දරුඵල ඇද්ද? නැද්ද?
විවාහයෙන් පසු ඕනෑම කෙනකුගේ ප්‍රාර්ථනය දරුවන් ලබාගැනීමයි. දරුවන් පිළිබඳව වූ පිහිටීම් ද ජ්‍යෙතිෂය අනුව විග්‍රහ කළ හැකි බව අපි දනිමු. මෙම ලිපිය ඒ අනුව සකස්‌ කෙරුණි.
විවාහයක ස්‌ථීර සාර අපේක්‍ෂාව දරුවන් ලබා ගැනීමයි. වර්ගයා පෝෂණය කිරීමයි. ඒත් සමහර යුවළකට දරුඵල නැහැ. තවත් කෙනකුට දරුවන් ගබ්සා වීම් සිදුවෙනවා. විවාහයක්‌ වෙන්න කලින් දරුඵල ගැන කියන්න බැරිද?
පුළුවනි, ජ්‍යෙතිෂය කියන්නේ ජීවිතය විනිවිද දැකිය හැකි ශාස්‌ත්‍රයක්‌. ජ්‍යෙතිෂයට අදාළ නොවන කිසිවක්‌ නැහැ. කෙනකුගේ හැසිරීම, වැදගත්කම, මුග්ධ බව, පහත් අදහස්‌ ඇති බව මේ සියල්ලම ජ්‍යෙතිෂ ඇසට පෙනෙනවා.
එහෙම නම් පොරොන්දම් බලා විවාහයට සුදුසුය කියලා නිර්දේශ කරන අයටත් දරුවන් නැත්තේ ඇයි?
එහෙම වන්නේ විවාහ ගැලපීම් බලන අයගේ නොදැනුවත්කම නිසයි. වැඩි දෙනෙක්‌ කරන්නේ පොරොන්දම් වැඩි ගණනක්‌ හොඳ නම් විවාහයට ගැලපේ කියා නිර්දේශ කරන එකයි.
ඉතිං ඒක වැරදිද?
වැරදියි. පොරොන්දම් ගලපන්න කලින් බැලිය යුතු බොහෝ දේවල් තියෙනවා. විවාහ වන පුරුෂයා හෝ ස්‌ත්‍රීය උමතු කල්පනා ඇත්තෙක්‌ද? ඒ අයට දරුඵල තියෙනවාද? හිර බන්ධන ගත වීම් වෙත්ද? බරපතළ සැත්කම් වේද? මන්ද බුද්ධික දරුවන් ලැබේද? ආයු බලය හොඳද? මේ ආදී බොහෝ කරුණු පරීක්‍ෂා කර බලා ඉන් අනතුරුව පොරොන්දම් ගැලපීමට යොමු විය යුතුය.
ඔය කියන ක්‍රමය අනුව දුෂ්ට මිනිසෙකුගේ කේන්ද්‍රයකට විනීත ස්‌ත්‍රියකගේ පොරොන්දම් හොඳට ගැලපෙන්න පුලුවන්නේ?
ඔව්. බුද්ධිමත් කාන්තාවකගේ කේන්ද්‍රයට පිස්‌සන් කොටුවේ ඉන්න මිනිසෙකුගේ කේන්ද්‍රය පොරොන්දම් පැත්තෙන් අගේට ගැලපෙන්න පුළුවනි.
දරුඵල බලන ක්‍රමයක්‌ ජ්‍යෙතිෂයේ තියෙනවාද?
ඇයි නැත්තේ ඡන්ම කේන්ද්‍රයක අනු රාශියක්‌ තියෙනවා. පුත්‍ර කාරක ග්‍රහයෙක්‌ ඉන්නවා. විවාහය පමා කරන නැත්නම් ඉක්‌මන් කරන, රැවටිලිවලට හසුවන ග්‍රහ පිහිටීම් තියෙනවා. ඒ ග්‍රහ පිහිටීම් ඇසුරින් බොහෝ දේ කියන්නත් පුළුවනි.
කවුරුද ඔය කියන පුත්‍ර කාරකයා? මොකක්‌ද ඔය පුත්‍ර රාශිය?
හැම කේන්ද්‍රයකම පස්‌වැන්න පුත්‍ර ස්‌ථානයයි. හෙවත් පුත්‍ර රාශියයි. ගුරු හෙවත් බ්‍රහස්‌පති පුත්‍රකාරක ග්‍රහයායි. පස්‌වැන්නේ සිටින ග්‍රහයාටත්, පස්‌වැන්න අයිති ග්‍රහයාටත් පස්‌වැන්න දකින ග්‍රහයාටත් දරුවන් පිළිබඳ වගකීම් පැවරීමක්‌ තියෙනවා.
එහෙමනම් ඔය හැම කේන්ද්‍රයකම පුත්‍ර කාරකයාය කියන ගුරු ඉන්නවනේ. ඉතිං සමහර කෙනකුට දරුවන් ඉන්නත් තව කෙනකුට දරුවන් නැති වෙන්නත් හේතුවක්‌ නැහැනේ?
නැත්තෙ නැහැ තියෙනවා. ගුරු පුත්‍ර කාරකයා වුණාට එක්‌ එක්‌ අයගේ කේන්ද්‍රවල එම පුත්‍ර කාරක ගුරු විවිධ ස්‌වරූපයකිනුයි ඉන්නේ. ඔය කියන පුත්‍ර කාරක ගුරු උච්චබල ඇතිව, ස්‌වක්‍ෂේත්‍රව, මුල ත්‍රිකෝණව, නීචව, පාප කර්තරිව, ශුභ කර්තරිව, අශුභ නැකතක, ශුභ නැකතක, අශුභ දෘෂ්ටි සහිතව, ශුභ දෘෂ්ටි සහිතව, 10 වන, 22 වන හෝ 34 වන දෙර්කාණ අයිතිය ඇතිව ආදී වශයෙන් විවිධ ස්‌වරූපයෙන් සිටිය හැකියි. ඒ පිහිටීම අනුව ශුභඵල හෝ අශුභ ඵල ලැබෙනවා. පුත්‍ර කාරක ගුරු 6, 8, 12 යන දුෂ්ට රාශියක සිටීමත් දරුඵලවලට යහපත් නැහැ.
ඔබ කිව්වා පස්‌වැන්න දරුවන් ගැන පවසන රාශිය බව. එතකොට දරුවන් හතර පස්‌ දෙනෙක්‌ සිටියත් ප්‍රමුඛ වන්නේ පස්‌වැනි රාශියමද?
පොදුවේ දරුවන් ගැන කියන විට පස්‌වැන්න ප්‍රමුඛම රාශියසේ සැලකෙනවා. තවත් සුවිශේෂ අවස්‌ථාත් තියෙනවා.
ඒ සුවිශේෂ අවස්‌ථා මොනවාද?
මාපියන්ගේ කේන්ද්‍ර අනුව දරුවන් ගැන කීමේදී,
- පස්‌වන භාවයෙන් පළමු දරුවා ගැනත්
- සත්වන භාවයෙන් දෙවන දරුවා ගැනත්
- නවවන භාවයෙන් තුන්වන දරුවා ගැනත්
- එකොළොස්‌වන භාවයෙන් 4 වන දරුවා ගැනත්
- පළමු භාවයෙන් 5 වන දරුවා ගැනත්
- තුන්වන භාවයෙන් 6 වන දරුවා ගැනත් කියවෙනවා.
එයින් එහාට දරුවන් ගැන කියන්නට භාවයක්‌ ඉතිරිවෙලා නැහැනේ. ඒ ඇයි?
නැත්තේ නැහැ. තියෙනවා. හයවැනි දරුවකුගේ කේන්ද්‍රයේ තුන්වැන්නෙන් 7 වන දරුවා ගැනත්, 7 වන දරුවාගේ කේන්ද්‍රයේ තුන් වැන්නෙන් 8 වන දරුවා ගැනත් යනාදි වශයෙන් සෙසු දරුවන් ගැනත් කියන්න පුළුවනි.
ඔය කියන න්‍යායට සහෝදර ස්‌ථානයේ සම්බන්ධ කමක්‌ නැද්ද?
ඇයි නැත්තේ? සහෝදර ස්‌ථානය කියන්නේ කේන්ද්‍රයේ තුන් වැන්නටය. තුන් වැන්නෙන් තුන් වැන්න නැවතත් සහෝදර ස්‌ථානයට නෑකම් කියන රාශියකි. ඒ විතරක්‌ නොවෙයි. සහෝදරයාගේ ධනය, ඉගෙනීම ආදී සියල්ලන් මේ ක්‍රමය අනුව කිව හැකිය. එය පරාශර ඉසිවරයාගේ ඉගැන්වීමක්‌.
එතකොට දරුඵල රහිත රාශි මොනවාද?
මේෂ, මිථුන, සිංහ, කන්‍යා ඒවා වඳ රාශි 5 වැන්න වඳ රාශියක්‌ වීම නරකයි. එවිට දරුවන් නැතිවේවි. ගබ්සා වීම් ආදිය පෙන්වනවා.
කෙනකුගේ විවාහයට පළමු ඔවුන්ගේ ඡන්ම කේන්ද්‍රය ඇසුරින් දරුඵල කිව හැකි නම් එය කියන්නේ කොහොමද?
ඡන්ම කේන්ද්‍රයේ පස්‌වැන්න ඵලදායි රාශියක්‌ වී එම රාශියේ ශුභ ග්‍රහයකු සිටියදී පුත්‍ර කාරක ගුරුත් පස්‌ වැන්නාධිපතින් බලවත් නම් ඔහුට දරුඵල තියෙනවා. දෙදෙනාගේම කේන්ද්‍රවල එම රාශි එසේම යහපත් නම් දරුඵල වඩාත් හොඳයි.
මීට අමතරව ඡන්ම කේන්ද්‍රයක දරුඵල පිහිටන ග්‍රහ පිහිටීම් ගැන තවත් කරුණු තිබෙනවාද?
ඔව්. ඒවා මෙසේයි. පස්‌වැන්න මළ රාශියක්‌ වී එහි ශුභ ග්‍රහයන් සිටීම නැතොත් පස්‌වැන්නට ශුභ දෘෂ්ටි ලැබීම. 2. පස්‌වැන්න අධිපතියා සහ පුත්‍ර කාරක ගුරු යෝග වී ශුභ රාශියක සිටීම. 3. ජන්ම කේන්ද්‍රයේ ගුරු සිකුරු දෙදෙනා ලග්නයේ හෝ 9 වැන්නේ සිටියේ නම් දරුඵල වැඩිවේ. 4. කේන්ද්‍රයේ 1, 5, 9 යන රාශි තුනේ ග්‍රහයන් යෝග වී එකී රාශි තුනෙන් එකක වීමත් දරුඵල ලබන ග්‍රහ ගමනකි.
ඒ වගේ දරුවන් නොලබන යෝගයන් තිබේද? ඒ මොනවාද?
පුත්‍ර කාරක ගුරු පාපින්ගෙන් පීඩා වීම ගුරු ග්‍රහයා සිටින රාශිය දෙපස රාශි දෙකේ පාප ග්‍රහයන් සිටීම. පුත්‍ර කාරක ගුරු නීචව සිටීම. ගුරු ග්‍රහයා 22 වන දෙර්කාණාධිපතියා වීම, පස්‌වැන්නාධිපති දුෂ්ට රාශිගතව සිටියදී පස්‌ වැන්නට පාප දෘෂ්ටි ලැබීම. ආදිය වෙතොත් ඒ අයට දරුඵල නැහැ.
කෙනකුගේ කේන්ද්‍රයේ දරුඵල සහිත ග්‍රහයෝග තිබියදීත් දරුඵල නැති අය සිටිය හැකිද?
හේතු කීපයක්‌ම නිසා එසේ සිදුවිය හැකියි. උපත් පාලන ඖෂධ මිශ්‍ර ආහාර ගැනීම විවාහයට පෙර රහසේ පිළිසිඳගත් දරුවන් ගබ්සා කිරීම, දරුවන් ලැබීම පමා කිරීම සඳහා බෙහෙත් ශරීර ගත කිරීම වැනි හේතු නිසාත් දරුඵල නැතිවීමට පුළුවනි.
ඇතැම් නිරෝගිමත් යුවළකටත් දරුඵල නැතිව පසු තැවෙනවා. එහෙම දරුඵල නැතිවෙන්නට පෙර ආත්මයක කරන ලද පවක්‌ හේතුවෙන්න පුළුවන්ද?
දරුඵල සඳහා සසර ගමනේදී රැස්‌ කරන ලද පාරමිතා පෙරදැරි පින් හේතුවක්‌ වෙනවා. කෙනකුට දරුඵල නොපිහිටන පව කුමක්‌ද කියා ජ්‍යෙතිෂයේ සඳහන් වෙනවා. ඒකට කියන්නේ සර්ප ශාප යෝගය කියලා. සර්ප ශාප යෝගය යනු අලියා, නාගයා, ඉබ්බා, කපුටා වැනි දීර්ගායුෂ හිමි සතකු මරා දැමීමට හවුල් වීම එය දැක සතුටු වීම වැනි හේතුවක්‌ නිසා තමා පසු පස එන සාපයක්‌. කැළෑ ගිනි තැබීමත්, සත්ත්ව ඝාතනය කිරීමත් එවැනි පාපයක්‌.
කෙනකුට ලැබෙන්නේ පිරිමි දරුවෙක්‌ද? නැතහොත් ගැහැනු දරුවෙක්‌ද යන්න ඡන්ම කේන්ද්‍රය බලා කියන්නට පුළුවන්ද?
පුළුවනි. පියාගේ කේන්ද්‍රයේ පුත්‍ර ස්‌ථානය වූ පස්‌වැන්න පුරුෂ ග්‍රහයකුට අයත් වී එම රාශියේ පුරුෂ ග්‍රහයකු සිටීම හෝ දැකීම වෙතොත් ඔහුට පිරිමි දරුවන් වැඩියි. එසේම පුත්‍ර කාරක ගුරු පුරුෂ ග්‍රහයකුට අයත් නැකතක සිටීම නිසාත් පිරිමි ළමයින්ගේ ලැබීමට නැඹුරුයි. ඒ වගේම පුත්‍ර රාශිය ස්‌ත්‍රී ග්‍රහයකුට අයත් රාශියක්‌ වී ස්‌ත්‍රී ග්‍රහයන්ගේ දෘෂ්ටිය පස්‌වැන්නට වැටුණොත් ගැහැනු දරුවන් ලැබෙයි. යම් ලෙසකින් පුත්‍ර ස්‌ථානයේ කුජ - ශුක්‍ර දෙදෙනාම යෝග වී සිටිතැයි සිතිමු. කුජ පුරුෂ ග්‍රහයෙක්‌ සිකුරු ස්‌ත්‍රි ග්‍රහයෙක්‌. ඒ අනුව එම පියාට පිරිමි ගැහැනු දරුවන් සම ගණනක්‌ ලැබෙයි. තවත් පැහැදිලි කරනවා නම් පුතයි, දුවයි, පුතුන් දෙදෙනයි දූවරුන් දෙදෙනයි. මේ ආදී වශයෙනි.
හොඳයි. කේන්ද්‍රයේ පස්‌වැන්නේ කුජ - ශුක්‍ර සිටින කෙනකුට පිරිමි දරුවයි ගැහැනු දරුවන් දෙන්නයි සිටින තැන් තියෙන්නට පුළුවනි. ඒ ගැන අදහස කුමක්‌ද?
එහෙම වෙන්න පුළුවනි. එහෙම වෙන්නේ එක්‌කෝ එක්‌ පිරිමි දරුවකු ගබ්සා වීමකට ඉඩ තිබීමෙනුයි. නැත්නම් වැරදි හැසිරීමක්‌ නිසා වෙන තැනක ඔහුගේ දරුවෙක්‌ ඉන්න ඉඩ තියෙනවා.
ඔය කියන ආකාරය අනුව පොරොන්දම් 20 වටිනාකමක්‌ නැති ඉදිරිපත් කිරීමක්‌ බවයි පෙනෙන්නේ?
නැහැ පොරොන්දම්වල වටිනාකමක්‌ නැහැ කියා ප්‍රතික්‍ෂේප කිරීමට පුළුවන් කමක්‌ නැහැ. ඒවායේ වටිනාකම අපමණයි. පුරාණ ඉසිවරුන් විසින් පොරොන්දම් 20 ක්‌ම ඉදිරිපත් කර ඇත්තේ බොහෝ දුර දිග බැලීමෙනුයි. මිනිස්‌ වර්ගයාගේ රුචි කම් විවිධයි. එහෙම වෙන්නේ අදහස්‌වල විවිධත්වය නිසයි.කෙනෙක්‌ මාංශ භක්‍ෂණයට ලැදියි. තවකෙනෙක්‌ නිර්මාංශ ආහාරයට නැඹුරුයි. කෙනෙක්‌ විනෝදයට, නැටුමට ඇවිදීමට කැමැතියි. තව කෙනෙක්‌ ලෝකෝත්තර හැඟුම් සහිතයි. එබඳු වෙනස්‌ කම් ඇති දෙදෙනකුට විවාහ ජීවිතයේ සතුට අඩුවෙන්න පුළුවනි.
පොරොන්දම් හඳුන්වා තිබෙන්නේ සතුන්ගේ නම් වලින් නැත්නම් ගස්‌වල නම්වලින් ඒ ඇයි. නයා, මුගටියා, බළලා, මීයා මේ ආදී වශයෙන් ඇයි හාවා පොළඟා වැනි සතුන්ගේ නම් නැත්තේ?
එසේ නම් කර ඇත්තේ සංකේත හැඳින්වීමක්‌ වශයෙන්. නිදසුනක්‌ කියන්නම්. මා නැකතට පුනාවාස නැකත ගැලපෙන්නේ නැතැයි කී විට කෙනකුට සිතා ගන්න අමාරුයි. මා නැකත මීයාටත්, පුනාවාස නැකත බළලාටත් උපමා වශයෙන් පෙන්වා දුන් විට ඒ සතුන් දෙදෙනා ඔවුනොවුන්ට සතුරු බවක්‌ හැඟෙනවා. ඒකයි එහෙම දක්‌වා ඇත්තේ.
එතකොට රාස්‌ස දේව ගණය මනුස්‌ස ගණය කියලා කියන්නේ? යක්‌කු වගේ මිනිස්‌සුන් ඉන්නවද? දෙවියන් වගේ මිනිසුන් ඉන්නවද?
ඒක හොඳ ප්‍රශ්නයක්‌. බුදු හාමුදුරුවන්ගේ නැකත විශා. විශා නැකත අයත් වන්නේ රාස්‌ස ගණයටයි. ඉතිං බුදුන් වහන්සේ රාස්‌සයකු වගේ නපුරු කෙනෙක්‌ද? නැහැ. විඳදරා ගැනීමේ ශක්‌තිය ඇති කෙනකු බවයි එයින් හැඟෙන්නේ. රාස්‌ස ගණේ ගැහැනියක්‌ මනුස්‌ස ගණේ පිරිමියෙකුට වඩා එඩිතරයි. විවාහ වන යුවළකට සමාන ගතිගුණ තිබුණොත් හොඳයි. පොරොන්දම් 20 අතර අදට නොගැලපෙන පොරොන්දම් කීපයක්‌ තියෙනවා. ඒවා වෙනස්‌ කරන්න කාටවත් අයිතියක්‌ නැහැ. ජ්‍යෙතිෂ සංගායනාවක්‌ මගින් පමණක්‌ එය කළ හැකියි. නයි පොළොං වගේ මිනිස්‌සුත් ඉන්නවනේ. එකට කා බී සිටියත් තමන්ගේ වාසියට යාලුවාට දෂ්ට කරන මිනිසුන් සිටින බව ඔබ පිළිගන්නවා ඇතිනේ.
පියසේන රතුවිතානගේ
උපුටා ගැනීම දිවයින
.jpg "පැටිස්")
