කාන්තා රෝග සඳහා මුල්වන ග්‍රහ පිහිටීම්
කාන්තාව යනු නිවසක්‌ ආලෝකවත් කරන සුපසන් පහනකි. එකී පහන් සිළුවෙන් හාත්පස ආලෝකවත් කරන්නා සේ ගැහැනිය ද බොහෝ ජීවිත එළිය කරන්නීය. සුන්දරත්වය අභිබවා යන නිරෝගී බව කාන්තාවට මහඟු ආභරණයකි. අපේ මුතුන් මිත්තෝ ස්‌ත්‍රිය නිවසේ පහනට සමාන කළේ එම නිසාවෙනි. කුටුම්භය නම් පවුල් ඒකකය තුළ ස්‌ත්‍රී පුරුෂ දෙපක්‍ෂයම නියෝජනය වන අතර යහපත් පවුල් සංස්‌ථාවක්‌ පවත්වා ගෙන යැම උදෙසා නිරෝගීමත් බව අත්‍යවශ්‍යම සාධකයකි. දරුවන් බිහිකරමින් රැකබලා ගැනීමේ කාර්යභාරයේ නියෑළෙන කාන්තාවගේ නිරෝගිමත් භාවයට ප්‍රමුඛස්‌ථානයක්‌ හිමි වේ. නමුදු මේ නිරෝගිමත් භාවයට අභියෝග එල්ල කරන්නා වූ කාන්තාවට ම සුවිශේෂ වන්නා වූ රෝගාබාධයන්ට ඇයට මුහුණ දීමට සිදුවන අවස්‌ථා බොහෝය. දැරියක මල්වර වීමේ අවධියේ සිට පරිණත ගැහැනියක වීමෙන් පසු ජීවිතයෙන් සමුගන්නා තෙක්‌ ම ඇයටම සුවිශේෂ වූ මෙම රෝගයන්ට ගොදුරු වීමේ අවදානමක්‌ ඇත. ස්‌ත්‍රියටම ආවේණික මෙම රෝගයන් හා ඇයගේ ජන්ම පත්‍රයේ ග්‍රහ පිහිටීම් අතර මනා සම්බන්ධතාවක්‌ පෙන්වයි.
මේ සඳහා ස්‌ත්‍රී කේන්ද්‍රයේ භාවයන් 12 අතර 5, 6, 7, 8, 9 යන භාවයන්ට ද රවි, කුජ, රාහු, ශනි යන ග්‍රහයන්ට ද විශේෂ ස්‌ථානයක්‌ හිමි වේ. කාන්තාවකගේ කේන්ද්‍රයේ 07 හා 8 වැනි භාවයන් හි කුජ, ශනි හෝ රවි, කුජ යෝගගතව සිටීම ඇයගේ මාසික ශුද්ධියේ වෙනස්‌වීම් පිළිබඳව ගැටලු ඇති කිරීමට සමත් වෙයි. සාමාන්‍යයෙන් කාන්තාවකට ඔසප් වීම සිදුවන්නේ දින 28 කට වරක්‌ වන අතර ඉහත ග්‍රහ පිහිටීම් ඇති වූ විට නිසි අයුරින් ඔසප්වීම සිදු නොවේ. එසේම ඔසප් වීම සිදුවන කාලය තුළ අධික වේදනාවක්‌ ද ඇති වේ. සාමාන්‍යයෙන් කාන්තාවකගේ ඔසප් චක්‍රය නතර වීම සිදුවන්නේ අවුරුදු 45 - 47 කාල පරාසය තුළය. එහෙත් කුජ ශනි හා රවි කුජ යන ග්‍රහයන් යෝගගතව 07 හා 08 වැනි භාවයේ සිටීමත් එම භාවයන්ට රාහු ග්‍රහයාගේ ග්‍රහ දෘෂ්ටිය වැටීම නිසාත් ඔසප් චක්‍රය නතර වන කාල සීමාව අවුරුදු 49 - 50 දක්‌වා දීර්ඝ වේ. එසේම මෙම ග්‍රහ පිහිටීම යටතේ ඩිම්බකෝෂ ආශ්‍රිත සියුම් ගෙඩි සෑදීමට ද ඉඩ ඇත.
කාන්තාවන්ට ආවේණික රෝග අතර තවත් සුවිශේෂී ස්‌ථානයක්‌ ගනු ලබන්නේ ගර්භාෂය ආශ්‍රිත රෝගයන්ය. ගර්භාෂයේ සියුම් ගෙඩි, ගර්භාෂය පහත්වීම ආදී ගර්භාෂය හා සම්බන්ධ නොයෙකුත් රෝගයන් ඇත. ස්‌ත්‍රී කේන්ද්‍රයේ 5 හා 6 වෙනි භාවයේ රවි, කුජ, රාහු කුජ හෝ කුජ ශනි යෝගගතව සිටීම තුළින් ගර්භාෂ ආශ්‍රිත රෝගයන්ට ගොදුරුවීමට ඇති ඉඩකඩ වැඩිය. මෙහිදී ඉහත ග්‍රහයන්ගේ සතුරු මිතුරු භාවය හා උපන් නැකත අනුවද එම ග්‍රහයාගේ තත්ත්වය අනුව ද ඉහත තත්ත්වය අඩු වැඩි වීමට පුළුවන.
එසේම දරුවන් බිහිකිරීම කාන්තාවට පමණක්‌ම ලැබෙන සුවිශේෂී වරප්‍රසාදයකි. මෙහිදී දරුවන් පිළිසිඳ ගැනීම ප්‍රමාද වීම යනු කාන්තාවකට මුහුණ දීමට සිදුවන තවත් ප්‍රශ්නයකි. දරුවන් පිළිබඳ කේන්ද්‍රයේ 5 වැනි භාවය නියෝජනය කරයි. පස්‌වැනි භාවයේ සිටින ග්‍රහයාත්, 5 වැනිනාධිපති සිටින ස්‌ථානයත් 5 වැන්නට හෙළන ග්‍රහ දෘෂ්ටි මත ද මෙම තත්ත්වය වෙනස්‌ වේ. සාමාන්‍යයෙන් පස්‌වැන්නාධිපති 8, 3, 12, 6 යන භාවයන්හි භාවගත වීම තුළින් පිළිසිඳ ගැනීම තරමක්‌ ප්‍රමාද වේ. එසේම ගුරු, රවි, කුජ යන ග්‍රහයන්ගේ ග්‍රහ දෘෂ්ටි 5 වැන්නට වැටීම තුළින් ද දරු පිළිසිඳ ගැනීම තරමක්‌ ප්‍රමාද වීමට ඉඩ ඇත.
තවද දරුවකු පිළිසිඳ ගත් විට දරුගැබ ආරක්‍ෂාකර ගැනීම ද ස්‌ත්‍රියට මුහුණ දීමට සිදුවන තවත් අභියෝගයකි. සාමාන්‍යයෙන් ගැබට මාස 03 ක් පමණ කාල සීමාව ඇතුළත මේ අවදානම් තත්ත්වය උදා වේ. ගබ්සාවීම් පිළිබඳව 05 වැනි හා 06 වැනි භාවයන්හිද. 9 වැන්නෙන් ද නිරූපණය කරයි. 05 හා 06 වැනි භාවයන්හි රවි කුජ ද, රාහු කුජ ද යෝගගත වීම රාහු ග්‍රහයා නවවැන්නේ භාවගත වී ඇති විටත් කාන්තාව ඒ සම්බන්ධව සැලකිලිමත් විය යුතුය. මෙසේ ස්‌ත්‍රී කේන්ද්‍රයේ ඇයටම ආවේණික විශේෂ රෝගයන් පිළිබඳව ඉඟි පළ කරනු ලබයි.
යම් කාන්තාවක්‌ ජන්ම පත්‍රය පරීක්‍ෂා කිරීමේදී මෙවන් රෝගී තත්ත්වයන් ගැන ජ්‍යෝතිෂවේදියකු මත පළකළහොත් අනිස බියක්‌ ඇති කර ගත යුතු නැත. කළ යුත්තේ ඒ සඳහා පිළියම් යෙදීමයි. මේ සඳහා අවශ්‍ය ශාන්තිකර්ම ද සුළු හෝ රෝගී තත්ත්වයක්‌ පැවතුනහොත් නිසි වේලාවට ප්‍රතිකාර ගැනීම තුළින්ද මේ තත්ත්වයෙන් මිදිය හැක. එසේම උදේ සවස බුදුන් වැඳ නවගුණ ශාන්තිය කියවා නවග්‍රහයන්ට පිං දීමත් ජය පිරිත උදේ හවස සඡ්ජායනා කිරීමත් බොහෝ රෝගවලින් මිදීමට හැකි ක්‍රමයකි. හැක. ඊට අමතරව රෝගීන් සඳහා තමාට හැකි අයුරින් උදව් කිරීමත් ඖෂධ ලබා ගැනීමට හැකි පමණින් උපකාර කිරීමත් තුළින් තමාට ඉදිරියට එන්නා වූ ලෙඩ රෝගවලින් මිදී නිරෝගී ජීවිතයක්‌ ගත කිරීමේ වාසනාව උදාවනු ඇත.
ජ්‍යෝතිෂ්‍යවේදිනී - නිලූකා ලලන්ති "සාරද" ජ්‍යෝතිෂ්‍ය කාර්යාලය මිනුවන්ගොඩඋපුටා ගැනීම දිවයින
