කටක ලග්නයෙන් උපන් කාන්තාවන් ගැනයි මේ
මේෂ, වෘෂභ, මිථුන ලග්න කාන්තාවන් මෙන්ම කටක ලග්න කාන්තාවන් ද ලග්නය කටක වුවත් නවාංශක අනුව තුන්දෙනෙක්‌ ගත්තොත් ක්‍රියාකාරීත්වය තුන් ආකාරයට වේ. ඒ අනුව ඔවුන් ආශ්‍රය කරන කොට ඇතිවෙන ගැටලු ද ඒ ඒ නවාංශක අනුව සිදුවන බව ඔබට පැහැදිලි වේ. එසේම ලෝකයේ ශ්‍රේෂ්ඨතම පුද්ගලයන් කටක ලග්නයෙන් ඉපදී ඇති බවට අටුවා ටීකා අවශ්‍ය නැහැ. බුදුපියාණන් වහන්සේගේ කේන්ද්‍රයෙන්ම ඒ බව මනාව පැහැදිලි වෙනවා. මගේ පියා සර්වඥ කේන්ද්‍රය පිළිබඳ කියා දෙන විට කට පාඩම් කරවපු කවියක්‌ අදටත් මට මතකයට නැගෙන්නේ මෙසේය.
වෙසඟ මඟුල් දින පසළොස්‌ කටකගුරු නිසඟ සොමි සිකුරු අජ රැස පළඟහිරු සසඟ තුල මුවර කුජ කුම්භ සෙන සුරුමෙලෙස උපති සත දෙත දෙන තිලෝ ගුරු
මේ අනුව ඔබට පැහැදිලි වෙනවා ලෝකයේ ශ්‍රේෂ්ඨ පුද්ගලයන් කටක ලග්නයෙන් උපන් බව. එය එසේ තිබියදී අපි අද කටක ලග්න කාන්තාවන් පිළිබඳ විග්‍රහයට යමු. වර්තමාන සමාජයේ අනේක විධ ප්‍රශ්නයන්ට මුහුණ දී සිටින කටක ලග්න කාන්තාවන්ට ඉහත විග්‍රහය ප්‍රශ්නයක්‌ වීමට ද පුළුවන. ඇයි අපි කටක ලග්නයෙන් ඉපදී මේ කියන ශ්‍රේෂ්ඨත්වය අපිට නැත්තේ ඇයිද? කියා. බුද්ධිමත් කාන්තාවනි. ජ්‍යෝතිෂයට අනුව ලග්නය නවාංශකය පමණක්‌ කටක වීමෙන් පමණක්‌ එය සිදුවන්නේ නැහැ. ග්‍රහයන් සිටින නැකත්භාව සහ යෝග අනුවයි ඔබට එහි ඵල අපල භුක්‌ති විඳිය හැක්‌කේ. මේ අනුව කටක ලග්නයේ කටක නවාංශකයෙන් උපන් කාන්තාවන්ගේ විවාහක ස්‌ථානය අධිපති සෙනසුරු මාරකස්‌ථානාධිපතියා වී විසිදෙවන දෙර්කාණාධිපතියන්ද වේ. එසේම මෙවැනි අවස්‌ථාවක සෙනසුරු සමඟ සිකුරු සම්බන්ධකම් පැවැත්වීමෙන් මෙවැනි කාන්තාවන්ගේ විවාහ ජීවිතය නීරස තත්ත්වයට පත්වීම විවාහ නොවීම කඩාකප්පල්වීම ආදියට හේතු වෙයි. ලෞකික ජීවිතයට එය එසේ වුවත් ලෝකෝත්තර ජීවිතයට එම ග්‍රහ තත්ත්වය බෙහෙවින් උපකාරී වේ. විශේෂයෙන් කටක ලග්නයේ කටක නවාංශකයෙන් උපන් කාන්තාවන්ට සෙනසුරු, බුධ, සිකුරු යන ග්‍රහයන් බාධක ග්‍රහයන් ලෙස මතක තබා ගත යුතුයි. එසේම සුබ ඵල දෙන ග්‍රහයන් වන්නේ ගුරු සහ අඟහරු යන ග්‍රහයන් දෙදෙනායි. ඒ අනුව විශේෂයෙන් කටක ලග්නයේ කටක නවාංශකයෙන් උපන් කාන්තාවන්ට සෙනසුරු බුධ සිකුරු යන ග්‍රහයන් බාධක ග්‍රහයන් ලෙස මතක තබා ගත යුතුයි. එසේම සුබඵල දෙන ග්‍රහයන් වන්නේ ගුරු සහ අඟහරු යන ග්‍රහයන් දෙදෙනායි. ඒ අනුව මේ ග්‍රහයන් දෙදෙනා යෝගකාරක වීම හෝ පූර්ණ දෘෂ්ඨිගතවීම හේතු කරගෙන එබඳු කාන්තාවන් වාසනාවන්ත සෞභාග්‍යවත් කාන්තාවන් බවට පත්වේ.
තවදුරටත් විග්‍රහ කළොත් කටක ලග්නයේ කටක නවාංශකයේ ඉපදීම භාග්‍යයක්‌ කොට සැලකුවත් 7 වැන්නේ සෙනසුරු සිටියේ නම් එවැනි කාන්තාවන්ට විවාහ කීපයකට මඟ පෑදෙන අතර කුලයෙන් ආගමෙන් වෙනස්‌ අය සමඟ විවාහ වීමට ද විවාහ කඩාකප්පල් වීමට ද සිදුවන නිසා සමාජය තුළ ඔබේ ශ්‍රේෂ්ඨත්වයට කැළලක්‌ විය හැකි බව මතකයේ තබා ගන්න. සෙනසුරු සිටින්නේ 4 රේ නම් ඔබට ශාරීරික වශයෙන් දුර්වල රෝග වලට මුහුණ දීමට සිදුවනවා මෙන්ම නොපෙනෙන බලවේග නිසා කරදරවලට පත්වේ. අධ්‍යාපනයට රැකි රක්‍ෂාවලට, දරුඵලවලට, සෙනසුරු ප්‍රමුඛස්‌ථානයේ සිටීමෙන් බාධා ඇති වේ. මේ කාන්තාවන්ට සෙනසුරු හෝරාව සෙනසුරාදා දිනය අසුබ වන අතර, ගුරු සිකුරු දින හෝරා සුබ පල දෙන දින හෝරා වශයෙන් දැක්‌විය හැකියි.
මීළඟට කටක ලග්න මීන මකර නවාංශක ලත් කාන්තාවන් පිළිබඳ විග්‍රහ කොට බලමු :
මේ නවංශකයන්ගෙන් උපන් කාන්තාවන්ට බුධ සහ ශනි සුබඵල දෙන අතර සිකුරු අසුබ ඵල උදා කිරීමට හේතු වෙයි. විශේෂයෙන් මේ කාන්තාවන්ගේ සිකුරු 7 වැන්නේ සිටීමෙන් හා හත්වැන්නට අසුබ දෘෂ්ටි වැටීම හේතු කොට ගෙන මේ කාන්තාවන්ගේ විවාහ ජීවිතයට ආදර සම්බන්ධතාවට දැඩි සේ බාධක ඇති වන බව ද විවාහ අවුල් වී යන බව ද දත යුතුයි. එසේම සිකුරු දශා අනු දසා කාලවලදී ග්‍රහයාගේ තත්ත්වයට අනුව රැකි රක්‍ෂා පවා අහිමි වී යයි. සමාජ අපවාදවලට ලක්‌වීම ලෙඩ රෝගවලට ගොදුරුවීම මේ කාන්තාවන්ට සිදුවන නිසා එබඳු කාන්තාවන් ඒ බව අවබෝධ කර ගැනීම වැදගත් වේ. සෙනසුරු මේ කාන්තාවන්ගේ කර්මස්‌ථානයේ හෝ අයස්‌ථානයේ සිටී නම් එබඳු අවස්‌ථාවල ගුරු කුජගේ පූර්ණ දෘෂ්ටීන්වලට ලක්‌ වන්නේ ද එබඳු කාන්තාවන්ට සුබපල උදාවන බව මාගේ අත්දැකීමයි. එපමණක්‌ නොව එබඳු අවස්‌ථාවල රවිගේ දෘෂ්ටියට ලක්‌ වන්නේ ද එය ද සුබ පල දීමට හේතු වේ. මේ කාන්තාවන් සෙනසුරුගෙන් හානියක්‌ නොවන නිසා සිකුරුගේ දෘෂ්ටිය නොලද සෙනසුරුගෙන් වාසනාව උදාකර ගැනීමට හැකියාව ඇත.
මීළඟට කටක ලග්නයේ වෘශ්චික නවාංශකයෙන් උපන් කාන්තාවන් පිළිබඳව විමසා බලමු :
මෙම කාන්තාවන් සුන්දරවත් පිරිපුන් මුහුණක්‌ ඇති ක්‍රේල් කේෂ කලාපයක්‌ ඇති, දැඩි පෞරුෂයකින් යුක්‌ත ඉක්‌මන් කේන්තිකාර ප්‍රභූ කාන්තාවන් ලෙස පෙනී සිටින්නියන් ය. විශේෂයෙන් වෘශ්චික නවාංශක කාන්තාවන්ට සෙනසුරු 10, 11 සිටීම ඉතාමත් වාසනාවන්ත පිහිටීමකි. එම වාසනාවන්ත භාවය තවදුරටත් ප්‍රභල වෙනවා. කුජ, ගුරු, රවි යන ග්‍රහයන්ගේ දෘෂ්ටිගත වීමෙන් මේ ග්‍රහ තතත්වයන් නිසා ඒ අනුව මේ කාන්තාවන් සමාජයේ ගරු නම්බු ලැබීමට වාසනාවන්ත වන්නා සේම හදිසි ධන යෝග ද උදාකර ගැනීමට වාසනාවන්ත වෙයි. යාන වාහන ඉඩකඩම් දැසි දසුන් ඇතුළු ජීවිතය ගෙන යැමට හැකියාවක්‌ මොවුන්ට ඇත. මේ කාන්තාවන්ට සෙනසුරු 7 සිටියා කියා කිසිම විවාහ බාධාවක්‌ ඇති නොවෙයි. නමුත් මේ කාන්තාවන්ට බුධ ග්‍රහයා සියලු අපල ඇති කරයි. ඒ අනුව බුධ හතේ සිටියොත් විවාහයට බාධා ඇති කරයි. විවාහ ප්‍රමාද කරයි. කඩාකප්පල් කරයි. විනාශ කරයි. මේ කරුණු කාරණා අවබෝධ කර ගෙන ඔබ ඔබේ ආදර සම්බන්ධතා මිත්‍ර සමාගම් පවත්වාගෙන ඉදිරි ජීවිතය සරු සාරවත් කර ගන්න. ඔබට ජය හා සතුට.
ප්‍රවීණ ජ්‍යෝතිෂවේදී
මුදියන්සේ නැමිඇල්ල
උපුටා ගැනීම දිවයින
