එකම දින ගණනකදී නිම වෙයි. මාසයක්‌ තුළ චන්ද්‍රයා රාශි 12 හරහා ගමන් කරන අතරතුර පිළිසිඳ ගැනීමක්‌ සිදුවන ස්‌ථාන හයක්‌ හමුවේ. එනම් ස්‌ත්‍රියගේ උපන් හඳහනේ ලග්නය, හතර, හත, දහය යන සතර කේන්ද්‍ර හා රවි චන්ද්‍ර ස්‌ඵුටයි. මෙම ස්‌ථාන හය හරහා ගමන් කරන විට පුර පක්‍ෂයේ නම් දින පහක්‌ ඇතුළත ද, අව පක්‍ෂයේ නම් දින තුනක්‌ ඇතුළත ද සංසේචනය සිදුවේ. හෙවත් ප්‍රතිසන්ධියක්‌ ඇතිවේ. ඔසප් වී ස්‌නානයෙන් පසුව සඳු බලවත් කාලය නම් දින 20 යන තුරු ද දුර්වල නම් දින 16 යන තුරුද පිළිසිඳ ගත හැකිය. ස්‌ත්‍රියක්‌ ඔසප් වී දින 12-16 අතර දරුවන් අපේක්‍ෂාවෙන් සම්භෝගය සුදුසු යෑයි වෛද්‍ය උපදෙස්‌ ලැඛෙන්නේ ද මේ අනුවය. නමුත් ඒ අවස්‌ථාවේ ජන්ම පත්‍රයේ ඉහත ස්‌ථාන හතර හරහා සඳු ගමන් කරන වේලාවත් උදා නොවූයේ නම් එම බීජ ඔසප් රුධිරය සමග පිටවී යනවා ඇත. මේ අනුව දරුවෙකු අපේක්‍ෂාවෙන් සම්භෝගයේ යෙදෙන විවාහක යුවළකට ඒ සඳහා කල් ඇතිව ජ්‍යොතිෂ උපදෙස්‌ දීමට ග්‍රහ ගණිතය දන්නා ජ්‍යොතීර්වේදියකුට හැකි වෙයි. එමෙන්ම නූතනයේ භාවිතා වන කෘතීම උපත් පාලන උපකරණ හෝ ඖෂධ නැතිව උපත් වැළැක්‌වීමට ද මෙම ක්‍රමය යොදා ගත හැකිය. ඒ උපත් පාලනයට ස්‌වභාවික ක්‍රමයකි. දරුවන් අපේක්‍ෂාවෙන් සිටින යුවළකගේ කායික යෝග්‍යතාවය මෙන්ම මානසික සමබරතාවය පිළිබඳව ද වත්මන් සමාජයේ ඇති අවධානය ඉතා අල්පය. මෙකල කායික යෝග්‍යතාවය යනුවෙන් අදහස්‌ කරන්නේ දරුවෙකු පිළිසිඳ ගැනීමට තරම් බිරිඳ හා සැමියා නිරෝගීද? යන්න පිළිබඳව පමණකි. ගර්භාෂය, ඩිම්බ හෝ ශුක්‍රාණුවල දෝෂ තිබේ නම් ඊට වෛද්‍ය ප්‍රතිකාර කරනු ලබන අතර එම තත්ත්වය යහපත් නම් ගැටලුවක්‌ නැති බව වැඩි දෙනාගේ පිළිගැනීමයි. එසේ නමුදු එම දෙපළගේ කායික, මානසික තත්ත්වය මෙන්ම එම අවස්‌ථාවේ ග්‍රහ බලය පිළිබඳව ද විශේෂයෙන් සොයා බැලිය යුතු බවත් නැතහොත් උපදින දරුවාගේ සෞඛ්‍ය තත්ත්වයේ පිරිහීමකට එය බලපාන බවත් පැරණි ජ්‍යොතිෂ ග්‍රන්ථ පරිශීලනය කරන විට දැනගත හැකිය. මේ නිසා සම්භෝගය සඳහා සුදුසු නැකත් පරාසයක්‌ වෙන් කර දීම පුරාණ චාරිත්‍රයක්‌ විය. මේ අනුව දෙදෙනාගේම ජන්ම, අනුජන්ම, ත්‍රිජන්ම නැකත් දිනයක්‌ යෙදුණු අවස්‌ථාවක සම්භෝගය සිදුවන ලෙස නැකත් සෑදීම ශුභ නැත. මංගල නැකත් පත්‍රවල පෝරුවේ චාරිත්‍ර ආදිය ශුභ නැකත්වලට සිදු කළද, සවස්‌ වන විට අදාළ ශුභ නැකත ගෙවී ඉහත අශුභ නැකතක්‌ උදාවන බව අපට නොයෙක්‌ අවස්‌ථාවල දැකගත හැකි විය. මේ අවස්‌ථාවේ සඳු 6, 8, 12 භාවවල සිටීම ඉතා අශුභ බවද, සඳු හා රවි 6, 12 යන භාවවල සප්තමව පිහිටීම නිසා අශුභ බවද, සඳු හා රවි 6, 12 යන භාවවල සප්තවම පිහිටීම නිසා අන්ධ දරුවෙකු පිළිසිඳ ගත හැකි බවද කියා තිබේ. සම්භෝග අවස්‌ථාවේ බිරිඳ උපන් තිථියම උදා වී තිබුණේ නම් බොහෝ විට දරුවෙකු පිළිසිඳ ගනී. එවිට සඳු පුරුෂ රාශියක ගමන් කරමින් සිටියේ නම් පිරිමි දරුවකු ද ස්‌ත්‍රි රාශියක ගමන් කරමින් සිටියේ නම් ගැහැනු දරුවකු ද පිළිසිඳ ගන්නවා ඇත. දරුවාගේ ස්‌ත්‍රී, පුරුෂභාවයට බිරිඳ උපන්දා සිට සංසේචනය වූ දිනය දක්‌වා ගත වී තිබූ අමාවක තිථි ගණන ද බලපානු ඇත. එම අමාවක තිථි ගණන ඔත්තේ නම් පිරිමි දරුවකු උපදවයි. ඉරට්‌ටේ නම් ගැහැනු දරුවෙකු උපදවයි. තමන්ට අවශ්‍ය දරුවාගේ ස්‌ත්‍රී පුරුෂභාවය පවා කල් ඇතිව තීරණය කර ගැනීමට මෙය සාර්ථක ක්‍රමයක්‌ බව නොකිව මනාය. දරුවකු ලැබුණ ද නොලැබුණ ද විවාහ ජීවිත බිඳවැටීමේ ප්‍රධාන හේතුව කායික නොගැළපීම් බව සමාජ විද්‍යාඥයන්ගේ මතයයි. දැඩි ආර්ථික දුෂ්කරතා විවාහයට බාධා කරන පළමු වැනි හේතු නොවේ. එය වැටෙන්නේ තුන්වැනි තැනටය. දෙවැනි තැන හිමි වන්නේ මානසික නොගැළපීම්වලටය. එනම් අගහිගකම්වලටත් අදහස්‌වල ප්‍රතිවිරෝධතාවලටත් වඩා කායික නොගැළපීම විවාහ ජීවිතවලට බලපාන බව පෙනේ. එමගින් ඇතිවන ලිංගික අතෘප්තිය විවාහයේ සතුට පලවාහැරීමටත් වැරදි කාම සේවනයටත් පෙළඹවීමට ඉඩ තිබේ.
මේ නිසා ස්‌ත්‍රිය හා පුරුෂයා යන දෙදෙනා පිළිබඳව බිරිඳ සහ සැමියා මනාව අවබෝධකර ගැනීම අවශ්‍ය වේ. (1 ප්‍රස්‌ථාරය බලන්න) එමෙන්ම එම අංශයකදී ස්‌ත්‍රියට වඩා පුරුෂයා දක්ෂ බවත් තවත් විටෙක පුරුෂයාට වඩා ස්‌ත්‍රිය වෙනස් බවත් පෙනේ. නමුත් සම්පූර්ණ ගෝලයම සාදන්නේ මේ දෙදෙනාගේ එකතුවෙනි. සම තැන නොව නිසි තැන දීම අවශ්‍ය වේ. ගැටුම් ඇතිවන්නේ මේ වෙනස වටහා නොගැනීමෙනි. ලිංගික අතෘප්තියට ප්‍රධාන හේතුව මානසික තත්ත්වය බව පෙනේ. ස්‌ත්‍රීහු ස්‌වභාවයෙන්ම ප්‍රමාදයට නැඹුරු වන අතර පිරිමි ස්‌වභාවයෙන්ම ඉක්‌මන් වෙති. උදාහරණයක්‌ වශයෙන් බිරිඳ හා සැමියා ආහාර ගන්නා අවස්‌ථාව සලකා බලමු. දෙදෙනාම ආහාර ගැනීමට සූදානම්ව කෑම මේසයේ වාඩිවෙයි. ස්‌වභාවයෙන්ම ඉක්‌මන් වන සැමියා ඉක්‌මනින් කෑම කා අවසන් කොට අත සෝදා ගනී. බිරිඳ සූදානම් වූයේම ප්‍රමාද වී බැවින් ඇය තවමත් ආහාර ගන්නවා විය හැකිය. නමුත් සැමියාගේ ඉක්‌මන ඇය නොඉවසයි. බිරිඳගේ ප්‍රමාදය සැමියා නුරුස්‌සයි. නමුත් අවබෝධයෙන් කටයුතු කරමින් බිරිඳ ගැන සලකා සෙමෙන්, ඉවසීමෙන්, සංයමයෙන් ආහාර ගැනීමට සැමියාට ඉඩ තිබූ අතර තරමක්‌ ඉක්‌මනින් සැමියා අනුගමනය කිරීමට බිරිඳ ද කල්පනා කළේ නම් දෙදෙනාම සතුටින් ආහාර වේල අනුභව කර නිමා කරනු ඇත.
ජ්‍යොතිෂයේ ස්‌ත්‍රී දීර්ඝ පොරොන්දමෙන් මෙය විස්‌තර කෙරේ. ලිංගික සබඳතාවේ පදනම ද මීට සමානය. ( 2 ප්‍රස්‌ථාරය බලන්න) රේඛා කැපෙන තැන බලන්න. පුරුෂයා උපරිමයට ගොස්‌ පහළට එමින් සිටී. ස්‌ත්‍රිය අතරමගය. දෙදෙනාගේම මානසික ආකල්ප වෙනස් කර ගැනීමෙන් තිත් ඉරිවලින් දක්‌වා ඇති පොදු මට්‌ටමට පැමි”මට උත්සාහ කළ යුතුය. එපමණක්‌ නොවේ. සම්භෝගයේදී ස්‌ත්‍රිය හා පුරුෂයාගේ කායික මානසික තත්ත්වය ද දරුවාට ඛෙහෙවින් බලපාන බව සැලකිය යුතුය. මෙහිදී යුවතිපතීන්ගේ නිදන කාමරය නිදන යහන හා කාමරයේ වාස්‌තු විද්‍යාත්මක කරුණු ද බලපානු ඇත. නිදන කාමරයට වාතාශ්‍රය හොඳින් ලැබීම, ඇඳට ඉහළින් හරස්‌ අතට තලාන් බාල්ක නොතිබීම, උතුරට හෝ බටහිරට හිස දමා නිදා ගැනීමට නොව නැගෙනහිරට හෝ දකුණට හිස දමන සේ ඇඳ පිහිටීම, ඇඳ යට කුණු රොඩු හෝ වෙනත් අනවශ්‍ය දේ පරණ සපත්තු ආදිය නොතිබීම මෙන්ම ඇඳ තනි ඇඳක්‌වීම හා තනි මෙට්‌ටයක්‌ වීම සුදුසුය. යුවළක්‌ ඇඳන් දෙකක්‌ යාකොට එකට තබා නිදා ගැනීම හෝ මෙට්‌ට දෙකක්‌ එකට තබා නිදාගැනීම නිසා සමගියට බාධා වන බව පෙංපුයි ශාස්‌ත්‍රය කියයි. දෙදෙනාගේ කායික හා මානසික යෝග්‍යතාවය ගැන චරකසංහිතා ආදී ආයුර්වේද ග්‍රන්ථවල කියා තිබේ. මේ අනුව තමන්ගේ නිවසේ නොව තමන්ට අයිති නැති පිට ගෙදරකදී හෝ අතරමගදී ද ශරීරය ඉතා වෙහෙසා වැඩක්‌ නිම කළ විට දී ද ගෙදර වෙනත් කෙනෙකු අසනීප වී ප්‍රතිකාර කරමින් සිටින විටද හිතවත් ඥාතියකුගේ මළ ගෙදරක ගොස්‌ පැමිණි විටද තම නිවසේ මළ ගෙදරක්‌ වී එහි කටයුතු නිම කර දින 7 ඇතුළත ද රෝගියකු බැලීමට ගොස්‌ පැමිණි විටද වෙනත් ගමනක්‌ යැමට සූදානම් වී සිටින විටද දෙදෙනාගෙන් කෙන කුට අසනීප තත්ත්වයක්‌ ඇති විටද, කේන්තියෙන් සිටින විටද, මළ මූත්‍රා බරින් සිටින විටද අසල්වැසි නිවසක සොර බියක්‌ හෝ ගිණි බියක්‌ ඇති වූ දිනද, ඥාතිවරයකුගේ හෝ හිතවතුන්ගේ මරණයක්‌ ආරංචි වූ දින ද තද සුළං, වර්ෂා, භූමිකම්පා, ජල ගැලීම් ඇති දින ද නිවසේ ඉදිකිරීම්, ළිං කැ”ම්, ආදී බර වැඩක්‌ කරන දින ද, ලොකු ජයක්‌ හෝ පරාජයක්‌ ලද දින ද මත්පැන් මත් ද්‍රව්‍ය රැගෙන සිටින විටද දරුවන් අපේක්‍ෂාවෙන් සම්භෝගයේ යෙදීම ඉතාම අශුභය. එසේ කායික දුර්වලතා හෝ ආවේගශීලී අවස්‌ථාවලදී සම්භෝගය නිසා උපදින දරුවන් දුර්වල, අංග හීන, අවාසනාවන්ත දරුවන් වන බව ඉසිවර මතයයි. එමෙන්ම හොඳ පිරිසිඳු ඇඳුම් පැළඳුම් සහිතව ශරීරය පිරිසිදු කරගෙන සුවඳ විලවුන් ගල්වා දෙදෙනාම සැහැල්ලු ගුණදායක ආහාර රැගෙන ජලස්‌නානය කිරීමෙන් පැය 1 1/2 පෙර හෝ පසුව දෙදෙනාම සැබෑ ආදරයෙන්, ගෞරවයෙන්, කරුණාවෙන්, අන් අයගේ දරුවන්ට ද ආදර සංග්‍රහ කර සතුටින්, සමගියෙන් මෙන්ම සිල්වත්ව බයෙන් සැකෙන් තොරව, ඉවසීමෙන් යහපත් දරුවෙකු ලැබේවායි ප්‍රාර්ථනාවෙන් එක්‌වන යුවළකට නිරෝගී වාසනාවන්ත ගුණයහපත් දරුවකු පිළිසිඳ ගන්නවා ඇත. එමෙන්ම රාත්‍රි දහයත් පාන්දර පහත් අතර කාලය මේ සඳහා සුදුසු බවත් දවල් දොළහත් දෙකත් අතර කාලය සාමාන්‍ය බවත් දවසේ ඉතිරි කාලය සම්භෝගයට යෝග්‍ය නැති බවත් කියා තිබේ. මංගල පෝරුවේදී මනාලයාගේ වම් පසින් මනාලිය සිටුවා ඇති බව අවුරුත් දන්නා කැරණකි. යුවතිපතීන් දෙදෙනා නිදාගන්නා විට ද සැමියාගේ වම් පසින් බිරිඳ නිදාගැනීම ඉතා සුදුසුය. ශරීරයේ සූර්ය, චන්ද්‍ර නාඩිවල ක්‍රියාකාරීත්වය ගැලපෙන බැවින් මෙයින් අන්‍යොන්‍ය ගැළපීම මනාව සිදුවේ. සෙනෙහස වර්ධනය වේ. මේ පිළිබඳව චරක සංහිතාව, වාත්ස්‍යායන කාමසූත්‍රය වැනි ග්‍රන්ථවලින් වැඩි විස්‌තර දැනගත හැකිය.
සුනිල් කුමාර ගම්ලත්
උපුටා ගැනීම දිනමිණ පුවත් පත
