පාට පාට ආරුනූල්

අනෙක් මැණික්වලට වඩා විශේෂ කැපී පෙනෙන බලයක් සහ ශක්තියක් අද අපි කතා කරන්නට යන මැණික් වර්ගය සතු වෙනවා. ඒ තමයි මැණික් ලෝකයේ විශේෂ ශක්තිවන්තයා වන "ආරුනූල්" කියන මැණික ගැනයි.කොරැන්ඩම් කුලයේ මැණික් වර්ගයක් වන ආරුනූල් නිල්, රතු, දම්, කහ, තැඹිලි, රෝස ආදී වර්ණ කිහිපයකින්ම තිබෙනවා. මලුක්කම් හැඩයට ඒ කියන්නෙ බිත්තරයක් වගේ කපා ඔප දමාගන්නා මේ ආරුනූල් මැණික්වලට එම නම සෑදී ඇත්තේ මෙන්න මෙහෙමයි.

දෙමළ භාෂාවෙන් ආරු කියල කියන්නෙ හය කියන එකයි. ආරු නූල කියල කියන්නෙ නූල් හයක් සහිත තරු සලකුණක් මෙම ගලෙහි ආලෝකය හමුවේ දිස් වන නිසයි.ඒ කියන්නෙ මේ මැණික් ගල සූර්යාලෝකයේදී හෝ විදුලි පන්දමක ආලෝකය හමුවේ ගල තුළ එහා මෙහා යන තරුවක් දිස්වෙනව.වර්ණ අනුව අපි මේ ආරුනූල් බෙදා වෙන් කරනු ලබනවා. නිල් පැහැය නිල් ආරුනූල් ලෙසත්, රතු පැහැය රතු ආරුනූල් ලෙසත්, කහ පැහැය පුෂ්පරාග ආරුනූල් ලෙසත්, පද්මරාග පැහැය පද්මරාග ආරුනූල් ලෙසත්, දම් පැහැය ඉන්ද්‍ර නීල ආරුනූල් ලෙසත් සුදු පැහැය පසිම ආරුනූල් ලෙසත් අපි හඳුන්වනවා.

කොරැන්ඩම් කුලයේ ගල් තුළ ඇති එකිනෙක කැපුණු සිල්කි පටි නිසා ඇති වන මේ ආරුනූල් තරු සලකුණ හරිම වාසනාවන්ත ගුණයක් ලෙස මාණික්‍ය විද්‍යාවේ හඳුන්වනු ලබනවා.පැරැණි රාජාභරණ පරීක්ෂා කර බැලීමේදී සෑම රජකුම පාහේ තමාට ගැළපෙන වර්ණයේ ආරුනූල් පැලඳ සිටි බව පැහැදිලි වෙනවා. ඒ වගේම මෙසේ ආරුනූල් පැලඳීම තුළ ඉතා සාර්ථක චරිත බවට පත් වීමට ඔවුනට හැකියාව ලැබී ඇති බව ඉතිහාසය සමඟ මාණික්‍ය විද්‍යාව සසදා බැලීමේදී දැකගන්න පුළුවන්. (ස්ටාර් සැෆයර්) ලෙස ඉංගී්‍රසි භාෂාවෙන් හඳුන්වන ආරුනූල් ලෝකයේ ඉතා ප්‍රසිද්ධ මැණික් වර්ගයක්. හොඳ තත්ත්වයේ ආරුනූල් මැණික් සොයා ගැනීම දුර්ලභ කාර්යයක් වුවත් පැලඳීමට සුදුසු තත්ත්වයේ මැණික් ඕනෑ තරම් අපට වෙළෙඳපොළේදී හමුවෙනවා. කෙසේ නමුත් ආරුනූල් පැලඳීමේදී කේන්දර සටහනට අනුව තමාට ගැළපෙන වර්ණයේ ආරුනූලක් තෝරාගත යුතු වෙනවා.

ආරුනූල් පැලඳීම තුළ ඉතාමත් සාර්ථක ජීවන තත්ත්වයකට ඔබ රැගෙන යන අතර ව්‍යාපාර සඳහා ඉතා හොඳ උදව්වක් ලබාගත හැකි මැණික් වර්ගයක් ලෙසද මෙය හඳුන්වා දිය හැකියි.ලෞකික ජීවිතයේ සැපත සහ සෞභාග්‍ය සොයා යන අපි විශ්වයේ සහයෝගය බලාපොරොත්තු වෙනවා. ඉතින් මේ කියන්නා වූ ආරුනූල් ලෞකික සැපසම්පත් ලබා ගැනීමට අවශ්‍ය විශ්ව ශක්තිය හොඳින්ම අපට ලබාදෙන මැණික් වර්ගය කීවොත් මා නිවැරැදියි. මොකද ඉතිහාසයේ පටන් ආරුනූල් මැණික් සඳහා මාණික්‍ය විද්‍යාවේ කියැවෙන්නෙ පංච කාම සම්පත්තිය ඉහළින්ම ලබාදෙන මැණික් ගල ආරුනූල් බවයි. එකල සිටි රජ, සිටු, මහාමාත්‍ය, නිලමේවරු තම හිස පැලඳි ඔටුන්නේ මැදටත් අත පැලඳි මුදුවලත් බොහෝ විට මෙම ආරුනූල් ඔබ්බවා පැලඳීමට හේතුවත් ඔවුන් මේ මාණික්‍ය විද්‍යාව පිළිබඳවත් එහි බලවත් ආරුනූල් පිළිබඳවත් තිබූ විශ්වසනීය අවබෝධය බවත් අප තේරුම්ගත යුතු වෙනවා.කෙසේ නමුත් අපේ රටේ බහුලව හමුවන මේ වාසනාව ඔබත් අත්විඳින්න.

මවිබ්ම