ඔබේ බිරිඳ කොයි විලසද?
මෙලොව මව් පදවියට හිමිකම් කියන්නී ස්‌ත්‍රියයි. සකල ලොවම ඇය වටා ගොඩනැංවී ඇති බව කිව යුතු නැත. සියලු මිනිස්‌ ගුණධර්ම අරභයා මාර්ගෝපදේශක වන්නේ ඇයයි. මෛත්‍රිය, කරුණාව, දයාව වැනි යහගුණත්, ආලය ආදරය වැනි ස්‌නේහයත්, වෛරය ක්‍රෝධය වැනි දූෂිත ගතිත් ඇය නිරූපණය කරයි. මේ අනුව බලන විට හැම ස්‌ත්‍රියක්‌ම යහ ගතිගුණ වලින් පෝෂණය වී නැති බව පෙනේ.
ස්‌ත්‍රියක පුරුෂයකු හා විවාහවීමේදී එය තම ජීවන ගමනේ විශේෂිත සන්ධිස්‌ථානයකි. මේ අනුව ස්‌ත්‍රිය හා විවාහය දෙකක්‌ නොව එකක්‌ ලෙස සැලකිය යුත්තේය. ඇය විවාහ ජීවිතයට ඇතුළු වූ දා සිට අපේක්‍ෂා කරන කායික හා මානසික සැප සම්පත්, මෙන්ම අනේක දුක්‌ කරදර මානසික පීඩා ද අත්විඳියි. මේ කරදර, දුක්‌, සැප සම්පත් තමාට පමණක්‌ම නොව තම අනාගත පරපුරටද අත්වන්නේ විවාහයේදී ඇතිවන භාග්‍ය අභාග්‍ය කරුණු පදනම් කරගෙනය. මෙහිදී පුරාණයේ සිට විවාහ දිවියට ඇතුල් වීමට පෙර ස්‌ත්‍රී- පුරුෂ දෙදෙනාගේ පොරොන්දම් ගැලපීම ගැන ජෝතීර් වේදීන් හමුවී තතු විමසීම, සිදුවෙමින් පවතී. එහෙත් වර්තමානයේ ඒ ගැන එතරම් තැකීමක්‌ නොකරන වගක්‌ද දිස්‌වේ.
විවාහයේදී ස්‌වාමිපුරුෂයකුගේ බිරිඳක්‌ වන්නේ ස්‌ත්‍රියකමය. පුරාණ ආචාර්යවරුන්ගේ මගපෙන්වීම අනුව සියලුම භාර්යාවන් වර්ගීකරණයකට ලක්‌වෙයි. ඒ අනුව බිරින්දෑවරුන් වර්ග 07 කට බෙදේ.
වධක භාර්යාව, චෝර භාර්යාව, ස්‌වාමි භාර්යාව, මාතෘ භාර්යාව, භගිනි භාර්යාව, ස‚ භාර්යාව සහ දාසි භාර්යාව ඒ වෙයි.
වධක භාර්යාව :
තම ස්‌වාමිපුරුෂයාට ගෘහ ජීවිතය එපා කරවන තත්ත්වයේ, නොසතුටට පත්වන කරුණු කාරණා ඇති කර පවුල් ජීවිතයේ අපායක්‌ කරන්නී වධක භාර්යාවයි. මෙවන් භාර්යාවන්ගෙන් ප්‍රිය වචනයක්‌, ප්‍රසන්න සිනාවක්‌ අපේක්‍ෂා කළ නොහැකිය. ස්‌වාමි පුරුෂයාගේ වැරැදි අඩුපාඩු නිතර පෙන්වා ඇනුම් පද කියන්නීය. ඇය සතුටක්‌ ලබන්නේ සැමියාගේ සිත රිදවීමෙනි. තමාට අවශ්‍ය ආහාර පාන, ඇඳුම් පැළඳුම් නොලැබුණ කල රැවුම් ගෙරවුම් වැඩි වේ. කිසිදු අරපිරිමැස්‌මකින් තොරව කටයුතු කරයි. ගේදොර අස්‌පස්‌ කර ක්‍රමානුකූලව බඩු බාහිරාදිය තැබීමක්‌ සිදු නොවේ. අපිරිසිදුවට ගේ අවට මෙන්ම ඇතුළත ද තබා ගනී. ස්‌වාමිපුරුෂයා සමඟ සමගිය සමාදානය නැති වන පරිදි කටයුතු කරන්නීය.
චෝර භාර්යාව :
මැය තුළ ස්‌වාමි භක්‌තියක්‌ නැති සෙයකි. නිතරම සොර සිත් ඇත්තියක ලෙස කටයුතු කරයි. නිතරම පාහේ සැමියාගේ වැරැදි සොයමින් අන් ස්‌වාමි පුරුෂයන් කරා පහස සොයා යන්නීය. මේ නිසා සැමියාට සතුරුකම් කරයි. බොරු ලෙඩ අසනීප ඇති බව පෙන්වයි. පතිදම් නොරකී.
ස්‌වාමි භාර්යාව :
තමාගේ කැමැත්තට, අභිමතයට එකඟ නොවන සැමියා කෙසේ හෝ තම බලය පා ඔහු අවනත කරවා ගැනීමට උත්සාහ දරයි. නිවසේ ප්‍රධානියා තමා බව හැඟවීමට සියලු උත්සාහයන් දරයි. ගෙදර දොරේ හැසිරීම, ගති ක්‍රියා, පුරුෂයකු මෙන් තමා යටතේ පවත්වා ගැනීමට කටයුතු කරයි. කොටින්ම පවුලේ මුළු පාලනය තමා යටතට ගනී. ස්‌වාමි පුරුෂයා විසින් කළ යුතු ඉටු කර දිය යුතු කාර්යයන් තමා කිරීමට ඉදිරිපත් වීමත්, තමාට අයත් වැඩ කොටස්‌ ස්‌වාමිපුරුෂයා ලවා කරවීමත් ඇගේ අපේක්‍ෂාවයි. අසල්වාසීන් සමගද මතභේද ආරවුල් ඇති කර ගැනීමට දක්‍ෂයි. නිවසට පමණක්‌ම නොව නිවසින් පිටදීත් තම බලය පෙන්වීමට භාර්යාවට ඕනෑ කරයි. ආදායම් පාලනය ඇගේ රුචිකත්වය අනුව සිදු වේ. ඒ ගැන පුරුෂයාට බලයක්‌ නොදේ.
මාතෘ භාර්යාව :
යට කී වර්ග 03 ට වඩා මාතෘ භාර්යාව වෙනස්‌ය. මැය තම ස්‌වාමිපුරුෂයාට ඉතාමත් ලෙන්ගතුකමින් ආදරයෙන් අමතයි. ඇප උපස්‌ථානයේ යෙදෙයි. තම ආදරණීය සැමියා වෙනුවෙන් කළයුතු හැම උවටැනක්‌ම නොපිරිහෙළා ඉටු කිරීමට බලවත් උත්සාහයක්‌ ගනී. සැමියාගේ වැරැදි ඇත්නම් ඒවා පෙන්වා දෙන්නේ ඊට සුදුසු වේලාවක්‌ හා පරිසරයක්‌ යොදාගෙන බුද්ධිමත්වය. දූ පුතුන්ගේ අවශ්‍යතා ඉහළින්ම ඉටු කිරීමට ඉදිරිපත් වෙයි. කේලාම් ගතුකීම්වලින් වැළකී සිටී. පවුලේ හෝ ස්‌වාමිපුරුෂයා සමග හෝ අඩදබර සන්ඩු සරුවල් ඇති කර ගැනීමට කටයුතු නොකරයි. චරිතවත් ලෙස ජීවත් වේ. කොටින්ම නිවස තුළ සිරිකත සිටින්නාක්‌ මෙනි.
භගිනි භාර්යාව :
තම ප්‍රේමණීය සැමියාට වරෙක මවක ලෙස ද වරෙක සොහොයුරියක ලෙසද සමාන අයුරින් කටයුතු කරයි. සලකයි. ස්‌වාමියා තමාට හිතෛෂී යෙහෙළියක සේ ප්‍රසන්න වචන කතා කරමින් ප්‍රිය කතා බහේ යෙදෙයි. ස්‌වාමිපුරුෂයාට, බිරිඳකගෙන් ලැබිය යුතු හිමිවිය යුතු සියලු දෑ කිසිදු අඩුවක්‌ නැතිව සපුරා දෙයි. මැගේ යහගුණ නිසා ස්‌වාමිපුරුෂයා ද ඇයට එකසේ ඇළුම් කරයි. ලෙඩක්‌ දුකක්‌ කරදරයක්‌ සැමියාට ඇති වූ විට ඇය කම්පා වී ඒ ගැන වහාම ක්‍රියාත්මක වෙයි. දරුවන්ගේ ශුභ සාධනයට කැපවෙයි.
ස භාර්යාව :
මෙම වර්ගයේ භාර්යාව ද භගිනි බිරිඳ සේමය. තම ස්‌වාමිපුරුෂයාගේ අදහස්‌ උදහස්‌ සිත් සතන්, සතුටට පත් කරවන හැකි පරිදි සියලු කටයුතු කරයි. සැමියා උපයන වස්‌තුව, දේපළ රැක දෙයි. අනේක අයට පෙර පාන්දරම පිබිදී පවුලේ දරු දැරියන් හා ස්‌වාමිපුරුෂයාගේ කටයුතුවලට මුල්තැනදී කටයුතු කරයි. පතිදම් රකින මෙවන් භාර්යාවන් පවුලේ දියුණුවට ඉමහත් වාසනාවකි.
දාසි භාර්යාව :
දාසි භාර්යාවද යටකී භාර්යාවන් මෙන් ඉතාමත් විනීතයි. තැන්පත්ය. නිරහංකාරය. තම ස්‌වාමිපුරුෂයාට ඉතාමත් යටහත් පහත් වූ ගරු සරු කරමින් හා කීකරු වීමෙන් අදාළ කාර්යයන් මනාව සිදු කරයි. මැගේ හදවත කරුණාවෙන් පිරී ඉතිරී ගිය හදවතකි. බුද්ධිමත්, මැය දරුවන්ගේ අභිවෘද්ධිය සඳහා වෙහෙසේ. දුක සැප දෙක සැමියා සමග එකසේ විඳ දරා ගැනීමේ හැකියාව ඇතිවේ. පති භක්‌තිය ඉහළින්ම රකී. නිකරුණේ නොවටිනා කථාබස්‌වල නොයෙදේ. තම ස්‌වාමිපුරුෂයාට පණ මෙන් ආදරය කරයි.
උක්‌ත චරිත, චර්යාවන්, ඇති බිරින්දෑවරුන් පිළිබඳව ජ්‍යෙතිර්වේදයේ ද කරුණු දැක්‌වෙයි. ඔවුන්ගේ ජන්ම පත්‍රවල ග්‍රහයන් පිහිටා ඇති අයුරු, හා ග්‍රහයන් ගමන් ගන්නා විට සිදුවන වෙනස්‌කම් ද ජ්‍යෙතිෂ් ශාස්‌ත්‍රය අනුව නිගමනය කළ හැකිය. යටකී සප්තවිධ භාර්යාවන් ලබන ස්‌වාමිපුරුෂයන් ඉහත ආත්මවලදී කරනලද කුසල් අකුසල් කර්ම බලවේගවලට යටත් වන්නේය. ස්‌ත්‍රී පුරුෂ ඕනෑම ජන්ම ලාභියකුට ගොනු ගත විශේෂ ග්‍රහයෝග තිබේ. ඇතැම් ස්‌ත්‍රීන් තේජවන්ත, බලසම්පන්න පුරුෂයන් පවා අභිබවා යන අවස්‌ථා එමටය. එසේම රාජ්‍ය නායකයකුට උසස්‌ බිරිඳක්‌ ලැබීමේ භාග්‍යයෙන් ඔහුගේ රාජ්‍ය තාන්ත්‍රික කටයුතු ඉහළින්ම කිරීමේ භාග්‍යයද උදාකරයි. උපතේදී ඉතාමත් අසරණව දුගී දුප්පත්ව සිටියද ග්‍රහබල අනුව රාජයෝග යෙදී නම් ලෝකයාගෙන් ගරු සැලකිලි ලබා යහපත් ස්‌වාමිපුරුෂයන් ලැබීමේ භාග්‍යය ද ස්‌ත්‍රීන්ට නැත්තේ නොවේ.ස්‌ත්‍රියකගේ හඳහනක විවාහ ස්‌ථානයේ (07) ශුභ ග්‍රහයන් තිදෙනකු සමඟ සිකුරු සිටීම ඉතාමත් වාසනාවන්තයි. ඇයට ලැබෙන සහකරු රාජ්‍ය නායකයකු වෙයි.
උපුටා ගැනීම දිවයින
