අමනුෂ්‍ය දෝෂ දුරුකිරීමට මන්ත්‍රයක්‌
ප්‍රේතයින් හා භූතයින් ද විවිධ නම් වලින් හැඳින්වෙන යක්‍ෂයින් අප අතර නිතරම ගැවසේ. එහෙත් සමහරු එය නොපිළිගනී. "කිං මූ කතාහාරෙ නව කර්කටස්‍ය කීමන්න පානෙ නවගදා භස්‍ය අන්ධස්‍යදීපාද් බධිරශ්‍ය ගීතාත් මූඛස්‍ය කිං ධර්ම කථා ප්‍රසංගාත්" යනු හෙයින් කකුළුවාට මුක්‌තාහාරයෙන්ද, කොටළුවාට මධුර අන්නපානයෙන්ද, අන්ධයාට පහන් එළියෙන්ද, බිහිරාට ගීතිකාවෙන්ද, අඥනයාට ධර්මකතාවෙන්ද ප්‍රයෝජන නැති බව දන්නේයි. කියා භාවසන්න සහිත ප්‍රත්‍යශතකයේ පෙන්වා ඇත. අමනුෂ්‍ය අවතාර ගැන දන්නෝ අසත්‍යයක්‌ ලෙස නොපිළිගනී. මළමිනියක්‌ වලලන තැනට අමුසොහොන කියති. අමනුෂ්‍ය අවතාර හොල්මන් එතන ඇති බව අපි බහ තේරෙන වයසේ සිටම මේ දක්‌වා අසා ඇත. අමු සොහොනක්‌ ලඟින් යනවිට මේ හොල්මන් අවතාර දැක ඇති අයද නොදැක ඇති අයද සිටී. එසේ දැක ඇති අය සමහරවිට බියවීමෙන් උණ, දෙඩවිලි, හූ කියා කෑගැසීම්, ඔල්මාදව සිහි විකල්වීම සන්නි රෝගද, ළඟ සිටින අයට පහරදීම් බෙල්ල මිරිකීම්, එහේ මෙහේ දුවන්ට වීම ඒ අනුව ඔවුන් දම්වැල් වලින් බැඳ තබා සිටින අවස්‌ථාද අප දැක ඇත. තවත් සමහරුන් එම භූත අවතාර යන්ගෙන් ගුටිකා අතුල් පහරවල් කා පොර බදා ඇති අයද දැක ඇත. රඹුක්‌කන මාවනැල්ල පාරේ කැබැල්ලවත්ත අසලින් ඇති මහනුවර, ගලගෙදර, හතරලියද්ද යන මාර්ගයට පිවිසෙන හන්දියේ ඇති වංගුවේ පිහිටි දිය ටැංකිය අදත් පවතී. මෙම ටැංකිය ළඟ හොල්මන් ඇති බවත් දැක ඇති අයත් බිය වූ අයත් බොහෝ වෙත්. දිනක්‌ දිනපතා පාන්කූඩය බයිසිකලයේ පිටුපස බැඳගත් දමියෙල් නම් පාන් මාමා එම ස්‌ථානයේ කන්ද නිසා බයිසිකලයෙන් බැස බයිසිකලය තල්ලුකරගෙන යනවිට කෙනෙක්‌ දියනාන ශබ්දය ඇසුනද එක්‌වරම අනේ මාමේ ටිකක්‌ නැවතිලා මම නාන බාල්දිය ටැංකිය තුළට වැටුනා අරන් දෙන්නැයි කියා ඇමතූවිට පාන් මාමා සයිකලය නවතා එතනට විත් බලනවිට ඒ අසල ජකෝලිස්‌ගේ දුව පොඩී බව හඳුනාගෙන පාන් මාමා බාල්දිය ගැනීමට කොන්ද නමා අත දමා බැලුවේය. එක්‌වරම ඇඹරීගිය දත් විලිස්‌සාගත් දිව අඩියක්‌ පමණ එල්ලී ඇති, පියයුරු යුවල බිමටත ගෑවෙන අයුරින් එල්ලෙන බක බක ගා හයියෙන් හිනාවුනු අවතාරය පාන් මාමගෙ පිටට වැරෙන් ගැහුවේය. එවිටම ඔහු සිහි නැතිව එතනම වැටී සිටියේය. උදේ එළිය වැටුණු පසු රඹුක්‌කන සිට නුවර බලා යන උදේ 05.00 ට පිටත්වූ බස්‌රථය ටැංකිය ළඟ නවතා ඇන්ජිමට වතුර දැමීම සඳහා බසයෙන් බැස බාදියක්‌ රැගෙන ටැංකිය ළඟට ගියවිට රිය පැදවූ කරුණාරත්නට දකින්ට ලැබුණේ පාන් මාමා යටි කුරුව වැටී සිටින හැටිත් ඔහුගේ පිටේ මුරුංගා කරල් මෙන් දිගැති මහතැති ඇඟිලි පහක්‌ නිල් පැහැයෙන් ඇති බවය. ඔහු සිද්ධිය අසල්වැසියන්ට දන්වා ගියපසු ගම්මුන් පැමිණ ඔහු ඔසවාගෙන ගොස්‌ ගමේ සිටිය සේරමැඩිල්ලේ සහ දීගන කන්දේ වැලිකැටියේ කට්‌ටඬි මහතා කැඳවා තෙල් මතුරා සිහියගෙන වටවී සිටින අයට කීවේ පාන් මාමාට යකා ගහලා කියලාය. පසුව ඔවුන් යකා නටවා දොල පිදේනි දී ඔහු සුවපත් කළද, පාන් මාමා උදේ එළිය වැටුණු පසු පාන් ගෙන යැම පුරුද්දක්‌ කර ගත්තේ යකාට බිය වූ නිසාත් පහර කෑ නිසාත්ය. (මෙය සත්‍ය සිද්ධියකි 1957 වර්ෂයේ සිදුවූවකි).
මෙවන් අවතාර හොල්මන් අපේ රටේම පමණක්‌ නොව පිටරටවල් වලද ඇත. එංගලන්තයේ හොල්මන් අවතාර පවත්නා නිවාසය වශයෙන් ඉතාමත් ප්‍රසිද්ධියට පත් වූයේ ඉසෙක්‌ස්‌හි පිහිටි "බොර්ලේ රෙක්‌ටරි" (Borley Rectory) මෙහි හොල්මන් ඇති බවට පර්යේෂණ කළ සී. ඊ. එම්. ජොඩ් (C.E.M. Joad) මහතා ඇතුළු 40 දෙනකුගෙන් යුත් බුද්ධිමතුන් හා දාර්ශණිකයන් මේ හොල්මන් මන්දිරය වසර දෙකක පරීක්‍ෂණයක්‌ පවත්වා එම වාර්තා වලින් හෙළිවූයේ මියගිය අය භූතයන් කීපදෙනකුවී මෙහි හොල්මන් කරන බව සත්‍ය බවයි. වැඩිදුරටත් ඔප්පු වූයේ මියගිය කන්‍යා සොහොයුරියක්‌ පිළිබඳවය. ඇය මැරුණාට පසු මේ මන්දිරයේ ජනෙල්වලට තට්‌ටු කිරීම සීනු නාද කිරීම, අඩි ශබ්ද නැගීම, දොර ජනෙල් ඉබේ ඇරීම, බිත්තිවල පණිවිඩ ලිවීම, මඩු මුට්‌ටු ඒ මේ අත පෙරලා දැමීම, භාජන තිබුණු තැනින් අන්තර්ධාන වීම, ආදිය සිදුවන්නට විය. පරීක්‍ෂණ වලින් හෙළිවූයේ මේ කන්‍යා සොයුරිය මේ මන්දිරය තුළ මරාදමා වළලා දැමූ පසු එදා සිට ඇය භූතාත්මයක ඉපිද මෙහි ගැවසෙන බවයි. ධනවත් සල්ලාලයකු විසින් මැය රවටාගෙන ගොස්‌ මේතුළදී කාමුක අපරාධ කර මරා වළදැමූ බවයි. මැය ප්‍රංශ ජාතික සොයුරියකි. මේ සිද්ධිය පිළිබඳවද අපරාධය අනුවද නඩුවක්‌ තිබී ඒ තීන්දුව අනුව මේ අපරාධ කාර තරුණයා එල්ලා මරා දමනු ලැබුවේය. මෙම කරුණු පදනම්කොට විස්‌තර ඇතුළත් පොතක්‌ 1943 වර්ෂයේ හැරී ප්‍රයිස්‌ නමැති සුප්‍රසිද්ධ අධි මානසික පර්යේෂකයා විසින් ලන්ඩන නුවරදී පළ කළේය, එහි නම The most Hounted House in England යනුය. එංගලන්තයේ සුප්‍රසිද්ධ හොල්මන් නිවස නම් වූ මෙම පොත එම වකවානුවේ විශාල ලෙස විකිණී ගියේය. කර්මය හා පුනර්භවය පිළිබඳ පරීක්‍ෂණමය සාක්‍ෂි සොයන්නට මෙය ඉතා වැදගත් වූ ග්‍රන්ථයක්‌ ය. එනිසා අමනුෂ්‍ය අවතාර පිළිබඳව නොඇසූ කෙනෙක්‌ අපේ රටේ හෝ විදේශවල නොමැති තරම්ය. හූනියන් යකා, මහසෝනා, රීරියකා ට බියවුණු ආතුරයින්ට ශාන්ති කර්ම බලි තොවිල් කර සුවය ලබාදෙයි. යක්‍ෂ, ප්‍රේත, භූත වශයෙන් කොටස්‌ කර දැක්‌වෙන මේ අමනුෂ්‍යයින් මියගිය මනුෂ්‍යයන්ගේ අවතාර ලෙස අපි සැලකීමට පුරුදුව ඇත. අපත් සමඟ ජීවත්වන මනුෂ්‍යයෝ යම් යම් චෛතසිකයන් ඔස්‌සේ මිය ගිය පසු අදෘශ්‍යමාන ආකාරයෙන් ආකාශස්‌ථ වශයෙන් හෝ භූමස්‌ථ වශයෙන් අප අතරම ගැවසෙන අමනුෂ්‍යයන් පිරිසක්‌ බවට පත්වී ඔවුන්ගේ අභිලාශයන් සපුරා ගන්නට උත්සාහ දරණ බව බෞද්ධ ආකල්ප තුළින් හෙළිවේ. යක්‍ෂ ගනයට වැටෙන අමනුෂ්‍යයෝ බියකරු වේෂයන් ගෙන් අන්ධකාර රාත්‍රිවල ජීවත් වන්නන් හමුවේ පෙනී සිටිති. ඔවුන්ගේ ශරීර අවයවයන් ඉතා බිහිසුණු අයුරින් මැවී පෙනීම විශේෂ ලක්‍ෂණයයි. මේ හැර යක්‍ෂයාගේ මුළු ශරීරයම නොපෙනී එක කොටසක්‌ හෙවත් දිව පමණක්‌ හා දත්, කට, ඇස්‌ දර්ශනය වෙන අවස්‌ථාද ඇත. යක්‍ෂා වේෂයෙන් තොරව භයානක අලි, කොටි, වලස්‌, බල්ලන්, නරියන්, වවුලන්, නයි, පොළොං ආදි විෂ කූරු සර්ප වේෂයෙන් විද්‍යාමානවන බැව් පෙනේ. ඒ හැර මනුෂ්‍ය ප්‍රාණයක්‌ වාහනය වශයෙන් යොදාගෙන පැමිණීමද බැල්ම හෙළා ගැනීමද යක්‍ෂයාගේ පැමිණීම වශයෙන් පෙර පටන් සැලකුවකි. "ඉත්ථි වාහනං කත්මා අනුයන්ති දිසො දිසං පුරිස වාහනං කත්වා අනුයන්ති දිසො දිසං".... යන මෙම පාඨයෙන් පැවසෙන්නේද ඉහත කී අදහසයි. භූත ගනයට වැටෙන අමනුෂ්‍යයෝ කිසිසේත් නොපෙනෙන අතර සිටින බවට සළකුණු ඇති කිරීම විශේෂයි.
රාත්‍රි කාලයේ ශබ්ද කිරීම, දොර ජනෙල්වලට තට්‌ටු දැමීම, ඇරීම, ගේ තුළ ඇති බඩු මුට්‌ටු රෙදි ආදිය නොපෙනෙන අයුරින් ගෙනගොස්‌ මිදුලේ හෝ වෙනත් තැන්වල තැබීම, සමහරවිට වැලි ගැසීම්, කෑමවලට අශූචි මළ මුත්‍රා දැමීම මුදල් කොට්‌ටය යට තැබීම ආදී ලක්‍ෂණයක්‌ භූත බලපෑම් සේ සැළකිය හැක. මේ හැර සමහර අවස්‌ථාවල ශාරීරික වශයෙන් නොපෙනී ජීවත්වන්නන්ගේ ගෙල මිරිකා පැනයැම, කනබොනදේ උදුරාගෙන දිවීම, නිදියහන් වලින් බිමට ඇද දැමීම, හීනෙන් සොහොන් පලවල් ඇළවල් ලිං පතුල් ළඟට කැඳවාගෙන ගොස්‌ තල්ලුකර දැමීම් ආදි කුරිරු ක්‍රියාවන් කරයි. තවත් විටෙක මිල මුදල් දීම, දියුණුවන ආකාරය සිහිනෙන් කියාදීම වැනි හිතෛෂි ක්‍රියාවලින් මිත්‍රත්වය දැක්‌වීමද අමනුෂ්‍ය භූතයින් විසින් කරයි. ප්‍රේත ගනයට අයත් භූත කොටස්‌ ගෙමිදුල්වල කෙලපිඬු දමා යැම, අපවිත්‍ර දේවල් දැමීම කරයි. තවද නිරුවත් කයින් ජීවත්වන්නන්ට සැරිසරමින් පෙනී සිටියි. මොවුන් දියුණුවට අකුල් හෙළීම බෙහෙවින් කරති. ප්‍රේත යන වචනය සිංහලට නැගී තිබෙන්නේ පාළි බසෙහි එන "පේත" යන වචනයෙනි. මෙහි මූලික තේරුම "පහව ගිය" යන්නයි. "පෙතානං කාල කතානං" යන පාළි පාඨයෙන් එය හොඳින් පැහැදිළිවේ. මියගිය අයෙකු ප්‍රේතයෙකු සේ කටයුතු කිරීම එහි අදහසයි. එනිසා අප අතරේ විශ්වාසයක්‌ පවතිනවා. මියගිය පසු නරකාදියේ උපන් තැනැත්තා ප්‍රේතයා හැටියටය. මෙවන් යක්‍ෂ ප්‍රේත භූත හා ඕනෑම අමනුෂ්‍යයන් පලවා හැරීමට මෙන්ම එවැනි බැල්මවල් පලවා හරින්නට බැරි නිවාස, ව්‍යාපාරික ස්‌ථාන, දේවාල, භූමි ඉඩකඩම් හා ශරීරයේ සැඟව ඇති මළප්‍රේත, යක්‍ෂ භූත දිෂ්ඨි සියල්ලක්‌ම මුළුමනින්ම නැති භංග කිරීමට පලවා හැරීමට පැරණි ප්‍රබල දුර්ලභ ක්‍රමයක්‌ මෙසේ තිළිණ කරමු. අව පක්‍ෂයේ මාස පෝය දිනට පෙරදින නිවසේ සිටින සියලුම දෙනාගේ අතින් සුනු සහල් මුට්‌ටියකට දමා එයට විසිපස්‌ ජාතියක්‌ මිශ්‍ර ව්‍යාංජනයක්‌ උයා පුළුටු පස්‌ වර්ගය, ගොඩ මස්‌, දියමස්‌, වෙරි පහ, බිත්තරයක්‌ බැද, කැවුම් 7, පරවුන මල් 7 වර්ගයක්‌, පලතුරු 7 වර්ගයක්‌ ගෙන මේ සියල්ල පිඟානකට බෙදා දුම්මල පන්දමක්‌ දල්වා දුම්මල දුන්දී ගේ වටා තුන් වලල්ලක්‌ ගොස්‌ එය රැගෙන සොහොනක්‌ මත තබන්ට. මෙම බෙහෙත් වර්ග වියලා කුඩුකර තෙල් නව ජාතියකින් සිඳ පහත මන්තරයෙන් 1008 වරක්‌ ජපකර නිවසේ 4 කොන ගේ තුළ එල්ලන්න. නෙළුම් මල්, මුල්, අල. ඉරිවේරිය, උන කපුරු, ජසඳ කුංකුමප්පු, පුස්‌කර, කැකුන මද, කංසා, මුඩමහන, කුංකුමප්පු වදකහ, කොට්‌ටන්, අබිං කලං එකක්‌, කරල් සැබෝ, ගොඩ මානෙල් අල, මනෝසීල, හිරියල්, හෙල අබ යන ඖෂධ යොදා ගන්න.
ජප මන්තරය :ඕං නමෝ එංති ජාරේ පෝරුම් ත්‍රී කට්‌ටු වන්ත ප්‍රතීශ්වර කට්‌ටු ලොක නාථ කට්‌ටු ක්‍රෙම සූනියන් කට්‌ටු බන්ද පුට්‌ටු විෂ්ණු කදිර ප්‍රලෝක කට්‌ටු රාජ ස්‌ත්‍රී කට්‌ටු භෛරවාන් ත්‍රි යක්‍ෂ රාක්‍ෂ ප්‍රේත භූත කට්‌ටු හනුමා අංජනදේවි භෛරවා කට්‌ටු සූර්ය චන්ද්‍ර මණ්‌ඩල කට්‌ටු ත්‍රී කට්‌ටු ශක්‍ර බ්‍රහ්ම මණ්‌ඩලා ක්‍රීස්‌ කට්‌ටු ඊශ්වර ප්‍රතිශ්වර මංඩලන් කට්‌ටු භූමි භූෂණ කදිරපුර වල්ලි අම්මා ත්‍රිස්‌ කට්‌ටු සර්ව යක්‍ෂ රාක්‍ෂ ප්‍රේත ශාස්‌ත්‍ර ත්‍රී පර්වත හත කට්‌ටු නාරා ප්‍රතිරාජාං ථ්‍ර දිවමිං කට්‌ටු සර්ව යක්‍ෂ රාක්‍ෂණී කට්‌ටු පුට්‌ටු නමඃ
සියලු භූත, ප්‍රේත, යක්‍ෂ අමනුෂ්‍ය උපද්‍රවන් දුරුවේ. සියලු දෙවියන් ආරක්‍ෂා කරයි, තමා හිතූ දේවල් හීනෙන් පෙන්නා දෙයි. මෙම ආරක්‍ෂා තෙල් නිවසේ එල්ලා හරක්‌ මස්‌ බුදින්නන්ට වැඩ වරදින බව කිව යුතුයි.
රඹුක්‌කන ජිනදාස එදිරිසිංහඋපුටා ගැනීම දිවයින
