ඔබේ ඇස්‌ කියන රහස්‌
කෙනෙක්‌ දුටු පමණින් ඔහු හෝ ඇය පිළිබඳව අවබෝධයක්‌ ලබාගත හැකිනම් කොතරම් අගනේද. එසේනම් බුද්ධිමත් ලෙස එම තැනැත්තා සමග කටයුතු කිරීමට පහසු වනු ඇත. කෙනෙකු බැලූ පමණින්ම අපේ නෙත ගැටෙන අංග ලක්‍ෂණයක්‌ වන දෙනෙත් දේහ ලක්‍ෂණ විද්‍යාවේදී ප්‍රමුඛ තැනක්‌ ගනී. ඇස්‌වල වර්ණය හා පිහිටීම අනුව ඔවුන්ගේ ගතිගුණ හා චරිත ලක්‍ෂණ පැවසීමට අපේ පැරැණි සෘෂිවරු සමත් වූහ.
- පියකරු පෙනුමකින් යුත් නිල් පැහැයෙන් බබලන කාන්තිමත් නෙත් යුගළක්‌ හිමි කාන්තාව සැබෑම වාසනාවන්තියකි. විවාහ දිවියේද බොහෝ සැප සම්පත් විඳින ඇය සැමියාගේ ආදරය කරුණාවද නොමදව ලබන්නීය. දිගුකාලයක්‌ ජීවත් වීමේ වාසනාවද ඇයට හිමිය.
- ඇස්‌ යුගළේ කෙලවර රත් පැහැයෙන් යුක්‌තව කළු ඉංගිරියාව තද කළු පැහැයෙන් යුතු ඇස්‌ පිහාටු සමානව දෙපසේම පිහිටා ඇති කාන්තාවෝද වාසනාවන්තියෝය.
- මුවැත්තියකගේ මෙන් ඇස්‌ ඇත්තී දඟකාරය. කෙලිලොල් බවක්‌ පෙන්වන්නීය. නමුත් විශ්වාසයක්‌ තැබිය හැකි නොවේ. අන් අය අතරදී තමන් පිළිබඳව වර්ණනා කිරීමට පෙළඹේ. මුදල් උපයා ගැනීමට වඩා මුදල් වියදම් කිරීමට දක්‍ෂය.
- යම් කාන්තාවකගේ ඇස්‌ ගිලීගිය ස්‌වභාවයක්‌ පෙන්නුම් කෙරේ නම් රත් පැහැය හුරුවේ නම් ඇගේ දුෂ්ට ගතිගුණ හෙළිවෙයි. තමන් ගැනම පමණක්‌ සිතන ඔවුන් අන්‍යයන්ට උදව් උපකාර කිරීමට අකමැතිය. තම සැමියාගේ දෙමාපියන්ට හා වැඩිහිටියන්ටද සැලකීමට අකමැති ඇය හැමවිටම කෝපාවිෂ්ඨ වී සිටින බවක්‌ පෙන්වයි.
- කළු ඉංගිරියාවන් සමග සුදු පැහැය ගත් ඇස්‌ පිහිටන්නේ වහා වෙනස්‌වන අදහස්‌ ඇති නුවණින් අඩු ස්‌ත්‍රීන්ටය.
- ඉදිරියට නෙරන ලද ඇස්‌ ඇත්තී වැන්දඹුවේ.
- තද නිල් වර්ණයෙන් යුත් ඇස්‌ පිහිටන අය කඩිසර ලෙස වැඩෙහි යෙදෙන තමන්ගේ යුතුකම් නොපිරිහෙලා ඉටු කරන්නෝය.
- දුඹුරු වර්ණයෙන් යුතු ඇස්‌ ඇති අය ලාමක අදහස්‌වලින් යුක්‌ත වන අතර සිත් ඇද ගන්නා ගුප්ත දේවල් ගැන උනන්දුවක්‌ දක්‌වන්නෝ වෙති.
- කාම අපරාධවලට මුල්වන අයගේ ඇස්‌ කහ වර්ණයෙන් යුක්‌තය. එමෙන්ම ඔවුහු රාගාධික බවක්‌ද පෙන්වයි.
- අඳුරු වූ නිල්පාට කළු ඉංගිරියාව ඇති ඇස්‌ ඇතිවීමෙන් සහ ඇසිපිය රෝම නැතිවීමෙන් ධන විනාශය පෙන්නුම් කෙරේ.
- කෙලින් බලා සිටීමට තරම් අපහසු තියුණු ඇස්‌ ඇති කාන්තාවට නිර්භීත එමෙන්ම එඩිතර චරිතයක්‌ සතුවෙයි. තම පරම්පරාව හා සැමියා කෙරෙහිද අප්‍රමාණ වූ ගෞරවයකින් හා බැඳීමකින් ජීවත් වෙයි. කිසිදා වරදෙහි නොබැඳේ.
- දික්‌වූ රත් පැහැයෙන් යුක්‌ත දෙනෙත් ඇති ස්‌ත්‍රිය දුෂ්චරිත ක්‍රියාවන්හි යෙදෙන අතර නපුරු ගතිගුණවලින් යුක්‌තය.
- සාමාන්‍යයෙන් පිටතට නෙරා ගිය ඇස්‌ ඇති කාන්තාව වටපිටාවේ අවබෝධය යම් යම් දේවල් පිළිබඳ අවබෝධයක්‌ ඇතිකර ගැනීමට උනන්දුවක්‌ දක්‌වයි.
- පහතට එල්ලෙන්නාක්‌මෙන් පවතින ඇස්‌ ඇති අය අන් අයගේ ඕපාදූප කියාපාමින් තමන් නිවැරැදි බව පවසන රහස්‌ ප්‍රතිපත්ති ඇති අය වෙති.
- දකුණු ඇස අන්ධ වූ ස්‌ත්‍රිය බොහෝ දරුවන් ලබන්නීය.
- වම් ඇස අන්ධ වූ ස්‌ත්‍රිය තම පුරුෂයා අතහැර පර පුරුෂයන් කරා යැමට පෙළඹේ.
- මීවන් පිඟු ඇස්‌ ඇති කාන්තාව සදාකල්හිම ධනයෙන් ආඪ්‍යව වෙසෙන්නීය. ඇය තම දරු මුණුපුරන්ගෙන් මෙන්ම තම පුරුෂයාගෙන්ද පැසසුම් ලබමින් දිගු කාලයක්‌ ජීවත් වන්නීය.
- නීල වර්ණ ඇස්‌ ඇති අය ශක්‌තිමත් පෞරුෂත්වයක්‌ ඇති අයවන අතර ඔවුහු හුදෙකලා ජීවිතයට වැඩි කැමැත්තක්‌ දක්‌වති.
- ලා නිල්පාට ඇස්‌ ඇති අයට ඇත්තේ නිතර වෙනස්‌වන අදහස්‌ ඇති චරිතයකි.
- වටකුරු ඇස්‌ ඇත්තේ නම් ඇය ඇසුරු කරන්නන්ගේ සිත් දිනා ගන්නා අතර තමන්ගේ කටයුතු කපටි කමින් කර ගැනීමට දක්‍ෂ අයවෙති.
- රක්‌තවර්ණ ඇස්‌ ඇති කතුන් කාමාධිකය.
- නෙළුම් පොහොට්‌ටුවක මෙන් හැඩයගත් දෙනෙත හිමි කතුන්ද වාසනාවන්තය. ධනයෙන් හා බලයෙන් හා සැපයෙන් අඩු නොවේ.
- බළල් ඇස්‌ ඇති කාන්තාවන්ද නිහඬවම වැරදි කරති. එහෙත් තීක්‍ෂණ හා සූක්‍ෂම ඥනයක්‌ ඇති අය වෙති.
- සිහින් වූ දිගටි කාන්තිමත් දැසක්‌ හිමි කාන්තාවෝ ආගමික කටයුතුවලට ලැදි පිවිතුරු අදහස්‌ ඇති අය වෙති.
- යම් අයෙකුට මහනෙල් පෙති ආකාර වූ කෙලවර වපර ගතියට හුරු ඇස්‌ ඇත්තේ නම් හේ සියලු ඓශ්චර්යයෙන් පිරුන අයෙක්‌ වෙයි.
- වපර වූ ඇස්‌ ඇත්තේ නම් වංක ගතියෙන් යුක්‌තය.
- කහපාටට හුරු ඇස්‌ පිහිටන්නේ පාපිෂ්ඨ අදහස්‌ ඇති අයටය.
- ඇසිපිය රෝම නැතිවීමෙන් ධන විනාශය පෙන්නුම් කරන අතර නිදිබර දැසක්‌ හිමි අය බොහෝ විට කාමුකය.
ඇස්‌වලට සමීපව පිහිටන උපන් ලප මගින්ද කෙනෙකුගේ ජීවන තොරතුරු බොහෝ දුරට පෙන්නුම් කරයි.
- දකුණු ඇස්‌ බැමෙහි උඩ උපන් ලපයක්‌ පිහිටි කාන්තාවන්ද ඉතා වාසනාවන්තය. ඔවුන්ගේ සිතුම් පැතුම් බොහෝ දුරට ඉටුවන අතර සැප සම්පත් ලැබීමේ භාග්‍යයද ලබන්නෝ වෙති.
- වම් ඇහිබැම උඩ උපන් ලප පිහිටියේ නම් මධ්‍යම වයසේදී නොයෙකුත් කරදරවලට පැටලෙන අතර රෝග පීඩාදියටද ලක්‌වනු ඇත.
- දකුණු ඇසේ පිහාටුව උඩ ලප පිහිටීමෙන් පෙන්නුම් කරන්නේ ඔවුනට මුදල් ලැබීම අතින් ඉතා යහපත් බවයි. නමුත් ඔවුන් අන් අයගේ රැවටිලිවලට හසුවන අතර සමාජයෙන් නින්දා අපකීර්තියටද පත්වෙනු ඇත.
- වම් ඇසේ කෙලවර උපන් ලපය විවාහ ජීවිතයේ කරදරකාරීබව ප්‍රකට කරයි. ඉතා තුනී වූද, නිල් පැහැයෙන් යුතු වූද, දේදුනු ආකාර වූද දෙනෙත් ඇති ස්‌ත්‍රිය රාගාධිකවෙයි.
- පිඟුවන් වූද මහත් වූද, සෘජු වූද, අක්‍ෂි යුග්මය සහ තුනීවූ ලෝමවලින් යුත් දෙබැමද පිහිටියේ නම් ඇය ඉතා අශිෂ්ටය.
- කුඩා නෙත් ඇති අය කපටි බවින් යුතු වන අතර උකුස්‌සන් හා කුකුලන්ගේ ඇස්‌වලට සමාන ඇස්‌ ඇත්තේ නම් ඔවුන් කෲර ගති ලක්‍ෂණවලින් යුතු අන් අයගේ දේ උදුරා ගැනීමට තැන් කරන්නෝ වෙති.
- තරමක්‌ විශාල ඇස්‌ ඇති අය උගත්කමින් මෙන්ම කඩිසර කමින්ද යුතු වෙයි. බොහෝ විට පෙම් සබඳතා අඩු ඔවුන් නොයෙකුත් ශිල්ප හැදැරීමට දක්‍ෂයෝ වෙති.
හිඹුටානේ - පියතිලක ද අල්විස්‌උපුටා ගැනීම දිවයින
