චන්ද්‍ර සූරිය මන්ත්‍රයේ ප්‍රබල බලය
හිරු සඳු යනු අප වාසය කරන මේ පෘථිවියේ ජීවප්‍රාණ බලයයි. යම් දිනෙකදී මෙම චන්ද්‍ර සූර්යන්ගේ විනාශය පෘථිවි ජීවී අප සැමගේද විනාශයයි. එසේ හෙයින් අප සෞරග්‍රහ මණ්ඩලයට සූර්යාගෙන් ලැබෙන ශක්තියත් අප ජීවත්වන පෘථිවියට චන්ද්‍රයාගෙන් ලැබෙන බලයත් සුළුකොට තැකිය හැකි නොවේ. මේ මහා ශක්ති ප්‍රවාහය හොඳින් අවබෝධ කරගත් පුරාතන අපේ මුතුන් මිත්තන් මෙම චන්ද්‍ර සූර්ය දෙදෙනා දේවත්වයෙන් ඇදහීමට පටන් ගත්හ. එම සූර්ය වන්දනා ක්‍රමය අදවන විටත් මිනිසුන් අතර තවමත් එලෙසින්ම පවතිනුයේ එයින් ලැබෙන සුවිශේෂී වූ ශක්තිය නිසාය.
මෙම සූර්ය නමස්කාරය පිළිබඳ වර්තමානයේ සිටින විවිධ පුද්ගලයන් විවිධ මත දරති. ඇතැමකු මෙසේ මන්ත්‍ර ජපකරමින් සූර්ය චන්ද්‍ර දේවත්වයෙන් කරනු ලබන වන්දනාවන් කිසිදු විද්‍යාත්මක සත්‍යතාවක් නොමැති දේවල් ලෙසට බැහැර කරනු ලැබුවත් අවුරුදු දහස් ගණනාවක් මෙම ක්‍රමයන් නොවෙනස්ව මෙසේ පරපුරෙන් පරපුරට පැමිණ ඇත්තේ එහි යම් සත්‍යතාවක් ඇති නිසා බව කිවයුතුය. සැබැවින්ම මෙම සූර්ය චන්ද්‍ර යනු දෙවිවරුන් ලෙස නොපිළිගනු ලැබුවද එම ශක්ති කදම්භයන් වන්දනා කිරීමෙන් අප්‍රමාණ වූ ශාන්තියක් උදා කරගත හැකි බව අප විසින් දැඩිව විශ්වාස කරන්නේ එහි සත්‍යතාවක් ඇති බැවින් චන්ද්‍රාලෝකය සහ සූර්යාලෝකය අප පෘථිවියට පැමිණෙන්නේ කිසියම් වූ සුවිශේෂී රටාවකටයි. මෙම රටාව අපගේ ඇසට නොපෙනුනත් නවීන විද්‍යාඥයන් සූර්ය කිරණ පාථිවියට ගලාගෙන එනු ලබන ආකාරයේ සංඛ්‍යාත්මක රටාවක් පෙන්වා දී ඇත. පාරජම්බුල කිරණ, ගැමා කිරණ ආදී වශයෙන් පෘථිවියේ සැරිසරන විවිධ කිරණ ශක්තීන්ට ආවේණික වූ හැඩතලයක් පවතී. මේ ලෝකයේ ඇති ඕනෑම ශබ්දයකටද එවැනි විද්‍යාත්මක වූ හැඩතලයක් ඇත. අපගේ හෘද ස්පන්දනයට ඇති ධ්වනි හැඩය ඔබ ඊ.සී.ජී. පටිවලින් දැක ඇති. එසේම මෙම මන්ත්‍ර ශාස්ත්‍රයේද කියැවෙන වචනවල ඇති ස්වරූපය අනුව එයට ආවේණික වූ සුවිශේෂී ශබ්ද රටාවක් ඇත. මේ ආකාරයට ඉර හඳ දෙකින් මෙම පෘථිවියට ගලාගෙන එනු ලබන මෙම කිරණ ශක්තිය මාත්‍රයක් ජපකිරීම තුළින් මන්ත්‍රය ශබ්ද වන විට නිකුත්වන ධවනිය හෙවත් හඬ තුළ පටලවාගෙන එය තමා කරා ළංකර ගැනීම මන්ත්‍ර ජප කිරීම තුළින් සිදුවේ. මන්ත්‍ර ශාස්ත්‍රයේ ඇති සෑම මන්ත්‍රයකින්ම සිදුකොට ඇත්තේ විශ්වයේ ඇති විවිධ ශක්තීන් මන්ත්‍රයක් කීම තුළින් නිකුත් වන ශබ්දය තුළ පටලවා ගැනීමයි. මෙය උදාහරණයකින් පෙන්වා දෙනවා නම් ගසක එතී ඇති වැල් ගොඩක් කෙක්කක් සහිත ලීයකින් දවටා කරකවා එම මුළු වැලම කුඩා ලීයට ඔතාගැනීමක් බඳුය. නමුත් මන්ත්‍රවලින් අදාළ ශක්තීන් ඇද බැඳ පටලවා ගෙන තමාට අවශ්‍ය යන්ත්‍රය මත හෝ යම් පූජා ද්‍රව්‍යක් මතට කාවැද්දීම නිසැකයෙන්ම සිදුකරනු ලබන ආකාරය සත්‍යයක් ලෙස කවුරුත් පිළිගනිති. සූර්ය චන්ද්‍ර වන්දනාවන් සඳහා නිර්මාණය කොට ඇති මන්ත්‍රයන්ද එම ආකාශගත විශ්ව ශක්තිය තමා වෙතට ගෙන්වාගත හැකි ක්‍රමයකට නිර්මාණය වී තිබේ. පරතෙරක් නැති මන්ත්‍ර විද්‍යාව නිර්මාණය වූයේ මේ පෘථිවියේම බැවින් පෘථිවිය පාලනය කරන සූර්යයා සහ චන්ද්‍රයා මන්ත්‍ර ශාස්ත්‍රයේද ගුරුවරුන් වෙති. ඒ නිසා සූර්යයා මුල්කොටගත් මන්ත්‍ර ඊශ්වර මුල්කොටගත් මන්ත්‍ර යැයි හඳුන්වා තිබේ. ජීවයේ උල්පත සූර්යයා සේම ශක්තියේ උල්පත ඊශ්වර බව හින්දු පිළිගැනීමයි. එබැවින් සූර්යයා සහ චන්ද්‍රයා මුල්වූ මන්ත්‍ර බෙහෙවින්ම බලවත් බව උගන්වා තිබේ. මෙවර ඔබට දායාදකරනු ලබන සර්වශක්තියම උදාකරනු ලබන චන්ද්‍ර සූර්ය මන්ත්‍රය මහත් වූ ශක්තියකින් හෙබි මන්ත්‍රයකි. එම තෙල හිඳින ආකාරයද මෙහි සඳහන් කිරීම පාඨක ඔබට වඩාත් ප්‍රයෝජනවත් විය හැකිය. රන්තැඹිලි ගෙඩියක් බිමට නොකඩා ඉරිදා ඉරු හෝරාවෙන් සේරු ලීයකින් හෝ පොල්කටුවකින් ගාගන්න. එම පොල්වලට වතුර නොදමා අතින් මිරිකාගෙන එය තඹ භාජනයකට වත්කරන්න. ඊට ඉරුරාජ, සඳරාජ සහ දුටුසතුටු කොළ ඉස්ම තේ හැඳි 1 බැගින් එක්කරන්න. ඉරිවේරිය මල් ඇත්නම් ඒවාද එයටම තළා දමන්න ඉන්පසු දින 14ක් අවු රශ්මියෙන් තෙල කකාරන්න. එවිට පෑදෙනුයේ සර්ව ශක්ති සූර්ය තෛලයයි. එම තෙල මෙම මන්ත්‍රයෙන් මතුරාගත හොත් ඉහත කී නොයෙකුත් ගුණ ඔබට ලබාගත හැකිය.
ඕං නම නමස්මිං සූරියං සූරියං වා වා දහම්සූ
රියං සඟුන් සූරියං වා වා ඕං නම නමස්මිං
ඉරුං වා වා ඉරුං සඳුං වා වා ඕං නම
නමස්මිං ජය ශ්‍රී ජයශ්‍රී ඕං නම නමාමී
ඇස්වහ කටවහ හෝවහ අංගං කොඩිවින විල්ලුං
බන්ධන අපල උපද්‍රා අංගජ පො
සැබැවින්ම මෙහි කියූ ලෙසින්ම ඇස්වහ කටවහ, අංගං, කොඩිවින, වින බන්ධන, අපල උපද්‍රව ආදී සියල්ල මෙම මන්ත්‍ර රත්නයේ ආනුභාවයෙන් දුරු කරවා ගත හැකිය. උදෑසන පායන සූර්යයා දෙස බලා මෙය හත්වතාවක් කීමෙන් මාරක අනතුරු, අමනුෂ්‍ය දෝෂ දුරු කරගත හැකිය. තමාට ඇතිවන සතුරු විපත් දුරුකර ගත හැකිය. ජයශ්‍රියාව තමාට නිතර උදාකරගෙන අප්‍රමාණ වූ ශාන්තියක් උදාකරගැනීමට මින් හැකියාව තිබේ. බොහෝ දෙනාගෙන් තමාට ඇතිවිය හැකි විවිධ විපත්තීන්ගෙන් සහ විශේෂයෙන් මෙය නිතර කියන විට නිවෙසේ ඇති අන්ධකාර ගතිය, මූසල පෙනුම දුරුකරගෙන ශාන්තිය උදාකරගත හැකිය. සූර්ය දිව්‍ය රාජයා සේ තමා තුළ තේජස් බලයත් චන්ද්‍ර රාජයා සේ සෞම්‍ය ගුණයත් නිතරම තමා තුළ ඇතිවීමට මෙම මන්ත්‍ර දැහැන මහෝපකාරී වේ. විශේෂයෙන් රවි නීච වූ අවස්ථාවලදී රවිගෙන් හෙවත් සූර්යයාගෙන් පිහිට ලබාගැනීම ඉතාම සුදුසු කදිම ක්‍රමයක් වශයෙන් මෙම වන්දනා ක්‍රමය වැදගත් වේ. සෑම දිනකම උදේ 6.00 සිට 6.10 දක්වා අතර කාලසීමාව මෙය මැතිරීමට ඉතාම සුදුසු ප්‍රශස්තම වේලාව වේ. ඉහත සඳහන් තෛලය සිඳගැනීමට රවිගේ බලය ඉතාම තදින් පවතින බලයක නැකැතක් යොදාගත යුතුය. නඩුහබ ආදියට, සතුරන් දපනයට, ග්‍රහදෝෂ සමනයට ආදියට ඉතාම සුබ පල ගෙනදෙන සුවිශේෂී වූ මන්ත්‍ර දැහැනක් ලෙස මෙය හඳුන්වා දිය හැකිය. නමස්කාරයක් වශයෙන් උදයට භාවිත කිරීමට ආරක්‍ෂක මන්ත්‍රයක් ලෙස නිතර භාවිතයට මෙන්ම දෝෂ දුරුකිරීමට සහ දෙහි කැපීමටද මෙම මන්ත්‍රය යොදාගත හැකිය. මෙම සර්ව ශක්ති චන්ද්‍ර සූර්ය මන්ත්‍රය ඔබත් භාවිත කොට මෙහි ඇති ශක්තිය අත්විඳින්න. තෙරුවන් සරණයි.
ඒ. සුමනවංශ හිමි 071-8241354මව්බිම
