දැක්ක ගමන් ගතිගුණ කියන ක්‍රමය
විවාහය ජීවිතයේ වැදගත්ම සන්ධිස්ථානයකි. මිනිසාගේ දෙවැනි උපත විවාහයයි. ප්‍රේම සබඳතා හා යෝජනා මඟින් විවාහ ගිවිස ගැනීම අද සුලබව දැකිය හැකිය. යහපත් ලක්ෂණ ඇති ස්ත්‍රීන් සරණ පාවාගන්නා පුරුෂයන් මෙන්ම යහපත් ලක්ෂණ ඇති පුරුෂයන් සරණ පාවාගන්නා ස්ත්‍රීන්ද දීර්ඝායුෂ ලබන්නේය. පවුල් ජීවිත යහපත් වන්නේය. ධනය සැපය, දරුපල මෙන්ම සමාජ ගෞරවයටද නිබඳව පාත්‍රවනු ඇත. හඳහනේ ග්‍රහ පිහිටීම හා පොරොන්දම් බලා සුබ නැකැතට විවාහ වන ස්ත්‍රී පුරුෂ දෙපාර්ශ්වයේ දේහ ලක්ෂණ පිළිබඳ ජේ‍යාතිෂානුකූලව විග්‍රහ කිරීම මෙම ලිපියේ මූලිකම අරමුණයි.
කාන්තාවක විසින් විවාහය සඳහා පුරුෂයකු තෝරා ගැනීමේදී මෙන්ම පුරුෂයකු විසින් කාන්තාවක් තෝරා ගැනීමේදී ද හුදු බාහිර ඔපය ගැන පමණක්ම නොව අභ්‍යන්තර ගතිගුණ ගැනද සැලකිලිමත් විය යුතුය. බොහෝ විට ස්ත්‍රී පුරුෂ ශරීර ලක්ෂණ මඟින් ඔහුගේ ඇයගේ අභ්‍යන්තර ගතිගුණ ඉතා ප්‍රබලව පෙන්වයි. ඒ තුළින් අපට එය අවබෝධ කරගත හැකිය. භාවකුතුහලය හා වෙනත් ඉපැරැණි ජේ‍යාතිෂ හා දේහ ලක්ෂණ විද්‍යා පොත් පත් මෙන්ම මුඛ පරම්පරාවෙන් එන විස්තර රාශියකින් මෙය මනාව තේරුම් ගත හැකිය. මුලින්ම අප බෞද්ධ සාහිත්‍යයේ එන ධම්ම පදට්ඨ කතාවේ එන එක් සිද්ධියක් පිළිබඳ අවධානය යොමු කරමු. එහිදී මාගන්දි බැමිණිය බුදු රජාණන් වහන්සේගේ පියවර සලකුණු බලා මෙසේ පවසා ඇත.
රත්තස්සහි උක්කුටිකං පදංභවෙ දුට්ඨස්ස හොති සගසානුපීළිතං මූළස්ස හොති අවකඞඨිතංපදං විවත්තච්ඡද්දසි ද මිදිතං පදංච
"අධික කාමාශාවෙන් පෙළෙන්නකුගේ යටිපතුල මැදින් උස්ව පිහිටියේය. ද්වේෂාධිකයාගේ වහා හැපෙන ස්වභාව ඇත්තේය. මෝඩයාගේ පතුල පසුපසට ඇදෙන්නේය. මෙවැනි පියවර සලකුණක් ඇත්තේ කෙලෙස් නැති අයකුටය
"
ඉහත දැක්වූයේ යම් පුරුෂයකුගේ පියවර සලකුණු බලා ඔහුගේ චරිත ලක්ෂණ දැන ගැනීමට අපේ බණ පොතේ එන උදාහරණයකි.
එසේනම් අපි මුලින්ම ස්ත්‍රී දේහ ලක්ෂණ පිළිබඳ සලකා බලමු :
ස්ත්‍රී ලක්ෂණ පාද මොළොක් පැතලි මස් වැඩුණු රත් පැහැ පාද ඇති ස්ත්‍රිය ගුණ ධර්මයන් වඩන රාජ භාර්යාවක් වන්නේය.
- රළු වියළි පා ඇති ස්ත්‍රිය අවාසනාවන්තියකි.
- පයේ මාපට ඇඟිලි උස්ව පිහිටා තිබෙයි නම් බොහෝ සැප ලබන්නියකි.
- ගමන් කරන කල්හි දූවිලි ඇවිස්සේ නම් අවකල් ක්‍රියාවෙහි යෙදෙන ස්ත්‍රියක්ය.
- පා ඇඟිලි එක පිට නැඟී සිටීම වැන්දඹු ලක්ෂණයකි.
- නිය පා, නියපොතු වටව උස්ව තඹවන් වුවහොත් ඈ බෝග සම්පත් ලබන්නීය.
- පිට පතුල නෙලුම් පෙත්තක පිට පැත්තේ හැඩයට සමානව පිහිටා ඇත්නම් පිනැතිය.
- උඩුපතුල මැද නැවී ඇත්නම් දිළිඳුය.
- පා මැද නහර ගැට ගැසුණේ නම් නිකරුණේ ඇවිදින්නියකි.
- උඩු පතුලේ ලොම් ගැවසුණේ දාසියකි.
- ඇස්වට බෝල යුග්මය සැඟවී නහර අඩුවුවහොත් ඈ පිනැති කාන්තාවකි.
- විළුඹ තඹ වූයේ නම් පිනැතිය. උස්ව පිහිටියේ නම් අසුබය.
- කෙණ්ඩ මස්වැඩි ලොම්නැති සිනිඳු සමින් වැසුණු කෙණ්ඩ ඇති කාන්තාව සැප ලබන්නීය.
- දණහිස මස්වැඩි වට වූ දණහිස් ඇත්තී වාසනාවන්තියකි.
- උකුල උකුල මහත්ව ඉඟටිය සිහින්ව ඇත්තී පින්වන්තියකි.
- වැහැරී නැවී කුඩාව හෝ ලොම් ඇතොත් කණවැන්දුම් වීමේ ලක්ෂණයකි.
- නිතඹ බිම්බාකාරව උස්ව හෝ මස් අධිකව පළල් වුවහොත් කම් සැප ලබන්නීය.
- ලෙළෙන නිතඹ ඇත්තී කාමාධිකය.
- උරහිස නැවුණු උරහිස පුතුන් ඇති ලක්ෂණයකි. කෙටි වුවහොත් සැප ඇත්තියකි. මස් වැඩුණොත් ඉතා කාමාධිකය. මස් රහිත වූයේ නම් වැන්දඹු වෙයි. සමව උරහිස් ඇත්තී පින්වන්තය.
- අත් අතේ මහපට ඇඟිල්ල පියුම් කැකුළක් බඳු වූයේ හා පිරිසුදු හා පැහැදිලි රේඛා අත්ලේ පිහිටියේ නම් ඇය පිනැත්තියකි.
- අත්ල පියුමක් මෙන් මොළොක් වූයේ නම් සැප ලබන්නියකි. කොඩි කුඩ මත්ස්‍ය ස්වස්තික දුනු ආකාර ලක්ෂණවලින් එකක් යම් කාන්තාවකගේ අත්ලේ පිහිටියේ නම් ඈ සැප ලබන්නියකි. චක්‍ර යුධායුද ජය සංකේත යන ලක්ෂණවලින් එකක් පිහිටියේ නම් ඇය කිසි ලෙසකින් දුක් නොවිඳින භාග්‍යවන්ත කාන්තාවකි.
- රෝම ගැවසුණු හා වළගැසුණු පිට අල්ල ඇති කාන්තාව ස්වාමියාට අපල වෙයි.
- නහර ඉලිප්පී ලොම් ගැවසුණු පිටි අල්ල ඇති ස්ත්‍රිය චිත්ත සන්තාපයෙන් කල් ගෙවන්නියකි.
- මහපට ඇඟිල්ල මුල සිට සුළැඟිල්ල දක්වා අල්ලේ රේඛා වැටී ඇති නම් ඇය ස්වාමියා නසන්නීය.
- පැතලි වැහැරී හැකිළුණු ඇඟිලි පුරුක් බිය රෝග ඇති කරයි.
- වකුටු වූ හෝ රළු වූ නියපොතුද රෝග බිය ඇති කරන අතර නියපොතුවල සුදු බින්දු වැටීම අධික කාමාශාව ඇති බවෙහි ලක්ෂණයකි.
- බෙල්ල වට වූ පිරුණු දිග් වූ බෙල්ල ඇති ස්ත්‍රිය ස්වාමියාට සැප ගෙන දෙයි.
- බෙල්ල කෙටි වීම ස්වාමියාට සැප අඩු කරයි.
- බෙල්ලේ රේඛා 3ක් පෙනේ නම් එය ඉතා සුබ ලක්ෂණයක් වෙයි.
- බෙල්ල පැතලි නම් ස්වාමි සැප අඩුය.
- කම්මුල මස් ඇති පිරුණු සිනා පිරි කම්මුල ඇත්තී වාසනාවන්තියකි.
- මස් අඩු රළු වකුටු කම්මුල ඇත්තී දුක් ලබන කාන්තාවකි.
- සිනාසෙන විට මැදි වළ ගැසුණු කම්මුල් ඇති කාන්තාව නිතර ප්‍රීතියෙන් සිටින්නීය.
- තොල් යටි තොල වටව සිනිඳුව බඳු වදමල් මෙන් පැහැපත්ව තිබේ නම් උතුමන් ප්‍රිය කරන කාන්තාවකි.
- රළුව එල්ලා වැටෙන මස් රහිත කළු වූ යටි තොල ඇති කාන්තාව ස්වාමි සැපය අඩු කරයි.
- දත් සමව කුඩාව කිරිවන් පැහැ දත් දෙතිස ඇත්තී පින්වත් කාන්තාවකි.
- කසාවන් හෝ කළුව මහත්ව පළල්ව සක් කැබලි වැනි දත් පිහිටියේ නම් පින් අඩු කාන්තාවකි.
- යටි ඇන්දේ දත් වැඩි කාන්තාව මවගෙන් වෙන්වෙයි.
- විකෘති ආකාර දත් ඇති කාන්තාව වැන්දඹු වෙයි.
- නාසය කුඩා සිදුරු ඇති සම වට වූ පටු නාසය ඇති ඇත්තී පින්වන්තය.
- අගින් වක් වූ නාසය ඇත්තී වැන්දඹු වේ.
- පැතැලි නාසය ඇත්තී දාසියකි.
- එල්බෙන නාසය ඇතිනම් ඇය කලහා ප්‍රියකරයි.
- ඇස් මුවන්ගේ ඇස් වැනි ඇස් ඇති නම් පින්වන්තය.
- බළල්, මී, කොබෙයි යන සතුන්ගේ ඇස් වැනි ඇස් ඇති නම් ඇය නපුරුය.
- දකුණු ඇස වපර වූයේ නම් වැන්දඹු වෙයි.
- වම් ඇස වපර වූයේ නම් පරපුරුෂයන් සොයයි.
- බිඟුවන් ඇස් ඇත්තී ස්වාමියා ධනවත් කරයි.
- කළු පැහැ ගන සැහැල්ලු ඇසිපිය ඇත්තී හිමියාට ප්‍රියවනසුලුය.
- නිතර ඇසිපිය ගසන්නේ මානය වැඩි ගුණ හීන කාන්තාවන්ය.
- නීලවර්ණ මොළොක් ඇස්බැම ඇත්තී වාසනාවන්තය.
- ඇස් බැම දෙක හාවී නම් නිතර දුක් ලබන කාන්තාවකි.
- කන් කන් දෙක එල්ලෙන ස්වභාව ඇත්නම් ඉතා යහපත්ය.
- නළල නළල් තලය උස්ව මොළොක්ව අඟල් 3ක ප්‍රමාණවත්ව අඩ සදාකාරව ඇතිනම් වාසනාවන්තය.
- කොණ්ඩය කෙස් වැටිය ඇතකුගේ කුම්භස්තලය වැනි වූයේ නම් පුණ්‍ය ලක්ෂණයකි.
- මී මැසි පෙළක් මෙන් පැහැතිව අගින් නැවුණු සිහින්ව කෙස් ඇති වූයේ නම් එයද පුණ්‍ය ලක්ෂණයකි.
- ගන වූ රළු වූ හිස කෙස් ඇති නම් දුක් විඳින කාන්තාවකි.
- ලප කැළැල් නළල මැද හෝ බැම දෙක අතර මැස්සකු වැනි ලපයක් ඇතිනම් හිමියාගේ සහකරුගේ හා මෙහෙකරුවන්ගේ සැප ලබන කාන්තාවකි.
- කම්මුල් මැද ලපය රතු නම් මහ පින් ඇත්තියකි.
- පියවුරු දෙක අතර රතු ලපයක් ඇති නම් අවට ලෝකයාගේ ආදරය දිනාගනිමින් රජ සැප ලබන කාන්තාවකි.
- නාසයේ අග රතු ලපයක් ඇතොත් ඕ තොමෝ ධනවන්තියකි. එය කළු වුවහොත් පරපුරුෂයන් කරා යයි.
- නාභියෙන් පහත ලප කැළලක් ඇතොත් ඈ පින්වන්තයි.
- නළලේ ත්‍රිශූල ලක්ෂණයක් ඇතොත් ඈ සේනාධිපතිනියක් වන්නීය.
පුරුෂ ලක්ෂණ මේ ආකාරයටම පුරුෂ ලක්‍ෂණද ඇත. ගමන් විලාසය අනුවද ශරීර ලක්ෂණ විවිධ වෙයි. එම නිසා ආවේණික ලක්ෂණ හා ආරූඪ කරගත් ලක්‍ෂණද ඇති නිසා ඒවා වෙන වෙනම හඳුනාගත යුතුයි.
- යමකුගේ ශරීරයේ බමරුන් මෙන් කළු පැහැති සිනිඳු රෝම තිබේ නම් උත්තම පුරුෂ ලක්ෂණයකි. එසේම යම් පුරුෂයකුගේ පපුවේ රෝම තිබීම සත් පුරුෂ ලක්ෂණයක් වන අතර රෝම නොමැති වීම අසත්පුරුෂ ලක්ෂණයකි.
- නහය අගින් නැවුණේ නම් මෝඩයෙකි.
- නිතර ඇසිපිල්ලම් ගසන්නේ නම් චංචල සිත් ඇති කපටියෙකි.
- කතා කරන විට හිස කසන්නේ නම් එය කපටිකහෙි ලක්ෂණයකි.
- මසින් හීන වූ කම්මුල් ඇත්තා අවාසනාවන්තයෙකි.
- රෝස පාට තොල් ඇත්තා බුද්ධිමතෙකි.
- විසම තොල් ඇත්තා බියගුල්ලෙකි.
- මැදින් එබී ගිය නාසය ඇත්තා මෝඩයෙකි.
- වක් හැඩය ගත් කුඩා නාසය ඇත්තා ගුණවන්තයෙකි.
එක් එක් පුද්ගලයාට ආවේණික වූ ගමන් විලාසද ඇත්තේය.
- බිම බලාගෙන ගමන් කරන්නා කල්පනාකාරයෙකි. හිතුවක්කාර අදහස් ඔහු සතුව ඇත.
- අභිමානවත් ලෙස ඍජුව ගමන් කරන පුරුෂයා යුක්තිගරුක මෙන්ම නීතිගරුක පුද්ගලයෙකි. කරන දේ හරියට කිරීම ඔහුගේ කැපී පෙනෙන ලක්ෂණයකි.
- අතේ ඇඟිලි නවාගෙන වටපිට බලමින් ගමන් කරන්නා දෙගිඩියාවෙන් කාලය ගෙවන්නෙකි.
- ඇඟිලි තදින් මිට මොළවාගෙන යන්නා ස්ථිර අධිෂ්ඨානය අති ධෛර්යවන්තයෙකි. ඔවුන්ට තමාගේ සිත පාලනය කර ගැනීම අපහසුය.
- අතක් වනමින් පිටුපස බලමින් ගමන් කරන්නා උපක්‍රමයෙන් ධනය උපයන්නෙකි.
- නිතර පස්ස බලමින් ගමන් කරන්නා හිතේ සැකයක් ඇත්තෙකි.
- පණ නැති අයකු මෙන් අත් දෙක දෙපසින් එල්ලාගෙන වාගේ ගමන් කරන්නා දැඩි ගොරෝසු සිත් ඇත්තෙකි.
- පිටිපසට අත් බැඳගෙන යන්නා ඕනෑවටත් වඩා පරෙස්සම් වන්නෙකි.
- පියවර මනිමින් අලස ස්වභාවයෙන් ගමන් කරන්නා ආත්මශක්තිය හීන අයෙකි.
- ප්‍රමාණවත් ලෙස අත් තබාගෙන අඩි ඔසවමින් ගමන් කරන්නා ඍජු අවංක පුද්ගලයෙකි.
- සාක්කුවේ අත් දමාගෙන යන්නා තම අදහස් සඟවා ගත්තෙකි.
මේ ආකාරයට ස්ත්‍රී, පුරුෂ ලක්ෂණ රාශියක් අපට දැක්විය හැකිය.
උපුටා ගැනීම මව්බිම
