කතක වත උපන් නැකැතින් හෙළිවෙත

මෙලොව උපදින සෑම අයකුටම තම උපන් ජන්ම කේන්දරයට අනුව නැකැතක් හිමිවනු ඇත. ජේ‍යාතිෂයේ නැකැත් 27ක් තිබෙන අතර ඉන් එක් නැකැතක් ඔබේ කේන්දර සටහනේ දක්වා තිබේ. එය ඔබ උපන් නැකැතයි. මෙම ලිපියෙන් දක්වන්නේ කාන්තාවන්ගේ උපන් නැකැතට අනුව ජීවන තොරතුරු විස්තරයකි. ඔබ උපන් නැකැතට පැවසෙන විස්තර කෙසේ දැයි බලන්න.

අස්විද නැකැත :

මෙම නැකැතින් උපන් කාන්තාවන් බොහෝ විට පිරිසුදුව සිටීමට කැමැත්තක් දක්වන අතර වැඩිහිටි අයට ගෞරව කරයි. තම ස්වාමියාට ඉතා අවනතව කටයුතු කරන මැය විශාල ධන සම්පත් සඳහා හිමිකාරියක් වනු ඇත.

බෙරණ නැකැත :

බෙරණ නැකැත හිමි කාන්තාවගේ සිත් තුළ දුදන ගති දැකිය හැකිය. රණ්ඩු දබර ඇතිකර ගන්නා මෙම ලලනාවෝ තරමක බිය ගතියක්ද දක්වති. කොතරම් ඇඳුම් තිබුණත් කිලිටි වස්ත්‍ර ඇඳීම ඇයගේ සිරිතක් වනු ඇත. දිළිඳු ජීවිත ගත කරන මෙම නැකැතින් ඉපදී ඇති බොහෝ කාන්තාවෝ කාන්තා පිරිස් සමඟ එක්ව කටයුතු කිරීමට දැඩි රුචිකත්වයක් දක්වති.

කැති නැකැත :

කැති නැකැත හිමි කාන්තාව නිතර කලබලකාරී හැඟීම් ඇතිකර ගනී. සිතේ සන්සුන් බව අඩුය. යමකු තමාට වරදක් කළහොත් ඒ ගැන දිගින් දිගටම සිතමින් කල් ගෙවයි. මොවුන් කාටවත් යටත් වීමට වැඩි කැමැත්තක් නොපෙන්වයි. කැති නැකැත හිමි කාන්තාවන්ට නෑදෑයන් අඩු බව ජේ‍යාතිෂයේ සඳහන් වේ.

රෙහෙණ නැකැත :

රෙහෙණ නැකැතින් උපන් ලලනාවන් පිවිතුරු හදවතක්ද ඇති අය වේ. තම ස්වාමියාට තදබල ලෙස ආදරය කරන මෙම කාන්තාවන් මවුපියන්ටද දැඩි හිතවත් බවක් දක්වයි. මොවුන් උදේ‍යාගිමත්ව කටයුතු කරන අතර ධනවන්තියක් ද වේ. යහපත් දූ පුතුන් ලැබ වාසනාවන්ත දිවියකට මෙවන් කතුන් හිමිකම් කියයි.

මුවසිරස නැකැත :

මෙම නැකැතින් උපන් කතට සමාජයේ අන් අයගෙන් ගෞරව හිමිවන අතර පැහැපත් සිරුරක් හිම්වේ. තම අදහස් අනුවම තර්ක විතර්ක කරමින් කතාබහ ඉදිරිපත් කරන ඇයට සාර්ථක ජීවිතයක් ගත කිරීමේ වාසනා ගුණය උපතින්ම හිමි වේ. ධනයට දැඩිසේ ඇලුම් කරන අතර වාසනාවන්ත දූ පුතුන් ලැබෙනු ඇත. ආගමික කටයුතුවලට කැමැතිය.

අද නැකැත :

අද නැකැත හිමි කාන්තාවගේ චරිතය එතරම් යහපත් නොවන අතර නරක හැඟීම් නිතර ඇති වන බව පෙන්වයි. සතුරන්ගේ රහස් සෙවීමට දක්ෂතා දක්වන මැය දෙවියන් ඉදිරියේ ශක්තිමත්ව කටයුතු කරයි. මෙම කාන්තාවන් අනවශ්‍ය දේවල් සඳහා දැඩිසේ වියදම් කරයි.

පුනාවස නැකැත :

මෙම නැකැතින් උපන් කාන්තාව ඉතා චරිතවත් වාසනාවන්ත දිවි පෙවෙතක් ගත කිරීමේ භාග්‍ය උපතින්ම හිමි අයෙකි. ආගමික කටයුතුවලට දැඩි ඇල්මක් දක්වන මෙම කාන්තාවන්ට මෙහෙකරුවන් ද ලැබෙනු ඇත. අන් අයට බොහෝ සේ ගරු බුහුමන් දැක්වීම මෙම කාන්තාවන් තුළ දැකිය හැකි සුවිශේෂ ගුණාංගයකි.

පුෂ නැකැත :

මෙම නැකැත හිමි කාන්තාවන් ඉතා රූමත්ව උපදියි. යහපත් අදහස් ඇති මෙවන් කාන්තාවන් දැඩි ආගමික භක්තියකින් කටයුතු කරයි. ධන සම්පත් හිමිවන මෙම කාන්තාවන්ට යහපත් දූ දරුවන්ද ලැබේ. තම ඥාතීන් සමඟ සුහදව කටයුතු කරන මොවුන් මහත් සතුටින් කාලය ගතකරනු ඇත.

අස්ලිස නැකැත :

අස්ලිස නැකැතින් උපන් කතගේ චරිතය අයහපත් වන අතර දුකින් කාලය ගත කිරීමටද සිදුවේ. පව් කිරීමට රුචිකත්වයක් දක්වන මැය දරුණු ලෙස වචන කතා කරන අතර දැඩි ලෙස අහංකාර වේ. මෙම කාන්තාවන්ට විරුද්ධවාදීන් වැඩිවේ.

මා නැකැත :

මෙම නැකැත හිමි කාන්තාව ආගමික භක්තිය ඇති වාසනාවන්ත ජීවිතයක් ගත කිරීමේ වාසනා ගුණය උපතින්ම ලබයි. ධන සම්පත් හිමිකම් සහිත ඇයට අන් අයගේ ගරු බුහුමන් හොඳින් ලැබේ. සතුරන් නැසීමේ ගුණයක් මෙම නැකැතින් උපන් කාන්තාව තුළ පවතී.

පුවපල් නැකැත :

සෞභාග්‍යමත් දිවියකට හිමිකම් කියන පුවපල් නැකැතින් උපන් වනිතාවෝ සතුරන් අබිබවා තම ජයග්‍රහණ අත්කර ගැනීමේ හැකියාවක් ඇති අය වෙති. මොවුන් අවංකය. කඩිසරය. ඉගෙනීමට දක්ෂතා ඇත. සමාජයට වැඩදායක දරුවන් ලොවට දායාද කරන මෙම නැකැත් හිමි කාන්තාවන් සිය කතා ශෛලියෙන් අනුන් වසඟ කර ගැනීමට සමත් වේ.

උත්‍රපල් නැකැත :

නීතිගරුක ගෙදර දොර පාලනය හොඳින් දත් කාන්තාවන් උත්‍රපල් නැකැතින් උපදී. ක්‍රියාශීලී බවින් යුත් ධන සම්පත් හිමි කතුන්ට මෙම නැකැත හිමිය. රෝග ඇතිවීමේ තත්ත්වයන් අඩු නිතර සතුටින් ගත කළ හැකි වාසනාව හිමි කාන්තාවන්ය.

හත නැකැත :

හත නැකැතින් උපදින කාන්තාවන් නියම ගැහැනියකගේ ගති ලක්ෂණ දක්වන පියකරු නෙත් යුගලක් ලැබෙන නිහඬ දිවියක් ගතකරන අය වේ. විවිධ දේවල් සඳහා දක්ෂතා පෙන්වන එමෙන්ම ධනවත් විය හැකි චරිතවත් කාන්තාවන්ය.

සිත නැකැත :

සිත නැකැතින් උපදින ලලනාව අන් අයගේ සිත් වසඟ කරගත හැකි සරාගී අයකු වනු ඇත. බොහෝ විට දුප්පත් බවට පත්වීමටත් එමෙන්ම වෙසඟනක් වීමටත් මෙම ලග්නගත කාන්තාවන්ට ඉඩකඩ ඇති බවක් ජේ‍යාතිර් විද්‍යාව අනුව පෙන්වා දිය හැකිය.

සා නැකැත :

ඉතාමත් වාසනාවන්ත ජීවිත ගතකරන චරිතවත් ධනවත් අවංක කාන්තාවන් මෙම නැකැත ඇතිව උපදිනු ඇත. බොහෝ මිතුරු මිතුරියන් හිමිවේ. ධනවතුන් බවට පත්වන නමුත් මොවුන් ගමන් බිමන් සඳහා එතරම් වැඩි කැමැත්තක් නොදක්වයි.

විසා නැකැත :

ඇය යහපත් වචන කතා කරයි. ධන සම්පත් හිමිවේ. නිතර සතුටින් කාලය ගත කරයි. තම නෑදෑ පරපුරට දැඩි ඇල්මක් දක්වන විසා නැකැත හිමි කත ආගම් භක්තියෙන් යුත් කරුණාබර හදවතක් ඇති අයෙකි. තම ස්වාමිපුරුෂයාට දැඩි ගෞරවයක් දක්වයි.

අනුර නැකැත :

ආත්මාර්ථයට වඩා පරාර්ථය ගැන සිතන කතුන්ට මෙම නැකැත හිමිය. දේශපාලන කටයුතුවලින් ජය ලැබීමටද, රන්රිදී ආභරණ ලැබීමේ වාසනා ගුණයද ඇයට නිතැනින්ම ලැබෙනු ඇත. තම සහකරුවාට දැඩි සේ ප්‍රේම කරන මෙම කතුන්ට යහපත් මිතුරු මිතුරියන්ද ඇති වනු ඇත.

දෙට නැකැත :

මිහිරි කටහඬක් හිමි ගුණවත් කාන්තාවන්ට මෙම නැකැත හිමි වන අතර වාසනාව හා පෙර පින් මහිමය නිසා පින්වත් දුවා දරුවන් ලැබෙනු ඇත. අවංක චරිතවත් භාවයෙන් යුත් දෙට නැකැත් හිමි කත මිතුරු ඇසුරට ඉතා යහපත්ය. ධනවත් වීමේ වාසනා ගුණයද හිමිවන ඇයගේ පවුලේ දියුණුව ශීඝ්‍රයෙන් ඇති වේ.

මුල නැකැත :

බොහෝ විට මඳකලක් සතුටින් දිවි ගෙවන නමුත් පසුව දුක්බර තත්ත්වයට පත්වන අවස්ථා දැකගත හැකිය. සෞඛ්‍ය තත්ත්වයද පිරිහුණු තත්ත්වයක් ඇති වන අතර සතුරු කරදරද ඇත. තම ඥාති හිත මිත්‍රාදීන්ගෙන් එතරම් ප්‍රයෝජනයක් නොලැබෙන අතර අන් අයගෙන් නින්දා අපහාස ඇති වීමද සිදුවේ.

පුවසල නැකැත :

මෙම නැකැත හිමි වනිතාවන් ඉතා ප්‍රිය මනාප එමෙන්ම බලවත් තත්ත්වයට පත්වන අය වේ. ඥාතීන් අතර ප්‍රධාන තැනක් ලැබෙන අවංක කාරුණික තරුණියන් මෙම නැකැතින් උපදී. පිරිපුන් දුටු දුටුවන් වශී කරන ශරීරයක් හිමිය.

උතුරුසල නැකැත :

තම කීර්තිය දසත පතුරුවයි. සමාජයේ කැපී පෙනෙයි. විවාහයෙන් පසු තම ස්වාමියාට අවශ්‍ය සැප සම්පත් ලබාදීමේ හැකියාව මෙවැනි කතුන්ට තිබේ. ප්‍රීතියෙන් තම ජීවිතය ගත කිරීමට දැඩි කැමැත්තක් දක්වයි. විනෝදයට කැමැති අතර පින් දහම්වලද නිතර යෙදේ.

සුවණ නැකැත :

මෙම නැකැතින් උපන් කාන්තාවෝ බුද්ධිමත් වන අතර ජේ‍යාතිර් විද්‍යාවටද කැමැත්තක් දක්වති. ඉගෙනීමේ හැකියාවන්ද ඇති මොවුන් වැඩිහිටියන්ට හොඳින් සලකයි. මෙම නැකැතින් උපන් කාන්තාවෝ ආගම ධර්මය කෙරෙහිද දැඩි පැහැදීමකින් ක්‍රියා කරනු ලබති.

දෙනට නැකැත :

දෙනට නැකැතින් ජන්ම ලාභය ලැබූ ළඳුන් කතාවට දක්ෂ වන අතර ආහාර පාන ඇඳුම් පැලඳුම් නොමඳව ලබයි. සහකරුට බලවත් සේ ආදරය කරන අතර යහගුණ පිරි දරුවන් සමාජයට දායාද කරයි. මෙම කතුන් අවංක චරිතවත් ගති ලක්ෂණ විදහා දක්වන අතර ලේඛන කලාවටද දස්කම් විස්කම් දක්වයි.

සියාවස නැකැත :

මෙම නැකැතින් උපන් කතුන් තම හැඟුමන් යටපත් කරගෙන දිවි ගෙවීමට සමත් වේ. අන් අය සමඟ ප්‍රියමනාපව කටයුතු කිරීමේ මනා හැකියාවක් ඇයට ඇත. වැඩිහිටියන්ට ගරු කරන කාන්තා ගෞරවය ලැබෙන නෑදෑයන්ගේද ගරු කිරීම් හිමිවන කාන්තාවන් මේ නැකැතින් උපදී.

පුවපුටුප නැකැත :

මෙම නැකැතින් උපන් අය මහා ධන යෝග හිමි අය වෙති. හොඳ අධ්‍යාපනයක් තුළින් සමාජයේ ඉහළ ස්තරයකට යෑමේ හැකියාවක් මෙම කතුන්ට තිබේ. තම දරුවන්ට දැඩි සෙනෙහසක් දක්වන මෙම ලලනාවන් පින් දහම් කටයුතුවලටද දැඩි කැමැත්තක් දක්වති.

උත්‍රපුටුප නැකැත :

තම ස්වාමියාගේ ආදරය නිතැතින්ම නොමඳව ලබයි. එමෙන්ම ඇය තම සහකරුට දැඩිව කැපවූ දිවියක් ගත කරනු ඇත. බුද්ධිමත් උපායශීලී යහපත් ගතිගුණවලින් යුක්තය. මොවුන් ගේ දොර වත්ත පිරිසුදුව තබා ගැනීමට දැඩි සේ උනන්දු වේ.

රේවතී නැකැත :

මොවුන් අන් අය සමඟ සහයෝගීව ජීවත්වන ගුණවත් අය වෙති. ඕනෑම බාධකයක් ජය ගැනීමේ දැඩි ආත්ම ශක්තියක් මෙම නැකැත් හිමි කාන්තාවන් තුළ සහජයෙන් උරුම වී ඇත. මොවුන් යමක් කිරීමට පෙර ඒ ගැන දූරදර්ශීව සිතා බලා ක්‍රියා කරනු ඇත.

ජේ‍යාතිර්වේදී එම්. උපුල් ජයශ්‍රී ද සිල්වා 0718136471උපුටා ගැනීම මව්බිම