සෞභාග්‍යය ළඟා කර දෙන වාලම්පුරි යේ ගුප්ත බලය
ජ්‍යෙතිෂ් ශාස්‌ත්‍රයේදී වාලම්පුරි යට තැනක්‌ ලැබී ඇත්තේ, එය සෞභාග්‍යය, වාසනාව ළඟා කර දෙන වස්‌තුවක්‌ වන හෙයිනි. වාලම්පුරියට භාරතයේ නම් ප්‍රමුඛස්‌ථානයක්‌ හිමිව ඇති අතර ලංකාවේ ද ඊට දැක්‌වෙන ගරු සැලකිල්ල විශාලය. භාරතයේ විෂ්ණු කෝවිල්වල හැම දිනකම වාලම්පුරි පූජාවන් පවත්වනු ලබන්නේ, එහි ගුප්ත බලයක්‌ පවතින නිසාය.
සෑම නිවසකම, පුද පූජා පවත්වමින්, වාලම්පුරියක්‌ තබා ගෙන තිබේ නම් නිවසට යහපතක්‌ම සැලසෙන බව ජ්‍යෙතිර්වේදීහු කියා සිටිති.
ඔවුන් පවසන අන්දමට, ස්‌ත්‍රී පුරුෂ, වශයෙන් වාලම්පුරි දෙවර්ගයක්‌ ඇත. ඒ දෙකම නිවසක ඇත්නම් වඩා හොඳය.
වාලම්පුරිය තැන්පත් කළ යුත්තේ බුදු පිළිමයක්‌ යටිනි. ඒ සඳහා, නිවසේ පිරිසිදු ස්‌ථානයක, අඩි පහක්‌ පමණ ඉහළින් නැගෙනහිර පැත්තට පිළිමයේ මුහුණ තිබෙන විධියට බුදු පිළිමයක්‌ තැන්පත් කළ හැකි වන අයුරින් පූජාසනයක්‌ සකස්‌ කර ගත යුතුය. ඊට අඩියක්‌ පමණ පහළින් තවත් පූජාසනයක්‌ සකස්‌ කර ගත යුත්තේ වාලම්පුරි තැන්පත් කිරීම සඳහාය.
වාසනාවන්ත සුබ දවසක සුබ නැකත් වේලාවකදී ඉහළම පූජාසනයේ බුදු පිළිමය තැන්පත් කොට මල් පහන්, ගිලන්පස පිදිය යුතුය. සුවඳ දුම් ඇල්ලිය යුතුය. ගිතෙල් පහනක්‌ නම් වඩාත් සුදුසු වන අතර ගිතෙල් සොයා ගැනීමට අපහසුතාවක්‌ ඇත්නම් ගිතෙල් සුළු ප්‍රමාණයක්‌ හා පොල්තෙල් ද දැමූ පහනක්‌ පත්තු කළ හැකිය.
පහතින් සකස්‌ කෙරුණු පූජාසනයේ වාලම්පුරි තැන්පත් කරන්නේ ඊට පසුවය. ලක්‌ෂ්මී දේවියගේ රූපයක්‌ එහි මුලින්ම තැන්පත් කළ යුතුය. ඉන්පසුව කළ යුත්තේ වාලම්පුරි අතට ගෙන, අදාළ දින ශුභ පැත්ත බලා කිරි දියරෙන් සුවඳ පැනින් එය නෑවීමය. පසුව, එය දෝතින් ගෙන, හිස මුදුනේ තබා, ඉහළ පූජාසනයේ වැඩහිඳින බුදු පියාණන්ට එයින් නමස්‌කාරකොට එහි හිස ලක්‌ෂ්මී දේවියගේ රූපය පැත්තට සිටින අයුරින්, උඩුබැලි අතට පූජාසනයේ තැන්පත් කළ යුතුය. වාලම්පුරි තැන්පත් කළ යුත්තේ බුලත් කොළ මතය.
නිවසේ තවත් වාලම්පුරියක්‌ ඇත්නම්, එය ද තැන්පත් කළ හැකිය. දෙවැනි වාලම්පුරියද තැන්පත් කරනවා නම්, එයද යට කී පරිද්දෙන් නහවා, හිස මත තබා එයින් බුදුපියාණන්ට නමස්‌කාර කොට තැන්පත් කළ යුත්තේ පළමු එකට වම් පසිනි.
එසේ පූජාසනයේ තැන්පත් කෙරෙන වාලම්පුරි දෙක ස්‌ත්‍රී පුරුෂ වාලම්පුරි දෙකක්‌ නම් වඩා සුදුසු යයි කියති. මුලින්ම තැන්පත් කරන එක පුරුෂද, දෙවැන්න ස්‌ත්‍රී ද විය යුතුය.
දිනපතා බුදු හිමියන්ට පුද පූජා පවත්වන පරිද්දෙන්, වාලම්පුරිවලටද දිනපතා පුද සත්කාර කිරීම වැදගත්ය. වාලම්පුරිවලට පුද සත්කාර කළ යුත්තේ බුදු හිමියනට පුද පූජා පැවැත්වීමෙන් පසුවය.
පූජාසනයේ වාලම්පුරි තැන්පත් කිරීමට පෙරාතුව, විෂ්ණු දේවාලයකට ඒවා ගෙන ගොස්‌ විෂ්ණු හා ලක්‌ෂ්මී මන්ත්‍ර, දැහැන්වලින් කපු මහතා ලවා ජීවම් කරවා ගැනීම ඉතා වැදගත්ය.
වාලම්පුරි තැන්පත් කරන ආරම්භක දවසේ ගෝධුලි මුහුර්තය යෙදී ඇති වේලාවක එය කළහොත් මැනවැයි ජ්‍යෙdතිර්වේදීහු පවසති. විෂ්ණු දේවාලයකදී කපු මහතා ලවා ජීවම් කරවා ගැනීමෙන් වාලම්පුරියේ ගුප්ත බලය ක්‍රියාත්මක වන බව ද ඔවුහු කියා සිsටිති.
වාලම්පුරි තුළ ගුප්ත බලවේගයක්‌ ඇතැයි විශ්වාස කෙරෙන්නේ අතීතයේ සිටය. සෑම පුර පසළොස්‌වක පොහෝ දිනකම සවස්‌ යාමයේ ශුභ දිශාව බලා පූජාසනයෙන් වාලම්පුරි රැගෙන නොඉඳුල් පීරිසියක්‌ වැන්නක තබා, එළකිරෙන්, සුවඳ පැනින් නහවා, මැනවින් පිස දමා, පූජාසනයේ නැවත තැබීමට අමතක නොකළ යුතුය.
නිවසේ යටලීයේ උඩුබැලි අතට වාලම්පුරියක්‌ එල්ලීමද, ගෙයක්‌ බඳින විට අත්තිවාරමේ වාලම්පුරියක්‌ තැන්පත් කිරීමද වාසනාව ළඟා කර ගැනීමට හේතු වන්නකි.
මේ අතර මුදල් හිඟයක්‌ ඇති නොවීම සඳහා භාරතයේ ජනයා මිල මුදල් ආරක්‌ෂාවට තබන ස්‌ථානයේ වාලම්පුරි දෙකක්‌ද තැබීමට පුරුදුව සිටිති. පොකට්‌ටුවේ හෝ අත් බෑගයේ හෝ පුංචි වාලම්පුරියක්‌ තැන්පත් කර ගැනීමෙන්ද, සුරයක ඉතා පුංචි වාලම්පුරි දෙකක්‌ දමා ගෙලේ පැළඳීමෙන්ද වාසනාව, සෞභාග්‍ය ළඟා කර ගත හැකි යෑයිද කියති.
පූජාසනයේ තැන්පත් කරන වාලම්පුරිවලට, සෑම දිනකම සවස්‌ යාමයේ පුද සත්කාර කිරීම වැඩදායකය.
උපුටා ගැනීම දිවයින
