ලග්නය සිංහ නම් ඔබ...

රවි හිමි සිංහ ලග්නයෙන් උපන් අය ඉතා උසස් ආත්ම ශක්තියකින් යුත් දියුණු වීමේ ආශාව ඇති එඩිතර ගති ඇති අයෙක් කීවොත් ඉතාම නිවැරැදියි. ඒ වගේම සිංහ ලග්න හිමියන් හදිසියේ හරි විපතකට කරදරයකට පත් වුවත් ඔවුන්ගේ චිත්ත ධෛර්යය නිසාම ඉතා ඉක්මනින් නැවත නැඟී සිටිනවා. තමන්ගේ ආත්ම විශ්වාසය නිසාම ඕනෑම භාරදූර එමෙන්ම බැරෑරුම් කටයුත්තක් වුණත් නොපැකිළ භාරගන්නවා. ඒ වගේමයි තමන්ගේ ආත්මාභිමානය නිසා ඕනෑම තැනක ප්‍රධාන තැන බලාපොරොත්තු වෙනවා වගේම භාරගන්නා ඕනෑම කටයුත්තක් නොපිරිහෙළා ඉටුකරනවා. භාරගත්ත වැඩක් අවසානය දක්වාම කරගෙන යන ස්වභාවයක්ද සිංහ ලග්න හිමියන්ට තියෙනවා. සිහිකල්පනාවෙන් යුක්තව ක්‍රමානුකූලව කටයුතු කරන නිසා නිතරම ජීවිතය ජය ගන්නා අයෙක් හැටියට ඉතාම ප්‍රසිද්ධියටත් පත්වෙනවා. කෙනෙකුට වරදක් කරන්නේ ඉතාම කලාතුරකින්. හැබැයි තමන්ට කොපමණ නැති වුවත් අන් අයගෙන් ඉල්ලන්නේ නම් නැහැ. ඒ වගේම තමා රාජපාක්‍ෂික භාවය ඉතාම උසස් කොට සලකන අයෙක්. නීතිය සම්බන්ධයෙන් ඉතාම ඉහළ ගෞරවයක් තිබෙනවා වගේම කිසිදිනෙක නීතිය කඩ කරන්නෙක්ද නොවෙයි. අන් අයව විවේචනය කළත් අනුන්ගේ විවේචන ඉවසීම ඉතා අසීරුයි. ඒ වගේමයි වැඩිහිටියෙක් හෝ දැනමුතුකම් ඇත්තෙක් හෝ වේවා තමාගේ වත්තම පවුලේ අයගේවත් වරදක් පෙන්වනවාට අකැමැතියි. අන් අයගේ ගරු බුහුමනට නිතරම පාත්‍ර වෙන අයෙක්. නමුත් හරි හෝ වැරැදි හෝ වේවා තමාගේම අදහස් ඉස්මතු කිරීමට පෙලඹෙනවා. ඕනෑම කටයුත්තකදි අවසන් තීරණය තීන්දු කිරීමට ඇති ආශාව තමයි සිංහ ලග්න හිමියන්ගේ දුර්වලකම. ඒ වගේම යන එන ඕනෑම තැනක නායකත්වය නිතැතින්ම හිමි වන අතර එසේ නායකත්වය ලැබීමට ආශාවක්ද දක්වනවා.

උපුටා ගැනීම මව්බිම