පක්‍ෂියා රජ කරන මොහොතේ ලොතරැයි අරගන්න ජය සිකුරුයි
අද අප රටේ ජනතාව ඉසුරුමත් ජීවිතයක් පතා ලොතරැයි ආදී දිනුම් අවස්ථා ඉතා විශාල වශයෙන් උරගා බලන බව රහසක් නොවුණත් එසේ වාසනාව සොයන සෑම දෙනාටම වාසනාව හිමි නොවේ. සමහර දිනෙක කිසිම ලොතරැයියකට සුපිරි ජයමල්ල සඳහා වාසනාවන්තයෙක් තේරී පත් නොවන අතර සමහර අවස්ථාවල ලොතරැයිවල සුපිරි ජයමල්ල මාසයකටත් අධික කාලයක් කිසිම වාසනාවන්තයකු අතටපත් නොවේ. එයට හේතුව එවැනි සුපිරි ජයමල්ල දිනාගත හැකි අතිවිශේෂ ධනයෝග ඉතා කලාතුරකින් කෙනකුට උදාවන බැවිනි. ඕනෑම අයකුගේ චන්ද්‍රයාගේ ගමන අනුව සහ කේන්ද්‍රයේ 2 සහ 11 අධිපතින්ගේ ගමන අනුව එසේත් නැතිනම් හෝරා ලග්නය අධිපතිගේ ගමන ආදී වශයෙන් ධනයෝග උදාකරන ග්‍රහයන්ගේ ගමන අනුව සෑම කේන්ද්‍රයකම සතිපතා ඉතාම සුළු ධන යෝග සහ මාස කීපයකට වරක් තරමක සැලකිය යුතු ධන යෝගද උදාවේ. ඔබත් ලොතරැයි හෝ වෙනත් තරග අවස්ථා තුළින් ඔබගේ වාසනාව උරගා බලන අයකු විය හැක. එහෙත් මේ වන තුරුත් ඔබට වාසනාව උදාවී නැතිවා විය හැක. නමුත් ඔබගේ උපන් නැකැත සහ නැකත හිමි පක්‍ෂියා අනුව සෑම දිනකම උදාවන සුබ මොහොතට අනුව ලොතරැයි වාසනා උරගා බලා කෙටි කලකින් ඔබට හිමි ධන යෝගයෙන් නිසි අයුරින් ප්‍රයෝජන ලබන්න. සාමාන්‍යයෙන් කලින් කලට ඔබගේ කේන්ද්‍රයේ උදාවන සාමාන්‍ය ධන යෝගයකින් උදාකර ගතහැකි වාසනාව ඔබගේ පක්‍ෂියා රජ වන මොහොතේ උරගා බලා වාසනාව උදාකර ගැනීම සඳහා ඔබගේ උපන් නැකැතට අනුව සෑම දිනකම උදාවන සුබ මොහොත සොයා එම වේලාවට වාසනාව උරගා බලා දිනුම් අවස්ථාවක් ලබාගැනීමට පහත උපදෙස් අනුව කටයුතු කරන්න.
සුබ මොහොත සොයන ආකාරය පළමුව ඔබේ උපන් නැකැත සොයා ඒ ඒ දිනට උදා වන සුබ මොහොත ගණනය කරන්න. ඒ සදහා උදාහරණයක් ගෙන සුබ මොහොත ගණනය කරන හැටි බලමු.
ඔබගේ උපන් නැකැත අස්විද යැයි සිතමු. අස්විද නැකැතට අයත් පක්‍ෂියා වන්නේ රාජාලියා නොහොත් භේරුණ්ඩ පක්‍ෂියාය. රාජාලියා සඳුදා දිනට රජ වන අවස්ථාව සොයාගත යුතුය. පංචාංග ලිතට අනුව පුර පක්‍ෂයේ සඳුදා දිනට රාජාලියා ස්ථුල යාමයේ රජ වන මොහොත ප.ව. 1.12 සිට ප.ව. 3.36 වේ. මෙම පැය දෙකකුත් විනාඩි 24 කාලය ස්ථුල යාමයක් ලෙස හැඳින්වේ. උදේ 6.00 සිට සවස 6.00 දක්වා ස්ථුල යාම පහක් ඇත. මෙම ස්ථුල යාමයක් තුළ සූක්‍ෂ්ම අවස්ථාව සොයාගත යුතුය. මෙය පුර පක්‍ෂය (එනම් අමාවක පෝයෙන් පසු පුර පසළොස්වක දක්වා) සහ අව පක්‍ෂය (එනම් පසළොස්වක පෝයෙන් පසු අමාවක පෝය දක්වා) අනුව වෙනස් වේ. එසේම දිවා සහ රාත්‍රි ආදී වශයෙන්ද වෙනස් වේ. අප මෙදින පුර පස සඳුදා දිනයක් ලෙස ගනිමු. පුරපස දිවා කාලයේ ස්ථුල යාමයක් වන පැය 2යි විනාඩි 24 නැවත සූක්‍ෂ්ම අවස්ථා 5කට බෙදේ. එනම් භෝජන අවස්ථාව සඳහා විනාඩි 30ද ගමන් අවස්ථා සඳහා විනාඩි 36ක්ද රජ අවස්ථාව සඳහා විනාඩි 48ක්ද නිදි අවස්ථාව සඳහා විනාඩි 18ක්ද මරණ අවස්ථාව සඳහා විනාඩි 12 ක්ද වශයෙනි. එවිට සූක්‍ෂ්ම කාලය තුළ භෝජන විනාඩි 30 සහ ගමන විනාඩි 36 යන දෙකෙහි එකතුව වන විනාඩි 66 පසු එනම් පැයකුත් විනාඩි 6කට පසු ඉදිරියට විනාඩි 48ක කාලය ඉහත කී ස්ථුල යාමයේ සූක්‍ෂ්ම රජ අවස්ථාව වේ. එනම් මුලින් කී ස්ථුල යාමය ආරම්භ වන ප.ව. 1.12ට විනාඩි 66ක් එකතු කර එතැන් සිට විනාඩි 48ක කාලය සූක්‍ෂ්ම කාලය වේ. 1.12ට විනාඩි 66 එකතු කළ විට වෙලාව ප.ව. 2.18වේ. එසේ නම් සූක්‍ෂ්ම කාලය යනු ප.ව. 2.18 සිට ප.ව. 3.06 දක්වා කාලය වේ. දැන් මෙම සූක්‍ෂ්ම කාලය තුළ අතිසූක්‍ෂ්ම අවස්ථාව සොයාගත යුතුය. පසුපස දිවා කාලයේ සූක්‍ෂ්ම රජ අවස්ථාව නැවැතත් කොටස් 5කට බෙදේ. එහිදී පළමු අතිසූක්‍ෂ්ම කාලය විනාඩි 16ක් රජ අවස්ථාව වේ. එසේ නම් ප.ව. 2.18 සිට ඉදිරියට විනාඩි 16ක් එනම් ප.ව. 2.18 සිට ප.ව. 2.34 දක්වා කාලය පක්‍ෂියා රජ වන අතිසූක්‍ෂ්ම කාලයයි. නමුත් මෙම ගණනය කිරීම කළේ ඉර උදාව උදේ 6.00 වශයෙන් ගෙනයි. දැන් අපි ඉර උදාව අනුව පක්‍ෂියා රජ වන අතිසූක්‍ෂ්ම කාලය සොයමු. අප සුබ මොහොත සොයන සඳුදා දින ඉර උදාව උදේ 6.00යි විනාඩි 32යි තත්පර 7 යැයි සිතමු. එසේ නම් පක්‍ෂියා රජ වන අතිසූක්‍ෂ්ම කාලය ආරම්භ වන ප.ව. 2.18ට තවත් විනාඩි 32යි තත්පර 7ක් එකතු කළ යුතුය. දැන් අපට ලැබෙන සුබ මොහොත වන්නේ ප.ව. 2 විනාඩි 50යි තත්තර 7 සිට පස්වරු 3යි විනාඩි 6යි තත්පර 7 දක්වා වන කාලයයි. නමුත් සෑම ලිතකම ඉර උදාව දක්වා ඇත්තේ කොළඹට ඉර උදා වන මොහොතයි. එසේ නම් ඔබ ජීවත් වන ප්‍රදේශයට අනුව ඉර උදාවේ වෙනස අවසාන වශයෙන් අප ලබාගත් කාලය සමඟ ගළපාගත යුතුය. ඔබ ජීවත් වන්නේ කුරුණෑගල දිස්ත්‍රික්කයේ ගල්ගමුව ප්‍රදේශයේ යැයි සිතමු. ගල්ගමුවේ ඉර උදාවන කාලය කොළඹට වඩා විනාඩි 1 තත්පර 56ක් අඩුය. එසේ නම් ප.ව. 2යි විනාඩි 50යි තත්පර 7න් විනාඩි 1යි තත්පර 56ක් අඩු කළ යුතුය. දැන් ඔබ ජීවත් වන ප්‍රදේශයට අනුව නිවැරැදි සුබ වේලාව ගණනය කර අවසන්ය. එසේ නම් දැන් ඔබගේ පක්‍ෂියා රජ වන අතිසූක්‍ෂ්ම කාලය වන්නේ පස්වරු 2යි විනාඩි 48යි තත්පර 11 සිට ඉදිරියට විනාඩි 16ක කාලය වේ. මෙම කාලය තුළ ලොතරැයි මිලට ගැනීමෙන් ඔබට වාසනාව උදාකරගත හැක. පංචාංග ලිත ඇසුරෙන් ඔබටම මෙය ගණනය කරගත හැක. ඔබේ නැකැත අනුව හිමි පක්‍ෂියා පංචාංග ලිතෙහි නැකැත් ගන යෝනි වෘක්‍ෂාදී චක්‍රය නමැති පිටුව ඇසුරෙන් සොයාගත හැක. ඒ ඒ දිනට ඔබගේ පක්‍ෂියා රජ වන ස්ථුල යාමය පංච පක්‍ෂි යන පිටුවෙන්ද එහි අවසාන කොටසේ සූක්‍ෂ්ම අවස්ථාව සහ අතිසූක්‍ෂ්ම අවස්ථාව දක්වා ඇත. එම පිටුවලට අනුව පුර පක්‍ෂයේ දවාලෙහි සූක්‍ෂ්ම අවස්ථා කොටුවේ භෝජන අවස්ථාව සඳහා විනාඩි 30ක්ද ගමන අවස්ථාව සඳහා විනාඩි 36ක් ලෙස ගැනෙන විනාඩි 66ක කාලයට පසු රජ අවස්ථාව ඉදිරියට විනාඩි 48ක් ලෙස දැක්වේ. එම රජ අවස්ථාව යන කොටුවට ඉදිරියෙන් ඇති සූක්‍ෂ්ම රජ අවස්ථාව වන විනාඩි 16 ඔබට සොයාගත හැක. කොළඹට ඉර උදා වන වේලා පංචාංග ලිත යන කොටසෙහි මාස 12 සඳහාම වෙන් වෙන් වශයෙන් සොයාගත හැක. කොළඹට සාපේක්‍ෂව ඔබ උපන් ප්‍රදේශයේ ඉර උදාවේ වෙනස ලිතෙහි ගම් නගර නාමාවලිය යන කොටසින් සොයාගත හැකිය. පංචාංග ලිත් පොත ප්‍රධාන පොත් සාප්පුවලින් රුපියල් 400 වැනි මුදලකට මිලදී ගත හැකිය. ඉහත ගණනය කිරීම් ඉතා සරලව පැහැදිලි කර ඇති බැවින් ඔබටම එදිනෙදා සුබ මොහොත සොයාගෙන ලොතරැයි වාසනා වැනි දිනුම් අවස්ථා උදාකරගත හැක.
එච්.ඒ.එම්.අයි.එස්. හෙට්ටිආරච්චි කුරුණෑගල 0772611003උපුටා ගැනීම මව්බිම පුවත්පත
