දත් උල් නම් ධනවත්
ස්ත්‍රී අංග ලක්ෂණ පිළිබඳ කතා කරන විට දන්ත කල්‍යාණියටද ඉතා වැදගත් තැනක් ලැබේ. දත්වල පිහිටීම අනුව ඒ ඒ කාන්තාවන්ගේ ගති ලක්ෂණ කිව හැකි යැයි පැරැණි ජේ‍යාතිෂවේදියෝ මත පළ කරති.
- දත් උල්ව පිහිටන ස්ත්‍රිය තම සැමියා නිතර සැක කරන අතරම තම සැමියාගේ ගුණ දොස් විවිධ මිනිසුන් ඉදිරියේ විවේචනය කරයි. මොවුන්ගේ විවාහ ජීවිතය ගැටලු, ප්‍රශ්න, රණ්ඩුවලින් පිරුණු එකකි. නමුත් මේ ස්ත්‍රීන් බොහෝ ධනවත් වේ.
- උඩු ඇන්දේ පමණක් දත් දුරින් පිහිටි ස්ත්‍රීන් තම සැමියා වරදින් මුදා ගැනීමට උත්සාහ දරයි. නමුත් මෙවන් ස්ත්‍රීන්ට හිමිවන්නේ සමාජයෙන් අපවාද අසන, වරදට යොමුවන නාස්ති කරන සැමියෙක්ය. ඒ නිසාම ගේ දොර සාමය බිඳ වැටී, සමාජයෙන් අපවාද විඳීමටද සිදුවේ. නමුත් ජීවිතයේ අග භාගය සැපවත්ය.
- මනා දත් දෙපළක් සමඟ නළ දත් පිහිටන ස්ත්‍රිය ඉතා වාසනාවන්ත පිහිටීමක් සහිත ස්ත්‍රියකි. මෙවන් ස්ත්‍රීන්ට යස ඉසුරු ලැබේ. දූ දරුවන්ටද ආදරය දක්වයි.
- යටි ඇන්දේ දත් පළල්ව පිහිටි ස්ත්‍රිය මුරණ්ඩු ගති ඇති අතිශය කලහකාරී ස්ත්‍රියකි. සැමියාද බියට පත් කරමින් යටත් කරගෙන සිටින මෙම ස්ත්‍රීන් විලිබිය නැති අධම ස්ත්‍රීන් වේ.
- පැළ ඉනි සිටෙව්වා සේ දත් අතර හිදැස් තිබෙන ස්ත්‍රිය අනාචාරයේ හැසිරෙන අතරම කාමාධිකය. කුඩා කල සිටම විළිබිය නැතිව හැසිරේ. මේ කාන්තාවන් උපරිම නිදහස භුක්ති විඳින අතර විවාහය අසාර්ථකවේ. චර්යා රටාවේ ඇති ගැටලු නිසාම සියලු දෙනාගේ දෝෂාරෝපණයට ලක්ව හුදෙකලා වේ.
- උඩු ඇන්දේ දත් පළල්ව පිහිටි ස්ත්‍රීන් බුද්ධියෙන් අඩු අය වන අතර මුළු ජීවිත කාලය පුරාම ආර්ථික අපහසුතා ඇතිවේ. මොවුන්ගේ පවුල් ජීවිතයම අඬදබරවලින් පිරී පවතින අතර තම මවට අගුණ දෙන පිහිටීමකි.
- දත් කෑලි කැඩී ඇත්නම් දිළිඳුකමේ උපරිමයටම යන අය වේ. බොහෝ අග හිඟකම් ඇතිවේ.
- දත් 32කම මනාව පිහිටි ස්ත්‍රියට යස ඉසුරු හිමි වන අතර මුළු ජීවිතයම සතුටින් කල් ගෙවන ස්ත්‍රියකි. ඇගේ ජීවිතය වාසනාවෙන් පිරි එකකි.
- බොල්ලෑ දත් පිහිටා ඇති ස්ත්‍රියගේ ජීවිතය කරදරවලින් පිරි එකකි. මොවුන්ට දරුවන්ගේද සහනය අහිමිය.
- ඉදිරිපෙළ දත් අතරමැද හිඩැස් ඇති ස්ත්‍රිය නිසා සැමියාට බොහෝ කරදර බාධක ඇතිවේ. මොවුන්ගේ විවාහය අසාර්ථකය. බොහෝ දුක් කම්කටොලුවලට මුහුණ දෙයි.
- යටි ඇන්දේ දත් වැඩියෙන් පිහිටි ස්ත්‍රියගේ මව මිය ගොස් හෝ හැරගොස්ය. ජීවතුන් අතර සිටී නම් ඇයට සලකන්නේ පිට දරුවකුට මෙනි. මවට ඉතාම අපලය.
- යටි ඇන්දේ දත් අක්‍රමවත්ව පිහිටි ස්ත්‍රිය විශ්වාස කළ නොහැකි දෙබිඩි චරිතයකින් යුක්ත තැනැත්තියකි. මොවුන්ගේ සැමියන් හැරයයි නැතිනම් අකාලයේ මිය යයි.
- දත් ඉතා තුනීව පිහිටි ස්ත්‍රිය ඉතා හිතුවක්කාර ගති පෙන්වයි. ජීවිතය අවුල් කරගනී.
හංසි ආටිගල
උපුටා ගැනීම මව්බිම
