අනාවැකි කියන උපන් ලප
සෑම පුද්ගලයකුගේම ශරීරයේ කොතැනක හෝ උපන් ලපයක් සේ ලප කිහිපයක් ඇත. පිටතින් ඕනෑම කෙනකුට දැකිය හැකි ශරීරයේ ස්ථානයක ඇතැම් ලප පිහිටා ඇත. එසේම ඇඳුමින් ආවරණය වූ ස්ථානවලද ලප පිහිටයි. සමහරක් ලප තමාටම කණ්ණාඩියක් ඉදිරිපිට ගිය විට දැකිය හැකිය. සමහරක් ලප තමාට වුවද දැකීම අසීරු වුවත් බාහිර පුද්ගලයකුට දැකිය හැකිය. උපන් ලපයද කෙනකුගේ අනාගතය දක්වන්නකි. චරිත ස්වභාවයද සංකේතවත් කරවන්නකි. මතු සිදුවන සුබ හෝ අසුබ සිදුවීමක පෙර නිමිත්තක්. මෙම ලපයන්හි හැඩද විවිධය. වටකුරු ලප, දිගටි ලප, කෝණාකාර ලප, ද්විත්ව ලප යනුවෙන් ලප වර්ග කළ හැකියි. එපමණක් නොව ලප වල වර්ණයද විවිධය. ඇතැම් ලප කළුය, මී පැණි වැනි, ලා වර්ණ රෝස පාට වර්ණ වශයෙන් පිහිටයි. සාමුද්‍රිකා ශාස්ත්‍රයේද අත්ලේ හා පිටි අල්ලේ පිහිටන ලප වලින්ද පලාපල කියැවේ. චරිතය, අනතුරු, රෝග ආදිය ප්‍රකාශ කරයි. කළු ලප, රතු ලප ආදී වශයෙන් අත්ලේ මණ්ඩලවලද, රේඛාවලද පිහිටීමෙන් පලාපල කියන ක්රම සාමුද්‍රිකා ශාස්ත්‍රය තුළ ඇත. මෙම උපන් ලප ක්‍රමවේදය තවත් එකකි. අත්ලේ පමණක් නොව යටි පතුලේද පිහිටි ලප හා සලකුණු මඟින් කියන ශාස්ත්‍රයක්ද වේ. සිද්ධාර්ථ ගෞතමයාණන්ගේද යටි පතුලේ මංගල ලක්‍ෂණ රාශියක් පිහිටා ඇත. බොහෝ කාන්තාවන්ගේ හා පිරිමින්ගේද යටි පතුලේ ලප පිහිටයි. අපේ ජේ‍යාතිෂයේදී ශරීරයේ ස්ථාන රාශි අනුව වර්ග කර ඇත. රාශි දොළහට සහ මේෂ, වෘෂභ, මිථුන, කටක, සිංහ, කන්‍යා, තුලා, වෘශ්චික, ධනු, මකර, කුම්භ, මීන වශයෙනුදු ශරීරයේ ස්ථාන හා අවයව වෙන් කෙරේ. එකී ස්ථානයන්හි පිහිටන ලප එකී ස්ථානවල ඉන්ද්‍රියන්ටද (අභ්‍යන්තර හෝ බාහිර) බලපායි. එක් ස්ථානවල ලප පිහිටීම ග්‍රහ ගමනේදීද ගෝචර වශයෙන් බලපෑමක් ඇති කරන බව මෙම ශාස්ත්‍රයෙන් පැහැදිලි කර ඇත.
වටකුරු ලපයක් පිහිටා ඇත්නම් වාසනාවන්තය. කළු ලපයක් පිහිටා ඇත්නම් කරදර බාධක වැඩිය. මී පැණි පැහැය ලපයක් නම් වාසනාව ගෙන දේ. දකුණු පස පිහිටි ලපය වාසනාවන්තය. වම් පස පිහිටි ලපය අසුබ පල ගෙන දේ. ලප දෙකක් එක ළඟ පිහිටියේ නම් ද්විත්ව බලපෑමක් එල්ල කරයි. ප්‍රේම සම්බන්ධයකදීද තදින් අපට බලපෑම් ඇතිවේ. ඇතැම් උපන් ලප පෙර ආත්මවල සිදුවීම් සටහන් කරයි. පුනර්භව කථනවලදී අනතුරු, වෙඩි වැදීම්, පිහි ඇනුම්වල සලකුණුද සංකේතවත් වන බව හෙළිදරව් වී ඇත. තවද හිසෙයි, නළලෙහි ලපයක් වී නම් මේෂ ලග්නයට අයත්ය. එවිට කුජ බලපෑම පෙන්නුම් කරයි. කුජ මහ දශාවේදී හෝ කුජ අතුරු දශාවේදී හෝ ගෝචර ගමනේදී හෝ පළමු රාශිය මඟින් ගමන් කරන විට හෝ තුවාලයක්, අනතුරක් හිසේ රෝගයක් හෝ හදයි. මේ අනුව සිරුරේ ස්ථාන ගැනද කියැවෙන රාශි අවබෝධයක් ලැබිය යුතුය.
- මේෂ - හිස
- වෘෂභ - මුහුණ, ගෙල, ඇස, නාසය
- මිථුන අත්, උරහිස, කන, ඉළ
- කටක - පපුව, බඩ, වැළමිට
- සිංහ - හෘදය, පිට, යටි බඩ
- කන්‍යා - වකුගඩු, උදරය, අධෝ මාර්ගය
- තුලා - මුත්‍රාශය, යටි බඩ
- වෘශ්චික - අණ්ඩකෝෂ, ඉකිළි
- ධනු - කලවා, උකුල, පාද
- මකර - දණහිස්, ඉකිළි
- කුම්භ - පාද, වළලු කර, වම් කන, දත්
- මීන - පාද, වම් ඇස, පා ඇඟිලි
මින් ඉදිරියට ශරීරයේ ස්ථානවල පිහිටි උපන් ලපවලින් හෙළිවෙන ප්‍රතිඵලය දැන ගනිමු. කම්මුල - කම්මුලෙහි ලපයක් පිහිටියේ නම් සංවේදී පුද්ගලයෙකි. දකුණු කම්මුලේ පිහිටි ලපය හේතුකර ගෙන සාර්ථක කෙනකු වේ. වෙනත් මහන්සි වී උපයා සමෘද්ධිමත් වේ. වම් කම්මුලෙහි පිහිටි ලපය නිසා එතරම් සාර්ථක නොවේ. නිකට - නිකටෙහි ලපය ඇත්තා කලාත්මක අරමුණු ඇත්තෙකි. ත්‍යාග සම්මාන පවා ලබයි. වාසනාවන්තය. උදාර ගති ඇත. කාරුණිකය. වැදගත්ය. මේ ලප පිහිටි කාන්තාව ස්වාමියට ළැදිව ආදරය කරයි. තොල් - තොල්වල ලපය ඇති තැනැත්තා ස්වභාවයෙන්ම රාගාධිකය. නිතරම හොඳ තත්ත්වයෙන් ජීවිතය ගත කිරීමට උත්සාහවන්තය. උඩු තොලේ ලපයක් පිහිටියේ නම් පෝසත් වේ. යටි තොලේ ලපයක් වී නම් වයස් ගතවන විට දියුණු වේ. සාමකාමී ජීවිතයකට කැමැතිය. ඇස් - ඇස් ඇතුළත ලපයක් වී නම් ස්වභාවයෙන්ම රාගාධිකය. ඇස් පිටත කොනේ ලපයක් වී නම් ස්වභාවයෙන් සත්‍ය ගරුකය. ගෞරවාන්විතය. ප්‍රේමාන්විතය. දකුණු ඇස අසල ලපයක් වී නම් බලවත් කෙනකු වේ. වම් ඇස අසල ලපයක් වී නම් ආවේගශීලීය. සංවේදීය. ඇහි බැම - දකුණ ඇහි බැමේ ලපයක් වී නම් ඉක්මන් හෝ කල්වේලා ඇතිව විවාහය සිදුවේ. සතුටු විවාහයකි. ක්‍රියාශීලීය. සාර්ථක ජීවිතයකි. වම් ඇහි බැම ලපයක් වී නම් රහසිගත ක්‍රියාවන්ද, ආත්මාර්ථකාමී බවද, ප්‍රතිපාර්ශ්වය කෙරේ ඇදී යන ස්වභාවයක්ද වේ. නළල - නළල මැද ලපයක් වී නම් නපුරුය. ඉක්මන් කේන්ති යන අයෙකි. ධනය ලැබේ. පී්‍රතිමත් ප්‍රේම සම්බන්ධයකි. නළලේ දකුණු පස ලපයක් වී නම් නායකත්ව හැකියා ඇත. නළලේ වම් පස ලපයක් වී නම් මුදල් පරිහරණයේද අපරික්‍ෂාකාරීය. ඉතිරි කිරීම් අසීරුය. පාදය - ඥානවන්තය, බහුශ්‍රැතය, සංචාර බොහෝය. බෙල්ල - බෙල්ලේ ඉදිරිපස ලපයක් වී නම් කලාත්මක දක්‍ෂතා ඇත. බලාපොරොත්තු නොවූ පරිදි ලැබීම් ඇත. බෙල්ලේ ඉදිරිපස දෙපැත්තේ කොතැනක හේ ලපයක් වී නම් නොසිතූ පරිදි ධන ලාභ හිමිවේ. උසස් සාර්ථකත්වයක් හිමිවේ. බෙල්ලේ පිටිපස ලපයක් වී නම් ජලයෙන් අනතුරු වීමට හේතු යෙදේ. අත් - දකුණු අතේ හෝ මැණික් කටුව පෙදෙසේ ලපයක් වී නම් වැඩිපුර වියදම් සිදුවේ. අත්ලෙහි මැද ලපයක් වී නම් නිරෝගීය, ඉතාමත් සමෘද්ධිමත් වේ. ධනවත් වේ. දකුණු පපුවේ කළු ලපයක් වී නම් කම්මැළි, අසංවර සැප සම්පත් නැති කෙනකු වේ. මී පැණි පැහැති ලපයක් වී නම් ධනවත්, සමෘද්ධිමත්, සැමියා / බිරිය සමඟ ලිංගික සතුට විඳිය හැකි පිරිමි දරුවන්ද ලබන්නෙකි. වම් පපුවේ කළු ලපයක් වී නම් අවාසනාවන්ත ජීවිතයක්. ප්‍රේමය සම්බන්ධ කටයුතුවලදී සැලකිලිමත් විය යුතුය. නාසය - නාසය මුල මුදුනේ ලපයක් වී නම් අවංක, දක්‍ෂ කෙනෙකි. විවාහයද සාර්ථක එකකි. නාසයේ දකුණු පස ලපයක් වී නම් සංචාරයෙන් සාර්ථක ප්‍රතිඵල ලබයි. වම්පස ලප වී නම් අනපේක්‍ෂිත අනතුරුවලට ලක්වේ. උගුර - උගුරේ ලපයක් වී නම් ව්‍යාපාර ආදියෙන් සාර්ථක වීම හා ධනවත් වීම සිදුවේ. තන පුඬුව - පිරිමියෙකුගේ තන පුඩුවේ ලපයක් වී නම් කාමුකය. ප්‍රේම සබඳතා රැසකි. කාන්තාවගේ නම් නිතරම හොඳ සමාජ තත්ත්වයක් පවත්වා ගැනීමට උත්සාහ දරයි. පියයුරු - වම් පියයුරේ ලපයක් වී නම් නොසැලකිලිමත් කෙනෙකි. මුදල් සම්බන්ධව අපරික්‍ෂාකාරීය. වියදම් කිරීමේදී පාලනයක් නොමැත. මොළයේ රෝගාබාධයකට ඉඩ ඇත. දකුණු පියයුරේ ලපයක් නම් ව්‍යාපාරාදියේදී දක්‍ෂය. අත් - දකුණු අතේ ලපයක් වී නම් ජීවිතයේ මුල් කාලය ගැටලු හා කරදර සහිතය. වැළමීට සමීපයේ නම් එම ප්‍රතිඵල ඉක්මනින් යෙදේ. දකුණු අතේ පහළ නම් වැඩිපුර කරදර එසේම යෙදේ. වම් අතේ පහළ කොටසේ නම් සාර්ථකත්වය බලා වෙහෙස වී ධනවත් වන කෙනෙක්. උපතේ සිට පිහිටන ලද විනා පසුව පිහිටන ලප, බිබිළි, ඉන්නන්, හම කළු පැහැවීම්, තුවාල කැළැල් මේ ශාස්ත්‍රයේ ලා සලකනු නොලැබේ. මෙසේ උපන් ලපවලින් ඕනෑම කෙනකුගේ චරිතය, ගති ගුණ, දියුණුව පිරිහීම වටහා ගත හැකිය. පෙර ආත්මභාවයන්හි සිට පැවැත ආ පවු පින්ද, වර්තමාන භවයේ ඒ අනුව හිමිවන තත්ත්වය හා ජීවිතයද සංකේතවත් කරන්නකි.
අංක විද්‍යා ජේ‍යාතිෂවේදී, කලාභූෂණ ජේ.ඒ.ඩී. පෙරේරාඋපුටා ගැනීම මව්බිම පුවත්පත
