ස්වාභාවික විපත් හමුවේ ආගමික සිද්ධස්ථාන නොසෙල්වුණේ ඇයි?

ශක්තිය, බලය මිනිසා සහ පරිසරය යන මෙම සමීකරණය බැඳී ඇත්තේ ස්වභාවික නීතිය පරිසර නීතිය එසේත් නැත්නම් විශ්ව නීතිය යන අපට නොපෙනෙන ප්‍රබල බලවේගවල සමතුලිතතාව මතය. මෙම ස්වාභාවික නීති පද්ධතියට එරෙහිවීමට කිසිවකුට වරම් දී නොමැත. අද ගස් කැපීම, කැලෑ විනාශ කිරීම, හොරෙන් පතල් කැපීම, කඳු කැපීම, මුහුද ගොඩකිරීම මඟින් පොළොවට දස වධ ලබාදී ඇත. වාස්තු විද්‍යාව හා බැඳුණු ගොඩනැඟිලි නිර්මාණය පවා වැරැදි ස්ථානවල මේ වන විට කොපමණ ඉදිකර ඇත්ද? අප පය තබා සිටින මේ පොළොවට දරා ගත හැකි උසුලා සිටිය හැකි වධවේදනා එක්තරා ප්‍රමාණයකට පමණක් ඉවසා සිටියි. මේ ලෝකයේ සෑම දෙයක්ම නිර්මිත වී ඇත්තේ ආපෝ (ජලය), තෙජෝ (ගින්දර), වායෝ (වායුව), පඨවි (පොළොව) හා ආකාශ් (අහස) යන පංචමහා භූත කොටස්වල සුසංයෝගය මතය. මේ සුවිශේෂී කරුණු පහ හා ඍජුවම සම්බන්ධවනුයේ ස්වාභාවික නීතියයි. ලෝකයේ ඇතිවන ඕනෑම ව්‍යසනයකට ප්‍රබලතම සාධකයන් වනුයේ මේ පංචමහා භූත ශක්තියේ අසමතුලිතතාවයි. 

ස්වාභාවික විපත්, පිළිම හා ආගමික ගොඩනැඟිලි :

මෙම පෘථිවිතලයේ සමතුලිතතාව ආරක්‍ෂාවන සේ මිනිසාට දයාදකර ඇති විවිධ ආගම් දර්ශන තුළින් බව ස්වාභාවික විපත් පිළිබඳ පසුගිය සතියේ පළවූ ලිපිය කියැවීමේදී ඔබට පැහැදිලිවන්නට ඇතැයි සිතමි. විශාල ගොඩනැඟිලි මොහොතකින් විනාශ වන විට, කුඩා පිළිමවලට කිසිම හානියක් නොවී ඉතිරි වෙනවා. ඇත්තටම මොකක්ද මෙයට හේතුව? ලෝකයේ ස්වාභාවික විපත් ලෙස භූමිකම්පා, සුනාමි, කුණාටු, ගිනිකඳු, ගංවතුර, නායයෑම් ඇතුළු ව්‍යසනයන් රාශියක් අයත්ව ඇත. ධර්මානුකූල ජීවිත ගත කරන, පරිසරය ආරක්‍ෂාකරන ස්වාභාවික නීතියට ගරුකරන අය මේ විපත්වලින් නිතැතින්ම ගැලවෙනු ඇත. 99න් බේරෙන්නේ ඒ අයය. ලෝකයේ පවතින ආගම් ගැනද අපි යම්කිසි අවබෝධයක් ගැනීමද මෙහිදී වැදගත්. අන්තර්ජාල තොරතුරුවලට අනුව විවිධ ආගම් 19ක් පවතින අතර කිසිම ආගමකට නැති ලෝකවාසීන් කොටසක් සිටින බවද පෙන්වා ඇත. ඒ අනුව මුළු ආගම් ගණන 20 වී ඇත.

ලෝක ජනගහනය අනුව ප්‍රධාන ආගම් බෙදී ඇති ආකාරය :

• ක්‍රිස්තියානි ආගම - බිලියන 2.1
• ඉස්ලාම් (මුස්ලිම්) - බිලියන 1.3
• කිසිම ආගමකට නැති කොටස - බිලියන 1.1
• හින්දු ආගම - මිලියන 900
• සාම්ප්‍රදායික චීන ආගම - මිලියන 394
• බුද්ධාගම - මිලියන 376

මෙයට අමතරව විවිධ ආගම් දර්ශන 14ක් ලෝකවාසීන් අතර බෙදී ගොස් ඇත. කිසිම ආගමකට නැති මූලධර්මවාදීන්, භෞතිකවාදීන් නාස්තිකවාදීන්, අන්තවාදීන් හා හේතුවාදීන් යන කොටසක් එතුළ ඇත. මේ අය සුවිශේෂිවනුයේ යමක් ලෙහෙසියෙන් පිළිනොගන්නා බව පෙන්වා තර්ක කිරීමය.  

ස්වභාව ධර්මය අපට දයාදකර ඇති ශක්තිය සහ බලය :

මෙම ධර්මතාව තුළ හඳුනාගත හැකි නොහැකි කොටස් 11ක් පමණ ඇත. ඒවා මෙසේ වර්ගකර පෙන්වා දිය හැකිය. 

1. පොළොවේ ශක්තිය (පරිසරය)
2. ගුරුත්වාකර්ෂණ බලය
3. චුම්භක ක්‍ෂේත්‍ර ශක්තිය
4. විද්්‍යුත් චුම්බක ක්‍ෂේත්‍ර ශක්තිය
5. ආකාශයේ ශක්තිය
6. විශ්ව ශක්තිය
7. පාරජම්බුල හා අල්ට්‍රාවයලට් කිරණ ශක්තිය
8. උෂ්ණත්වය හා ආලෝකය
9. සූර්ය ශක්තිය
10. නවග්‍රහ ශක්තිය
11. හඳුනානොගෙන ඇති අන්තරීක්‍ෂ ශක්තීන්

ස්වභාව ධර්මයට එරෙහිවන ඍණ ශක්තීන් :

1. මිනිසා විසින් නිර්මිත විද්‍යුත් ශක්තීන්වලින් පිටවන අහිතකර දේ.
2. මිනිසා විසින් නිපදවන බෝම්බ, රසායනික අවිවල ඇති විස වර්ග.
3. පරිසර දූෂණය ගංගා ඇළ‍ෙදාළ අපවිත්‍ර කිරීම.
4. බලශක්ති ගාරවලින්, කාන්දුකරණ විකිරණ
5. හිරෝෂිමා, නාගසාකි වැනි ස්ථානවලට දැමූ පරමාණු බෝම්බ විස අදත් පැතිරෙමින් තිබීම.
6. පොළොවට රසායනික පොහොර, විස වර්ග එකතු කිරීම.
7. ඕසෝන්තලය විනාශ කිරීම.
8. සාගරය අපවිත්‍ර කිරීම, විද්‍යුත් අබලි ද්‍රව්‍ය සාගරයට දැමීම.
9. සන්නිවේදන උපකරණ හා ජාල තුළින් නිකුත් කරන විස කිරණ හා අබලි ද්‍රව්‍ය නිසා පොළොවේ ශක්තිය දුර්වල කිරීම.
10. ස්වභාවධර්මයට අයත් සත්ත්වයන් ඝාතනය කිරීම සාගරයේ පවතින කොරල්පර, මත්සයන් විනාශ කිරීම.
11. වාස්තුවිද්‍යාවට එරෙහිව ගොඩනැඟිලි ඉදිකිරීමේදී පරිසරයට සිදුකරන හානි නිසා ඇති වන ඍණ ශක්තීන්.

පෘථිවියේ සමතුලිතතාව වෙනස් වීම : 

ස්වභාවධර්මය විසින් අපට දායාදකර ඇති ධන ශක්ති සහ බලය මිනිසා විසින් හිතා මතා දැන දැනම වෙනස් කිරීමට යෑම නිසා ඇති වන දුර්වල ඍණ ශක්තීන් නිසා පෘථිවියේ තිබෙන්නාවූ සමතුලිතාව බිඳෙන අවස්ථාවලදී මෙම අපදා, විපත්, ව්‍යසනයක් කලින් කල ඇති වී මිනිස් ජීවිත, දේපළ සියල්ල විනාශකර දමනු ඇත. ඒ සියල්ලටම වගකීම භාර ගත යුත්තේ මිනිසාමය. අපේ රටේ පමණක් නොව ලෝකයේ සිටින සෑම ජාතියකටම මෙලෙස ඇති වන භයංකාර, ඛේදජනක සිදුවීම් සතියක් හෝ දෙකක කාලයකදී අමතකවීමද ඓශ්චර්යයකි. ඉක්මනට අමතකවී ඇති මේ ව්‍යසනයන් නැවත වරක් මතක්කරදීමද යුතුකමක් බව සිතමි. ප්‍රධාන ආගම් හතරට අයත් පිළිම සහ ගොඩනැඟිලි බේරී ඇති ආකාරය අමතක කරන්න එපා. 2007 අප්‍රේල් 27 දින කුණාටුවකින්මි යන්මාරයේ ආරාමයක බේරුණ බුදු පිළිමය (2 රූපය) මියන්මාරය නැත්නම් බුරුමයේ මෙම කුණාටුවෙන් මිනිස් ජීවිත 1,33,000 බිලිගෙන ඇත. එනමුත් මෙම පිළිමයට කිසිදු හානියක් වී නැත. පුදුමයි නේද? 2012 ඔක්තෝබර් 29 දින නිව්යෝර්ක් නගරයට හැමූ සැන්ඩි නමැති කුණාටුවෙත් බේරුණ මරියතුමියගේ පිළිමය (3 රූපය) 2004 දෙසැම්බර් 26 දින ඇතිවූ සුනාමි උවදුරින් දකුණු ප්‍රදේශයේ කතරගම දේවලයක බේරුණ කතරගම දෙවියන්ගේ පිළිමය (4 රූපය) 2004 සුනාමියෙන් බේරුණ සෙන්ට්මේරිස් පල්ලිය - මාතර (5 රූපය) මෙම පල්ලිය තුළට ගසාගෙන පැමිණ ඇති නවීන පන්නයේ මෝටර් රථය (6 රූපය) 1999 තුර්කියේ භූමිකම්පාවකින් බේරුණා ගොල්කුක් මුස්ලිම් පල්ලිය ගොඩනැඟිලි සියල්ලම එකම දිසාවකට ඇතත් මුස්ලිම් පල්ලිය දිසාව මුල්කර පිහිටුවා ඇත. මෙම මුස්ලිම් පල්ලිය අවට ගොඩනැඟිලි සුන්බුන් දෙස හොඳට අවධානය යොමු කරන්න. පෙර ලිපියේ ආකාරයටම මෙම මුස්ලිම් පල්ලියත් ඉස්ලාම් වාස්තුවිද්‍යාව අනුව දිශාව මුල්කර ගෙන ඉදිකර ඇති බව හොඳට පෙනේ. (7 රූපය) ලෝකයේ කොහේ තිබුණත් මුස්ලිම් පල්ලියේ ආකෘතිය මක්කම දෙසට හැරවීමටද සැඟවී ඇති රහසක් ඇත. අපි වාස්තු විද්‍යා ඉගෙන ගන්නවානම් පරිසරයට දිශාවලට ගොඩනැඟිල්ල අනුගත කිරීමට අනිවාර්යෙන්ම උනන්දු විය යුතුයි. අපේ රටේ නම් දිසාවලට අනුගත කරනවා කියන එකට කිසිම සැලකිල්ලක් නැත. අනුරාධපුර, පොළොන්නරු යුගවල ඉපැරැණි චෛත්‍යය, පිළිම ස්ථානගත කර ඇත්තේ ප්‍රධාන දිසා 4 මුල්කරගෙන බවද කිව යුතුය. අද සිදු වනුයේ නිවෙසට එන පාර මුල්කරගෙන ගොඩනැඟිල්ල ඉදිකිරීමය. බුද්ධ දර්ශනයේ අද්විතීය බලය සහ ශක්තිය පෙන්වන මාතර කොට්ටේගොඩ බුදු පිළිමය සහ පස්වග මහණුන් (8 රූපය)මාතර කෝට්ටේගොඩ බුදු පිළිමය සහ පස්වග මහණුන් දක්වන මෙම පිළිම අවට විනාශ වී ඇති ගොඩනැඟිල්ලේ සුන්බුන් දෙස හොඳට බලන්න. පස්වග මහණුන් වහන්සේ බිම වාඩිවී තවමත් බණ අසන හැටි හොඳට බලන්න. සුනාමි නොවේ මුළුමහමෙර සෙලවුණත් මේ පිළිම නම් නොසෙල්වී සිටින ආකාරය පිළිබඳ හොඳට සිතන්න. ඔබට දැන් බුද්ධ දර්ශනයේ දිග සහ පළල හොඳට දැනෙනු ඇතැයි සිතමි. මේ කොන්ක්‍රීට් කෑලිවලින් මේ කුඩා පිළිම 5 බේරුණේ කෙසේද? 

උගත් විද්වතුන්ගේ මත හා පිළිම :

මීට පෙර ලිපියේ විද්වතුන් තිදෙනකුගේ මතයන් මා සිංහල භාෂාවෙන් ඔබ වෙත ඉදිරිපත් කළ බව මතක ඇතැයි සිතමි. මේ මත පිළිබඳ මා කිසිම විනිශ්චයක් නොදෙන අතර එය ඔබට භාරකරන බවත් මෙහිදී සඳහන් කරමි. ඔබගේ විනිශ්චයට පහසුවීමට ඔවුන්ගේ මතවලට සම්බන්ධ කළ තාක්‍ෂණ ක්‍රමවේදය පහත සඳහන් කරමි. 

1. මතය - ඉතාමත් හොඳ අමුද්‍රව්‍ය යෙදීමත්, දක්‍ෂ ශිල්පී ක්‍රමයන් ආදේශ කිරීම නිසාත් මේ පිළිම බේරීමට වලාකුළු බැම්මවල් හෝ වෙනත් බැමි, විශාල ගස් හේතුවන බවත් සඳහන් කර ඇත. 

වලාකුළු බැම්ම :

ඉතාමත් හොඳ අමුද්‍රව්‍ය කියන්නේ මොනවාද? ශ්‍රී ලංකාවේ භාවිත කරන්නේ හැමෝම පාවිච්චි කරන සිමෙන්තිය. මේ පාවිච්චි කර ඇති සිමෙන්තිවල පිරමීඩ් හෝ ඉපැරැණි චෛත්‍යය, බැම්වලට භාවිත කළ සිමෙන්ති වැනි දෙයක් භාවිත කර නැති බව ඔබ සැම දන්නා කරුණකි. මේ පිළිම වටා කිසිදු වලාකුළු බැමි හෝ වෙනත් තාප්ප තිබී නැත. අපි යම්කිසි මතයක් ඉදිරිපත් කරනවානම් එය අප රටට පමණක් නොව මුළු ලෝකයටම පිළිගත හැකි එකක් වේ නම් වඩා වටිනවා නේද? සුළි සුළංවලින් ඇමෙරිකාවේ හා මියන්මාරයේ බේරී ඇති පිළිම දෙස නෙත යොමු කළහොත් ඔබට ඔවුන් පෙන්වන තාක්‍ෂණ ක්‍රමවේදයන් හරිද යන්න සිතාගත හැකියි. මම මේ අදහස් දක්වන්නේ ඔබට හොඳ විනිශ්චයක් දීමට කරුණු වටහා දීමටය. පිළිමවලට විශාල තද කොන්ක්‍රීට් අත්තිවාරම් හෝ පදනමක් මත නිසා බේරුණු බව පැවැසීමද අපි පරීක්‍ෂා කළ යුතුව ඇත. ගොඩනැඟිලි තැනීමට පොළොව කළු ගල තෙක් අඩි 50, 60 යන තැන් තිබෙනවා. මේ පිළිමවලටත් එහෙම දමනවාද? නැහැ වැඩිවුණොත් අඩි 3 - 5 අතරය. 

2 මතය :

වෙරළාශ්‍රිත ප්‍රදේශවල පොල්ගස් බේරුණේ එහි මුල්වල පොළොව බදාගෙන තිබෙන රවුම් නැත්නම් වටකුරු හැඩතලය නිසා බවය. ඒ ආකාරයට මේ පිළිමවලත් යටට මෙවැනි හැඩතලයක් ඇති නිසා පිළිම බේරුණු බවය. සුනාමි උවදුරේදී වෙරළ අවට සහ ඒ අසල භූමිවල තිබූ පොල්ගස් විශාල ප්‍රමාණයක් විනාශ වී තිබුණි අතරින් පතර එකක්, දෙකක් බේරීද තිබුණි. 

පොල් ගස් වල මුලේ සංයුතිය පිළිබඳ විද්‍යාත්මක මතය :

පොල්ගසේ මුල්වල සංයුතිය බැලීමේදී මීටර් 1 හෝ 2 අතර පරාසයක තිරස්ව හා සිරස්ව පොළොවේ පිහිටන බව විද්‍යාත්මක මතයයි. ඉහත රූප සටහනෙන් එය ඔබට අවබෝධවනු ඇත. පිළිම තාක්‍ෂණය බැලීමේදී මේ බේරී ඇති පිළිම විශාල පිළිම නොවේ. මාතර කොට්ටේගොඩ පස්වග මහණුන් වහන්සේලගේ පිළිම දෙස හොඳට බලන්න. බේරී ඇති බුදු පිළිම සියල්ල ආසන මත ඉදිකර ඇති ඒවාය. ඔබට මේ සම්බන්ධව විනිශ්චයකට යෑමට මෙම කරුණු ප්‍රමාණවත්වේ යැයි සිතමි. 

3. මතය : එරෝ ඩයිනමික්ස් තාක්‍ෂණ ක්‍රමවේදය :

මෝටර් රථ නිෂ්පාදනයේදී යොදා ගන්නා එරෝඩයිනමික්ස් ක්‍රමය අනුව වායුව කපාගෙන රථය ඉදිරියට යෑම. මේ ඔබ දකින්නේ මෝටර් රථ නිෂ්පාදනයට භාවිත කරන වායුව හා ජලපහර කපාගෙන ඉදිරියට යන තාක්‍ෂණ ක්‍රමවේදයයි. එහිදී රථයට වායුව වැදෙන ආකාරය එයට බාධකයක් නොවී ඉදිරියට යෑමට යොදා ගන්නා වාහනයේ හැඩතල ගැනද ඔබ හොඳට පරීක්‍ෂාකර බලන්න.වායුව හෝ ජල පහර කපාගෙන ඉදිරියට යෑම මෝටර් රථය නම් පිළිමය වගේ එකතැන තිබෙන එකක් නොවේ. මෝටර් රථය ඉදිරියට ඇදෙන අතර පිළිමය එකම තැනක ස්ථිරව ස්ථානගත කර ඇත. දැන් ඔබට සිතන්න පුළුවන් වේ යැයි සිතමි. 

පිළිම නෙළීමේ තාක්‍ෂණය සහ වාස්තු විද්‍යාව :

ස්වභාව ධර්මයා, නිර්මාණය කරන මෙවැනි විපත්වලදී යම්කිසි ද්‍රව්‍යයක් ආරක්‍ෂා වේ නම් එයට සුවිශේෂිවූ හේතු අනිවාර්යයෙන්ම තිබිය යුතුය. ලෝකයේ තිබෙන සෑම දෙයක්ම විනාශවී යාහැකිය. එනමුත් මේ ප්‍රධාන ආගම් සතරේ ඇති පූජනීය වස්තුවලට කිසිදු හානියක් නොවන්නේ වලාකුළු බැමි තාක්‍ෂණය, පොල් ගස් තාක්‍ෂණය හෝ එරෝඩයිනමික්ස් තාක්‍ෂණය, නිසාද කියා ඔබම පරීක්‍ෂාකර බලන්න. බෞද්ධ පිළිම ගෙවල් හා පල්ලි ඇතුළට මෝටර් රථ ඇවිත් වැදිලත් මේවා බේරෙන්නේ කෙසේද කියාත් බලන්න. දේවරූප, පිළිම, පිළිමගෙවල්, ක්‍රිස්තියානි හා මුස්ලිම් පල්ලි ඉදිකිරීමේ තාක්‍ෂණ ක්‍රමවේදය ස්වාභාවික විපත්වලදී ලෝකයේම ආරක්‍ෂා වී ඇති ආගමික පිළිම සහ ගොඩනැඟිලි හොඳට පරීක්‍ෂා කර ගැනීම මෙතැන් සිට සිදු කරමු. දේව පිළිම වාගේම බුදු පිළිම නෙළීමට ගැඹුරු සුවිශේෂී තාක්‍ෂණයක් ඇත. එතරම්දුරට මා ඒවා පැහැදිලි නොකරන අතර සාමානයෙන් දැනගත යුතු දේවල් පමණක් ඔබහට ඉදිරිපත් කරමි. 

පිළිමවල සමතුලිතතාව තුළින් ජීවමාන බව නිර්මාණය වේ :

පිළිම නෙළීම සම්බන්ධව අප රටේ ශාරිපුත්‍රය නමැති ග්‍රන්ථයත්, ඉන්දියාවේ වාස්තු ශිල්ප නම් කෘතියත් අපට අදත් දැකිය හැකි ග්‍රන්ථ දෙකකි. අපේ රටට පිළිම නෙළීමේ කලාව ඉන්දියාවෙන් ලැබුණු දායාදයකි. මෑතකදී අප රටේ ඉදිවූ ලෝකයේ විශාලතම බුදු පිළිමය නෙළුවේද ඉන්දියාවෙන් පැමිණි ශිල්පීන්ය. පිළිම නෙළීම පිළිබඳ යම්කිසි අවබෝධයක් මේ වන විට ඔබට ලැබී ඇතැයි සිතමි. වර්තමානයේ ගොඩනැඟිලි ඉදිකරන ආකාරයට ඕනෑම තැනක මෙම පිළිම හෝ ආගමික ගොඩනැඟිලි ඉදිකරන්නේ නැත. මෙම පිළිම හෝ ආගමික ගොඩනැඟිලි ඉදිකිරීමට සිද්ධාන්ත කීපයක් සලකා බලනු ඇත. සම්මත මිමි, වාස්තු විද්‍යාත්මක කරුණු, භූමිය, සුබස්ථාන, නැකැත්, නේත්‍රා මංගල්‍යය හා සුබ දිශාව ඒ අතරින් ප්‍රධානයි. ගොඩනැඟිලි හෝ පිළිම නියමිත මිමිවලට හා නියමිත තාක්‍ෂණ ක්‍රමවේදයට මේවා ඉදිවීමේදී ජීව බලය නිතැතින්ම මේවාට ආරෝපණය වනු ඇත. එය ස්වභාවධර්මය විසින්ම එතුළට එම ජීවගුණය කාන්දුකර ඇත. ඕනෑම විපතකදී දේව පිළිම, බුදු පිළිම, ආගමික ගොඩනැඟිලි යන පූජනීය ස්ථානවලට ලෙහෙසියෙන් හානියක් නොවන්නේ ඒ නිසාය. හානියක් සිදුවී ඇත්නම් ඒවා දෝෂ සහිත තත්ත්වයක් තිබුණොත් පමණය. එසේ සිදුවන්නේ කීයද සඳහන් කළ හැකිය. මෙම පිළිමවලට නොසෙල්වෙන ගුණය ලැබෙන්නේ විශ්ව ශක්තිය තුළින්ය. මේ සෑම ආගමික සිද්ධස්ථානයකම ඒ ඒ ආගමික භක්තිකයන්ගේ වැඳිම, පිදීම යනාදී කරුණු මත සුවිශේෂ ශක්තියක්, බලයක් ඒ තුළ ගොඩනැඟෙනු ඇත. ඒ තුළින් ලැබෙන මෙම ජීවගුණය ඔබ ආප්‍රාණික යැයි සිතන පිළිම හා මෙම ගොඩනැඟිලිවල ඇත්තේ අසාමාන්‍ය නොසැලෙන ශක්තියකි. ඒ ශක්තිය හා බලය ලැබෙනුයේ ස්වාභාවික නීතිය මඟින් මිනිසා ආරක්‍ෂා කරදීමටය. ස්වාභාවික නීතිය හා බැඳුණු මෙම සමීකරණයේ ආකෘතිය වනුයේ ත්‍රිකෝණාකාර හැඩරුවකි. එය හරියට කකුල් 3 කනප්පුවක් වගේ යැයි සංකේත කළ හැකිය. මිනිසා, ශක්තිය සහ බලය හා පරිසරය යන කරුණු තුනෙන් එකක් හෝ විනාශ වුවහොත් ස්වාභාවික නීතියෙන්ම දඬුවම් ලැබෙනු ඇත. කකුල් 3 කනප්පුවේ එක කකුලක් කැඩුණෙහොත් අනිත් දෙකෙන් සිටිය නොහැකිය. පරිසරය විනාශ කරන්න සිතන්නවත් එපා. පරිසරයට අනු ගත වන්න.

මව්බිම