සුබපල දෙන ස්‌ත්‍රී දේහ ලක්‍ෂණ
දේහ ලක්‍ෂණයන් උපයෝගි කරගෙන අපේ පැරැන්නන්ට අනාවැකි කීමේ පුදුම හැකියාවක්‌ විය. එය එකල වූ සාමාන්‍ය ජනයා වුවද දැන සිටියාට සැක නැත. සම්පූර්ණයෙන් නොවුවත් මඳ වශයෙන් හෝ දැන සිටියා යෑයි කියතොත් නිවැරදිය. දැනුදු අතරින් පතර කීප දෙනකු නැතුවා නොවේ. පුරුෂ දේහ ලක්‍ෂණයන්ටත් වඩා ස්‌ත්‍රී දේහ ලක්‍ෂණ ගැන අප සමාජයේ බොහෝ දෙනා දනී. ඒවා ගැන සැලකිලිමත් භාවයකින්ද යුක්‌ත වේ. විශේෂයෙන්ම විවාහයකට ස්‌ත්‍රියක්‌ තෝරාගැනීමේ දී මේ ගැන වඩාත් සැලකිලිමත් වන බවද එසේ වූ අසුබ ස්‌ත්‍රී දේහ ලක්‍ෂණ වෙතොත් ඒ මංගල්‍යය නොකර සිටීමට තරම් අද සමාජය මේ ගැන සැලකිලිමත්ය. ඔවුන් එසේ කරනුයේ මේ ගැන පොත පතක තිබූ පමණට හෝ කවුරුන් හෝ කියූ පළියටම නොවේ. අත්දැකීමෙන්ම දන්නා කරුණු නිසාය. මෙම ලිපියෙන් විස්‌තර කෙරෙන්නේ ස්‌ත්‍රියට සුබඵල ගෙන දෙන දේහ ලක්‍ෂණ කිහිපයක්‌ පිළිබඳවය. ඇතැම් ඒවා ඔබ දැනටමත් දන්නවා විය හැකිය. කෙසේ වෙතත් නොදන්නා අයද නැතුවා නොවේ. කාගේ කාගේත් දැන ගැනීම පිණිස මතක්‌ වීම පිණිස ඒවා පහත විස්‌තර වේ. තවද කිවයුතු විශේෂ කරුණක්‌ වේ. එනම් ස්‌ත්‍රියකගේ අසුබ දේහ ලක්‍ෂණ පිළිබඳ පමණක්‌ සැවොම විමසිලිමත් වන බවය. එය එසේ නොවිය යුත්තකි. මහත් සුබඵල දෙන ලක්‍ෂණ කිහිපයක්‌ම දේහ එක්‌ අසුබ ඵලයක්‌ ගැන කතා නොකිරීමම මැනවි. බොහෝ දෙනා සොයන්නේද අසුබ පැත්තමය. ඒ අද සමාජයේ හැටිය. දැන් දේහ ලක්‍ෂණ පිළිබඳ විමසමු.
- යම් ස්‌ත්‍රියකගේ නාසා පුට කුඩාවට පිහිටා සමාන වට ප්‍රමාණයෙන්ද යුක්‌ත නම් ඇය කා සමගත් සුහද ලෙස ජීවත් වන්නට උත්සාහ කරයි. යමෙකු තමා වෙත තැබූ විශ්වාසය කිසිදිනක බිඳ දමන්නේ නැත. අන්‍යයන්ගේ අදහස්‌වලට ගරු කරයි. කරුණාවන්ත වූ අනුකම්පා සහගත සිතක්‌ ඇති, සාමකාමි ලෙස වැඩකටයුතු කළ හැකි වූද ඇත්තියකි. සැප සම්පත්, ධන ධාන්‍ය ඇතිව ජීවිතය සුදුසු සේ සකස්‌ කරගන්නට හැකිවේ.
- යම් ස්‌ත්‍රියකගේ දෙකන් එල්ඛෙන ස්‌වභාවයෙන් හා වටවූ ආකාරයෙන් පිහිටියේ නම් සෙමෙන් සෙමෙන් දියුණුව කරා පා නගයි. කරන දේ සිතට එකඟව කරයි. හොඳ සෞඛ්‍ය තත්ත්වයක්‌ සහ විශාල ව්‍යාපාරවලින් හොඳ ප්‍රතිඵල ඇතිවේ. ඉතා හොඳ ඥන ශක්‌තියක්‌ ඇතිවේ. සිතීමෙන් සහ අදහස්‌වලින් බලවත් වේ. අනෙක්‌ පුද්ගලයන්ගේ සිත් ගැනීමට දක්‍ෂ වේ. උගතුන්ට නැණවතුන්ට ගෞරව කරන්නියකි. කරන කුමන කටයුත්තක්‌ වුවද ප්‍රවේශම් සහිතව කරයි.
- යම් ස්‌ත්‍රියකගේ ගෙල අඟල් හතරක්‌ පමණ දික්‌ව මනා සේ පිරුණු බවින්ද, යුතුව ප්‍රියමනාප ලෙස වටවූ ආකාරයෙන් පිහිටියේ නම් සමාජය තුළ ගෞරවයට පාත්‍ර වන්නියකි. ඉතා හොඳ අනාගතයක්‌ සහ ජීවිතයේ හොඳ ප්‍රතිඵල ඇතිකර ගනී. තම සැමියාට ඉතා හිතවත්ව ක්‍රියා කරන්නීය. නියම ආදරයක්‌ ඇතිකර ගනී. වෙනත් පිරිසිදු ආදරය සහ පරාර්ථකාමී, හොඳ චරිතවත්, නිදහස්‌, ගුණවත්, ස්‌ථිර ආදරයක්‌ ඇති කෙනෙකි. කොට ඛෙල්ල ඇති ස්‌ත්‍රිය ධනවත් වන්නීය. කලබල අඩු නිස්‌කලංක පරිසරවලට ප්‍රිය කරයි.
- යම් ස්‌ත්‍රියකගේ අත්ල පිරිසිදුව රේඛාවලින් ගැවසුණි නම් යහපත් ගත් පැවැතුම් වලින් යුක්‌ත වන්නීය. සෑම කටයුත්තකදීම ශූර බවින් යුතුය. ඉතා විනීත ලෙස හැසිරෙයි. අන් අයගේ ප්‍රසාදයට ලක්‌වන සිතුම් පැතුම්වලින් යුක්‌ත ඇත්තියක්‌ වෙයි. යම් ස්‌ත්‍රියකගේ අත්ලෙහි දකුණට කැරකැවුණු රේඛාවක්‌ වූයේ නම් දීප්තිමත්, බුද්ධිමත්, දක්‍ෂතාව ඇති දියුණුව සහ ප්‍රසිද්ධීය, කීර්තිය ලබාගනී. අන් අය අතර ජනප්‍රිය වේ. බලාපොරොත්තු නැති ලැබීමක්‌ හිමිවේ. නැතහොත් නොසිතූ ආකාරයට තත්ත්වය උසස්‌ වේ. කුඩයකට හෝ සක්‌ ගෙඩියකට සමාන රේඛා ලක්‍ෂණ අත්ලේ පිහිටියේ නම්ද එසේමය. විවාහ දිවියේ ගුණධර්ම රකින්නීය. දරුඵල සහිතය. කාන්තා අත්ලක මාළුවකුගේ ලකුණ පිහිටීමද දරුඵල පෙන්වන ලක්‍ෂණයකි.
- මඳක්‌ දිග සුදු පැහැති නිය පිහිටා ඇති ස්‌ත්‍රිය වාසනාවන්තය. පරාර්ථය ප්‍රියකරන්නාවූ සෘජු අදහස්‌ නිතැතින් පහළ වෙයි. ස්‌ථිරසාර වූ බුද්ධිමත් කතා විලාශයක්‌ පවතී. විනීත ගති පැවැතුම් ඇති ඉතා අවංකව ක්‍රියා කරන ස්‌ත්‍රියකි. ස්‌වභාව සෞන්දර්යයට ඇලුම් කරයි. යමෙකු සමඟ ඉක්‌මනින් අමනාප නොවේ.
- යම් ස්‌ත්‍රියකගේ රෝම කූපයන්හි ඉතා සිහින් වූ රෝම එක බැගින් පිහිටියේ නම් ඉතාමත් ඉසුරුබර දිවියක්‌ ගත කිරීමට උපතින්ම භාග්‍යය හිමිකර ගෙන ඇත. කැපී පෙනෙන ලක්‍ෂණයක්‌ සහ පැහැදිලි දියුණුවක්‌ ඇතිවේ. නොයෙක්‌ මාර්ගවලින් මුදල් උපයයි. හෙවත් බොහෝ කටයුතු කෙරෙහි සමත්කම් දක්‌වයි.
- උස්‌ වූද මහත් වූද පුළුල් උකුලක්‌ යම් ස්‌ත්‍රියකට පිහිටියේ නම් විවෘත හදවතක්‌ ඇයට හිමිය. කියන දේ කෙළින්ම කියන්නට පෙළඹේ. බොහෝ හිත මිත්‍රාදීන් ඇතිවේ. හොඳ තීක්‍ෂණ බුද්ධියක්‌ද, දුරදක්‌නා නුවණක්‌ද වේ. අන්‍යයන්ගේ ගෞරවාදරයට පාත්‍ර වන අතර යහපත් විවාහයකටද උරුමකම් කියයි.
- යම් ස්‌ත්‍රියකගේ උදරය මෘදු මොලොක්‌ව මසින් යුක්‌ත වේ නම් ඇගේ අනාගතය ඉතා දීප්තිමත් වේ. තම අභිලාෂයන් සම්පූර්ණ කරගනී. ශරීර සනීපයට හෙවත් නිරෝගීභාවයට හේතුවේ. පවුලේ සාමාජිකයන්ගෙන් උදව් ලැබේ.
- යම් ස්‌ත්‍රියකගේ දණහිස්‌ දෙක මසින් පිරි ඉතා බරවද, ප්‍රිය මනාපවද පිහිටියේ නම් සන්තෝෂවත් සහ සමෘද්ධිමත් විවාහ ජීවිතයකට උරුමකම් කියයි. හොඳ සහකරුවකු ලබා ගැනීමට හැකිවෙයි. සිය ස්‌වාමිපුරුෂයාටද යහපත්ය. සත්‍ය කතාකරන අයට ලැදිය.
- පාදයේ මහපට ඇඟිල්ල උස්‌ව, මඳක්‌ වටකුරුව පිහිටියේ නම් එම ස්‌ත්‍රිය ඉතා භාග්‍යසම්පන්නය. විශාල ධනයක්‌ හෝ සමෘද්ධිමත් ජීවිතයක්‌ ඇති කරයි. ඥතීන්ගෙන් උදව් උපකාර ලැබේ. උසස්‌ සමාජය සමඟ සම්බන්ධකම් ඇතිකර ගනී.
- පාදයේ නිය තඹ පැහැයෙන් යුක්‌තව වටව සිනිඳුව පිහිටීමද එම ප්‍රතිඵලයම අත්වේ.
- යම් ස්‌ත්‍රියගේ විළුඹ සාමාන්‍ය ප්‍රමාණයෙන් යුක්‌ත වේ නම් ඇය ධන ධාන්‍යාධි සැප සම්පත් ලබන්නීය. අබිමානයෙන් යුතුවේ. රහස්‌ සඟවන්නේ නැත. යමක්‌ දුටු පමණින් කිරීමට හැකි කෞෂල්‍යකින්ද, ශූර ගතියකින්ද යුක්‌ත වේ. විශේෂයෙන් විරුද්ධ ලිංගිකයන්ගෙන් උදව් උපකාර ලැබේ.
- තිලකයට සමාන වූ ලකුණක්‌ යම් ස්‌ත්‍රියකගේ නළලෙහි පිහිටියේ නම් ඇය නීතිගරුක වේ. උගතුන්ට සලකයි. සැමියාට ඉතා හිතවත් ලෙස කටයුතු කරයි. උසස්‌ අයගේ ප්‍රසාදයට භාජන වේ.
- හිසකෙස්‌ තද කළු පැහැයෙන් යුතු, පියයුරු එකිනෙකට තදවී ඇති, පැහැදිලි සම්පූර්ණයෙන් විවෘත වූ ඇස්‌ ඇති ස්‌ත්‍රියද, කලවා දෙක ඇත් සොඬක්‌ සේ මනාව පිහිටි ස්‌ත්‍රියද වාසනාවන්ත වන්නීය. තමන්ගේ පවුලට, දූ දරුවන්ට, නැදැයින්ට, ඉටුවිය යුතු යුතුකම්ද නොපිරිහෙලා ඉටු කරන්නීය. දැඩි ආත්ම ශක්‌තිය නිසා අන්‍යයන් අතර කැපී පෙනෙන බැවින් ප්‍රධානත්වය හිමිවේ. අන්‍යයන්ගේ පැසසුමටත් ගෞරවයටත් පාත්‍රවේ.
- උකුල හා උකුල් සන්ධි පිරුණු බවින් යුක්‌ත වූයේ නම් ඇය ශක්‌තිමත් සහ සෞඛ්‍ය සම්පන්න දරුවන් ලබයි. නායකත්වයට සුදුසු, විරුද්ධ පාර්ශ්වයේ අවධානය දිනා ගැනීමට සමත්, ප්‍රසිද්ධිය හා කීර්තිය හිමිකර ගන්නා එක්‌ භාග්‍යවත් දරුවෙකු ඒ අතර වේ. මඳක්‌ වටකුරු වූ සාමාන්‍ය ප්‍රමාණයේ තොල් රතු පැහැතිනම් ඇය විවාහ දිවියේ ගුණධර්ම රැකගනී. සැමියාට ඉතා හිතවත් ලෙස කටයුතු කරයි.
- උරහිස්‌ දෙක කොටට. ඝනව, ගැඹුරින් පිහිටීමද සෘජුව පිහිටි නාසයද යහපත්ය.
මංජුල තරුකෙම
උපුටා ගැනීම දිවයින පුවත් පත
