මේෂ ලග්නයේ ග්‍රහ ගමන
තම දශා කාලයන්හිදී එක එක ලග්නයට විශේෂිත වූ ශුභ හා අශුභ පල දෙන ග්‍රහයන් පිළිබඳව විස්‌තර ජ්‍යෙතිෂ්‍ය ග්‍රන්ථවල සඳහන් වේ. මෙම ලිපියෙන් විස්‌තර වන්නේ මේෂ ලග්නයට තම දශාවන්හි ශුභ හා අශුභ ඵල දෙන ග්‍රහයන් පිළිබඳව තොරතුරු බිඳකි.
මේෂ ලග්නයට රවි සඳු සහ ගුරු යන ග්‍රහයන් සුබදායක වේ. සඳු සහ ගුරු ග්‍රහයන් මේෂ ලග්න හිමියාගේ රවි හිමි කැති නැකැතේ සිටි විටද, රවි හිමි උත්‍රපල් නැකැතේ සිටි විටද, රවි හිමි උත්‍රසල නැකතේ සිටි විටද, සඳු හිමි රෙහෙණ නැකැතේ සිටි විටද, සඳුහිමි හත නැකැතේ සිටි විටද, සඳු හිමි සුවණ නැකැතේ සිටි විටද, ගුරු හිමි පුනාවස නැකැතේ සිටි විටද, ගුරු හිමි විසා නැකැතේ සිටි විටද, ගුරු හිමි පුවපුටුප නැකැතේ සිටි විටද, තම දශා කාලයන්හිදී ජන්මියාට ශුභ ඵල සලසා මානසික සතුට ලබාදේ.
සිකුරු – සඳු
මේෂ ලග්නයට සිකුරු ග්‍රහයා සඳුගේ නැකැත්වල සිටීම ශුභ ඵල උදාකර දෙන්නේ බොහෝ සෙමින්ය.
සිකුරු – රවි
මේෂ ලග්නයේදී රවිගේ නැකැතක සිටින සිකුරු ජන්මියාට ශුඵ ඵල ලබාදෙන්නේ එම ජන්මියා දැඩි උත්සාහයකින් කටයුතු කළහොත් පමණි.
ශනි මහ දසාව
රාශි චක්‍රයේ චර රාශියක්‌ වශයෙන් සැලකෙන මේෂ ලග්නයට බාධක ග්‍රහයා වන්නේ එකොලොස්‌ වැන්නාධිපති සෙනසුරුයි. මේෂ ලග්න හිමියකුට මේ සෙනසුරුගේ දශාවක්‌ ලැබූ විට, නින්දා අපහාස, බොරු චෝදනා, මානසික අසහන, රැකියා අහිමි වීම්, හදිසි අනතුරු, හදිසි රෝග, පාදවල අනතුරු, අධික වියදම් හා ජීවිතය එපාවීමට තරම් කරුණු යෙදේ. මෙසේ මේෂ ලග්නයෙන් උපත ලබා ශනි මහා දශාවන් ලැබූ අයට සවස නෑම, අධිකව වෙහෙසවීම වාද විවාදවලට පැටලීම, නිතර අනුන්ගේ ගෙවල්වලට යැම, දුර ගමන් යැම, රාත්‍රී ගමන් යැම, වේගයෙන් යන වාහනවල යැම, වේගයෙන් වාහන පැදවීම අශුභදායකයි.
අපල සමනයට
මේෂ ලග්නයෙන් උපත ලබා ශනි මහා දශාව ලැබූ අය උදේ සවස ආගමික වත්පිළිවෙත් කරමින් දැහැමිව ජීවත්වීම සුදුසුවේ. එසේම සෙනසුරාදා දිනවල බෝධි පූජා තබා බෝධියේ බස්‌නාහිර පැත්තේ නිල්මල් පුදා, නිල් කොඩි එල්ලා විෂ්ණු දෙවියන්ට පින්දී ආරක්‍ෂාව ඉල්ලීමත් සුබදායකයි. කකුලක ආබාධයක්‌ ඇති අසරණ අයෙකුට සෙනසුරාදා දිනවල දහවල් ආහාර වේලක්‌ දන්දීම ශුභයි. විහාර මළු, චෛත්‍ය මළු, බෝමළු සිත එකඟ කරගෙන ඇමදීමද ඉතා සුදුසුයි.
කුජගෙන් අශුභ
මේෂ ලග්නයෙන් උපත ලබා මේෂ ලග්නයේ ප්‍රථම දෙර්කාණයට අයත් මේෂ, වෘෂභ මිථුන යන නවාංශකයන් හිමිවූ විට ලග්නාධිපති කුජ විසි දෙවන දෙර්කාණාධිපතියා බවට පත්වෙයි. එසේ කුජ විසි දෙවන දෙර්කාණාධිපතියා වී කුජ මහා දශාව ලැබූ විට ජීවිතයේ අඳුරු සහගත අවාසනාවන්ත කාල පරිච්ඡේදය එය වනු ඇත. එසේම එම ජන්මියාට නපුරුකමක්‌ ආරුඪ වෙයි. හිතුවක්‌කාරව කටයුතු කර විනාශය කරා යයි. උත්පත්ති කේන්ද්‍රයේ කුජ භෞම දෝෂ උදාකරමින් එක හතර, හත, අට, දොළහ යන ස්‌ථානයක සිටියහොත් කලත්‍රයාට මාරක සමාන දුක්‌ත තත්ත්වයක්‌ ඇති කරයි. එසේම ගිනි බිය හා කැපුම් කෙටුම් තුනවාල ද ඇතිවීමට පුළුවන. වනිතා කේන්ද්‍රයක මේ තත්ත්වය ඇති වුවහොත් ගබ්සාවීම්වලටද කරුණු යෙදේ. මේ කාලය තුළ දරුවෝ ලැබුණහොත් ඔවුන් අකීකරු මුරණ්‌ඩු තත්ත්වයට පත්වෙති. ඉගෙන ගන්නා අයගේ ඉගෙනීම් කටයුතු කඩාකප්පල්වේ.
කුජගේ අපලයට
රතු මල් වර්ග හා කනේරු මල් පුදා රතු කොඩි එල්ලා බෝධි පූජා තබා කතරගම දෙවියන්ට පින්දීම ශුභයි. එසේම කතරගම දෙවිඳුට සෙත්කවි කියවීම ශුභයි.
කනේරු මල්, රුක්‌මල්, මූණමල්, පෙරුම්කායම්, සුදු හඳුන්, බැවිල, ජටාමාංශ, තැම්බූ වතුර ස්‌නානයක කිරීම ශුභය. “කන්දකුමාර යන්ත්‍රය” හෝ “අභිසම්භිදාන යන්ත්‍රය” පැළඳ ගැනීමෙන්ද අපල සමනයට හේතුවේ. මේ ශාන්තිකර්ම කරන විට අශුභ කුජ මහා දශාවෙන් ඇති කරන අඵල උපද්‍රව අඩුවේ.
උපුටා ගැනීම දිවයින
