ලග්නයට හිමි රැකියාව - කුම්භ ලග්නය
- කුම්භ ලග්නයට අධිපති ලග්නාධිපති සෙනසුරු ග්‍රහයා වන අතර රැකියාව පිළිබඳව කියැවෙන දහ වැන්න අඟහරුට හිමි වෘශ්චික රාශියයි. අඟහරු ග්‍රහයා දහ වැන්න තුළම සිටී නම් රුචක යෝගය උදා කරයි. ස්ථීර රැකියාවට උපතින්ම වාසනා බලය රැගෙන ආ අයෙකි. ආරක්‍ෂක අංශවලට යොමු වුවොත් ඉහළ තනතුරු ලබයි. ඔබ බලාපොරොත්තු නොවූ මොහොතක හදිසියේම රැකියාවකට ඇරැයුම් ලබන අතර, උනන්දුවෙන් උත්සාහයෙන් රැකියාව කරන අයෙකි. තමන්ට වියදමට සරිලන වැටුපක්ද ලබයි.
- බුධ ග්‍රහයා දහ වැන්න තුළ සිටී නම් ඉන්ජිනේරුවකු විය හැකිය. කුඩා කල උනන්දුවෙන් ඉගෙන ගත්තොත් අනිවාර්යයෙන්ම ඉන්ජිනේරුවකු විය හැකියි. ඔබ පරිගණක තාක්‍ෂණය ඉහළින්ම ලබයි. ගණිත විෂයන්වලට දක්‍ෂයෙකි. බැරි වෙලාවත් ඔබ තුලා, වෘශ්චික, ධනු යන නවාංශකයක් හිමි අයකු නම් රැකියාව තරමක් බාධක ඇති කරන අතර, ඉක්මන් කෝපය නිසා රැකියාව අහිමි කර ගනී.
- ගුරු දහ වැන්න තුළ නම් ඉතාම හොඳ පිහිටීමකි. ඔබ මූල්‍ය ආයතනවල ප්‍රධාන තනතුරක් දරන අයකු විය හැකිය. රැකියාව ස්ථීරයි. රැකියාවට අමතරව බාහිරව ආදායම් මාර්ග මඟින් උපයා ගනී. ගුරු වෘත්තිය, බැංකු, විශාල ව්‍යාපාර ආදියේ හිමිකරුවකු විය හැකිය.
- සිකුරු දහ වැන්න තුළ නම් ඔබට යෝග කාරක ග්‍රහයා කර්මස්ථාන ගත වීම ප්‍රබල පිහිටීමකි. රැකියාවක් ලැබීමට පෙර පින පෑදෙයි. දෙන දෙවියෝ ගෙදරට ගෙනත් දෙයි. නිසි කලට වේලාවට හොඳ රැකියාවක් ලබයි. නිල නිවාස ප්‍රවාහන පහසුකම් ලබන අතර, සතුටින් විනෝදයෙන් කැමැත්තෙන් යුක්තව රැකියාව කරන අයෙකි. අධ්‍යාපනයට බාධා ඇති වුවොත් වෙනත් වෘත්තීය හැකියාවන් ලබයි. ඇඟලුම් ක්‍ෂේත්‍රය තුළ ඉහළ තනතුරු ලැබීමට භාග්‍ය ඇත.
- ශනි ග්‍රහයා දහ වැන්න තුළ නම් ශනිට සතුරු රාශියකි. නමුත් ලග්න අධිපතියා නිසා අහිතකර තත්ත්වයන් මඟහැරෙයි. හොඳ රැකියාවකට ග්‍රහ බලය ඇත. නමුත් තරමක් වෙහෙස වී කය වෙහෙසවා වැඩ කිරීමට සිදුවෙයි. ඔබ උගත් අයකු වී ඉන්ජිනේරු මහතකු වුවත් අව්වේ සිටිමින් මාර්ග ඉදිකිරීම් ගොඩනැඟිලි ආශ්‍රිතව නිතරව රැකියාවක් කරයි.
- රාහු දහ වැන්න තුළ නම් රාහුට නීච රාශියකි. තමන් අපේක්‍ෂා නොකළ රැකියාවක් ලබයි. එක තැනක සිටගෙන රැකියාව නොකරයි. වරින් වර වෙනස් වීම් ස්ථාන මාරුවීම් ඇති විය හැකියි. වාහනවල ගමන් බිමන් හා වෛද්‍ය වෘත්තිය ආශ්‍රිතව, මත්පැන් හල් ආශ්‍රිතව හෝ ඖෂධ ආශ්‍රිතව රැකියාවේ නිතර වීමට ඉඩකඩ පවතී.
- කේතු දහ වැන්න තුළ නම් කේතුට උච්ච රාශියකි. හොඳ රැකියාවක් ලබයි. රැකියාව තුළත් පඩියට අමතර වෙනත් ලාභ වාසි ලබයි. එකම තැන එකම දිගට රැකියාව කරන අතර, ඉහළ තනතුරු ලැබිය හැක.
- රවි ග්‍රහයා දහ වැන්න තුළ නම් දේශපාලනයට යොමුවිය හැකියි. ඉහළ තනතුරු දරන අය ඇසුරු කරයි. රජයේ රැකියාවකට භාග්‍ය ඇත. ආරක්‍ෂක අංශවල ස්ථීර රැකියාවක් හිමිවිය හැකියි. වෛද්‍ය වෘත්තිය වැනි අංශවලට යොමු විය හැකියි.
- චන්ද්‍රයා දහ වැන්න තුළ නම් සඳුට නීච රාශියකි. රැකියාව ප්‍රමාද කරයි. සතුරු කරදර රැකියාවට බාධාවක් විය හැකියි. තමන් කොපමණ හොඳට වැඩ කළත් නරක නාම අසන්නට ලැබෙයි.
- අඟහරු හය වැන්න තුළ සිටී නම් රැකියා අංශවල විශාල දියුණුවක් ලැබිය හැකියි.
ප්‍රවීණ ජේ‍යාතිර්වේදී සරත්චන්ද්‍ර බෝතලාගේඋපුටා ගැනීම මව්බිම පුවත්පත
