ඔබේ ආත්මීය සහකරු තවමත් හමු වූයේ නැද්ද?
ඔබට තවමත් බඹා කෙටූ කෙනා හමුවූයේ නැද්ද? විවාහ ලාභී දරුන් සිටින දෙමවුපියන් නිතර පවසන දෙයක්‌ තමයි අපි කොච්චර හෙව්වත් හරියන්නේ නැහැ. ඉතින් පතාගෙන ආපු කෙනා එන්න එපැයි. කවුද මේ බඹා කෙටූ කෙනා? කවුද මේ පතාගෙන එන කෙනා? එයා තමයි ඔබේ ආත්මීය සහකරුවා. අපට සිරුරු දෙකක්‌ තිබෙනවා. එනම් භෞතික සිරුර සහ ආත්මීය සිරුර. අප මිය යන විට මෙම භෞතික ශරීරය අත්හරිනවා. නමුත් අපේ ආත්මීය සිරුර සංසාරයේ ආත්ම ගණනාවක්‌ අපේ උත්පත්තිය කෙලවර වන තෙක්‌ නැත්නම් නිවන් දක්‌නා ජාති දක්‌වා අප සමග පවතිනවා. අප මොන ආගමක හෝ ඇදහීමක සිටියත් අප සියලු දෙනාම විශ්ව නීතියට යටත්. එනම් අප වපුරන දෙය තමයි අප නෙළා ගන්නේ. අප කරන යහපත් දේට අපට යහපත් කර්ම එක්‌රැස්‌ වෙනවා. අයහපත් දේට අයහපත් කර්ම එක්‌රැස්‌ වෙනවා. ඒ අනුව අප මියගිය විට අප කරන ලද හොඳ නරක අනුව නොයෙක්‌ තලයන්හි උත්පත්තිය ලබනවා. මනුෂ්‍ය ආත්ම ලබන අප බොහෝ දෙනෙක්‌ නැවත උත්පත්තිය ලබන විට අප හා සංසාරයේ සැරිසැරූ අපගේ ඥති මිත්‍රාදීන් ද අප සමග එකටම උත්පත්තිය ලබන බව තහවුරු වී තිබෙනවා. මේ අය ආත්මීය සගයන් ලෙස හඳුන්වන්න පුළුවන්. නමුත් ඔබේ ආත්මීය සහකරුවා වන්නේ සංසාරයේ ආත්ම ගණනාවක්‌ ඔබත් සමග ජීවිතයේ සහකරු හෝ සහකාරිය ලෙස පැමිණි කෙනෙක්‌. සංසාරයේ ඔබත් සමග එකට ආදරයෙන් ජීවත් වන්නට පතාගෙන ආ කෙනෙක්‌ සමහර ආත්මීය සහකරුවන් තමන්ට වූ යම් සිද්ධියක්‌ නිසා ඔබගෙන් පළිගැනීමට ද පැමිණෙන්න පුළුවන්. එහෙමත් නැත්නම් ඔබට යහ මග පෙන්වන්නට ආ ආත්මීය මඟ පෙන්වන්නෙක්‌ වන්නත් පුළුවන්. යශෝධරා දේවිය සිදුහත් කුමරාගේ සංසාරික ආත්මීය සහකාරිය බව බෞද්ධ ඉතිහාසයෙහි සඳහන් වනවා. ඔවුන් සංසාරයේ ආත්ම ගණනාවක අඹු සැමියන් වශයෙන් ඉපදී තිබෙනවා. ඒ වගේම සිතා රාමා, රාධා ක්‍රිෂ්ණා, රෝමියෝ ජුලියට්‌, ක්‌ලියෝපැට්‌රා මාක්‌ ඇන්තනි, වැනි වෘතාන්ත මෙම සංසාරික හමුවීම් ලෙස සැලකෙනවා. මෙලොව ජීවිතයේදී අප සැමටම විශේෂ වූ පුද්ගලයන් කෙනෙක්‌ හෝ කීපදෙනෙක්‌ සිටිනවා. මේ අය අපේ දෙමවුපියන් සහෝදරයන් කල්‍යාණ මිත්‍රයන් ඥති හිතමිත්‍රාදීන් වන්නට පුළුවනි. මේ අය සංසාරයේ ආත්ම ගණනාවක්‌ අප සමග සිටි අයයි. අප මේ අය හඳුනා ගන්නේ කෙසේද? එය එතරම් පහසු නැහැ. එනම් සමහර අවස්‌ථාවල අප ජීවිතයේ ප්‍රථම වතාවට හමුවූ පුද්ගලයන් පිළිබඳව අපට ඉතා හුරු පුරුදු සමීප ලෙන්ගතු හැඟීමක්‌ ඇතිවනවා. මේ අය අප සමග සංසාරයේ එකට පැමිණි අපේ දෙමවුපියන් සහෝදර සහෝදරියන් ඥති මිත්‍රාදීන් විය හැකියි. පුනරුත්පත්තිය කියන පුද්ගලයන් පෙර භවයන්හි ඔවුන් සමග සිටි අය මේ භවයේදී ද තමන් සමග සිටින බව පවසා තිබෙනවා. ඒ වගේම අතීත ආවර්ජනය කරන මෝහන ක්‍රියාවලියන්හිදී ද මේ බව තහවුරු කර තිබෙනවා.
ඔබ පෙම් සබඳතාවකින් විවාහ වුවත් යෝජනාවකින් විවාහ වුවත් බොහෝ විට ඔබේ ආත්මීය සහකරු වන්නේ සංසාරයේ ඔබ සමග සහකරුවකු ලෙස ජීවත් වූ කෙනෙක්‌. මෙම ආත්මීය සහකරුගේ හමුවීම අපට ඛදඩැ aඑ සෙරිඑ sසටයඑ නැත්නම් දුටු සැණින් ඇතිවන ආදරයක්‌ ලෙස ද හඳුන්වන්න පුළුවන්. මෙය ඔබ බොහෝ දෙනෙක්‌ ලැබූ අත්දැකීමක්‌. මෙහිදී ඇතිවන්නේ පුදුමාකාර හැඟීමක්‌. අපට කවදාවත් හමු නොවුණු පිටස්‌තරම කෙනකුට මෙතරම් බලගතු ආදරයක්‌ ඇතිවන්නෙ ඇයි? මේ ආදරය හමුවේ හැදූ වැඩූ දෙමවුපියන් සහෝදර සහෝදරියන් දේපළ පමණක්‌ නොවේ. රජකම පවා පයට පෑගෙන දූවිල්ලක්‌ තරම් නොවටිනා බව හැඟෙන්නේ ඇයි? ඒ ඔහුට හෝ ඇයට ඇති සංසාරික බැඳීම නිසාමයි. ඔහුගේ රුව ඔබට අමා දසුනකි. ඔහුගේ වදන් ඔබට අමා මිහිරකි. ඔහුගේ එක ස්‌පර්ශයක්‌ විදුලි සැර වැදුණාක්‌ මෙන් ඔබ අවදි කරයි. මේ හැඟීම් වචනයෙන් විස්‌තර කළ නොහැකියි. එතරම් සුන්දරත්වයක්‌ ප්‍රීතිමත් හැඟීමක්‌ තවත් ලොව නැහැ. එය හරිහැටි දැනෙන්නේ එවැනි අවස්‌ථාවකට මුහුණ දුන් අයට පමණයි. ජ්‍යෝතිෂය අනුව වුවද අපට අපේ සහකරුවන් ගැන යමක්‌ දැනගන්නට පුළුවන්. ඔවුන් කුමන ප්‍රදේශයකින්ද රැකියාව යනාදිය කෘතහස්‌ථ දෛවඥයකුට පැවසිය හැකියි. ඒ වගේම මෙම ආත්මීය සහකරුවන්ගේ පොරොන්දම් ද මැනවින් ගැලපෙනවා. බොහෝ විට එකම සුබ නැකතින් ඉපදී සිටින්නට පුළුවන්. ඒ කියන්නේ පොරොන්දම් 20 න් 20 ම ගැලපෙනවා කියන එකයි. දැන් ඔබ නොඉවසිල්ලෙන් ඇති. කෙසේද ඔබේ ආත්මීය සහකරු හඳුනා ගන්නේ කියල. ඔහු හෝ ඇය හමු වූ විට එය ඔබේ හදවතට මනසට යළි හමුවීමක්‌ ලෙස දැනෙනවා. ඔබේ ආත්මීය සහකරු හෝ සහකාරියගේ අදහස්‌ උදහස්‌ බොහෝ විට සමානයි. නිදසුනක්‌ වශයෙන් ගතහොත් ඔබ සංගීතය කියවීම ප්‍රිය කරන්නෙක්‌ නම් ඔහු ද ඒවා ප්‍රියකරන්නෙක්‌. ඔබ දෙදෙනා අතර ටෙලිපති සම්බන්ධතා එනම් එකම අවස්‌ථාවක එකම සිතුවිලි ඇතිවීමේ ස්‌වභාවයක්‌ ඇතිවෙනවා. ඔබ දෙදෙනාම ප්‍රිය කරන පුද්ගලයන්ද සමාන වනවා. ඔබ දෙදෙනාගේ ආදර සම්බන්ධයද ඉතා ආශ්වාදජනක එකක්‌ වනවා. ඔබට සහ ඇයට මෙම එක්‌වීම ඉතා සුරක්‌ෂිත බවක්‌ ගෙන දෙනවා. දුකේදී සහ සැපේදී කිසිදිනක වෙන් නොවන වැනි හැඟීමක්‌ ඇති වනවා. මෙවැනි හමුවීමක්‌ ඉතා වාසනාවන්ත සංසාරික හමුවීමක්‌. සමහර විට ඔබට ආත්මීය සහකරුවන් කිහිප දෙනෙක්‌ සිටින්නට පුළුවන්. සංසාරයේ දිගටම එකම ආත්මීය සහකරුවකු සිටීම විරල අවස්‌ථාවක්‌ම එවැනි අවස්‌ථා උදාවන්නේ අධ්‍යාත්මික වශයෙන් ඉතා දියුණු ආත්මවලට පමණයි. නිදසුනක්‌ ලෙස සිදුහත් යශෝධරා ගත හැකිය. ඔවුන්ගේ පුණ්‍ය ශක්‌තිය සහ දැඩි භක්‌තිය එයට බලපාන්නට ඇත. සමහර අවස්‌ථාවල ඔබේ ආත්මීය සහකරු ඔබට හමුවන විට ඔහු හෝ ඇය වෙනත් බැඳීමකට යොමුවී තිබෙන්න පුළුවන්. එවිට ඔබට හෝ ඇයට කළ යුතු දෙයක්‌ නැහැ. කිමද පවුල් කඩාකප්පල් කිරීමේ කර්මයට ඔබ කරගහගත යුතු නැහැ. එබැවින් එවැනි අවස්‌ථාවල් අසීරුවෙන් හෝ මගහැරිය යුතු වෙනවා. සමහර අවස්‌ථාවල ආත්මීය සහකරු හමු වුවත් ඔහු හඳුනා ගැනීමට සෑහෙන කලක්‌ ගත විය හැකියි. සමහර විට ඔබ ඔහු හඳුනා ගත්තත් ඔහු ඔබ හඳුනා නොගන්නට පුළුවන්. මෙය වේදනාකාරී තත්ත්වයක්‌. නමුත් මෙහිදී ඔබට කළ හැකි දෙයක්‌ නැහැ. එය දෛවයට භාරදී නිහඬ විය යුතු වෙනවා. තවත් සමහර අවස්‌ථාවල ලිංගික ආකර්ෂණය අනුව ආත්මීය සහකරුවා වරදවා හඳුනා ගන්න පුළුවන්. මෙය අද සමාජයේ ඉතා සුලභ දෙයක්‌ නමුත් ආත්මීය සහකරු හදවතින් මිස ලිංගික ආකර්ෂණයෙන් හඳුනාගත නොහැකියි.
සමහර අවස්‌ථාවල මෙම ආත්මීය සහකරුවන් සංසාරයේ දිගටම ඔබෙන් පළිගැනීම සඳහා පැමිණි අයෙක්‌ නම් ඔහු ඔබ සමග විවාහ වී ඔබේ ජීවිතය මිහිපිට අපායක්‌ කළ හැකියි. එවැනි අවස්‌ථා අද සමාජයේ බොහෝ සේ දක්‌නට ලැබෙනවා. සැමියන් බිරින්දන් දරුවන් වදදී මරා දමනවා. මේ ඒ ඒ අය කරන ලද කර්මයන් හා බැඳී තිබෙන දේවල්. ඒ වගේම සමහර සංසාරයේ අප සමග එන ආත්මයන් දරුවන් සොහොයුරු සොහොයුරියන් ලෙස ඉපදී අපගෙන් පළිගන්නවා. තවත් අවස්‌ථා තිබෙන්න පුළුවන්. ඔබේ ආත්මීය සහකරුවා මෙම ආත්මයේදී මෙලොවට බිහි නොවී සිටින්නට පුළුවන්. සමහර විට ආත්මීය සහකරුවන් මෙම ආත්මයේ විවාහ ජීවිතයට ඇතුළත් නොවී සිටින්නට පුළුවන්. ඔවුන් මිතුරු මිතුරියන් ලෙස එකට සිටින්නට පුළුවන්. ඒ ඔවුන්ට මෙම ආත්මයේ වෙනස්‌ න්‍යාය පත්‍රයන් තිබෙන නිසා වෙන්න පුළුවන්. ඔවුන්ගේ අධ්‍යාත්මික වර්ධන රටා වෙනස්‌ වන්න පුළුවන්. අද සමාජයේ සමහර යුවති පතියන් මෙලෙස කල් ගෙවනවා දකින්නට පුළුවන්. ඔවුන් විවාහ ජීවිතය ප්‍රිය කරන්නේ නැහැ. සමහර විට ඔබේ ආත්මීය සහකරු හමු වූ පසු ඔබට හිතෙන්න පුළුවන් දැන්ම මට විවාහ වන්න බැහැ, මට තව වයස තියෙනවා. එසේත් නැත්නම් ඇය හෝ ඔහු වෙනත් ජාතියක ආගමක කුලයක ඒ නිසා මට ගැලපෙන්නේ නැහැ. මේ සියල්ල ඔබ ඔබටම නිදහසට කරුණු ලෙස දක්‌වන්න පුළුවන්. නමුත් ආත්මීය සහකරු හෝ සහකාරිය තෝරා ගැනීමේදී මේ කිසිවක්‌ බලපාන්නේ නැහැ. මතක තබා ගන්න ඔබට ජීවිතයේ ඔබේ ආත්මීය සහකරු හමුවන්නේ සමහර විට එකම වතාවක්‌ පමණක්‌ වන්න පුළුවන්. ඔබ එම අවස්‌ථාව මගහැරිය හොත් නැවත කිසි දිනක එය උදා නොවන්නට පුළුවන්. ඔබ අසා තිබෙනවාද කියමනක්‌ "වාසනාව කියන්නේ හිසේ එක කෙස්‌ ගසක්‌ පමණක්‌ ඇති මහළු කාන්තාවක්‌ ඇය ඔබ අසලින් යන්නේ ඉතා කලාතුරකින් ඇය එසේ ඔබ අසලින් යනවිට වහාම ඒ එක කෙස්‌ ගසෙන් දැඩි ලෙස අල්ලා ගත යුතුයි. නැතහොත් ඔබට එම වාසනාව හිමිවන්නේ නැහැ." ඔබේ ආත්මීය සහකරු හමුවීම අහඹු සිදුවීමක්‌. දෛවෝපගත සිදුවීමක්‌. එය කොතැනද කවදාද කවර අන්දමින්ද කියන එක කියන්න බැහැ. ඒ වගේම ඔබට ඒ හමුවීම බලෙන් ඇතිකර ගත හැක්‌කක්‌ ද නොවේ. එය ඔබ දෙදෙනාගේම දෛවය නැත්නම් කර්මය සහ සම්බන්ධ වුවක්‌ වගේම දෙදෙනාගේම නිදහස්‌ අදහස්‌ අනුව සිදුවිය යුතු හමුවීමක්‌. ඔබේ ආත්මීය සහකරු හඳුනාගත් විට හෝ හමුවූවිට ඔබේ හදවතට එකඟව කටයුතු කිරීම ඉතා වැදගත්. අනෙකුත් අයගේ නොයෙකුත් බලපෑම් හමුවේ ඔබ ඔහු හෝ ඇය අහිමි කර ගතහොත් ඔබේ ජීවිතය අසාර්ථක වන්න පුළුවන්. ඔබේ දෙපතුලටම දෛවය විසින් ගෙනවිත් දෙන මෙම සංසාරික ත්‍යාගය ඔබ ප්‍රතික්‍ෂේප කළ හොත් මුළු ජීවිත කාලයේම ඔබ පසුතැවෙන්න පුළුවන්.
ආචාර්ය බ්‍රයන් වයිස්‌ ගේ 'Love is Real' ඇසුරෙනි.
ශ්‍රියානි ද සේරම්උපුටා ගැනීම දිවයින
