ලැබු දෙයින් සතුටුවන මීන ලග්න හිමියෝ
දෙළොස්‌ රාශියේ අවසාන රාශිය වන මීන රාශිය සංකේතවත් කරන්නේ මත්ස්‍ය ජෝඩුවකිනි. ගුරු හෙවත් බ්‍රහස්‌පති හිමි මීන ලග්නය ස්‌ත්‍රී දක්‌ෂිණ ආපෝ හෙවත් ජල, උභය, ඵලදායි, ගොළු, ද්විත්ව රාශියකි. මීන රාශියට ගුරු හෙවත් බ්‍රහස්‌පති අධිපති වන බැවින් එකී ලග්න කරුවෝ ඉතාමත් ප්‍රසන්න පෙනුමකින් යුක්‌ත වන අතර ජලජ රාශියක්‌ බැවින් හැමවිටම වැනෙන ප්‍රතිපත්තීන්ගෙන් යුතු වූවෝ වෙති. සැගවුණු සහ සගවන අදහස්‌වලින් හෙබි මොවුන් හැමවිටම තම අදහස්‌ එකවර ප්‍රකාශ කිරීමට මැලිකමක්‌ දක්‌වයි. අසීමිත ලෙස නිදහස ප්‍රියකරන සාමය අගයන මොවුන් ජීවිතයේ සෑම කටයුත්තක්‌ම සැහැල්ලුවට ගනිමින් වගකීම් වලින් තොරව ක්‍රියාකරන අතර ජීවිතයේ බරපතළ බව ගණනකට නොගනී. චංචල සිතකට හිමිකම් කියන අතර ආත්ම ශක්‌තියෙන් ඉතා දුර්වල අයකු වේ. පමණට වඩා හැඟීම්වලට වහල්වන ගතිය නිසාම වරින්වර දුකට පත්වන චරිත වේ. පියකරු මුහුණක්‌ද කාරුණික පෙනුමක්‌ද තියුණු දෑසක්‌ද හිමි මොවුන් වඩා උස මහත ශරීරයකට හිමිකම් නොකියයි. එක්‌ වරකට කටයුතු දෙකක නියෑළීමේ විශේෂ දක්‌ෂතාවක්‌ ඇති මීන ලග්නයෙන් උපන් අය කුමන දක්‌ෂතාවයෙන් පිරිපුන් වුවද සිත එක අරමුණක රඳවා ගැනීමේ නොහැකියාව මත තම දියුණුවට බාධා පමුණුවා ගනී. කොතරම් දැඩි තීරණ ගත්තා ද බලපෑම් මත තම තීරණය වෙනස්‌කර කිසිසේත් බලාපොරොත්තු නොවූ යමක්‌ කිරීමට පෙළඹේ.
මහජන සේවයට ඛෙහෙවින් කැමැති වේ. නම්බු නාම බලාපොරොත්තු නොවේ. තමා වෙත එන සෑම දුකක්‌ කරදරයක්‌ම ඉවසමින් කවදා හෝ තමාට මේවායේ හොඳ ප්‍රතිඵල ලැබේ යෑයි සිතා යළි යළිත් එකී කටයුතුවල නියෑළේ්. කවරෙකු හෝ තමා ගැන තැබූ විශ්වාසය කඩ නොවන ආකාරයෙන් කටයුතු කිරීමට දක්ෂ වේ. අධික ත්‍යාගවන්ත භාවයෙන් හා දුරදිග නොබලා උදව් පදව් කිරීමට යොමුවීම නිසා මීන ලග්න හිමියෝ දුකට කරදරයට පත්වන අවස්‌ථා බහුල වේ. සතුරෙකුට වුවද දේ‍රා්හිකමක්‌ කිරීමට පසුබට වෙන මෙකී ලග්න කරුවෝ සතුරෙකු වුවත් දුක්‌ විඳිනවා දැකීමට අකමැති වේ. තමාට කොපමණ දේ‍රා්හිකම් කළ අයකු වුවද කරදරයකට පත්වූ බව දැනගත් මොහොතේ සිට පිහිට වෙමින් කටයුතු කරයි. සමාව දීමේ විශේෂ ගුණය පිහිටන මොවුන් හැදෙන ගහක්‌ වැලක්‌ කපා දැමීමට පවා මැලිවේ. අසරණ, දුගී ආබාධිත අය කෙරේ දැඩි අනුකම්පාවකින් කටයුතු කරන අතර අසල්වාසීන්, ඥාතීන්, හිතමිතුරන් අතරද ඉතා සුහදශීලීිව කටයුතු කරන්නේ කිසිවකුගේ සිත් රිදවීමට ඇති අකමැත්ත නිසාමය. කිසි විටෙක තමාගේ හොඳගති අන් අයට නොපෙන්වන මොවුන් ඒවා තමාගේම සතුට පිණිස භුක්‌ති විඳී. තමා ආදරය කරන අයට තම දිවි දෙවැනි කොට ආදරය කරයි. එහෙත් එවැන්නන්ගෙන් තමාට ආදරය නොලැබුණද ඒ ගැන සිතා පසුතැවිලි නොවන්නේය. බුද්ධියට වඩා හදවතට එකඟව සියලු කටයුතු සිදුකිරීමට යැමෙන් කරන වැඩකටයුතු අවුල් සහගත බවට පත්කර ගනී. හැමවිටම පිළිවෙළකට ජීවත් වීමට උත්සාහ දරයි. මොනයම් හේතුවක්‌ නිසා හෝ සිතේ මතුවන තරහ තනිවම විඳගනිමින් පාලනය කර ගැනීමේ උත්සාහ දරයි. බැරිම අවස්‌ථාවක කෑගසන්නේ එය තමාට ආරක්‍ෂක උපක්‍රමයක්‌ ලෙස සිතමිනි. ඕනෑම කෙනකු සමග ඇතිවන ක්‍ෂණික කෝපය ඉතාමත් සුළු වේලාවකදී හේතු විරහිතවම නිවී යයි. එසැණින් ඔහුට හෝ ඇයට පෙරළා උදව් උපකාර කළත් ඒ කිසිවකින් හොඳක්‌ අසන්නට නොලැඛෙන අතරම මීන ලග්න හිමියා සතු මෙකී උදාර ගති සමාජය ඉදිරියේ නිවටකමක්‌ ලෙස කතාබහට ලක්‌ වේ.
අහස උසට ප්‍රාර්ථනා බලාපොරොත්තු තිබුණත් ලැබුණු දෙයින් සෑහීමකට පත්වන්නට මීන ලග්න හිමියා හිත හදා ගනී. තමා සතු බලාපොරොත්තු මත මියෑදෙන්නට නොයන මොවුන් ඒවා ඉටු වුණොත් ඉටු වුණාවේ හිමිකමක්‌ ඇත්නම් ඉටු වෙයි යනුවෙන් සැහැල්ලුවෙන් සිතයි. තමා කොතරම් ආශා කරන දෙයක්‌ වුවද ඒවා අන් අය වෙත දීමට තරම් ත්‍යාගවන්ත වන අතර බොහෝ විට තම රුචි අරුචිකම් එළිදක්‌වන්නේ නැත. මීන ලග්නයෙන් උපනුන් සෑම අවස්‌ථාවකම අන්‍යයන්ගේ දුක දකින්නේ තමා උපමාවට ගනිමිනි. අන් අය විඳින දුක තමාට අත් වුවහොත් යන්න පිළිබඳ සිත සමග තර්ක කරයි. එය ඉසිලිය නොහැකි බවත් ඒවාට විසඳුම් තමාම සොයයි. අනතුරුව දුකට පත් අය දුකින් මුදා ගැනීමට සිතයි. ඒ සඳහා අවශ්‍ය සෑම උපකාරයක්‌ම කිරීමට පෙළැඹේ. කුමන ආකාරයේ රැකියාවක නිරත වන්නට සිදු වුවද එය වගකීමකින් ඉටු කිරීමට දක්ෂ වේ. නිතර ජනතාව සමග ගැටෙමින් රෝහල් ක්‍ෂේත්‍රය, බැංකු, පුවත්පත් ආදී රැකියාවලින් ප්‍රයෝජන ලබයි. හැමවිටම තම ශරීරය පිරිසිදුව තබා ගැනීමට උනන්දු වන අතර ජලාශ්‍රිත දේට වඩාත් ප්‍රියකරයි. යම් දෙයක්‌ කරන ආකාරය එක වරක්‌ දැකීමෙන් එය ඒ ආකාරයෙන් ම කිරීමේ සහජ දක්‍ෂතාව ඇතත් මීන ලග්නයේ් ඔබ එම උනන්දුව බලෙන් ඇති කර ගත යුතුය. එසේ වන්නේ ඔබ ජන්මයෙන්ම කම්මැලි තත්ත්වයට පත් කර ඇති බැවිනි. ඇග වෙහෙසා කරන කටයුතුවලට අකමැති අතර දියුණුව කෙරෙහි කැපවීම් නොකරන අයවලුන් වේ. මීන, කටක, වෘශ්චික ලග්න හිමියන් මොවුනට විවාහය සඳහා වඩාත් යෝග්‍ය වේ. එම ලග්නකරුවන් සමග විවාහය වඩාත් සාර්ථක වේ. යහපත් භාර්යාවන් ස්‌වාමියෙක්‌ ලැබීමට තරම් මීන ලග්නකරු වාසනාවන්ත වුවත් දැන දැනම පවුල් ජීවිත අවුල් කර ගැනීමට තරම් අඥනවන්තයකු වන අවස්‌ථාද ඇත.
මීන ලග්න හිමියන්ට විශේෂයෙන්ම ජලයෙන් ඇතිවන රෝග බලපාන අතර සෙම් රෝග, පෙනහළු රෝග, උදරාබාධවලින් නිතර පීඩා විඳීමට සිදුවේ. මේ හැරුණු කොට හන්දිපත් ආබාධ සහ ලේවල දෝෂවලටද ලක්‌විය හැකිය. මෙම ලග්න හිමියන්ට සිකුරු, රවි, ශනි යන ග්‍රහයන් මාරක වන බැවින් එම ග්‍රහයන්ගේ දශා අතුරු දශා කාලවලදී රථවාහනවලින් හා ගංගා, මුහුදු ආදී ස්‌ථානවලින් දැඩි ලෙස ප්‍රවේශම් විය යුතුය. සතියේ බ්‍රහස්‌පතින්දා හා අගහරුවාදා මොවුනට සියලු කටයුතු සඳහා සුබ වන අතර සිකුරාදා දිනය අසුබ වේ.
ජ්‍යොතිෂවේදී රංජන් සිසිර කුමාර
උපුටා ගැනීම දිවයින පුවත් පත
