රජුගේ අනුග්‍රහයෙන් ග්‍රහයන්ට ගෙවල් ලැබුණේ මෙහෙමයි
ජේ‍යාතිෂය ශාස්ත්‍රයකි. නැතිනම් විද්‍යාවකි. මෙය තරමක් ගුප්තය. මෙහි දක්ෂයකු වීමට නම් මහත් වූ ස්මරණ ශක්තියක් සැබැවින්ම අවශ්‍ය වේ. ජේ‍යාතිෂ න්‍යායන් මතකයේ රැඳවීම සඳහා ඍෂීන් විසින් විවිධ උපක්‍රම හා උපාය මාර්ගයන් භාවිත කළහ. ජේ‍යාතිෂ විෂයයට රුචිකත්වයක් දක්වන ලද දුහුනන්ගේ දැනුම වර්ධනය කරවීමේ අරමුණ පෙරදැරිව, මහා ඍෂීන් ඇතුළු ජේ‍යාතිෂ ආචාර්යවරු, ග්‍රහයන් සම්බන්ධ කර ගනිමින් රසවත් කතා නිර්මාණය කළහ. එමඟින් ආධුනිකයා තුළ ජේ‍යාතිෂයේ ගුප්ත බව පරයමින් එම ශාස්ත්‍රය ඉගෙනීමට මහත් ආශාවක් සිත් තුළ ජනිත කරවන්නට සමත් විය. ඈත අතීතයේ වසර හත්දහසකටත් පෙර ජේ‍යාතිෂය ආරම්භ වූ යුගයේ රාශි චක්‍රය නම්කර තිබී ඇත්තේ 'ගගන' නමින්ය. සිංහයෙන් ආරම්භ වන සිංහ, කන්‍යා, තුලා, වෘශ්චික, ධනු හා මකර යන රාශීන් හයේ අධිපතියා වූයේ හිරු හෙවත් රවි ග්‍රහයාය. කටකයේ සිට පිටුපසින් ඇති මිථුන, වෘෂභ, මේෂ, මීන හා කුම්භ යන කටකයේ විලෝමය වූ රාශි හයේ අධිපතීත්වය දරන ලද්දේ සඳු හෙවත් චන්ද්‍රයාය. එම සිදුවීමේ සිට රාශි චක්‍රයෙහි ප්‍රධානීන් වූයේ හිරු, සඳු දෙදෙනාය. අන් ග්‍රහයන් වන බුධ, ගුරු, සිකුරු, කුජ හා ශනි යන ග්‍රහයන් පස් දෙනා එතැන් පටන් හිරු හා සඳුගේ පාලනයට යටත් විය. රාහු හා කේතු ග්‍රහයන් නොවන බැවින් ග්‍රහ දේව මණ්ඩලයට ඔවුන් අයත් නොවීය. සුරගුරු හෙවත් ගුරු ග්‍රහයාත්, අසුර ගුරු හෙවත් සිකුරු ග්‍රහයාත් ග්‍රහ ලොව තුළ බලවත් ඇමැතිවරු වූහ. එහෙත් දෙදෙනා අතර එතරම් හිත හොඳ බවක් නම් නොතිබිණි. ඔවුන් දෙදෙනාම එකිනෙකාට විරුද්ධව රහසිගතව කටයුතු කළ දෙදෙනකු විය. රාජ සභාවේදී හොඳ මුහුණ පෙන්වමින් බොරුවට කතා බහ කළද, ඔවුන් දෙදෙනාම හැසිරුණේ හිත යට කෝන්තර තබාගෙන බව රජු ඇතුළු මුළු ග්‍රහ මඬුල්ලම දන්නා රහසකි. ඔවුන් දෙදෙනාගේ මෙම වෛරී ප්‍රතිපත්තිය හේතුවෙන් 'ගුරු, ශුක්‍ර සදා වෛරම්' යන ශ්ලෝකයක්ද පට බැඳුණි. ඔවුන් දෙදෙනා සතු නෛසර්ගික ගතිගුණ, පසු කාලයේ මිනිස් ලොව රාජසභාවන් හි මැති ඇමැතිවරුන් අතර පවා දැකගත හැකි සාමාන්‍ය චර්යාවක් බවට පත්විය. හිරු හෙවත් රවි රජුගේ රාජ සභාවේ චන්ද්‍රයාට හිමි වූයේ පළමු ස්ථානයයි. ඇය දෙවැනි වූයේ මහ රජුට පමණි. ග්‍රහ දේව සභාවේ දී ඇය හැඳින්වූයේ රජුගේ අග මෙහෙසිය ලෙසිනි. එනිසාම ඇය උත්තරීතර වූවාය. බුධ ඔවුන් දෙදෙනාගේ එකම පුතු වූ අතර යෞවනෝදය කරා ඔහු පියමන් කරමින් සිටියේය. අඟහරු හෙවත් කුජ ග්‍රහයා, රජුගේත්, ග්‍රහ දේව මණ්ඩලයේත් ආරක්ෂක සෙන්පතියා විය. ඔහු නිර්භීත රණශූරයකු ලෙස රජුගේත් බිසවගේත් ගෞරවයට හා ආදරයට පාත්‍ර වූවකු වූ අතර ඉක්මන් කේන්තිකාරයකු ලෙසද ග්‍රහ ලොව නම් දරා සිටියේය. සෙනසුරු හෙවත් ශනි, රජ මැඳුරේ මෙහෙකරුවා විය. රජ මැඳුරේ පිරිසුදු කිරීම් භාරව සිටියේ ඔහු වන අතර රජ මාලිගයේ අස්සක් මුල්ලක් නෑර ඇවිදිමින් පිරිසුදු කිරීමේ කටයුතු පිළිබඳව හොඳින් සොයා බැලීම ඔහුගේ රාජකාරිය විය.
කාලයක් සමඟ ග්‍රහ ලොව රජු වන රවි ග්‍රහයා, තම ප්‍රකෘති රූපයට ගැළපෙන ආකාරයට සිංහ රාශිය තම මාලිගය බවට පත් කරගත් අතර අග බිසව වූ චන්ද්‍රයාද තම ස්වභාවයට සරිලන ලෙස ජල රාශියක් වූ කටකය තම වාසභවනය කර ගත්තාය. මෙලෙස ටික කලක් ගතවද්දී, යොවුන් වියේ සිටි ඔවුන්ගේ එකම පුත් කුමරුවා වන 'බුධ' පිය රජු වන රවි වෙත පැමිණ තමාට නිදහසේ ජීවත්වීමට ස්ථිර නිවෙසක් ලබා දෙන ලෙස ඉල්ලීමක් කළේය. පුතුගේ එම ඉල්ලීම ඉතා සතුටින් පිළිගත් පිය රජු, තම මාලිගයට යාබදව 'කන්‍යා' මන්දිරය තම එකම පුතුට තිළිණ කිරීමට පසුබට නොවිණි. එහෙත් මෙම ආරංචිය ලද සැණින් මවුබිසව වූ චන්ද්‍රයා කලබලයට පත් වූවාය. ඇය සසලව බියට පත් වූ අතර තම එකම පුතු වන බුධ, පියාගෙන් ලද අගනා තිළිණය නිසා තමාට වඩා පිය රජුට වැඩි ආදරයක් දක්වනු ඇතැයි ඇය මහත් සේ කනස්සල්ලට පත් වූවාය. ඇය වහාම පුතා කැඳවා, තම මාලිගයට යාබදව පිහිටා තිබූ 'මිථුන' මාලිගයේ අයිතිය බුධට පවරා දී හිත සනසා ගත්තාය. රජු සහ බිසව විසින් කරන ලද පරිත්‍යාගයන් සවනට වැකුණ අනෙක් ග්‍රහයන් හතර දෙනා වහාම මහ රජු හා බිසව බැහැදැක, තමන්ටද ස්ථිර වාසය සඳහා නිවාස ලබාදෙන මෙන් කාරුණික ඉල්ලීම් කරන ලදී. රජුට හා රැජනට ඔවුන්ගේ සාධාරණ ඉල්ලීම්වලට සවන් නොදී සිටිය නොහැකි විය. එය තම රාජකීයත්වයට කැළලක් විය හැකි යැයි සිතූ රජු හා බිසව, ඔවුන් සිවුදෙනාටද යුතුකම් ඉටු කිරීමට සිතා ගත්හ. රජුගෙන් එක් මාලිගයක්ද, බිසවගෙන් තවත් එකක්ද වශයෙන් එක් අයකුට මැඳුරු දෙක බැගින් ලබාදීමට රජු හා බිසව කාරුණික වූහ. අඟහරු හෙවත් කුජට මේෂ හා වෘශ්චික යන රාශි ද්විත්වයද, සිකුරුට වෘෂභ හා තුලාවද, ගුරු ග්‍රහයාට ධනු හා මීනයද, සෙනසුරුට මකර හා කුම්භ යන රාශි මැඳුරුවල අධිපතීත්වයද හිමි විය. එක් එක් ග්‍රහයාට ස්ථිර වාසස්ථාන ලබා දීමෙන් පමණක් නතර නොවූ රවි රජු මාසයක් මාසයක් පාසා පවරා දුන් නිවාසවලට ගොස් නැවතී සිටිමින් ඔවුන්ගේ සුවදුක් බලා යෑම සිරිතක් කර ගත්තේය. ඒ අතර සඳු බිසවද තම කාන්සිය මඟහරවා ගැනීමට සිතා දින දෙකහමාරෙන් දෙකහමාරට රාශි මාලිගාවලට යමින් ඔවුන්ගේ සැපදුක් සොයා බැලුවාය. අඟහරු හෙවත් කුජ සෙන්පතියාද මාස එකහමාරෙන් එකහමාරට රාශි මැඳුරුවලට යමින් ඔවුනගේ ආරක්ෂාව පිළිබඳව සොයා බලන්නට විය. ශුක්‍ර හෙවත් සිකුරු සාමාන්‍යයෙන් මාසයකට වරක් පමණ රාශි මැඳුරුවලට ගොඩවැදීම සිරිතක් කර ගනී. නමුත් වැඩි කාලයක් එක් මැඳුරක සිට ආපසු කලින් සිටි මැඳුරට ගොස් එහි ටික දිනක් නැවතී සිටීම හේතුවෙන් සමහර විට මාස දෙකක් හෝ දෙකහමාරක් එක් රාශි මැඳුරක විසීමට ඇයට සිදුවිය. ග්‍රහ ලොව තුළ එය හඳුන්වන්නේ වක්‍ර වීම හා විවෘත වීම යනුවෙනි. සුරගුරු හෙවත් ගුරු ග්‍රහයාද, සාමාන්‍යයෙන් වසරකට වරක් රාශි මැඳුරකට ගොඩවී යෑම සිරිතකි. එහි ගත කරන වසරක කාලය තුළ යහපත් උපදෙස් හා අනුශාසනා ලබා දීම ඔහු ඉටු කරනුයේ ඉතා සතුටිනි. එහෙත් ඔහුටද සමහර අවස්ථාවලදී එකම මාලිගයක් තුළ වසර එකහමාරක පමණ කාලයක් වක්‍ර වෙමින් නිවෘත වෙමින් (පසුපසට හා ඉදිරියට) ගමන් කරන්නට සිදුවූ වාර අනන්තය. එලෙස වූ අවස්ථාවලදී ඊළඟ රාශියට පැමිණෙන ගුරුට එම රාශිය පසුකරන්නට ගත වන්නේ මාස පහක් හෝ හයක් වැනි කෙටි කාලයකි. එය ඉතා ශීඝ්‍ර ගමනකි. ශනි හෙවත් සෙනසුරු වසර දෙකහමාරක කාලයක් එක් රාශි මැඳුරක සේවය කරන අතර මැඳුරු ආවරණය කිරීමට ඔහුට වසර තිහක පමණ කාලයක් ගතවේ. සෙනසුරුද වසරකට එක් වරක් හෝ ආපසුහැරී බලමින් තම රාජකාරිය වූ පවිත්‍ර කිරීමේ රාජකාරිය නිසි ලෙස ඉටු කරලයි. අඩු වශයෙන් මාසයකට ආසන්න දින ගණනක් එක් රාශි මැඳුරක ගත කරමින් එහි ඇත්තන්ගේ හා විශේෂයෙන් දරුවන්ගේ අධ්‍යාපන හා බුද්ධිමය කටයුතු පිළිබඳව සොයා බැලීම බුධ කුමරුවාගේ වගකීමය. සමහර අවස්ථාවලදී එක් මාලිගයක් තුළ එහාට මෙහාට ගමන් කිරීම හේතුවෙන් මාස දෙකකට අඩු හෝ වැඩි කාලයක් ගත කිරීමට බුධට සිදුවනු ඇත.
පාරම්පරික ජේ‍යාතිෂවේදී කොටදෙණියාවේ ඩී.ඩග්ලස් නිමලවංශ ගුණවර්ධන 0776283097මව්බිම
