මිථුන ලග්නයෙන් උපන් කාන්තාවන්ට පමණයි
ජ්‍යෝතීෂ්‍ය විද්‍යාවට අනුව රාශි චක්‍රයේ අංශක 60 සිට අංශක 90 දක්‌වා දිස්‌වෙන 3 වැනි රාශිය මිථුන රාශියයි. ඔබත් මිථුන රාශියෙන් උපන් බිරිඳක්‌, පෙම්වතියක්‌, හිතවතියක්‌, කාන්තාවක්‌ද එසේ නම් මේ නවාංශකවලට අනුව ඔබේ ජීවිතය සරුසාරවත් කර ගැනීමට මේ කරුණු කෙතෙක්‌ දුරට උපයෝගී වන්නේද? විමර්ශනාත්මකව සොයා බලන්න.
ඒ අනුව මිථුන ලග්නයෙන් උපන් කාන්තාවන්ට සුබම ග්‍රහයා වන්නේ සිකුරුයි. කුජ, රවි, ගුරු ග්‍රහයන් අසුබ ග්‍රහයන් වෙයි. පොදුවේ මෙසේ අසුබ වුවත් මෙම ග්‍රහයන්ගේ උපන් භාවයන් අනුවත් දෘෂ්ටීන් අනුවත් පල අපල වෙනස්‌ වන අවස්‌ථාද ඇත. පොදුවේ මේ කාන්තාවන්ට අත්වල හිරිවාත, පෙනහැලි රෝග, පපුවේ අමාරු, නිව්මෝනියාව, කාස රෝග වැනි රෝගී තත්ත්වයට ගොදුරු විය හැකි බැවින් මේ රෝග පිළබඳව අවධානයෙන් සිටින්න.
ප්‍රථමයෙන්ම මිථුන ලග්නයේ වෘශ්චික නවාංශකයෙන් උපන් කාන්තාවන් පිළිබඳව විමසා බලමු :
මේ කාන්තාවන් පුරුෂ පක්‌ෂයේ සිත් ඇදගන්නා සුළු වශීකෘත සුන්දරභාවයෙන් යුක්‌ත වෙයි. එමෙන්ම ඔවුන්ගේ කතා විලාශයද අන් අයගේ සිත් ඇදගන්නා සුළුයි. අලංකාරවත් දේ කිරීමට ආශාවක්‌ දක්‌ෂතාවයක්‌ ඇත්තියක්‌ වේ. ගුණවත් භාවයෙන් චරිතවත් භාවයෙන් උසස්‌ ලෙස සමාජයේ සිටීමට උත්සාහ දරයි. එසේ වුවත් මේ කාන්තාවන්ගේ 4 වැන්නේ සෙනසුරු හෙවත් ශනි සිටියේ නම් ඔහුගේ සතුටට බාධා ඇතිවන්නේය. එසේම අමනුෂ්‍ය, භූත දෝෂ ඇතිවීම ඉඩකඩ බහුලයි. මුළු ජීවිත කාලයම සඟවාගත් දුකකින් සිටීමටද සිදුවෙයි.
වෘශ්චික නවාංශකයෙන් උපන් කාන්තාවන්ගේ විවාහක ස්‌ථානයේ සෙනසුරු සිටියේ නම් විවාහයට බාධා පැමිණේ. විවාහ දෙදරා යැම, ප්‍රේම සම්බන්ධතා බිඳවැටීම විවාහයක්‌ වුවත් තමන්ට නොගැලපෙන පුද්ගලයකු සමග විවාහ වීමට සිදුවීම ආදී පෙන්නුම් කරයි. එසේම මේ කාන්තාවන්ගේ පස්‌වැන්නේ සෙනසුරු සිටියදී උණ සිදු වුවහොත් අධ්‍යාපනයට බාධා එල්ලවෙයි. එසේම එවැනි කාන්තාවන්ගේ දරුවන්ටද එය අපල සහිත වෙයි. මේ කාන්තාවන්ගේ ස්‌වාමි පුරුෂයන්ට සෙනසුරු මහ දශාව අතුරු දශා කාලවලදී රැකියාව පවා අහිමි වී ගොස්‌ දුකසේ ජීවත්වීමට සිදුවෙයි. සිකුරු බුධ මහ දශා අතුරු දශා කාලවලදී සුබපල ලබාදී ජීවිතයේ සතුට ගෙන දෙයි.
මකර, මීන නවාංශකවලින් උපන් මිථුන ලග්න කාන්තාවන් පිළිබඳව විමසා බලමු :
මේ කාන්තාවන්ට විශේෂයෙන් මුත්‍ර රෝග දියවැඩියාව, සෙම්ගෙඩි, වායුගෙඩි, මස්‌ දළු ඇතිවීම, වකුගඩු රෝගවලට ගොදුරුවීම ආදී රෝග ඇතිවීමේ ප්‍රවනතාවය වැඩි නිසා ඒ පිළිබඳව අවධානයෙන් සිටීමෙන් එම රෝගවලින් මිදීමට හැකියාව ඇති වෙයි. මේ නවාංශක හිමි කාන්තාවන් ඉතාමත් බුද්ධිමත් කාර්ය ශූරී කාන්තාවන් වේ. එසේම ප්‍රසිද්ධියට නම්බු නාමවලට මහත් රුචිකත්වයක්‌ දක්‌වයි. ආභරණවලට ආසාව දක්‌වන අයවෙයි. තමන්ගේ නිසි වයසට වඩා වැඩි වයසක්‌ මේ කාන්තාවන් තුළින් දක්‌නට ලැබේ. එසේම මේ කාන්තාවන්ගේ විවාහකත්ව පරීක්‌ෂා කිරීමේදී විවාහක ස්‌ථානයේ සිකුරු සිටීම විවාහයට බාධාවක්‌ වේ. නමුත් මේ කාන්තාවන්ගේ සෙනසුරු හත්වැන්නේ සිටීම විවාහයට බාධා නොවේ. නමුත් මේ කාන්තාවන් ලෞකික දේවලට වඩා ලෝකෝත්තර දේට වැඩි නැඹුරුතාවක්‌ පෙන්නුම් කරයි. මේ නිසාම ගෘහ ජීවිතය අවුල් සහගත තත්ත්වයක්‌ පෙන්නුම් කරයි.
වෘෂභ නවාංශකයේ සිටි මිථුන ලග්න කාන්තාවන් පිළිබඳව තොරතුරු විග්‍රහයට ලක්‌ කරමු :
මේ නවාංශකයෙන් උපන් කාන්තාවන්ගේ විශේෂ ලක්‌ෂණය වන්නේ සෞන්දර්යට ගීත ගායනයට නැටුම් ආදියට බෙහෙවින්ම දක්‌ෂතාවයක්‌ සහ නැඹුරුතාවයක්‌ දක්‌වන අය වෙයි. නිතර ජල පිපාසයෙන් යුක්‌ත වෙයි. ආභරණ විලාසිතාවන්ට ගිජු බවක්‌ දක්‌වයි. එසේම සිය මිත්‍රාදීන් අතරේ කැපී පෙනී සිටීමට උත්සාහ දරයි. එසේම මෙම කාන්තාවන්ගේ දුර්වලතාවයන් ලෙස දකින්නේ සිය බුද්ධිය මෙහෙයවා කරන කටයුතුවලින් මන්දගාමී ස්‌වරූපයක්‌ පෙන්නුම් කරයි. මේ කාන්තාවන්ගේ විවාහය ගැන බැලූ විට විශේෂයෙන් මේ කාන්තාවන්ට විවාහක ස්‌ථානයේ බුධ සිටීම අයහපත් වේ. සිකුරු ග්‍රහයා හත්වැන්නේ සිටීම ඉතාමත් යහපත් විවාහයකට හේතුවෙයි. එසේම ශනි හෙවත් සෙනසුරු කර්මස්‌ථානයේ හෝ අයස්‌ථානයේ සිටී නම් සුබපල උදාවේ. බුධ 7 වැන්නේ සිටීම විවාහයට අයහපත් වන්නා සේම සිය නැන්දා මාමාවරුන් සමග විසීමටද අයහපත් වන බැවින් ඒ පිළිබඳව අවබෝධයෙන් සිටීම වැදගත් වේ. මෙම කාන්තාවන්ට බුධ අධ්‍යාපනයට පවා බාධක ග්‍රහයෙක්‌ වේ. එසේම මේ කාන්තාවන්ට සිහිමඳ භාවය, මීමැස්‌මොරය, නිතර නිතර ක්‌ලාන්තගතිය ඇතිවීම, හිතේ අමාරු, පෙනහැල්ලේ, නාසයේ රෝග සෙම්ගෙඩි ඇතිවීම දිවේ තුවාල ආදිය රෝග ඇතිවීම විශේෂයෙන් පෙන්නුම් කරයි.
මේ තොරතුරු ඔබේ කේන්ද්‍රයෙන් විග්‍රහකොට බලා ඔබේ දිවියේ ඉදිරිමග සරුසාරවත් කරගන්න. ඔබට ජය හා සතුට.
උපුටා ගැනීම දිවයින
