සුනඛ පලාපල

සුනඛයාද, හූනා මෙන්ම සුබ සහ අසුබ සංඥා ලබාදෙන සිවුපා සතකු ලෙස සැලකේ. අතීතයේ සතුන් දඩයම් කිරීමේ කාර්යය සඳහාද සුනඛයා සහාය ලබාදී තිබේ. නිවෙසින් බැහැරව සතුන් දඩයම් කිරීමට සූදානම් වනවිට සුනඛයා ඒ මේ අත දුවමින් කෙඳිරි ගායි නම් සතුන් දඩයමට පහසු වන බවත්, යම් ස්ථානයකට දුවමින් සංඥා කරන්නේ අවශ්‍ය ස්ථානය පෙන්වීමට බවත් මතයක් පවතී.

නිවෙසින් බැහැරට යන විට සුනඛයා කන්පට ගසයි නම්, ගමනට අසුබ වේ. ගමන ගියහොත් අනතුරක් සිදුවේ.
නිවෙස ඉදිරිපිට රෙදි වැලක් ළඟ සිට හෝ කළු ගලක් අබියස සිට උඩුබුරයි නම්, තම හිතවතකුගේ, ඥාතියකුගේ මරණයක් හෝ ඔවුන්ට සිදුවූ යම් කරදරයක් පිළිබඳ ආරංචි වේ.
සුබ වැඩක නිරත වන විට ඉදිරියට පැමිණ ඉදිරි පා දෙකෙන් පහුරු ගායි නම්, අසුබ ලකුණකි. කරන ක්‍රියාවෙන් පල නොලැබේ.
ගමනක් යෑමට සැරසෙන විට සුනඛයා ඇඟේ තැවරෙමින්, කෙඳිරිගාමින් බිම ලගී නම්, එම ගමනේදී සතුරු කරදර ඇතිවේ. එම ගමන අනතුරු සහිත වේ.
ගමනක් යන විට බැල්ලක් දිව ආවේ නම්, එය සුබ පලයකි. එම ගමනින් තමන් සිතන දේ ඉටුවේ.
මස් කටුවක්, මස් කෑල්ලක් හෝ මියගිය සතෙක් කටින් ඩැහැගත් සුනඛයකු දකී නම්, තත්ත්ව, තානාන්තර ඉහළ නිලතල තිබුණත් එම කාලයේදී නින්දා අපහාස විඳීමට සිදුවේ. එම නිලතල අහිමි වෙයි.
ශරීරයේ මඩ තැවරුණු හෝ තෙමුණු සුනඛයකු දිව ආවේ නම්, අත ඇති මිල මුදල් රන් භාණ්ඩ හෝ යම් කිසි වටිනා දේපළක් සොරුන් විසින් ගැනීමක් හෝ නැති වීමක් සිදුවේ.
යහළුවෙක් හෝ හිතවතකු සමඟ යන විට සුනඛයන් දෙදෙනෙක් ඉදිරි පාද ඔසවා සෙල්ලම් කරයි නම්, එම හිතවතා කල්‍යාණ මිතුරෙකි.
කාගේ හෝ නිවෙසකට යන විට එම ඉඩමේදී බල්ලන් දෙදෙනෙක් පොරකෑවේ නම්, ලේ හැලුවේ නම්, එම නිවෙසින් තමන්ට වස විස කැවීමක්, අපහාසයක් හෝ සතුරු කරදරයක් සිදුවේ.
තමන්ගේ රථ වාහන ඉව කරමින් එහි රෝදවලට මුත්‍රා කරයි නම්, එම රථයෙන් තමන්ට යහපතක් සිදුවේ. සුනඛයා එහි යම් කොටසක් සපාකෑවේ නම් ඉන් අයහපතක් සිදුවේ.
ගමනක් ගොස් නිවෙසට එන විට ගෙදර සුනඛයා පසුපසින් ගියේ නම්, නිවෙසට ඥාතියකු පැමිණේ.
නිදාගෙන සිටිය සුනඛයකු හයියෙන් බිරීම හෝ කෙඳිරිගෑවේ නම්, නිවෙසට අමනුෂ්‍ය දෝෂ බහුල වෙයි.
ගම මැද කුඹුරු යායක හෝ එළිමහනක රාත්‍රි 11.00-12.00 අතර සුනඛයන් උඩුබුරලෑවේ නම්, ගමට නියඟයක් ඇතිවේ. බව බෝග පාළුවක් මෙන්ම වසංගත රෝග පීඩා ඇතිවේ.