නිරෝගී සුවය, බලය, සැපය හිමිකරන මහා බලගතු වජ්‍රය
වසර දහස් ගණනකට පෙර මෙලොව සුරයන් හා අසුරන් අතර ඇතිවූ යුද්ධයේදී බලවත් සුරයන් පැරදවීමට අසුරයන්ගේ මහා සෘෂීන් විසින් අසුරයන්ට මහා බලවත් අවි ආයුධ නිර්මාණය කර දුන් අතර පුලස්ථි මහා සෘෂිවරයා විසින් මහා රාවණා නිරිඳුන්ට නිර්මාණය කර දුන් අවි ආයුධ අතර ප්‍රබලම ආයුධය වජ්‍රායුධයයි. විශ්වයේ ඇති මහා විශ්ව ශක්තිය ඒකරාශි කර සුරයන්ගේ හිස මත මහා අකුණුසැර වපුරමින් මහා සංග්‍රාමයක් කර සුරයන් පරදවා අසුරයන් දිනවීමට තරම් ප්‍රබල වූ මෙම වජ්‍රායුධය පුලස්ථි සෘෂිවරයා විසින් විශ්වකර්ම මුනිවරයා ලවා නිර්මාණය කරවා මහා රාවණා පරපුරට ලබා දුන් අතර එය හේලයාගේ හෙවත් අසුරයාගේ පැවැත්ම තහවුරු කිරීමට හේතු වූ ප්‍රබල උපකරණයයි. මෙම වජ්‍රායුධයේ මූලික සිද්ධාන්තවලට අනුව රාවණා පරපුර විසින් ලොවට දායාද කළ වජ්‍රය වසර දහස් ගණනක් පුරාවට ලෝකය තුළ නොයෙකුත් අයුරින් විශ්ව ශක්ති මෙවලමක් ලෙස භාවිත කරන අතර විටෙක ධනය උදෙසා ද විටෙක බලය උදෙසා ද විටෙක නිරෝගීභාවය උදෙසා ද පිහිට ලබාගන්නා උපකාරකයක් ලෙස මෙම වජ්‍රය භාවිත කර ඇත. මෙම වජ්‍රය යන පදය සංස්කෘත භාෂාවෙන් බිඳී ආ වචනයක් වන අතර එය මූලික තේරුම් තුනක් ඇති වචනයකි. එනම් වජ්‍රය යන්න අකුණුසැරටද, දියමන්තියටද, ඉසුරුමත් බවටද වශයෙන් භාවිත කරයි. එහිදී මෙම තේරුම් ගැන වෙන්වෙන්ව මෙන්ම එකක් ලෙසද භාවිත වන අතර පුලස්ථි මහා සෘෂිතුමා මෙම වජ්‍රය යන්න නිර්වචනය කර ඇත්තේ දියමන්තියක් මෙන් දැඩි වූද, සංකීර්ණ වූද අකුණුසැරක් මෙන් ප්‍රබල වූද ඉසුරුමත් බවක් හා ශක්තියක් ලබාදෙන උපකරණයක් වශයෙනි. මෙම වජ්‍රය නම් උපකරණය අති සංකීර්ණ ජ්‍යාමිතික හා වාස්තු විද්‍යාත්මක නිර්මාණයක් බව ඒ දෙස බැලූ බැල්මට අපිට නොපෙනෙන්නකි.
විසිතුරු භාණ්ඩයක් මෙන් විචිත්‍ර මෙම උපකරණය දුටුවන් සිත් පිනවන කලා කෘතියක් වැනිය. එහෙත් මෙම වජ්‍රය විශ්වයේ ඇති පුණ්‍ය වූ ශක්තින් හෙවත් විශ්වය තුළ ඇති ජීවියාට හිතකර වූද, ප්‍රයෝජනවත් වූද, විශ්ව ශක්තීන් ඒකරාශි කර හෝ ගබඩා කර අවශ්‍ය ආකාරයට හසුරුවා ගත හැකි ලෙස නිර්මාණය කරවූ අති විශිෂ්ට ජ්‍යාමිතික හා වාස්තු විද්‍යාත්මක උපකරණයකි. මෙම වජ්‍රය ගෝලයක් වැනිය. දෙපසට සවිකළ නෙලුම් පොහොට්ටු දෙකක් වැනි උපකරණයකි. එහි දෙපස ඇති නෙලුම් පොහොට්ටු දෙක යනු විශ්වයේ හා භූමියේ ඇති ශක්තිය උරාගැනීම උදෙසා නිර්මාණය වූ ජ්‍යාමිතික හා වාස්තු විද්‍යාත්මක උපකරණ දෙකකි. එසේම මධ්‍යයේ ඇති ගෝලය තුළට එම ඇදගන්නා ශක්තිය එක්රැස් කර වජ්‍රය අත දරන්නාට එම ශක්තිය සම්ප්‍රේෂණය කරන අයුරින් මෙය නිමවා ඇත. අකුණු සැරයක් යනු ගණනය කළ නොහැකි මහා විශාල විද්‍යුත් ශක්ති ප්‍රමාණයකි. මෙම වජ්‍රය තුළ අකුණක ශක්තිය ගබඩා කළ හැකි බව කියැවෙන අතර මෙම උපකරණ ලෝහ හෙවත් සන්නායකවලින් නිපදවා ඇත. සන්නායක නොවන ද්‍රව්‍යවලින් මෙය නිමවා ඇති අවස්ථා දැකිය හැකි වුවද එය අසාර්ථක උත්සාහයකි. එසේ කියනුයේ ඒ තුළ ගබඩා වන ශක්තිය අඩු බැවිනි. මෙය සන්නායකයකින් නිපදවිය යුතු අතර එයට අදාළ නියමිත ජ්‍යාමිතික හා වාස්තු විද්‍යාත්මක අනුපාතවලට අනුව නිපදවිය යුතු අතර එසේ නොවන අවස්ථාවලදී සිදුවනුයේ මිනිසාට හිතකර නොවන ශක්තීන් මේ තුළ ගබඩා වීම. එමඟින් ජීවයට අහිතකර තත්ත්වයන් ඇති වීමට ඉඩ සැලැසේ. යම්කිසි අයුරකින් මෙම වජ්‍රය සෘෂි නියමයන්ට පටහැනි අයුරින් නිර්මාණය කළහොත් එයට නියමිත පුද සත්කාර වත් පිළිවෙත් නොකරන අවස්ථාවකදී එය උකහා ගනුයේ හුදෙක් විශ්වයේ ඇති අහිතකර ශක්ති කිරණ බැවින් එයින් අවශ්‍ය අරමුණ ඉටු නොවන බව සිහි තබා ගත යුතුය. වජ්‍රය නිරන්තරයෙන්ම මිනිසා වෙත විශ්වයේ ඇති ක්‍රියාකාරි ශක්තිය ලබාදෙමින් මිනිසා සෞභාග්‍ය කරා ගෙන යන නිර්මාණයක් වන අතර මෙම වජ්‍රය අත දරන්නා හැම මොහොතකම තමා කරා එන විශ්ව ශක්ති කිරණයේ බලයෙන් සියලු කටයුතු සාර්ථකත්වයට පත් කරගන්නා සේම ඉතා ප්‍රබල ලෙස මිනිසුන් තමාගේ බහට අවනත කර ගනිමින් තමා වටා පිරිසක් ගොඩනඟා ගන්නා අතර මෙය දේශපාලනඥයන්, ව්‍යාපාරිකයන් වැනි පුද්ගලයන්ට තමාගේ පිරිස් බලය ඇති කර ගැනීම උදෙසා අතීතයේ ලැබූ මහඟු දායාදයක් ලෙස දැක්වීමට හැකිය. වාස්තු පිරමීඩ හතරක් විසින් ලබාගන්නා ශක්තිය ලෝක ගෝලයට ලබා දෙන ආකාරයට නිමවා ඇති මෙම වජ්‍රය යම්කිසි පුද්ගලයකු අත දරන්නේ නම් ඔහු ජනතා ප්‍රසාදය දිනා සියලු යස ඉසුරු ලබන්නේය.
මහා රාවණා නිරිඳුට පුලස්ථි සෘෂිවරයා නිමවා දුන් වජ්‍රායුධය දිශා අටකට යොමුවූ මුහුණත් අටක් ඇති උපකරණයක් වූ අතර පසුව විශ්වකර්ම මුනිවරයා මෙසේ දෙපසට මුහුණත් ඇති වජ්‍රය නිමවා ඇත. මෙය යුද අවියක් නොවුවද අකුණු සැරයක් ලෙස මිනිසාට ශක්තිය ලබාදීමට හැකි ආයුධයක් වැනි උපකරණයකි. මෙසේ නිපදවූ මෙම වජ්‍රය හෙවත් "ජයකොන්තය" අතීතය පුරාවට මිනිසාට ඉමහත් ශක්තියක් වූ අතර කඳසුරිඳුන් විසින් දුටුගැමුණු මහ රජුට යුද්ධයේදී අත තබාගන්න ලබාදුන් ජයකොන්තය ලක්දිව එක්සේසත් කිරීමට එතුමාට මහා ශක්තියක් විය. මෙසේ හෙළදිව හෙවත් අසුර රාජධානිය තුළ වසර දහස් ගණනකට පෙර නිර්මාණය වූ මෙම වජ්‍රය අසුරයන්ගෙන් සුරයන්ටත් මුළු මහත් ලෝකය පුරාවටත් එකිනෙකට වෙනස් ආකාර තුළින් විහිදී පැතිරී ගිය අතර එය මිනිසා නමැති ජීවියාට ඉමහත් ප්‍රයෝජනයක් විය. සුරයන්ගේ මහා දෙවියන් වන ශ්‍රී ඊශ්වර මහා දිව්‍ය රාජයා අත දරන ත්‍රිශූලය මෙම වජ්‍රයයි. ත්‍රිශූලය යනු පද්ම පාද දෙකක් සහිත වජ්‍රයයි. පද්ම පාද දහසක් දක්වා වන වජ්‍රයන් ඇති අතර ඒවා එකිනෙකට වෙනස් වූ අවශ්‍යතා උදෙසා නිර්මාණය කර ඇත. එසේම අප දිවයින සුරකින මහේශාක්‍යය වූ කතරගම ස්කන්ධ කුමාර මහා දෙවියන්ගේ දකුණු පළමුවන අත දරා සිටින්නේද මෙම මහඟු සම්පතක් වූ වජ්‍රායුධය වෙයි. එසේ නම් මෙම වජ්‍රය කොතරම් බලගතු දැයි කොතරම් ශක්ති සම්පන්න දැයි යන්න මෙය දෙවියන් අත දැරීම තුළින් පැහැදිලි වනු ඇත. විශ්වය තුළ සිටින ඕනෑම මිනිසකුට මෙම මහානුභාවසම්පන්න වජ්‍රය භාවිත කර තම ජීවිතය සැපවත් කර ගත හැකි අතර නිරෝගී සම්පත් ලැබ රෝග නිවාරණය තුළින් ප්‍රයෝජන ගත හැකි අතරද බලය, ශක්තිය ලබාගත හැකිය. එනම් එය තම උපන් නැකැතට ග්‍රහ චාරයට අනුව නිවැරැදිව නිර්මාණය කරගත යුතු අතර එයට අදාළ පුද සත්කාර භාවිත කර නිවැරැදි ශක්තිය හා බලය යොදාගෙන එම ශක්තිය විනාශ නොවන ලෙස භාවිත කළ යුතුයි. එසේම මෙය මුලින්ම අත දැරීම නියමිත අයුරින් විශ්ව ශක්තිය ලැබෙන පංචාංග ශුද්ධිය සහිත සුබ නැකැතකට කළ යුතුය.
මව්බිම
