මේෂ ලග්නයෙන් උපන් කාන්තාවක්‌ නම් මෙය කියවන්න
ඔබ තරුණියක්‌, කාන්තාවක්‌, හිතවතියක්‌, පෙම්වතියක්‌ බිරිඳක්‌ විය හැකියි. නමුත් ඔබ ලග්න නවාංශක අනුව දැනුමක්‌ අද්දැකීමක්‌ ඇත්තියක්‌ නොවන්නේ නම් ඔබ ඔබේ ගෞරුත්වය දියුණුව ඔබ විසින්ම විනාශ කරගන්නේය. එසේ හෙයින් ඒ ඒ ලග්න නවාංශක වලින් උපන් කාන්තාවන්ගේ සුබ අසුබ ගුණාංග මේ ලිපිපෙළින් ඉදිරිපත් කරන්නේ කාන්තා ඔබගේ දිවිමග සරු සාරවත් කර ගැනීම සඳහාමයි. ඒ අනුව අද මේෂ ලග්නයෙන් උපන් කාන්තාවන් පිළිබඳවයි.
ජ්‍යෝතිෂ්‍ය විද්‍යාවට අනුව රාශි චක්‍රයේ පළමු රාශිය මේෂ රාශියයි. මේෂ රාශියෙන් උපන් කාන්තාවන් ටිකක්‌ ආඩම්බර කාරයි. මේ ලග්නයෙන් උපන් කාන්තාවන්ට සිකුරු සෙනසුරු බුධ යන ග්‍රහයන් පාපකාමී ග්‍රහයන් වන බවත් ගුරු රවි යන ග්‍රහයන් වශයෙන් පෙන්වා දීමට පුළුවන. පෙර පුන්‍යස්‌ථාන පුණ්‍යස්‌ථාන ත්‍රිකෝණ ස්‌ථානය, මාරකස්‌ථාන භේද කර ගෙන මෙසේ පොදු හැඳින්වීමක්‌ කළත් ග්‍රහයාගේ තත්ත්වය දෘෂ්ටි නැකත් අංශකාදී හේතු කරගෙන සුබ අසුබ වෙනස්‌ විය හැකි බව මතක තබා ගත යුතුයි.
මේෂ ලග්නයේ ඒ ඒ නවාංශක වලින් උපන් කාන්තාවන්ගේ සුභා සුභ ගති ලක්‍ෂණයන් මෙසේය :
ඒ අනුව වෘෂභ නවාංශකයෙන් උපන් කාන්තාවන් ආත්ම විශ්වාසය හා ධෛර්ය සම්පන්න භාවය අඩු නිසා පිරිස්‌ පාලනය සහ නායකත්වයට ටිකක්‌ මැලිකමක්‌ දක්‌වන අතර ලැබුණත් එය මන්දගාමී භාවයක්‌ පෙන්නුම් කරයි. ශරීරය නිතරම දැවෙන පිච්චන ගතියක්‌ පෙන්නුම් කරයි. සුළු දෙයටත් ප්‍රශ්න අඬදබර ඇති කර ගනියි. සමාජ රෝග වැනි භයානක රෝගවලට ගොදුරුවීමේ ප්‍රවනතාව වැඩියි. හදිසි අනතුරුවලට ලක්‌වීම විෂකුරු සතුන්ගෙන් අනතුරු ඇතිවීම ස්‌වභාවික විපත්ති වලට ගොදුරු වීම ආදී පෙන්නුම් කරයි. එසේම මෙම කාන්තාවන්ට විදේශ ආධාර ගමන් බිමන් ලැබුනත් එයින් පල ප්‍රයෝජන අඩුබව මගේ අත්දැකීමයි.
වෘෂභ නවාංශකයේ උපන් කාන්තාවන් පිළිබඳව විමසා බලමු :
තෙවැන්නේ භුමපත්‍ර හෙවත් අඟහරු සිටියේ නම් ඇය පවුලේ බාලයාම විය යුතුයි. එසේම මේ නවාංශකයෙන් උපන් කාන්තාවන්ගේ විවාහ ජීවිතයට අකුල් හෙළීමට කුජ හෙවත් අඟහරු 7 වැන්නේ සිටීම හේතු කාරක වේ. විවාහයට පෙර මෙවන් කාන්තාවන් ඒ පිළිබඳව අවබෝධය ලබාගත යුතුයි. එසේම කාන්තා කේන්ද්‍රයේ ලග්නය 2, 4, 7, 8, 12 යන ස්‌ථානවල කුජ හෙවත් අඟහරු සිටීම අසුබ බව ජ්‍යෝතිෂ්‍යයේ පොදු මතයයි. මෙවැනි ග්‍රහ තත්ත්වයන් තුළ දක්‍ෂ දෛවඥයකුගේ මඟ පෙන්වීමකින් තොරව විවාහ ජීවිතයට පිවිසුණහොත් එවැනි අයගේ විවාහ ජීවිත කඩා කප්පල් වීම, ලෙඩ රෝග, අඬදබර මැද විවාහය ගෙන යැමට සිදුවීම, එසේම විවාහ ප්‍රමාද වීම විවාහ නොවී සිටීම ආදිය සිදුවෙයි. එසේම කුජ අසුබ වී මහදශාව ගත කරන අවස්‌ථා වලදී සිය සැමියාට මාරකද සිදුවිය හැකියි. මේ නිසා මේ පිළිබඳව අවබෝධයෙන් සිටීම ඔබට යහපතක්‌ම වේ.
කන්‍යා, කටක නවාංශක වලින් උපන් මේෂ ලග්න කාන්තාවන් පිළිබඳව විමසා බලමු :
මේ කාන්තාවන් නිතරම සෞන්දර්යයට ඇලුම් කරන රූමත් විලාසිතාවන් අගයන සංගීතයට නැඹුරු උසස්‌ ඥතීන් හිතවතුන් ප්‍රියකරන ආගන්තුක සත්කාර කරන දියුණුවේ ශක්‌තිය සොයා යන යහපත් කාන්තාවන් වේ. ඔවුන්ගේ දුර්වලකම් ලෙස ලෙස පෙනී යන්නේ යමක්‌ පිළිබඳව විමසීමෙන් සොයා බැලීමෙන් තොරව ඉක්‌මනින් කලබලයට පත්වීම ඉක්‌මන් තීරණය ගැනීමයි. මේ නිසා මෙය ඔවුන්ට අවාසිදායක වේ. මේ කාන්තාවන්ගේ විවාහ ජීවිතයට බාධක ග්‍රහයා වන්නේ ගුරුයි. ඒ අනුව හත්වැන්නේ ගුරු සිටියදී උපත ලැබුවොත් විවාහයට බාධා ඇතිවේ. එසේම සෙනසුරු දෘෂ්ටි ගතවුවහොත් ලිංගික දුර්වලතාවන් ඇතිවේ. මේ කාන්තාවන්ට විශේෂයෙන් රුධිරගත හා ස්‌නායුගත රෝග බහුලව සෑදීමට හැකි වන අතර එම රෝගයෙන් සමහර අවස්‌ථාවලදී වෛද්‍ය පරීක්‍ෂණයන්ටද අසුනොවන තත්ත්වයක්‌ ඇති වේ. කන්‍යා කටක නවාංශක වල උපත ලද කාන්තාවන්ගේ සාර්ථක විවාහයට හේතුවන කුජ ග්‍රහයා දස වැන්නේ හෝ 11 වැන්නේ සිටියේ නම් වාසනාවන්ත ධනවත් විවාහයකට හේතු වෙයි. නමුත් ගුරු 7 වැන්නේ නොසිටිය යුතුයි. එසේම කුජ මහ දශාවේදී සියලු සැප සම්පත් ගෙනදීමට හේතුවෙයි. විශේෂයෙන් මෙම කාන්තාවන්ට මංගල කටයුතු කිරීමේදී ගුරු දිනය නොගත යුතුයි.
වෘශ්චික නවාංශකයෙන් මේෂ ලග්නයේ උපන් කාන්තාවන් පිළිබඳව විමසා බලමු :
ඉහත සඳහන් කාන්තාවන්ට වඩා දැඩි වෙනසක්‌ පෙන්නුම් කරයි. මේ නවාංශකයෙන් උපන් කාන්තාවන්ගේ විශේෂ ගති ලක්‍ෂණය වන්නේ එඩිතර බව නිර්භීත බව පෙරටු කර ගෙන ඕනෑම අමාරු කාර්යයකට වහා ඉදිරිපත් වීමයි. එසේම මොවුන් මවු පාර්ශ්වය ඈත් වීමත් පිය පාර්ශ්වයට එක්‌වීමක්‌ පෙන්නුම් කරනවා. චන්ද්‍රයාගේ පිහිටීම අනුව මවට මාරක වෙන අවස්‌ථාද තිඛෙනවා. විශේෂයෙන් ලග්නයෙන් අටේ දොළහේ හයේ දුර්වලව සිටියොත් එවැනි කාන්තාවන්ගේ මවුවරුන්ට අපල ඇති වෙයි. එලෙසම වායුගෙඩි උදරාබාධ වලිප්පු සන්නි රෝග අපස්‌මාරය වැනි රෝග වලට ගොදුරුවීමද සඳුගේ දශාවේදී ජලවිපත්ද ඇති වන බැවින් ඔබ ඒ පිළිබඳව අවබෝධයෙන් සිටිය යුතුයි. මෙවැනි කාන්තාවන්ගේ විවාහ ජීවිතය ගැන විමසීමේදී සිකුරු සඳු පිළිබඳව අවබෝධයෙන් සිටිය යුතුයි. ඒ මන්දයත් සඳු හත්වැන්නේ සිට සිකුරු අට දොළහ හය යන ස්‌ථානවල දුර්වලව සිටී නම් අනිවාර්යයෙන්ම විවාහය අවුල් සහගත වේ. කරදරවලට පත්වේ. එසේම ගුරු සඳු යෝග කාරකව සිකුරු බලවත්ව පූර්ණ දෘෂ්ටි ගතවන්නේ නම් එවැනි කාන්තාවන්ගේ විවාහ ජීවිතය වාසනාවන්ත සෞභාග්‍යමත් එකක්‌ වේ.
ඉතින් බුද්ධිමත් කාන්තාවනි. මේ ලිපි වලින් ජ්‍යෝතිෂයේ සියුම් විග්‍රහයන් ඉදිරිපත් කිරීමට හැකියාවක්‌ නොවන හෙයින් පොදු සිද්ධාන්තයන් පමණක්‌ ඉදිරිපත් කරමි. එය ඔබට ප්‍රමාණවත් නොවන්නේ නම් දක්‍ෂ දෛවඥයකු කරා ගොස්‌ ඔබේ ප්‍රශ්නවලට නිසි පිළියම් සොයා ගැනීම ඔබටම භාර කරමින් ඔබේ ප්‍රායෝගික ජීවිතයේ දී මිත්‍ර සමාගම් ඇති කර ගැනීමට පෙම් සබන්ධතා ගොඩනගා ගැනීමට විවාහ ජීවිතය සාර්ථක කර ගැනීමට ඔබ කවුදැයි ඔබටම තේරුම් කර ගැනීමට මේ ලිපිපෙළ ඔබට උපකාරී වේ. ඔබට ජය හා සතුට.
උපුටා ගැනීම දිවයින පුවත් පත
.jpg "පැටිස්")
