දැන දැන දින දින තොරතුරු මෙලෙස කරමු සතිය සොඳුරු

සතියේ දින හත ඒ ඒ ග්‍රහයාගේ නමින් හැඳින් වේ. රවි ග්‍රහයාට අයත් නිසා ඉරිදා රවි දින වශයෙන්ද සඳු ග්‍රහයාට අයත් නිසා, සඳුද සඳු දින වශයෙන්ද කුජ ග්‍රහයාට අයත් නිසා අඟහරුවාදා, කුජ දින වශයෙන්ද බුද ග්‍රහයාට අයත් නිසා, බදාදා බුද දින වශයෙන්ද ගුරු ග්‍රහයාට අයත් නිසා, බ්‍රහස්‌පතින්දා, ගුරු දින වශයෙන්ද කිවි හෙවත් සිකුරු ග්‍රහයාට අයත් නිසා සිකුරාදා කිවි දින වශයෙන්ද ශනි ග්‍රහයාට අයත් නිසා. සෙනසුරාදා ශනිදින වශයෙන්ද ජ්‍යෙdතිෂයේ දී හැඳින්වේ. හැම දිනක්‌ම එක හා සමානව ගෙවී යන බව අපට දැනුනද මේ එක්‌ එක්‌ දවසට විශේෂිත වූ ලක්‍ෂණ ඇත. එම ලක්‍ෂණ මොනවාදැයි පරීක්‍ෂා කර බැලීම, මෙම ලිපියේ අරමුණයි.

රවි දින :

රවි හෙවත් සුර්යයා අධිපති වී සිටින සතියේ මුල් දිනයයි. රජුන් පුභූන්, මැති ඇමැතිවරුන් මුණ ගැසීමට සුදුසු දිනයයි. රාජ්‍ය උත්සව පැවැත්වීමට රජයට සම්බන්ධ කටයුතු වලට, රාජ්‍ය නිලධාරීන්ගේ සමිති, සමාගම්, සාකච්ඡා පැවැත්වීමට ද මෙම දිනය ඉතා සුදුසුය. මෙදින පෙරවරු 6.00 -7.00 දක්‌වාද පස්‌වරු 1.00 -2.00 දක්‌වාද රවි හෝරාව පවතී. ඉහත සඳහන් කටයුතු වලට රවි හෝරාව තුළ ශුභ මොහොතක්‌ සකස්‌ කර ගත හැකිය. රවි දින වැඩිවියට පත්වන යුවතියෝ උඩගු අහංකාර ගති ඇති, අලංකාරව සිටීමට කැමති ප්‍රධානත්වය දැරීමට සුදුසු අය වෙති. තම පැහැය දිනයට ශුභ පාටයි. මෙදින උපන් දරුවන්ට නම් තැබීමට සුදුසු අක්‌ෂර අ, ඉ, උ, එ, ඔ වේ.

සඳු දින :

සඳු හෙවත් චන්ද්‍රයා අධිපති වී සිටින සතියේ දෙවන දිනයයි. පුරපක්‍ෂයේ සඳු දින, අවපක්‍ෂයේ සඳු දිනට වඩා බලවත්ය. සියලුම ශුභ කටයුතු සඳහා යොදාගත හැකි දිනයකි. සදුදා සිතුවිලි අධික දවසකි. ඉරිදා, නිවාඩු දිනයක්‌ ලෙස යොදා ගෙන ඊට පසු දිනය වූ සඳුදා වැඩ කිරීම තරමක්‌ අලස නිසා සඳු දින කම්මැලි දිනයක්‌ ලෙස සැලකීමට සමහරු පෙළඹී සිටිති. දිවා කාලයේ පෙරවරු 6.00 – 7.00 දක්‌වාද පස්‌වරු 1.00 – 2.00 දක්‌වාද සඳු හෝරාව පවතී. සඳුදා වැඩිවියට පත් වන යුවතියෝ කරුණාවන්ත, ශාන්ත ගති පැවතුම් ඇති, මාතෘත්වයට ගරු කරන අය වෙති. සුදු පාට මෙදින ශුභ වර්ණය වේ. සඳුදා උපදින දරුවන්ට ය, ර, ල, ව, ශ, ෂ, ස, හ, ළ යන අක්‌ෂරවලින් නම් තැබීම සුදුසුය.

කුජ දින :

ග්‍රහ ලොව සෙන්පති ලෙස හඳුන්වන කුජ ග්‍රහයා මෙදිනට අධිපති වේ. ඌෂ්ණය අධික, උද්යෝගයෙන් කටයුතු කළ හැකි දිනයකි. යුද්ධ කටයුතුවලට ක්‍රීඩා තරගවලට, වාද විවාද පැවැත්වීමට සුදුසුය. රෝග සුව වු අයට, කුඩා දරුවන්ට මහලු අයට මෙදින ඌෂ්ණ දිනයක්‌ නිසා ස්‌නානය කිරීම එතරම් ශුභ නැත. අඟහරුවාදා වැඩිවියට පත්වන යුවතියෝ මුරණ්‌ඩු ස්‌භාවයක්‌ ඇති සටනට කැමති, යටත්වීමට අකමැති ඌෂ්ණාධික ශරීරයෙන් යුක්‌ත අය වෙති. මෙදිනට ශූභ වර්ණය රතු පාට වේ. අඟහරුවාදා උපදින දරුවන්ට නම් තැබීමට සුදුසු අක්‍ෂර ක, ඛ, ග, ඝ, ඬ වේ.

බුද දින :

බුද්ධියට අධිපති බුද ග්‍රහයා මෙම දිනයට අධිපති වේ. ශාස්‌ත්‍රීය කටයතු, ග්‍රන්ථකරණය, සන්නිවේදන කටයුතු නුවණ යොදවා කරන කටයුතුවල මෙම දිනය සුදුසු වේ. රාශිය උදා වී බුධ බලවත්ව සිටින බදාදා දිනයක බුද කාල හෝරාවේ. බුද පංචම කාල හෝරාව යෙදී තිබෙන මොහොතක දරුවන්ට අකුරු කියවීමට ශුභ වූ සරස්‌වතී යෝගය යෙදෙන්නේය. දිවා කාලයේදී පෙරවරු 6.00 – 7.00 දක්‌වාද පස්‌වරු 1.00 -2.00 දක්‌වා ද බුධ හෝරාව පවතී. බදාදා වැඩි වියට පත්වන යුවතියෝ විහිලු තහලු කරන, කථාවට හා ලිපි කටයුතු වලට දක්‍ෂ සහෝදරයන්ට හිතවත් අය වෙති. කොලපාට මෙදිනට ශුභ වර්ණයයි. මෙදින උපදින දරුවන්ට ට, ඨ, ඩ, ඪ, ණ යන අක්‍ෂර මුලට යොදා නම් තැබීම සුදුසුය.

ගුරු දින :

ඉතාමත් ශුභ ග්‍රහයකු වූ ගුරු හෙවත් බ්‍රහස්‌පතී මෙදිනට අධිපති වේ. විවාහයට, නිවාස ආරම්භ කිරීමට, යහපත් වැඩවලට මෙදින ඉතා සුදුසුය. දිවා කාලයේදී පෙරවරු 6.00 – 7.00 දක්‌වාද පස්‌වරු 1.00 -2.00 දක්‌වා ඉතා ශුභ වූ ගුරු හෝරාව පවතී. මෙදින මල්වර වන යුවතියෝ යහපත් ගතිගුණ ඇති වැඩුණු ශරීරයෙන් යුක්‌ත යහපත් විවාහ ජීවිතයක්‌ ගත කරන අය වෙති. බ්‍රහස්‌පතින්දා උපදින දරුවන්ට ත, ථ, ද, ධ, න යන අක්‍ෂර මුලට යොදා නම් තැබීම ශුභයි.

කිවි දින :

ආදරයට අධිපති සිකුරු ග්‍රහයා මෙදිනට අධිපති වේ. විවාහ මංගල්‍යවලට ගමන් යැමට සංගීතයට කලා කටයුතුවලට සිකුරාදා, ශුභ දිනයකි. රෝග සුව වූ අයට, කුඩා දරුවන්ට, වයස්‌ගත අයට මෙදින සිසිල් දිනයක්‌ නිසා ස්‌නානය කිරීම එතරම් ශුභ නැත. පෙරවරු 6.00 – 7.00 දක්‌වාද පස්‌වරු 1.00 – 2.00 දක්‌වාද දිවා කාලයේදී සිකුරු හෝරාව පවතී. මෙදින මල්වර වූ යුවතියෝ සැහැල්ලු ජීවිතය ප්‍රිය කරන, විනෝදකාමී, සංගීතයට, කලා කටයුතුවලට ලැදී, සැප සම්පත් විඳීමේ භාග්‍යය ලද විවාහ ජීවිතයෙන් පසුව ජීවිතයේ දියුණුව දකින අය වෙති. විචිත්‍ර වර්ණ මෙදිනට ශුභයි. සිකුරාදා උපදින දරුවන්ට ච, ජ. ඡ, ධ, ඤ යන අක්‍ෂර මුලට සිටින සේ නම් තැබීම ශුභයි.

ශනි දින :

දුකට අධිපති සෙනසුරු හෙවත් ශනි ග්‍රහයා මෙම දිනයට අධිපති වේ. මහණ කිරීම, බණ භාවනා කිරීම, ආගමික කටයුතු සඳහා සෙනසුරාදා දිනය ශුභ වේ. ලෝකෝත්තර කටයුතුවලට මෙදින ශුභ වන අතර, ලෞකික කටයුතු සඳහා ශුභ නැත. පෙරවරු 6.00 – 7.00 දක්‌වාද පස්‌වරු 1.00 – 2.00 දක්‌වාද ශනි දින සෙනසුරු හෝරාව පවතී. මෙදින මල්වර වන යුවතියෝ දුකට පත්වන, අපිරිසිදුව සිටින කම්මැලි ජීවිත ගත කරන, විවහය ප්‍රමාද වන අය වෙති. කලු පැහැයට හුරු තද නිල් පාට මෙදින ශුභ වර්ණය වේ. සෙනසුරාදා උපදින දරුවන්ට ප, එ, බ, භ, ම යන අක්‍ෂර මුලට යොදා නම් තැබීම සුදුසුය.

ජ්‍යෙතීර් විද්‍යාවට අනුව දවස ආරම්භවන්නේ සූර්ය උදාවේ සිටය. හෝරාවන් පිළිබඳව ඉහත දැක්‌ වූ වේලාවන් එදින සුර්ය උදාව අනුව සංශෝධනය කර ගත යුතු බව සඳහන් කරමි.

උපුටා ගැනීම දිවයින